LAGLAG sa selda ang tatlong hinihinalang drug personalities matapos matimbog sa magkahiwalay na operation ng pulisya sa Caloocan City.

Sa kanyang report kay NPD Director P/BGen. Rizalito Gapas, sinabi ni Caloocan police chief P/Col. Ruben Lacuesta na ikinasa ng mga operatiba ng Station Drug Enforcement Unit (SDEU) ang buy bust operation kontra kay alyas ‘Pusa’, 56, matapos ang natanggap na impormasyon hinggil sa pagbebenta nito ng droga.

Nang tanggapin ni ‘Pusa’ ang P500 marked money na may kasamang 6-pirasong boodle money mula sa pulis na nagpanggap na buyer kapalit ng isang medium plastic sachet ng shabu ay agad siyang dinamba ng mga operatiba, kasama si alyas ‘Lennon’, 26, dakong alas-3:47 ng madaling araw sa Torsilyo Street.

Nakumpiska sa mga suspek ang nasa 14.25 grams ng hinihinalang shabu na may katumbas na halagang P96,900.00 at buy bust money.

Samantala, dakong alas-8:15 ng gabi nang maaresto naman ng mga tauhan ng Cadena De Amor Police Sub-Station 11 si alyas ‘Cardo’ matapos maaktuhan nakikipagtransaksyon sa ilegal sa Balintawak Street, Pag-asa, Barangay 175, Camarin.

Ani Col. Lacuesta, nakuha sa naarestong suspek ang isang plastic sachet na naglalaman ng humigi’t kumulang10 grams ng hinihinalang shabu na nagkakahalaga ng P68,000 habang nakatakas naman ang nag-abot sa kanya ng droga.

Mahaharap ang mga suspek sa kasong paglabag sa RA 9165 o Comprehensive Dangerous Drug Act of 2002. (Richard Mesa)

NALAMBAT ng mga tauhan ng District Special Operation Unit ng Northern Police District (DSOU-NPD) ang 22-anyos na lalaki na nasa top 3 most wanted person sa Navotas sa ikinasang manhunt operation sa Caloocan City, kamakalawa ng hapon.

Kinilala ni DSUO chief PLTCOL Robert Sales ang naarestong akusado na si alyas “Badjao” ng Brgy. 28, Caloocan City na pansamantalang nakapiit sa custodial facility unit ng DSOU habang hinihintay ang pagpapalabas ng commitment order mula sa korte.

Sa kanyang ulat kay NPD Director P/BGen. Rizalito Gapaz, sinabi ni Lt Col. Sales na nakatanggap sila ng impormasyon hinggil sa pinagtataguang lugar ng akusado sa kaya bumuo siya ng team sa pangunguna ni P/Major Marvin Villanueva para sa gagawing pagtugis kay ‘Badjo’.

Kasama ang mga tauhan ng NPD-DID, Northern NCR Maritime Police Station at WSS ng Navotas police, agad nagsagawa ang DSOU ng joint manhunt operation na nagresulta sa pagkakadakip sa akusado dakong alas-3:30 ng hapon sa kahabaan ng Blk. 14 Pamasawata Brgy., 28 Caloocan City.

Ani Maj. Villanueva, binitbit nila ang akusado sa bisa ng warrant of arrest na inisyu ni Presiding Judge Romana Maria Melchora P. Lindayag-Del Rosario ng Branch 287, Navotas City noong January 30, 2024 para sa kasong Murder.

Sinabi ni Lt Col. Sales na ang pagkakaaresto sa akusado ay alinsunod sa inilitag na agenda ng Chief PNP na “Aggressive and Honest Law Enforcement Operations”. (Richard Mesa)