KAHIT BAWAL sa Article II Section 26 ng 1987 Constitution ang political dynasties, ipinipilit ni presidential bet Ferdinand “Bongbong” Marcos Jr. na hindi dapat pigilan ang sinumang gustong pumasok sa serbisyo publiko — pwede naman daw kasi mawala ang political clans kung ‘di na iboboto ng tao.

“You cannot stop people from wanting to serve. [My sister] Imee wants to serve. I want to serve. Sandro, my son, wants to serve. What would I tell them? ‘No, don’t help’? Kung binoto naman ng tao, eh ‘di they deserve to be in wherever they are,” ani BBM, Miyerkules, sa Kapihan sa Manila Bay.

“It’s very clear that the political dynasties, there’s a very good system or process to mitigate the overstaying of political dynasties and it’s called elections.”

Ganyan ang sinabi ni Bongbong, anak ng diktador na si dating Pangulong Ferdinand Marcos Jr., ngayong nagsisilbing senador si Imee at kumakandidato bilang kinatawan ng Unang Distrito ng Ilocos Norte si Sandro.

Depensa pa ni Bongbong, marami nang political dynasties ang nawala matapos piliin ng mga botante ang ibang mga kandidato upang maluklok.

“Besides, why should Imee not be allowed to work? She does a very good work. Marami siyang ginagawa. Why? Because kapatid ko [siya]?” dagdag pa ng presidentiable.

Layunin ng konstitusyon na ipagbawal ang mga dinastiya, oras na magkaroon ng batas dito, para magkaroon ng “patas na oportunidad” na maglingkod sa serbisyo publiko ang lahat.

Ipinupukol naman ngayon ni Bongbong, na running mate ang presidential daughter at may sariling dinastiya sa Mindanao na si Davao City Mayor Sara Duterte-Carpio, ang sisi sa pagkakaroon ng political dynasties sa pagkakaroon ng “term limits” sa konstitusyon.

“The term limits makes political dynasties. ‘Pag mayor ako, nine years ako, patapos na ko pero hawak ko pa rin yung bayan at marami pa kong gustong gawin, patatakbuhin yung asawa, patatakbuhin yung anak, patatakbuhin yung pinsan tapos siya tatakbong vice mayor,” dagdag pa ng kontrobersyal na kandidato.

“That plays a large part in it. Even people have been talking recently and I happen to agree about how the partylist system has been abused. The term limits have something to do with that.”

Hindi naman inilinaw ni Bongbong kung paano niya nakikitang solusyonan ang nakikita niyang “problemang” ito. Madalas palagan ng mga militanteng grupo ang isyu ng pagtatanggal ng term limits lalo na’t paraan daw ito upang hayaang makaupo ang mga pulitiko kahit gaano katagal, basta’t mananalo.

DALAWANG lider sa Kongreso at limang gobernador ang kamakailan ay naghayag ng kanilang suporta para sa kandidatura pagka-Pangulo ni Vice President Leni Robredo.

Ang mga kaalyado na ni Robredo at nangakong ikakampanya siya ay sina House Deputy Speakers Rufus Rodriguez (Cagayan de Oro 2nd District congressman) at Mujiv Hataman (Basilan congressman) at mga Gobernador na sina Ben Evardone (Eastern Samar), Edwin Ongchuan (Northern Samar), Eugenio “Bong” Lacson (Negros Occidental), Daniel Fernando (Bulacan); at dating Gobernador Alvaro Antonio (Cagayan).

Pinili ng pitong pinunong kalalakihan si Robredo, ang tanging babaeng kandidato pagka-Pangulo bilang karapat-dapat na mamuno sa higit sa 100 milyon na Pilipino sa loob ng anim na taon.

Para sa kanila, si Robredo ay isang matapang na lider, mabilis umaksyon, at handang magbigay ng ayuda anumang oras. Napatunayan na niya ito sa napakaraming proyekto ng kanyang Angat Buhay program sa ilalim ng Office of the Vice President (OVP).

Hinikayat ni Hataman ang kanyang mga kapwa Muslim na iboto si Robredo dahil sa malalim niyang pang-unawa sa mga issue sa Mindanao.

“Naiintindihan niya tayo; naiintindihan niya ang ating kasaysayan at ang ating karanasan. At dahil dito, naiintindihan din niya ang mga isyung kaharap natin sa kasalukuyan, at ang mga solusyon dito,” sabi ni Hataman.

Sinabi ni Rodriguez, na pinuno rin ng Centrist Democratic Party (CDP), si Robredo ang “best choice for our country and our children”.

Inisa-isa naman ng mga gobernadora ang mga katangian ni Robredo na nagpapatunay na karapat-dapat siya maging Pangulo ng Pilipinas.

Sinabi ni Lacson si Robredo ay matalino, sinsero, matulungin, at mapagkakatiwalaan. Mahalaga naman para kay Fernando na napakaganda ng track record ni Robredo sa pagsisilbi sa taumbayan at higit sa lahat, wala siyang bahid ng korapsyon. Para kay Evardone, halos inendorso na ni Pa­ngulong Duterte si Robredo dahil sa sinabi nito na dapat isang “decisive, compassionate lawyer” ang papalit sa kanya. Si Evardone ay kilalang kaalyado ni Pangulong Duterte.

Sa isang Facebook post, sinabi ni Ongchuan na sang-ayon siya sa sinabi ni Pangulong Duterte na dapat ang susunod na Pangulo ng bansa ay may malasakit, mabilis magdesisyon, at marunong kumilala ng tao.

NAUUBUSAN na ng espasyo ang mga morgue sa Hong Kong dahil sa maraming mga biktima ang namamatay ngayon dahil sa COVID-19.

Batay kasi datos ay nakapagtala na ng halos isang milyong impeksyon ng COVID-19 habang nasa mahigit 4,600 naman ang mga naitalang namamatay sa Hong Kong ng dahil sa nasabing sakit sa loob lamang ng tatlong buwan simula nang tamaan ng highly transmissible variant ang bansa.

Dahilan kung bakit sa mga refrigerated shipping containers na lamang inilalagay ng mga manggagawa doon ang mga bangkay ng biktima ng nasabing virus.

Tinataya naman ng mga mananaliksik na ang bilang ng impeksyon sa Hong Kong ay mas mataas kaysa sa mga opisyal na numero, malamang na umabot na sa kalahati ng 7.4 milyong populasyon nito.

Ayon sa isang funeral industry representative, kasabay ng pagtaas ng bilang ng mga nasasawi sa lugar ay ang unti-unting pagkaubos na rin ng supply ng mga kabaong na sa ngayon ay nasa 300 na lamang ang natitira at inaasahang mauubos na sa pagtatapos ng linggong ito.

Sinabi naman ni Leader Carrie Lam na mayroong karagdagang mga kabaong ang nakatakdang matanggap ng Hong Kong mula sa mainland.

Samantala, galit naman ang natanggap ni Lam mula sa mga Chinese dahil isinisisi ng mga ito sa kanyang administrasyon ang pagdami ng bilang ng mga namamatay at sinasabi na ang pagkalat daw ng COVID sa mainland ay dahil sa mahinang epidemic response ng Hong Kong.

NIYANIG nang malakas ang kabisera ng Tokyo matapos na tamaan ng magnitude 7.3 na lindol ang silangang bahagi ng Japan kagabi na nag-udyok naman ng tsunami advisory para sa ilang bahagi ng northeast coast ng bansa.

Ayon sa Japan Meteorological Agency, sa baybayin ng Fukushima region nakasentro ang lindol na may lalim na 60 kilomentro.

Ilang sandali lamang matapos tumama ang lindol bandang 11:36 pm kagabi ay naglabas ang ahesya ng advisory matapos mamataan ang mga alon na may sukat na isang metro sa ilang bahagi ng naturang baybayin.

Samantala, wala naman naiulat ang mga kinauukulan na mga napinsala o nasaktan sa naturang pangyayari.

Ngunit ayon naman sa inilabas na pahayag ng electricity provider na TEPCO, nasa mahigit dalawang milyong kabahayan ang iniwang nawalan ng kuryente ng naturang lindol, kabilang na ang nasa 700,000 na kabahayan sa Tokyo.

Sinabi rin nito na kasalukuyan nanag sinusuri ang mga operasyon sa Fukushima nuclear plant na una nanag natunaw 11 taon na ang nakakaraan matapos itong yanigin ng 9.0 magnitude na lindol at tamaan ng tsunami ang eastern coast nito noong Marso 11, 2011.