INAMIN ni Kapuso actress Gabbi Garcia na ang boyfriend na si Khalil Ramos na ang kanyang ’the one’ sa interview ni Boy Abunda sa programa nitong “Fast Talk with Boy Abunda.”  

Sa ngayon ay six years na silang magkarelasyon at napag-usapan na nilang dalawa kung paano mapapanatili ang kanilang relasyon at naniniwala sila na sila na ang magkakasama sa buong buhay nila.  Naniniwala raw si Gabbi sa destiny, at sinusunod niya ang sabi ng mommy niya na ‘kung para sa ‘yo, para sa iyo’ at iyon daw ang destiny.

“Hindi po nagiging hadlang sa relasyon namin ni Khalil kung sakaling may iba kaming katambal sa proyektong ginagawa namin, naiintindihan naming part lamang ito ng trabaho namin. Kaya walang isyu ang bagay na iyon sa aming dalawa,” wika pa ni Gabbi.

“At ang masasabi ko, hindi seloso si Khalil, and I’m grateful for it.  Tulad sa “Unbreak My heart,” si Joshua Garcia ang katambal ko, at naiintindihan niya iyon dahil isa rin siyang actor.”

Malapit nang mapanood ang “Unbreak My Heart,” na first collaboration teleserye ng GMA Network, ABS-CBN at Viu Philippines, tampok din sina Jodi Sta. Maria, Richard Yap at iba pang Kapuso at Kapamilya stars.

Sila ang papalit sa malapit na ring magwakas na teleserye ng GMA Public Affairs, ang “The Write One” ng real lovers na sina Bianca Umali at Ruru Madrid, 9:35 p.m. Mondays to Thursdays, sa GMA-7.

                                                            ***

NGAYONG tapos nang mag-taping si Ruru Madrid ng “The Write One,” at nagsimula na siyang mag-shooting ng first movie niya sa Viva Films, ang “Video City” with Yassi Pressman.

Nagsimula na rin siyang mag-training ng pagmo-motor bilang paghahanda sa upcoming teleserye nila ng bagong Kapuso na si Matteo Guidelli.

Ayaw pa sanang sabihin ni Ruru kung ano ang project na gagawin niya pero nalaman niyang na-announce nang “Black Rider” ang pagsasamahan nila ni Matteo.

Inamin ni Ruru na natuwa siya nang sabihin sa kanyang magkakasama sila ni Matteo sa proyekto.

“It’s an honor po for me, dahil siyempre, napapanood ko siya noong nasa iba pa siyang network. Now na Kapuso na siya, excited na akong makatrabaho siya.  I know kung gaano rin siya ka-passionate magtrabaho. Kaya hopefully maging kaibigan ko rin siya.”

Malapit na rin silang magsimulang mag-taping ni Matteo. Para kay Ruru, isa namang malaking challenge ang kanyang gagawin, dahil pagkatapos ng serye nila ni Matteo, gagawin naman niya ang part two ng action-fantaserye niyang “Lolong.”

Kaya si Ruru, dahil alam na niyang nakalinya siya sa mga action projects, hindi niya inaalis iyong mga training, tulad ng mixed martial arts at kung ano pa iyong mga skills na dapat niyang matutunan.

Ayaw raw niyang biguin ang tiwala ng mga viewers sa kanya, na deserving siya sa bawat project na ibinibigay sa kanya.

***

ANG Congresswomman wife ni Senator Bong Revilla na si Lani Mercado-Revilla pala ang pumili kay Beauty Gonzalez na maging wife niya sa bagong comedy series na gagawin nila, ang “Walang Matigas na Pulis sa Matinik na Misis,”

Bakit si Beauty na isang Bisaya?

“Naa-amaze ako pag nakikita ko yung babaeng Bisayang asawa, na kapag nagalit, nagtatalak na,” kuwento ni Lani.

“I find it amusing, kaya sabi ko, magandang maging Bisaya ang ka-partner ni Sen.  Iba ang touch pag Bisaya.  Meron kasi kaming mga friends na Bisaya, naa-amuse ako kapag nag-uusap-usap sila.”

Umayon  naman agad si Sen. Bong sa recommendation ni misis.  “Saka marami kayong mga fans na makaka-relate diyan,” dagdag pa ni Lani.

Sina Beauty at Max Collins ang gaganap na legal wife at the other woman ni Tolome (Bong).  Kinukumbinse pa ni Sen. Bong na mag-guest si Cong. Lani sa sitcom na mapapanood na simula sa June 4 and every Sunday, 7:45 p.m., sa GMA-7.

(NORA V. CALDERON)

ISA ang Asia’s Songbird na si Regine Velasquez sa naisip namin habang nasusunog ang Manila Central Post Office noong Lunes.

Bukod sa siyempre, isa na itong historical landmark ng bansa.

Ang movie ni Regine with Richard Gomez ay napakaraming scene na kinunan sa MCPO, though, marami rin Pinoy movies na naging location ito. Pero isa talaga sa tumatak ang movie nila na “Ikaw Lamang, Hanggang Ngayon.”

At nalungkot nga si Regine sa nangyari at nag-post sa kanyang Instagram ng isang scene niya habang nakaupo sa bench at nasa background ang Manila Central Post Office.

At sabi niya, “Ano na kaya mangyayari kay Katherine at sa iba pang naging bahagi ng Manila Central Post Office? Naging bahagi ng buhay ko ang Post Office. Napasok ko at nakilala rin ang mga kaibigan do’n.

“The Manila Central Post Office was a historical landmark and it’s so sad that this happened.”

***

MAY bago na namang aabangan na promising singer, mula sa bayan ng Cavite and yes, true to her surname, siguradong madali ng makokonek kung ano ang pinagmulan niyang lahi, si Lizzie Aguinaldo.

Teenager pa lang ito, pero makikita na may promise talaga with her looks and voice. Ang maganda, suportado si Lizzie ng mga kababayan niya para sa kanyang very first single under Star Music, ang “Baka, Pwede Na,” mula sa award-winning composer na si Direk Joven Tan.

Ang first single niya ay ilalabas na ngayong end of May kaya malapit na malapit na.

***

HINDI lang may consent kung hindi, mismong si Congresswoman Lani Mercado pala ang nag-recommend kay Beauty Gonzalez na kuhanin ni Senator Bong Revilla para sa sitcom nito sa GMA-7, ang “Walang Matigas na Mister sa Matinik na Misis.”

Movie nila ito na ini-remake ngayon for TV at magpa-pilot na sa June 4. Kaya raw si Beauty ang napili ni Cong. Lani dahil nakikita raw niyang babagay rito ang role at sakto ang pagiging Bisaya pa.

Masaya naman si Senator Bong sa bagong sitcom dahil sa five taping days na raw na nagagawa nila, ang saya raw nila sa set at nakikita rin daw niya kay Beauty na sobrang nag-e-enjoy ito.

(ROSE GARCIA)

ALIW ang panonorpresa kay Richard Yap ng kanyang pamilya nitong kaarawan niya.

In character ang Kapuso actor sa taping ng “Abot Kamay Na Pangarap” nang sorpresahin siya para sa kanyang ika-56 na kaarawan.

Sa video na ipinost sa Instragram ng Sparkle GMA Artist Center, pinangunahan ng kanyang asawa na si Melody at mga anak na sina Ashley at Dylan ang ginawang sorpresa sa aktor.

Kasama rin siyempre ang cast at crew ng Kapuso hit afternoon series, kung saan gumaganap si Richard bilang si Dr. Roberto “RJ” Tanyag, naka-recover na mula sa pagkaka-comatose kaya may benda pa siya sa ulo at naka-wheelchair.

Sa video, maririnig na nagbibigay ng instruction para sa simula ng taping kaya in character na si Richard habang nakaupo sa wheelchair sa loob ng isang kuwarto.

At nang isigaw na ang “magic word” na action!, hindi ang kaeksena sa serye ang pumasok sa kuwarto kung hindi ang kanyang misis at mga anak na may bitbit na cake at inawitan na si Richard ng birthday song.

“Richard Yap thought it was another working birthday for him but this one was extra-special because his family paid him a surprise visit on the set of the GMA Afternoon Prime series #AbotKamayNaPangarap! Happy Birthday again, Richard!,” saad sa caption.

Makikita naman sa reaksyon ni Richard na successful ang ginawa nilang pagsorpresa sa aktor.

Mapapanood ang “Abot Kamay na Pangarap,” pagkatapos ng “Eat Bulaga” sa GMA 7.

***

BAGAMAN handa si Mike Tan na gawin ang lahat para sa kanyang pamilya, kahit itaya pa ang sariling buhay, may bagay din na hindi niya kayang gawin.

“Lahat talaga gagawin ko for my family. Kung patalunin man ako sa building… ‘di ba,” sabi ni Mike sa “Fast Talk with Boy Abunda” nitong Biyernes.

Gayunman, sinabi ni Mike na hindi siya gagawa ng masama, tulad ng pagpatay o pagnanakaw para sa pamilya.

“Mas takot na ako sa Diyos pagdating doon. Pero I will do everything na under ni God, by His laws, gagawin ko lahat para sa pamilya ko,” paliwanag ni Mike na may dalawa nang anak.

“That was what I was gonna say, I’d even die for my family,” pagsang-ayon naman ni Valerie Concepcion na kasama ni Mike sa Kapuso series na “Seed of Love.” At kasabay na nag-guest sa programa ni Tito Boy.

“Biglang napaisip ako, papatay ba ako, magnanakaw ba ako para sa pamilya? I really think that I’d do anything for my family.

“I think ‘pag nandoon na sa sitwasyon na ‘yon and if given a choice kung gagawin ko ito or ikamamatay ng someone I really love, I might do it,” paliwanag ni Valerie.

(ROMMEL L. GONZALES)