LUNGSOD NG MALOLOS– Nakiisa si Pangulong Rodrigo Roa Duterte sa pagdiriwang ng ika-123 Taong Anibersaryo ng Araw ng Kalayaan ng Pilipinas sa Bulacan habang personal at postyumong iginawad ang Orden ng Lapu-Lapu, Ranggong Magalong kina Hen. Gregorio S. del Pilar at Marcelo H. del Pilar sa Harap ng Gusali ng Kapitolyo sa lungsod na ito kahapon.

Tinanggap ni Marita del Pilar Villatema Santos, pamangkin sa ikalawang henerasyon ni Hen. Del Pilar, ang nasabing parangal na ipinagkakaloob bilang pagkilala sa pagiging huwaran ng mga opisyal at kawani ng Pamahalaan gayundin ang mga pribadong indibidwal dahil sa maringal na pagpapasulong ng adbokasiya ng pangulo.

“It is just fitting that more than a century since their exploits, these two sons of Bulacan continue to inspire succeeding generations of Filipinos to cherish the liberties and freedoms that they bled and fought for. I therefore consider it a great honor to bestow upon them – through their kin – the Order of Lapu-Lapu, in recognition of their extraordinary acts of heroism that served as the foundation of this nation,” anang Pangulo.

Hinikayat ni Duterte ang mga Pilipino, na parangalan ang legasiya ng mga ito sa pamamagitan ng paggawa ng maliliit na kabayanihan lalong higit ngayong panahon ng pandaigdigang krisis habang kinikilala ang mga makabagong bayani kabilang ang mga healthcare worker, kapulisan at iba pang mga frontliner na instrumento sa paglaban kontra COVID-19.

“In the past year, they have risked their own lives and sacrificed their own comfort and security to ensure that our society will continue to function despite this crisis. Maraming pong salamat sa inyong pagmalasakit at serbisyo,” ani Duterte.

Inanunsyo din niya na pinahintulutan na ng Armed Forces of the Philippines ang pagtatayo ng Wall of Heroes sa Libingan ng mga Bayani kung saan itatatak ang mga pangalan ng mga makabagong bayaning namatay dahil sa COVID-19 bilang pagkilala. Samantala, binigyang diin naman ni Gob. Daniel R. Fernando ang mga sakripisyo at kontribusyon ng mga bayani na ang legasiya ay patuloy na tumayo sa gitna ng kabiguan, sa awa ng Diyos, pagmamahal sa pamilya at sa bansa ay nananatili.

“Kung paanong naitatag ng ating mga ninuno ang isang malayang bansa, sa panahon ng matinding kahirapan, tayo ay naniniwala na lalaganap muli sa ating lupain ang inspirasyon upang patunayan at itanghal muli’t muli kung ano ang kayang maabot ng isang bansang nagkakaIsa para sa mabuting layunin,” ani Fernando.

Dumalo din sa pagdiriwang sina Chief Presidential Legal Adviser Salvador Panelo, Senador Bong Go, mga kinatawan ng distrito sa Bulacan, AFP Chief of Staff Cirilito Sobejana, PNP Chief Police General Guillermo Eleazar, Bise Gob. Wilhelmino Sy-Alvarado, mga punongbayan sa Bulacan, at National Historical Commission of the Philippines Chairman Dr. Rene Escalante. (Bishop Jesus “Jemba” M. Basco)

Aabot pa lamang sa dalawang porsyento ng populasyon ng bansa ang nakakumpleto na ng bakuna kontra COVID-19 may halos tatlong buwan makaraan ang umpisa ng ‘vaccination program’ ng pamahalaan.

Ayon kay Health Undersecretary at treatment czar Dr. Leopoldo Vega, halos dalawang milyon pa lamang sa 109.48 milyong populasyon ng bansa ang nakakumpleto na ng dalawang dose ng bakuna mula nang umpisahan ang vaccination nitong Marso 1.

Inamin ni Vega na sa naturang numero, mahihirapang maabot ang target nila na makapagpabakuna ng 50% hanggang 70% ng populasyon ng bansa bago matapos ang kasalukuyang taon.

Para maabot ang naturang target, kailangang mabakunahan ang average na 500,000 indibidwal kada araw. Ngunit magdedepende umano ito sa mga dumadating na suplay ng bakuna sa bansa.

Una nang humingi ng paumanhin si vaccine czar Carlito Galvez Jr. sa pagkabinbin ng delivery ng mga bakuna sa ilang lokal na pamahalaan.

Ipinayo ni Vega na mga brand na AstraZeneca, Sinovac at iba pang bakuna na hindi masyadong sensitibo sa temperatura ang dalhin sa mga malalayong lugar upang maserbisyuhan rin ang mga mamamayan sa mga kanayunan.