KINUMPIRMA ni Herlene Budol na muli siyang gagamit ng interpreter sa Miss World Tourism sa London, gaya ng ginawa niya sa katatapos lang na Miss Grand Philippines 2023.

Ginulat ng bida ng ‘Magandang Dilag’ ang lahat nang gumamit siya ng interpreter sa Q&A portion.

“Oo. Dito nga po sa Pilipinas na maraming nagta-Tagalog nakapagdala ako sa tabi ko. What more sa iba pang bansa? Pero gusto ko kasi mas maraming mas makaintindi. Kagaya ko hindi ganoon kagaling sa Ingles pero pinipilit,” sey nang nagwaging Miss Philippines Tourism 2023.

Bukod dito, wagi rin si Herlene ng ilang special awards.

Nauna nang ibinahagi ni Herlene ang ilan niyang larawan na proud na suot ang korona habang nagpapahinga sa bahay matapos ang kompetisyon.

Sa isa namang naunang post, ibinahagi rin niya ang kanyang larawan suot ang white two piece bikini.

Ayon sa kaniya, kinabahan siya habang hinihintay na matawag ang kanyang pangalan.

Si Nikki De Moura ng Cagayan de Oro ang itinanghal bilang Miss Grand Philippines.

***

REUNITED ang kapwa Kapuso stars at mabuting magkaibigan na sina Ruru Madrid at Kylie Padilla sa upcoming full action series na ‘Black Rider’.

Ayon kay Ruru, kaabangabang daw ang karakter ni Kylie sa serye.

“Ibang-ibang Kylie ‘yung mapapanood niyo. Grabe ‘yung drama na maipapakita niya dito,” sey ni Ruru.

Sang-ayon naman dito si Kylie na nagsimula na rin na mag-tape para sa mga eksena niya sa serye.

“Noong binasa ko ‘yung script, maganda naman talaga. Maganda ‘yung love story. Parang catalyst ‘yung character ko para sa magandang storyline niya.”

Maraming intense action scenes na rin daw ang nakuhan sa loob lang ng dalawang araw na taping.

Dagdag pa ni Ruru na full action series man ang Black Rider, sinigurado pa rin nila na mae-enjoy ito ng mas malawak na audience.

“Ang aming number one na pambato diyan, action. Hindi siyempre mawawala ang mga drama na eksena kasi siyempre ang dami nating mga dramatic actors na nandirito sa programa po na ito. May comedy rin, ang dami nating komedyante. Parang pinag-isa siya sa isang programa,” paglalarawan niya sa serye.

Dapat din daw abangan ang teaser ng serye na siguradong pupukaw sa interes ng mga manonood.

“Magugulat kayo sa aming inihandang teaser. We shot this for how many hours. Pinaghandaan namin ‘yan. We trained for how many months for that specific scene,” bahagi ni Ruru.

***

MARAMI na ang naghihintay sa highly-anticipated memoir ng dating Teen Pop Queen na si Britney Spears.

Sa October 24 na lalabas ang kanyang libro na ‘The Woman In Me’ naglalaman ng maraming kuwento sa buhay ng singer na hindi pa naisasapubliko simula noong sumikat siya noong 1999 dahil sa hit single na ‘Baby, One More Time’.

Kasama sa kanyang memoir ay ang tunay na dahilan ng kanyang pagkakaroon ng mental breakdown noong 2007 at sabay na nagpakalbo siya.

Hindi rin daw mawawala ang tungkol sa strict conservatorship na pinilit siyang pasukin ng kanyang amang si Jamie Spears noong 2008 para makontrol ang kanyang pera pati na ang personal niyang buhay. Natapos ang conservatorship noong 2021 nang hilingin niya sa korte na kaya na niyang maasikaso ang buhay niya.

Sinama rin ng 41-year old singer ang mga naging romantic involvement niya kina Justin Timberlake, Jason Allen Alexander, Kevin Federline at sa current husband niyang si Sam Asghari.

Ayon sa publisher ng memori: “This is a brave and astonishingly moving story about freedom, fame, motherhood, survival, faith, and hope. Written with remarkable candor and humor, Spears’s groundbreaking book illuminates the enduring power of music and love — and the importance of a woman telling her own story, on her own terms, at last.”

(RUEL J. MENDOZA)

PINANGUNAHAN ni former Ilocos Sur Gov. Luis “Chavit” Singson kasama ang kanyang lovely daugther na si Vanessa Singson, ang pagbubukas ng second branch ng sikat na South Korean food chain restaurant na ‘bb.q Chicken’, na matatagpuan sa labas ng third level ng Robinsons Magnolia, na malapit din sa mga sinehan.

Ang ‘bb.q’, na ang ibig sabihin ay “Best of the Best Quality Chicken” ay ang food chain na itinampok sa iba’t ibang K-drama series gaya ng “Goblin”, “The King: Eternal Monarch”, “One Spring Night”, at “Crash Landing On You”, na pawang popular sa mga Pinoy.

Dumating at sumuporta si Quezon City Vice-Mayor Gian Sotto bilang representative ni Mayor Joy Belmonte sa ginanap na ribbon-cutting noong Linggo, July 16.

Nauna namang dumating si Korina Sanchez-Roxas, kasama si David Chua, para mag-shoot sa naturang bonggang resto, hindi na lang niya nahintay ang pagdating ng dating gonernador.

Inabangan naman ng mga press people ang pagdating ni Coco Martin at iba pang celebrities sa opening ng ikalawang branch ng ‘bb.q Chicken’. Pero sa paliwanag Gov. Chavit, hindi na raw nag-inimbita ng mga kaibigang celebrities dahil hindi raw magkakasya sa newly-opened resto.

Ayon kay Gov. Chavit, “itong bb.q chicken, galing Korea ‘to na pwede lahat ng investor, pinapa-franchise so everybody is qualified, pwede sa lahat. Sa Korea, may chicken university.

“So, lahat ng mga chef, franchisee, mag-aaral do’n ng two months. Pero sabi ko, dito na lang mag-training para hindi masyadong malayo.”

Dagdag pa ng 82-year old politician at businessman, “’Yon lang po ang gusto kong ipaalam sa inyo, it’s open to everybody, maski sino po. Basta makahanap kayo ng lugar, aaprubahan lang nila and of course ‘yung itsura.”

Ang menu ng food chain ay binubuo ng iba’t ibang flavor ng manok na binuo ng Chicken University ng Genesis BBQ sa South Korea, na kung saan tatlo ang natikman namin, na pawang masasarap ang timpla na patok sa panglasang Pinoy. Na sure kaming babalik-balikan dahil sa kakaiba nilang ino-offer, kaya may ibang option kung type n’yo ang masarap na fried chicken.

Ang bestseller nila ay ang Golden Fried Chicken at kasama rin ang patok na Hot Crispy Chicken, Golden Fried Chicken Strips, Hot Spicy Secret Chicken, Gangnam-Style Chicken, at Cheesling Chicken.

Matitikman din ang bb.q Chicken ng tteokbokki, sundubu jigae, bibimbap, pasta, at salad. Mayroon silang iba’t-ibang coffee, na dapat ay sinubukan din namin ang kanilang Dalgona coffee. May fruit-based drinks, at ang na-try namin na Yakult Float Smoothie.

Of course, may beer din at cocktail drinks na bagay na bagay sa delicious fried chicken. Naging famous nga sa South Korea ang chimaek combination (chicken + beer) dahil sa mga K-dramas, at pagkakataon na ninyo itong maranasan sa two branches.

Meron na palang higit sa 3,500 na branch sa 57 countries ang bb.q chicken. Ayon kay Singson, mas maraming branch pa ang bubuksan sa Pilipinas sa darating na buwan, na kung saan ang first branch nito ay matatagpuan sa ikalawang palapag ng Bonifacio High Street Central, Taguig City, na nag-open last year. Nasa plano rin pala na sa ‘Pinas ang maging main home ng bb.q Chicken sa Southeast Asia.

Hinihintay naman kung sino kayang Korean superstar ang magiging endorser ng naturang food chain, na papupuntahin niya dito sa bansa. Pero malamang maghanap din sila ng LCS Group of Companies ng local stars na puwede rin maging endorser, lalo na ‘yun K-drama at K-pop fanatic, para naman swak na swak para sa bb.q Chicken.

(ROHN ROMULO)

NAGTATANONG na ang mga netizens na nanonood daily ng “Eat Bulaga” ng TAPE, Inc, bakit daw ilang araw nang hindi napapanood sa noontime show si Paulo Contis? 

Salamat sa post ng Sparkle Artist Center na kasama ni Paolo si Jimmy Santos, na dating Dabarkads ng “Eat Bulaga,”

Caption ng photo ay, “Paolo Contis is with his co-star Jimmy Santos, in Tasmania, Australia.  Catch them on a Mavx movie real soon,”

Nabalitang nasa Canada si Jimmy, so ngayon ba ay balik-acting muli ang komedyante?

Ayon din sa Instagram page ni Paolo, nagsu-shooting sila sa Australia. Bukod kay Jimmy Santos, kasama rin sa shooting sina Kaye Abad at Patrick Garcia, at parang may “Tabing Ilog” reunion, dahil magkakasama sila noon sa dating serye  ng ABS-CBN.

Pero wala nang ibang details tungkol sa shooting ng movie sa Australia, maliban sa IG post ni Patrick na nakatapos na sila ng day 8 of shooting.

Ang movie ay produced ng Mavx Productions, the same film studio behind “Unravel” na pinagsamahan nina Kylie Padilla at Gerald Anderson noon at napanood noong Summer Metro Manila Film Festival last April, 2023.

Sila rin ang nag-produce ng “Dollhouse” noon ni Baron Geisler.

                                                            ***

SA July 22 na ang GMA Gala 2023, kaya kanya-kanyang nang isip ng gimmick ang mga Kapuso couples na magpapakilig sa pagrampa nila sa red carpet.

Isa nga sa naghanda na ay ang mag-sweetheart na sina Jeric Gonzales at Rabiya Mateo.

Isang airport proposal ang ginawa ni Jeric na ipinakita na niya sa kanyang Instagram ang kabuuang proposal na may caption na, “She said Yes!!! Thank you sa pagpayag na maging date ko on GMA Gala, I love you Rabiya Mateo!”

Isa rin si Klea Pineda na ipinakita sa TikTok ang cute video na sinorpresa niya ang girlfriend na si Katrice Kierulf sa kanyang tanong na: “Will you be my date on July 22 for GMA Gala Ball?”  Hindi nabigo si Klea dahil ang nakuha niyang sagot kay Katrice ay “Yes, Baby!”

Mapapanood ang official red carpet livestream on July 22, 5p.m. on Sparkle’s social media accounts.

                                                            ***

NAG-POST si KC Concepcion sa kanyang social media, ng bonding moments niya kasama ang amang si Gabby Concecpion at mga little sisters niyang sina Samantha at Savannah.

Mga anak ito ni Gabby sa wife na si Genevieve Yatco Gonzales.  Nag-celebrate sila ng birthday ni Savannah sa isang restaurant sa Tagaytay City.

Nag-comment ang mga netizens na humanga sa pagiging mabuting ate ni KC sa mga little sisters niya.

“Parang mas happy and at peace si KC sa father’s side niya,”

“The right thing to do for a blended family, good job KC.”

“Nice bonding! Si Kristina mabait na Ate sa lahat ng mga kapatid niya.”

Matatandaan na kailan lamang ay nag-bonding naman sina Gabby at KC sa YouTube noong Father’s Day, na napaiyak pa si KC nang mapagkuwentuhan nilang mag-ama ang muli nilang pag-uusap makalipas ang halos dalawang dekada, na hindi niya narinig ang boses ni Gabby.

Meanwhile, nagsimula na ring mag-taping si Gabby ng teleserye nila ni Marian Rivera, na nag-assure sa kanya na this time, tuluy-tuloy na ang pagtatambal nilang dalawa.

Hindi nga sila natuloy noong una, dahil ipinagbuntis niya noon ang second child nila ni Dingdong, ang three-year old son nilang si Sixto.

(NORA V. CALDERON)