ITINATAYO  na ang kauna-unahang ospital ng Overseas Filipino Workers (OFW) na magkakaroon ng soft opening nitong Oktubre 1 .

Ayon kay Labor Usec. Renato Ebarle, pinamamadali na ng DOLE ang pagkumpleto upang sa lalong madaling panahon ay mabubuksan na ang OFW Hospital na itinatayo sa San Fernando, Pampanga makaraang madelay dahil sa patuloy na krisis dala ng COVID-19.

Aniya, puspusan na ang ginagawang trabaho ng contractor ng naturang ospital kaya naman 15.7% na itong kumpleto.

Sa huling bahagi ng taon, umaasa ang DOLE na  makukumpleto na ang mga equipment o kagamitan sa pasilidad.

Sinabi ni Ebarle na kukuha naman ng halos 300 medical personnel ang OFW Hospital, na ang proseso ng hiring ay mag-uumpisa sa ikatlong quarter ng taon.

Pinondohan ng  P1.5 billion ang OFW Hospital na inisyatibo ni Labor Sec. Silvestre Bello III sa tulong ng Provincial Government ng Pampanga, Department of Health, Philippine Amusement and Gaming Corporation o PAGCOR, at Bloomberry Cultural Foundation.

Ito ay kauna-unahang pagamutan  para sa mga OFW sa bansa, ay mayroong apat na palapag at magkakaroon ng 100-bed capacity na maaaring magamit ng mga mangangailangang OFWs at kanilang mga pamilya. (Bishop Jesus “Jemba” M. Basco)

Inanunsyo ng DOH na magtatalaga ng isang working committee ang pamahalaan at ang medical societies para mapagusapan ang mga strategies para labanan ang pagdami ng kaso ng COVID-19.

Magandang hakbang ito upang hindi puro military solutions na mula sa mga hereral ang napapakinggan kundi yung galing din sa medical experts.  Importante rin ang opinyon ng mga ekonomista para nang sa ganun ay makasulong ang ekonomiya habang pinangangalagaan ang kalusugan ng bawa isa.

Isang sektor na kailangan ang gabay ng medical experts ay ang public transportation. Mahalaga ang mobility ng tao sa ekonomiya pero dito rin mataas ang risk ng hawaan. Marami kasing polisiya sa transportasyon ang kwestyonable kung kailangan ba o hindi. Nais natin ng mga kasagutan ng mga medical experts sa mga sumusunod na tanong:

1. Kailangan ba ang “barrier” sa pagitan ng rider at angkas nito. Ininsulto ng DILG Secretary na motorcycle experts lang ang nagsasabing delikado ito samantalang heneral sya. So tanungin natin ang mga doktor tungkol dito?

2. Ligtas ba ang mga tradisyonal na jeepneys. Ano ang mas ligtas na sakyan, yung naka-aircon o open air tulad ng jeep?

3. Ang 50 percent reduced capacity ba sa mga pampublikong sasakyan ay pwede naman na basta naka mask ang mga pasahero at walang overloading sa bawat byahe?

4. Gaano kailangan o gaano ka kritikal ang cashless transaction sa pamasahe sa pampublikong sasakyan?

5. Ang face shield ba ay kailangan pa maliban sa face mask para sa mga pasahero?

6. May koneksyon ba sa pagpigil ng hawaan ng COVID-19 ang pagbago o pagputol ng mga ruta ng mga pampublikong sasakyan?

7. Kung pinayagan na mag backriding sa private motorcycles ang mga nagtatrabaho at mga persons authorized outside their residence, pwede na rin ba ang backriding sa tricycles at motorcycle taxis.

8. Ang paglalagay ba ng mga harang sa kalye ay kailangan?

Marahil ay marami pang nais itanong ang mga taga transport sector sa mga medical experts upang maliwanagan ang mga motorista at mga tao sa kalye at para naman maging angkop ang mga polisiya na ipinatutupad sa public transportation.

Sa ganitong paraan ay mas gagaan ang pagkilos at mas ligtas ang mga pasahero at mga drivers sa araw araw at mapagsisilbihan nila ng mas epektibo ang mga pasahero at ang publiko.

Mahirap ang mga ‘tsamba-tsamba’ at may ibang pakay maliban sa kaligtasan dahil napagsususpetsahan na ginagamit lamang ang pandemya upang magpatupad ng polisiyang wala namang koneksyon sa problema sa kalusugan. At kapag may sagot na ang mga medical experts sa mga tanong na ito, sana ay pakingan naman sila ng gobyerno. (Atty. Ariel Enrile-Inton)

Mas pinaigting ng Department of Health (DOH) ang panawagan sa publiko na iwasang maglalabas ng bahay dahil sa bukod sa COVID-19, mapanganib rin ngayon ang mga sakit dulot ng matinding init kabilang na ang heat stroke.

Sinabi ni DOH-Calabarzon Regional Director Dr. Eduardo Janairo na maliban sa heat stroke, dapat iwasan din ng publiko ang ‘sunburn,’ mga sakit sa balat, ‘heat cramps,’ at ‘heat exhaustion.’

Hindi umano dapat balewalain ng publiko ang epekto sa kalusugan ng sobrang init na maaaring magdulot ng mas matindi pang mga karamdaman.

Dapat iwasang lumabas ng bahay sa pagitan ng mga oras mula alas-9 ng umaga hanggang alas-3 ng hapon na may pinakamainit na temparatura sa isang araw.  Dapat din na palagian ang pag-inom ng tubig para maiwasan ang dehydration.

Nitong Mayo 12, 2021, ang Sangley Point sa Cavite ay nakapagtala ng maximum heat index na 46 degree Celsius, samantalang sa Ambulong, Batangas ay nakapagtala ng 42 °C.

Inuulat ng Philippine Ports Authority (PPA) na tumaas ang kanilang net income ng 3 percent ng nakaraang First Quarter kahit na may pandemya.

Sinabi ni PPA general manager Jay Santiago na umaasa ang kanilang ahensiya na magiging pangunahing taon ito para sa PPA upang makabangon sa masamang epekto ng COVID 19.

“If the first quarter of 2021 is any indication, the PPA is in for another good year in spite of the pandemic. The agency posted a three percent hike in net income in the same first three months of 2021, suggesting that economic activities are now rebounding from the effects of the pandemic,” wika ni Santiago.

Noong nakaraang 2020, ang PPA ay nakapagtala ng net income na P6.14 billion pagkatapos ng bayad sa taxes at 16 percent na mababa sa nakaraang taon sa parehas na panahon dahil sa epekto ng pandemya.

Ang cargo volume ay bumaba ng 230.43 million metric tons (MMT) noong nakaraang taon mula sa 266.42 MMT noong 2019.

Umaasa ang PPA na makakabawi sila sa cargo traffic itong taon subalit hindi pa rin babalik ng madali sa antas noong panahon na wala pang pandemya.

“For 2022 and 2023, PPA’s growth forecast for cargo volume is conservative at between one and three percent. The PPA is also forecasting passenger traffic to hover at between 25 million and 27 million this year up to 2023 or a growth of about one to two percent,” dagdag ni Santiago.

Mula noong 2016 hanggang 2020, ang PPA ay nakapagsulit ng mahigit na P17 billion na dividends sa national government kung saan ito ay mas doble sa P8.27 billion dividends na nabigay mula noong 2010 hanggang 2015.

Sa ilalim ng existing law ng PPA, inuutusan ang ahenisya na magbigay na 50 percent ng kanilang net income kada taon sa national government subalit ngayon taon, ang board ay nagdesisyon na magbigay ng 56 percent ng kanilang net income sa taong 2020 na nagkakahalaga ng P3.54 billion.

Wika pa ni Santiago na ang malakas na financial foundation ng PPA ay nakasalalay sa walang kapantay na pagsisilbi sa publiko at ang kanilang anti-corruption efforts.

“This is a clear testament that transparent and honest public service goes a long way and the whole PPA organization is proud of its accomplishments,” saad ni Santiago.

Nakatulong rin sa ahensiya ang kanilang malakas na performance upang magkaron ng financial flexibility na makakatulong sa kasalukuyang health emergency hatid ng COVID 19 at gumawa ng mga kailangan infrastructure projects sa mga pantalan ng bansa.

“This will go a long way in helping the national government in the country’s continuing fight against the global pandemic and the desire of the President to give comfortable lives to every Filipino,” sabi ni Santiago. (LASACMAR)