TULOY na ang pag-file ni Jennica Garcia para ma-annul ang kasal nila ng kanyang estranged husband na si Alwyn Uytingco.

Mas makabubuti raw ang annulment para tuluyan na silang maging malaya sa isa’t isa dahil wala na raw talagang balikan na maasahan sa kanilang dalawa.

Binigyan daw ni Jennica ng second chance noon pa si Alwyn, pero wala raw talagang nangyaring pagbabago.

Kinasal ang dalawa noong 2014 at naghiwalay noong 2021.

Three years nang hindi na ginagamit ni Jennica ang married name niya na Uytingco. Pero naging maingat si Jennica na magsalita ng hindi maganda tungkol kay Alwyn dahil sa kanilang dalawang anak na sina Mori at Alessi.

Pinabulaanan naman ni Jennica na ang reason ng pagpapa-annul niya ay dahil sa namumuong pagtitinginan daw nila ni Christian Bables na nagsimula sa teleserye na ‘Dirty Linen’.

Diin ni Jennica: “Wala po talagang romantic na dating or anything like that between me and Christian.”

(RUEL J. MENDOZA)

SA celebrity screening ng newest primetime series ng ABS-CBN na ‘Senior High’ na hatid ng Dreamscape Entertainment, may pasilip na ang character ng award-winning actress na si Sylvia Sanchez.

Gaganap siya bilang isang security guard sa school na kung saan nag-aaral ang kambal na sina Luna at Sky na ginagampanan ng ‘next important star’ at ‘future drama princess’ ng Kapamilya Channel na si Andrea Brillantes.

Bida rin sa serye sina Kyle Echarri, Juan Karlos, Elijah Canlas, Zaijian Jaranilla, at Xyriel Manabat.

After ng screening ng three episodes, nagkaroon ng presscon. Natanong si Sylvia kung bakit niya tinanggap ang naturang role na base naman sa patikim ay mukhang may lalim at malaki ang magiging kaugnayan sa mga batang bida ng mystery-thriller series, na kapupulutan ng mga aral.

“Malaki ‘yung role na ‘yun,” pag-amin niya.

“After ng HKM (Huwag Kang Mangamba), sinabi ko papahinga muna ako (paggawa ng teleserye). So ginawa ko yun, years akong nagpahinga.

“May mga offers naman na dumating, tinanggihan ko.

“Kasi pare-pareho na nanay, ganun. Gusto ko naman na ma-break ‘yung ganoon, na maiba ‘yung role ko.”

Dagdag pa niya, “So after 2 years, eto dumating itong role na ito na si Lydia na isang security guard. Tinanggap ko na walang pag-aalinlangan.

“Kasi after HKM, pinagkatiwalaan ako ng Dreamscape ng panibagong magandang role.

“Security guard siya, pero huwag lang siyang sinasabihan na security guard lang.

“Kasi ang security guard na ‘yun, ‘pag pumutok, tatahimik ang lahat,” pahayag pa ni Sylvia, na for sure, mamahalin din ng mga SG dahil sa naturang pagganap.

Samantala, nagbigay naman siya ng payo sa kanyang anak-anak na si Andrea, na nakasama rin niya sa ‘Huwag Kang Mangamba’.

Sobrang insecure pala ito dati at patuloy pa ring nakatatangap ng pamba-bash.

“Noong sinasabi ni Blythe na sobrang down siya, nandoon ako, nandoon ang pamilya ko. Nakita ko yun,” pagsisilawat ni Ibyang.

“So ngayon, tuwang-tuwa ako, sa nakikikita ko ngayon sa ‘yo. Di ba, sabi ko sa ‘yo ‘nak dati, maging matapang ka sa mundong ito. Kasi walang ibang tutulong sa ‘yo, kundi sarili mo lang.

“Nandyan ang barkada, na puwedeng sabihan, nandyan ang pamilya. Pero ‘di ba sinasabihan kita na, iiyak mo lang sa Diyos, kung ano mang pasakit ang nararamdaman mo.

“Ang bashers, ‘wag mong intindihin, bashers lang yan. Maganda man o pangit ang gagawin mo, nandyan sila, mananatili silang bashers. Wala silang kuwenta sa buhay natin.”

Dagdag rebelasyon pa ni Ibyang, “dati kasi sinasabi niya sa sarili niya na, ‘tita hindi po ako maganda’. Pero nakita ko siya noong bata sa siya, (8 years old sila ng magkasama ni Arjo (Atayde) sa ‘E-boy’), ang ganda-ganda niya.
“Tapos, ‘yung kumpiyansa sa sarili niya, kulang na kulang noon. Kaya ang sabi ko, ‘Blythe, maganda ka, magaling at matalino ka, kaya laban lang.

“Kaya ngayon, kung ano man ang nangyayari sa ‘yo, ang layo na ng Blythe na nakilala ko noong 8 years, sa Blythe ngayon, dahil ino-obserbahan kita. Kaya natutuwa ako.

“Palagi kong sasabihin sa ‘yo, na ang lakas ng loob, tapang at tiwala sa sarili, dalhin mo ‘yan palagi.”

Hirit pa ng mommy ni Gela Atayde na introducing sa ‘Senior High’, “at ‘pag may nagsabi sa ‘yo na pangit ka, at hindi ka magaling umarte, ako ang magsasabi sa kanila ng diretso, dahil mas maganda talaga siya.

“Saka tandaan mo ‘to, kahit tumanda ka pa, isang tawag mo lang sa akin, kay Gela, kay Tita Art, sa pamilya Atayde, nandoon kami, kahit na anong oras, kahit tulog kami, tatakbuhin ka namin.”

At dahil sa magagandang sinabi ni Sylvia, naging emosyonal nga ang bida ng ‘Senior High’ na nagsimula nang mapanood, Lunes hanggang Biyernes, ng 9:30 PM sa Kapamilya Channel, Kapamilya Online Live, A2Z, TV5, iWantTFC, at TFC.

(ROHN ROMULO)

KINASAL na si Lovi Poe sa kanyang long-time British boyfriend na si Montgomery “Monty” Blencowe noong August 26 sa Berkshire, England, United Kingdom.

Isang romantic garden ang setting ng wedding nila Lovi at Monty na ginawa sa Cliveden House, isang storied landmark built in 1666 by the second Duke of Buckingham.

Suot ni Lovi ay backless long-sleeve ivory wedding gown by Patricia Santos. Ang celebrity make-up artist na si Robby Piñera ang nag-create ng simpleng look ng aktres.

Naglakad si Lovi sa aisle sa instrumental rendition ng song ni Ogie Alcasid na “Pangarap Ko ang Ibigin Ka.”

Ilan sa namataang um-attend sa intimate wedding ay ang half-sister ni Lovi na Senator Grace Poe, ang pamangkin na si Brian Poe Llamanzares, celebrity doctors Vicki Belo and Hayden Kho, Bela Padilla, Rhian Ramos, eventologist Tim Yap. and producer-talent manager Leo Dominguez.

Both Lovi and Monty announced their engagement on social media last August 8.

Isang long-distance relationship meron sina Lovi at Monty. Habang nasa Manila si Lovi at nagtatrabaho sa ilang projects on TV and film, si Monty naman ay naka-base sa Los Angeles, California kunsaan isa itong film producer.

Taong 2017 noong unang mag-meet sina Lovi at Monty at 2019 naman noong i-post ni Lovi ang dating photos nila sa Banc of California Stadium, sa prestigious Royal Ascot in England at ang vacation nila sa Davao City.

Noong 2021 pa na-engage ang dalawa at sinekreto nila ito bago nila i-announce officially noong nakaraang August 8 lamang.

***

AFTER ng kanyang short-lived romance with Gigi Hadid, may bagong dine-date si Leonardo DiCaprio na 25-year old model named Vittoria Ceretti.

Nakita ang dalawa na bumibili ng ice coffee at ice cream sa Santa Barbara, California. Naka-baseball cap, white shirt at cargo shorts si Leo samantalang naka-long-sleeved white shirt and black athletic shorts si Vittoria.

Huling nakita si Leo with Gigi ay noong nakaraang July lamang sa Hamptons. Kaibigan naman ni Gigi ang dine-date ngayon ni Leo na si Vittoria.

Italian model si Vittoria na na-discover noong 2012 through the Elite Model Look Model contest.

Kinasal si Vittoria sa DJ na si Matteo Milleri noong 2020. Pero naghiwalay sila noong nakaraang June at meron silang pending divorce.

(RUEL J. MENDOZA)

MAHAHALAGANG aral tungkol sa mental health ang hatid na mensahe nina Andrea Brillantes, Kyle Echarri, Juan Karlos, Elijah Canlas, Zaijian Jaranilla, at Xyriel Manabat, sa bagong Kapamilya teleseryeng “Senior High.”

Mapapanood na ito simula ngayong Lunes (Agosto 28) ng 9:30 PM.

Isa itong mystery-thriller series kung saan bibigyang diin ang ilang mga pagsubok na pinagdadaanan ng mga kabataan ngayon tulad ng suicide, mental health, bullying, at peer pressure lalong-lalo na sa eskwelahan.

“We tackle sensitive topics. I really don’t wanna romanticize drugs, mental health, etc. I want to make this different and magkaroon talaga ng impact and makatulong talaga kami sa ibang tao na we need to take responsibility for our own life,” sabi ni Andrea.

Magsisimula ang kwento ng “Senior High” sa kambal na sina Luna at Sky (Andrea). Ibang-iba ang kanilang personalidad dahil si Luna ay matalino at pabibo, habang si Sky naman ay may hinanakit sa kanilang nanay na si Tanya (Angel Aquino) dahil ang lola niya ang nagpalaki sa kanya ng mag-isa.

Mag-iiba ang buhay ni Sky nang mag-enroll din siya sa eskwelahan nina Luna, ang prestihiyosong Northford High. Dito niya makikilala ang iba’t ibang grupo ng mga estudyante at isa na rito ang grupo ng mga mayamang bully na magkapatid na sina Archie (Elijah) at Z (Daniela Stranner), ang boyfriend ni Z na si Gino (Juan Karlos), at isa pa nilang kaibigang si Poch (Miggy Jimenez).

Sa kabilang banda naman ay ang tila mababait na mga estudyante pero may kanya-kanyang lihim din pala na itinatago. Nariyan ang misteryosong si Obet (Kyle) at ang mag-jowang sina Tim (Zaijian) at Roxy (Xyriel).

Mayayanig ang kanilang mundo nang ma-dead on the spot si Luna matapos mahulog sa isang balcony. Ipapalabas nilang suicide ang nangyari, pero malakas ang kutob ni Sky na may tumulak sa kanyang kapatid kaya gagawin niya ang lahat para lumabas ang katotohanan.

Suicide ba talaga ang nangyari kay Luna? Ano-ano ang mga kababalaghan at sikreto ng mga estudyante?

Ang “Senior High” ay mula sa direksyon nina Onat Diaz at Andoy Ranay, ang mga direktor ng patok na revenge series na “Dirty Linen.” Handog ng ABS-CBN Entertainment at iWantTFC ang isang Dreamscape Entertainment production, tampok din sina Tommy Alejandrino, Gela Atayde, Baron Geisler, Mon Confiado, Sylvia Sanchez, Desiree Del Valle, Kean Cipriano, Ana Abad Santos, Gerald Madrid, Inka Magnaye, Angeli Bayani, Ryan Eigenmann, Rans Rifol, Rap Robes, Kakki Teodoro, at Floyd Tena.

Mapapanood na ang “Senior High” Lunes hanggang Biyernes, ng 9:30 PM sa Kapamilya Channel, Kapamilya Online Live, A2Z, TV5, iWantTFC, at TFC.

Para sa updates, sundan ang @abscbnpr sa Facebook, Twitter, TikTok, at Instagram o bisitahin ang www.abs-cbn.com/newsroom.

(ROHN ROMULO)

NAGING emosyonal si Asia’s MultiMedia Star Alden Richards, after niyang mapanood ang last episode ng kanyang “Alden August” ng Magpakailanman last Saturday, August 26 sa GMA Network.  

Titled “Sa Puso’t Isipan: The Cantillana Family Story,” tungkol ito sa pamilya na may mental disorders ang kanilang mga parents, hanggang sa nagkaroon na rin nito ang eldest son, si Andrew, played by Alden, a loving son, mabait na kuya sa dalawang nakababatang kapatid at primary caregiver to his mentally-ill parents, na ang nagkuwento sa #MPK ay ang bunsong si Angelica.

After ipinalabas ang episode, nag-Facebook live agad si Alden at inaming hindi na niya pinanood ang finale scene nila noong taping dahil masyado raw mabigat sa kanyang pakiramdam ang role, na kahit may problema siyang personal ay hindi maipapantay sa paghihirap na dinaranas ni Andrew sa story.

Nanawagan din si Alden: “If may nakakakilala po sa Cantillana Family, please let me know, baka po mas may mahirap pa silang pinagdadaanan, kaysa napanood natin, na hindi naikuwento ni Angelica,  Handa po akong tulungan kayo in this fight.”

***

MATAGAL-TAGAL na ring na-miss ng mga TV viewers si Kapuso actress Sophie Albert, since ikinasal sila ni Kapuso actor Vin Abrenica at may little daughter na sila ngayon.

Huling napanood noon si Sophie nang mag-guest siya sa first part ng top-rating GMA Afternoon Prime drama series na “Abot-Kamy na Pangarap” nina Carmina Villarroel at Jilian Ward.

Ngayon ay napapanood na muli si Sophie sa bagong GMA Afternoon Prime series na “The Missing Husband” nina Rocco Nacino at Yasmien Kurdi, at 4:05 pm sa GMA Network.

Nang mag-promote si Sophie sa “Fast Talk with Boy Abunda,” ang naging topic nila ay ang hindi niya paggamit ng real surnames niyang Reyes or Cojuangco, ayaw daw ba niya ang said surnames?

“Hindi naman sa ayaw kong gamitin, lumaki ako using my surname ‘Reyes,’ paliwanag ni Sophie.

“But in showbiz, ang dami nang Reyes, and I felt like it was such a big responsibility to make it Cojuangco, and I grew up not having that in my name.  So, I chose to have my mom’s middle name na ‘Albert,’ instead.  Pero it doesn’t mean na hindi ko gusto ang surnames na Cojuangco or Reyes.”

Lola ni Sophie si Josephine Cojuangco-Reyes, ina ng father niya at nakatatandang kapatid ni former President Cory Aquino, mom ni Kris Aquino, kaya lola niya si Pres. Cory at auntie niya si Kris.

Pero hindi raw sila madalas nagkikita ni Kris.

***

SA isang interview kay Judy Ann Santos, sinabi niyang gusto pa rin niyang matuloy ang paggawa nila ng movie ni Sam, Milby na “Mrs. Winters.”

Ang location dapat ng movie ay sa Canada, kaya lamang nagkaproblema raw ang visa niya, kaya naubusan na sila ng winter.  Kung ipu-push daw nilang umalis noon ng May or June, biro ni Juday, “Mrs. Autumn” or “Mrs. Summer na siya, mawawala na raw ang essence ni “Mrs. Winters.”

Willing si Juday na ituloy ang movie dahil naka-commit na siya at gagawin niya ito kapag naayos na ang requirements at isa nga rito ay dapat may snow sa kanilang location.

(NORA V. CALDERON)

EMOSYONAL na binalikan ni Nadine Samonte ang mga hinarap niyang pagsubok bilang isang ina, kabilang noong sabihan siya ng doktor na hindi siya puwedeng magkaanak.

At nang mabuntis, kamuntikan pang malaglag ang isa niyang anak.

“Kasi sinabihan ako ng doctor na I can’t have kids noong 2013, 2014 hanggang 2015 na I cannot. I should consider surrogate,” kuwento ni Nadine sa “Fast Talk with Boy Abunda.”

“So sabi ko noon, ‘Wow I’m just 27 years old then sasabihan ka na hindi ka puwede magkaanak.’ That time sabi ko, ‘Kapag binigyan ako ni Lord ng mga anak, lahat gagawin ko para sa kanila. Kahit na itigil ko ‘yung trabaho ko, gusto ko silang palakihin talaga.’ And that’s what I did,” pagpapatuloy ni Nadine.

Kaya naman noong pinalad na mabuntis, labis na hirap ang kaniyang pinagdaanan.

“It’s very difficult, it’s very, very difficult. Lahat, everyday, injections, umaga, gabi, bed rest, diet, everything. Everyday nandoon ‘yung kaba na ‘Is the baby still okay? May heartbeat pa ba?’ ‘Yung gano’n.”

Kuwento ni Nadine, lumabas agad ang panganay niyang anak na si Heather Sloane sa ika-34 linggo niyang pagbubuntis.

Ang anak na lalaki naman niyang si Titus, ay muntik nang lumabas noong ika-28 linggo niyang pagbubuntis.

“Sabi ng doktor, ‘Hindi. Hindi siya puwedeng lumabas kasi kapag lumabas siya mahihirapan na tayo. Baka hindi siya maka-survive,’” kuwento ni Nadine.

Tila isang himala ang nangyari nang tumagal pa si Titus sa kaniyang sinapupunan.

“With God’s grace and everything, nakaabot kami ng 35 weeks,” sabi ng Kapuso actress.

Pag-amin ni Nadine, pinakanahirapan siya sa ikatlo niyang anak na si Harmony.

“Ang pinakamahirap for me is my third. Noong first trimester ko, malalaglag na siya. I was bleeding so hard, sobra. As in akala ko mawawala na siya and that’s COVID days pa. Ang hirap kumilos and all.”

“Ang lakas ko lang talaga kay Lord. Naka-survive siya,” pag-alala pa ni Nadine.

“Pero paglabas niya ng 37th week, ang daming complications. Na-incubator siya, hindi siya makahinga. Bagsak ang blood sugar. One week kami sa hospital.”

Laking pasasalamat ni Nadine na biniyayaan siya ng Diyos ng tatlong anak sa kabila ng kaniyang kalagayan noon.

“I’m super blessed. Thank you for my kids. ‘Yun lang.”

Kaya bilang isang ina, lahat ay gagawin ni Nadine para sa mga anak.

“Lahat gagawin ko for them. Sobra kasi ‘yun ‘yung turning point ko, nu’ng sinabi sa akin ng doktor na, ‘You can’t have kids,’” sabi niya.

Ikinalungkot ni Nadine ang posibilidad na hindi sila maaaring magkaroon ng mga anak ng kaniyang asawa.

“So, parang sabi ko kay Richard noon, ‘Paano? Are we still gonna be a family?’ ‘Di ba, ‘yung feeling na parang may kulang. Sige, nandiyan siya as my husband. Nandiyan kami. Kaya naman siguro kung walang kids.”

“Pero parang iku-question mo ‘yung sarili mo, ‘Bakit ako of all people? Bakit hindi ako puwede magkaroon ng anak?’” pagpapatuloy niya.

Inamin niyang minsan na rin niyang ikinonsidera ang surrogacy.

“Hanggang to the point na sabi ko sa mom ko na, ‘Sige, Ma, puwede bang ‘yung sister ko na lang ang mag-surrogate for me?’”

Ngunit hindi nawalan ng pag-asa ang kaniyang ina, at pinayuhan siya para tumatag ang kaniyang loob.

“Sabi ng mama ko, ‘Ano ka ba? Tumigil ka. Dumire-diretso ka lang sa ginagawa mo and kung talagang ibibigay sa ‘yo ng Diyos ‘yan, ibibigay ‘yan sa ‘yo,’” ani Nadine.

“At ibinigay. God is very, very good,”

Nasa cast ng ‘The Missing Husband’ ng GMA si Nadine na eere na simula sa Lunes, August 28.

(ROMMEL L. GONZALES)