2023 May Archive - People's Balita

July 3, 2024
Search in People's Balita
Ang Diyaryong Pinagkakatiwalaan

Archive for May, 2023

Para sa Asian premiere ng upcoming Neflix movie: CHRIS HEMSWORTH, excited na rin sa pagpunta sa bansa next month

Posted on: May 27th, 2023 by @peoplesbalita No Comments

GAME na mag-collab sa isang film project ang dalawang drama princess ng Philippine Television na sina Maris Racal and Barbie Forteza.

Dahil na rin sa kanilang mga fans na nag-suggest na magsama sila sa isang pelikula, nagpakita naman ng interes sina Maris at Barbie kahit na homegrown stars sila ng magkaibang TV network.

“Sobrang game if ever,” tweet ni Maris. Tweet naman ni Barbie ay “Game!”

Uso na kasi ngayon ang crossover projects ng Kapamilya and Kapuso artists, tulad na lang ng landmark collaboration of ABS-CBN and GMA-7, sa series na “Unbreak My Heart” na bida sina Jodi Sta. Maria, Joshua Garcia, Richard Yap and Gabbi Garcia.

Nakilala si Racal, dahil sa pagsali nito sa “Pinoy Big Brother: All In” noong 2014. Bukod sa acting, malawak din ang reach ng kanyang music career dahil sa kanyang musically-inclined family.

Si Barbie naman ay nagsimula bilang child actress sa GMA teleserye na “Stairway To Heaven” at sa teen series na “Reel Love Presents Tween Hearts” hanggang sa maging isa na siyang bonafide leading lady ng Kapuso network.

***

MALAPIT na ang ultimate bakbakan ng Final 4 Clashers sa high-rating reality talent competition ng GMA na “The Clash 2023!”

This Sunday (May 28), magtatagisan ng galing sa pagkanta sina ‘Feisty Diva’ Arabelle dela Cruz, ‘Baby Girl Biritera’ Liana Castillo, ‘Sexy Songstress’ Mariel Reyes, at ‘Simpatikong Bokalista’ Rex Baculfo. Sino kaya sa kanila ang tatanghaling The Clash Grand Champion?

Abangan ang matinding pasiklaban sa Clash Arena kasama ang Clash Panel na sina Asia’s Nightingale Lani Misalucha, Asia’s Romantic Balladeer Christian Bautista, at Comedy Concert Queen AiAi Delas Alas.

May bonus pang pakilig kasama ang #JulieVer at Clash Masters na sina Total Heartthrob Rayver Cruz at Asia’s Limitless Star Julie Anne San Jose.

Tutukan ang grand finals ng “The Clash 2023,” this Sunday at 7:50 p.m. on GMA Network.

***

NATUWA ang mga fans ng Marvel actor na si Chris Hemsworth dahil confirmed na darating ito sa Pilipinas next month para sa Asian premiere ng kanyang upcoming Neflix movie na “Extraction 2.”

“I’m coming to the Philippines soon. I’ll be flying to Manila this June for the premiere of ‘Extraction 2’. I don’t want you to miss out so please come join me. It’ll be fun. Can’t wait to see you all there soon. Take care. Bye for now,” sey pa ng bida ng mga Marvel films series na Thor at Avengers.

Sa action packed movie na “Extraction 2,” magbabalik ang karakter ni Chris na isang black ops mercenary na si Tyler Rake, na may panibagong misyon at ililigtas.

Naging kontrobersyal ang 39-year old Australian actor nang ma-diagnose siya with two copies of the APOE4 gene na puwedeng magbigay sa kanya ng Alzheimer’s disease.

(RUEL J. MENDOZA)

42 mambabatas, pinaiimbestigahan ang sunog sa MCPO

Posted on: May 27th, 2023 by @peoplesbalita No Comments

NAIS ng nasa 42 mambabatas na imbestigahan ng kamara ang naganap na sunog sa Manila Central Post Office building na nagdulot ng matinding pagkasira sa nasabing istraktura.

Sa House Resolution 1019, sinabi ng mga mambabatas na miyembro ng Arts, Culture and Creative Industries Bloc (ACCIB) ng kamara, na kailangang ang pagsasagawa ng imbestigasyon dala na rin sa importansiya nang pagiging heritage site nito.

Ayon kay Pangasinan Rep. Christopher de Venecia, Chairman ng House Committee on Creative Industry & Performing Arts, may mga ulat na walang anumang uri ng fire suppression system o water sprinklers ang MCPO building.

“It took about 30 hours to declare fire out. Apparently, this may have been a disaster waiting to happen. We will certainly take a close look to ascertain the real timeline of events during the fire and the building maintenance and security logs,” ani De Venecia.

Nais din aniya nilang malaman kung ano pang mga lumang gusali ng gobyerno ang walang fire suppression systems, lalo na yaong bahagi na ng kasaysayan ng bansa kabilang na ang National Museum, Cultural Center of the Philippines, National Library, at University of the Philippines. (BISHOP JESUS “JEMBA” M. BASCO)

Drug money sa Barangay, SK elections babantayan ng PNP

Posted on: May 27th, 2023 by @peoplesbalita No Comments

HINDI lamang mga private armed groups ang babantayan ng Philippine National Police (PNP) sa barangay at Sangguniang Kabataaan elections sa Oktubre kundi maging ang drug money.

Ayon kay PNP Public Information Office Chief PBGen. Redrico Maranan, posibleng kumalat ng drug money o pera galing sa transaksyon ng iligal na droga sa panahon ng eleksiyon.

Binigyang diin pa ni Maranan na maaaring magamit ng mga tiwaling barangay officials ang mga private armed group at drug money upang mang-harass, vote buying at makapuwesto.

Nabatid na pinag-aaralan na ngayon ng PNP ang bilang ng mga barangay na kanilang babantayan kasunod ng naunang datos ng PDEA noong 2018 na umabot sa mahigit 200 drug related barangays ang kanilang namonitor bago nasuspinde ang pagsasagawa ng BSKE sa nasabing taon.

Samantala, pabor ang PNP sa mungkahing drug test para sa lahat ng Brgy. Officials bago ang pagdaraos ng lokal na halalan.

Ani Maranan, magandang hakbang ito upang maiwasang mailuklok ang mga politiko na sangkot sa iligal na mga gawain partikular na sa isyu ng iligal na droga.

Dahil dito, mas mahihirapan aniya na sugpuin ng pamahalaan ang problema ng iligal na droga kung ang mismong barangay ay apektado nito.

Drug war victims, walang nakikitang katarungan sa ilalim ng administrasyong Marcos – ICC

Posted on: May 27th, 2023 by @peoplesbalita No Comments

DUDA ang pamilya ng drug war victims na magkakaroon ng progreso ang kaso na may kinalaman sa kontrobersiyal na anti-drug campaign ni dating Pangulong Rodrigo Roa Duterte.

Dahil dito, nanawagan ang mga ito sa International Criminal Court (ICC) na ituloy lamang ang imbestigasyon sa nasabing anti-drug campaign ng nakalipas na administrasyon.

Sa 20-pahinang report na may petsang Mayo 22, sinabi ng ICC na nakatanggap ito ng representasyon na isinatinig ang pananaw at concerns ng 350 individual victims at 165 pamilya kaugnay sa nagpapatuloy na apela sa proceedings.

Ang consultation process sa mga pamilya, isinagawa ng Victims Participation and Reparations Section, natuklasan ng mga ito na “unanimously and strongly urge” ang ICC na ituloy ang Jan. 26 decision kung saan pinapayagan ang prosecutor office ng korte na ipagpatloy ang imbestigasyon sa madugong drug campaign.

Ang alegasyon pa ng mga biktima ay nagpapatuloy di umano ang war on drugs sa ilalim ng liderato ni Pangulong Ferdinand Marcos Jr.

Sinabi ng ICC na “the victims also rejected the grounds of appeal submitted by the government, raising the need for a “genuine investigation” to obtain justice.

Binigyang diin pa rin ng mga ito na ipinakita lamang ng ahensiya ng pamahalaan sa PIlipinas ang pagtutol nito laban sa tangkang makuha ang pagkilala na ang drug killings ay hindi kontrolado ng batas.

“The lack of a government inquiry into the widespread killings and abuses significantly impacts the rights of victims, and in particular, denying them the opportunity to identify, prosecute, and punish the perpetrators of these grave crimes against humanity,” ayon sa dokumento.

Hinambalos din ng mga pamilya ang mga awtoridad sa mga nakalipas na pahayag ng mga ito na mga biktima ay “collateral damage” sa sinasabing police operations.

Nagpahayag naman ng pag-aalala ang mga pamilya ng mga biktima para sa kanilang buhay sabay sabing “the police “continue to harass and intimidate victims in their own homes and communities.” (Daris Jose)

Pagpapalabas ng P25.16-B para sa 8.4M indigents’ health insurance, aprubado ng DBM

Posted on: May 27th, 2023 by @peoplesbalita No Comments

MAKATATANGGAP ang Philippine Health Insurance Corp. (PhilHealth) ng P25.16 billion para sa one-year health insurance premiums ng mahigit sa 8 milyong Filipino indigents.

Ito’y matapos na magbigay ng “go signal” si Department of Budget and Management (DBM) Secretary Amenah F. Pangandaman na ipalabas ang P25,157,547,000 para sa insurance premiums ng 8,385,849 kuwalipikadong indigents na naka-enroll sa PhilHealth.

Nauna rito, inaprubahan ng Kalihim ang Special Allotment Release Order (SARO).

Sinabi ng DBM na ang inaprubahang pondo ay huhugutin mula sa authorized allotments sa 2023 General Appropriations Act.

Tinuran ni Pangandaman na ang pagpapalabas ng pondo ay bahagi ng pagsisikap ng administrasyong Marcos na magbigay ng “affordable health care” para sa lahat ng mga Filipino.

“President Ferdinand R. Marcos Jr. mandated his Cabinet to ensure that Filipinos are provided with affordable health care,” ayon sa Kalihim.

“Pinamulat sa atin ng pandemya ang kahalagahan ng mas matatag na health care system, kaya’t pinagsisikapan po natin na ilapit ito sa ating mga kababayan, lalong-lalo na po sa mga higit na nangangailangan ,” dagdag na wika nito.

May mandato naman ang state insurer na pangasiwaan ang National Health Insurance Program, naglalayong magbigay ng health insurance coverage at tiyakin ang “affordable, acceptable, available, at accessible health care services” para sa lahat ng mga Filipino. (Daris Jose)

Ads May 27, 2023

Posted on: May 27th, 2023 by @peoplesbalita No Comments

Jose, gaganap na kapatid niya: VIC, babu na muna sa pagiging ‘daddy’ sa bagong sitcom

Posted on: May 27th, 2023 by @peoplesbalita No Comments

BABU muna si Bossing Vic Sotto sa pagiging ‘daddy’ sa papel niya bilang si Boss EZ sa ‘Open 24/7’ ng GMA.

“Ang pinaka-role ko rito ay kung papaano makiki-interact sa dalawang generations; millennial at yung mga Gen Z.

“Alam naman natin na iba na ang mga pananaw ng mga kabataan ngayon e, di ba?

“So it’s more of papaano ka makiki-interact sa mga Gen Z, sa mga millennial, may mga kani-kanyang ideya na yang mga yan, e.

“So yung dynamics nung show is bukod dun sa nangyayari sa loob nung convenience store, it’s Open 24/7, ang location niyan is a convenience store na pag-aari naming dalawa ng kapatid ko na si Jose.”

Si Jose Manalo ay gaganap bilang si Spark na kapatid ni Boss EZ/Vic.

“Oo maniwala kayo kapatid ko si Jose! ‘Pag may kokontra e magkita tayo sa labas,” pagbibiro pa ni Vic.

“So iyon, yung character ko dito as the boss, supposedly the boss nung convenience store, so iba, iba yung magiging personalidad ko dito.

“Usually sa Daddy’s Gurl (na umere sa GMA mula 2018 hanggang 2023) ako yung tatay, yung daddy, ganun din sa Daddy Di Do Du (na umere naman mula 2001 hanggang 2007), daddy rin, so right now medyo aalis muna ako dun sa daddy role.

“Kumbaga e ano lang ‘to, Dabarkads ito,” pahayag pa ni Vic.

Female lead sa ‘Open 24/7’ si Maja Salvador bilang si Mikaela at makasama nina Vic, Maja at Jose ang Sparkle Sweethearts na sina Sofia Pablo bilang Kitty at Allen Ansay bilang Al at ang Sparkle artists na sina Riel Lomadilla bilang Bekbek, Anjay Anson bilang Andoy, Kimson Tan bilang Kokoy, Abed Green bilang Fred at si Bruce Roeland bilang Doe.

Sa direksyon ni JR Reyes at mula sa GMA at M-Zet Productions mapapanoood ang ‘Open 24/7’ simula ngayong gabi, pagkatapos ng ‘Magpakailanman’.

***

SPEAKING of ‘Magpakailanman’ o #MPK, isang celebrity life story ang tampok sa bagong episode ng naturang real life drama anthology.

Ibinahagi ni ‘Bubble Gang’ star at Kapuso actress Faye Lorenzo ang kuwento ng kanyang buhay sa episode na pinamagatang Daughter’s Dollhouse: The Faye Lorenzo Story.

Dahil sa regalong dollhouse ng mga magulang niyang sina Itoy at Gilai, pangarap ni Faye na makapagpatayo ng sariling bahay para sa kanyang pamilya.

Pero dahil sa hirap ng buhay, bigla silang aabandonahin ng nanay nilang si Gilai. Sa murang edad, mapipilitan si Faye na maging breadwinner ng pamilya.

Para mabigyan ng mas magandang kinabukasan ang mga mas nakababatang kapatid, makikipagsapalaran si Faye sa mundo ng showbiz.

Unti-unti nang bumubuti ang buhay ni Faye at ng kanyang pamilya nang harapin nila ang panibagong pagsubok–mada-diagnose ng cancer ang ama niyang si Itoy.

Abangan ang natatanging pagganap ni Faye Lorenzo bilang kanyang sarili sa brand new episode ng #MPK ngayong 8:00 pm.

Naka-livestream din nang sabay ang episode sa GMANetwork.com, sa YouTube account ng GMA Network at sa Facebook at TikTok accounts ng #MPK.

(ROMMEL L. GONZALES)

Mga pulis na kasama sa video ng P6.7-B anti-drugs ops, sasampahan ng kaso- Abalos

Posted on: May 27th, 2023 by @peoplesbalita No Comments

SINABI ni Interior and Local Government Secretary Benhur Abalos na sasampahan ng kasong kriminal at administratibo ang mga police officers na kasama sa video ng operasyon sa Maynila noong nakaraang taon kung saan P6.7 bilyong halaga ng shabu ang nasamsam.

“In 10 days malalaman ninyo kung ilang mga pulis na kasama sa video ang fifile-an natin ng kaso ” ani Abalos.

Sinabi ni Abalos na lumikha siya ng isang task force na pangungunahan ni National Police Commission (NAPOLCOM) vice chairperson Alberto Bernardo para sa kasong ito.

Si Abalos ang chairperson ng NAPOLCOM.

Matatandaang, sinibak sa hanay ng Philippine National Police si Police Staff Sgt. Rodolfo Mayo Jr., matapos masamsam ng mga otoridad ang nasa 990 kilo ng shabu na nagkakahalaga ng P6.7-B sa loob ng isang lending firm sa Maynila na pag-aari nito.

Ayon kay PNP Spokesperson P/Col. Jean fajardo, tinanggal si Mayo sa serbisyo matapos aprubahan ni PNP Chief General Rodolfo Azurin Jr. ang rekomendasyon ng PNP-Internal Affairs Service (IAS) na alisin ang tiwaling pulis matapos mapatunayang guilty sa kasong Grave Misconduct at Unbecoming of an officer.

Dahil dito, hindi na maaaring maluklok sa anumang posisyon sa gobyerno si Mayo at wala nang makukuhang benepisyo mula sa pamahalaan.

Oktubre 8 noong nakaraang taon nang idawit nang isang nahuling drug suspect si Mayo na umano’y sangkot sa drug recycling at nagtatago ng mga iligal na droga sa opisina nito sa Sta.Cruz Maynila.

Matatandaang ginawaran pa ng “Meritorious Heroic Acts” ni former PNP OIC Lt. Gen. Vicente Danao Jr. si Mayo matapos ang matagumpay na isinagawang buy-bust operation nito sa Valenzuela noon ring nakaraang taon. (Daris Jose)

Mahigit P565-M halaga ng food packs, inihanda ng DSWD para sa epekto ng Typhoon Mawar

Posted on: May 26th, 2023 by @peoplesbalita No Comments

NAGLAAN ang DSWD ng mahigit P565 milyong halaga ng food packs sa mga rehiyonal na tanggapan nito, habang naghahanda ito sa pananalasa ng Bagyong Mawar.

Sinabi ng ahensya na nakapaghanda ito ng kabuuang 797,051 family food packs sa mga regional office nito.

Bukod dito, mayroong 110,667 family food packs sa disaster response centers nito, higit 101,000 ay nasa National Resource Operations Center sa Pasay City at mahigit 9,000 naman ang nasa Visayas Disaster Resource Center.

Kaugnay niyan, inutusan ng Department of the Interior and Local Government (DILG) ang mga regional director na makipag-ugnayan sa kanilang Regional Disaster Risk Reduction and Management Councils, at pinayuhan din ang mga lokal na pamahalaan na maghanda para sa epekto ng nasabing bagyo.

Kung matatandaan, sinabi ni Social Welfare Secretary Rex Gatchalian na ang forecast ay nagpakita na ang bagyo ay maaaring makaapekto sa Ilocos Region, Cagayan Valley, at sa Batanes area, kung kaya’t marami sa kanilang mga food packs ang naipon para sa nabanggit na mga lugar.

Dagdag dito, bahagyang humina ang tropical cyclone na Mawar sa isang bagyo mula sa isang super typhoon noong ngunit maaaring muling lumakas kapag nakapasok na ito sa lugar ng Pilipinas.

DBM, itinanggi na naantala ang benepisyo ng mga medical workers

Posted on: May 26th, 2023 by @peoplesbalita No Comments

PINABULAANAN ng Department of Budget and Management (DBM) na naantala ang pagpapalabas ng benepisyo at allowances para sa mga healthcare at non-healthcare workers.

Sa katunayan, nagpalabas ang DBM ng kabuuang P19.96 billion para pondohan ang public health emergency benefits at allowances para sa mga healthcare at non-healthcare workers.

Ayon sa DBM, gagamitin ang nasabing halaga para bayaran ang kulang o natira noong 2020 para sa Covid-19 allowance at kompensasyon ng mga health at non-healthcare workers.

“This is in accordance with the Bayanihan to Heal as One Act (R.A. 11469), Bayanihan to Recover as One Act (R.A. 11494, and Public Health Emergency Benefits and Allowances for Health Care Workers Act (R.A. 11712),” ayon sa DBM.

Sa P19.96 billion na ipinalabas na pondo, sinabi ng DBM na P7.39 billion ang nagamit na ng Department of Health (DOH) “as of March 31, 2023.”

“The DBM wishes to reiterate that there is no delay in the release of the budget for the said program,” ayon sa departamento.

“The DBM remains committed to continue helping provide the support needed by our healthcare workers for their invaluable lifesaving work,” dagdag na pahayag ng DBM.

Samantala, nagpalabas naman ng paglilinaw ang DBM matapos sabihin ni Camarines Sur 2nd district Rep. LRay Villafuerte na kailangang maghanap ng paraan ang Department of Health at DBM na maipalabas ang P2 billion na naantalang health emergency allowances para sa mahigit sa 20,000 medical frontliners.

“Rest assured that we will continue to coordinate with the DOH to ensure that the released funds will be disbursed accordingly,” ayon sa DBM.

“We shall fully adhere to the marching order of President Ferdinand R. Marcos Jr. to continue granting our healthcare workers the necessary compensation entitled to them,” dagdag na wika nito. (Daris Jose)