IPINAG-UTOS ni Pangulong Ferdinand R. Marcos Jr. sa Department of Health (DOH) na magtalaga ng mga doktor at magbigay ng medical assistance sa bawat evacuation centers upang masiguro ang health conditions ng mga bakwit na apektado ng bagyong Carina.

Sa isang situation briefing, pinanindigan ni Pangulong Marcos na dapat na tiyakin ng DOH na ang evacuation centers ay mayroong mobile clinic para mag-check sa kondisyon ng mga kabataan at matatanda.

“Kailangan mayroon silang clinic sa bawat evacuation center, or at least may umiikot na medical team … can we get an instruction to the DOH that evacuation centers, kailangang madaanan ang mga bata,” ayon kay Pangulong Marcos.

“We have to get some medical, (team), kahit na ‘yung mga BHWs lang nila muna … hanggang makarating ang doctors dun. Mag assess lang sila that everybody is okay . Anybody is in need of immediate help,” ayon sa Punong Ehekutibo.

Binigyang diin ni Pangulong Marcos na ang mga doktor ay dapat na kagyat na italaga sa mga evacuation centers upang sa gayon ay kaagad silang makapaghatol sa mga matatanda na kailangan ang kanilang maintenance medicines.

Sa kabilang dako, sinabi ng Office of Civil Defense (OCD) na 189,014 pamilya o 910,536 indibidwal ang apektado ng Carina habang 123,992 pamilya o 612,961 indibiduwal ang nanuluyan sa iba’t ibang evacuation centers.

Makikita sa record na 13 indibiduwal ang nasawi habang dalawa ang napaulat na nasugatan at dalawa ang nawawala.

Samantala, pinangunahan naman ni Pangulong Marcos ang situation briefing, Huwebes ng umaga, Hulyo 25, kung saan nakapulong nito ang mga miyembro ng kanyang Gabinete na direktang may kinalaman sa ‘disaster efforts’ ng gobyerno kasama ang ibang ahensiya ng pamahalaan na kasama naman sa rescue and relief operations sa Presidential Security Command compound sa Maynila.

Ipinag-utos din ng Pangulo sa pamahalaan na tukuyin ang mga lugar na labis na hinagupit ni Carina para madetermina kung saan at ano ang klase ng agarang tulong na ipagkakaloob sa mga apektadong residente. (Daris Jose)

PINURI ng chairman ng House Committee on Dangerous Drugs ang pinaiiral na bloodless anti-illegal drug campaign ni Pangulong Bongbong Marcos.

Ayon kay Surigao del Norte Rep. Robert Ace Barbers, ang bagong pamamaraang ito ay ganap na nagpahinto sa mga pang-aabuso ng mga dating nagpapatupad ng batas kontra sa iligla na droga na nag-aakusa, humahatol, at nagpapatupad ng parusa sa mga pinaghihinalaang drug trafficker, adik, at gumagamit ng ilegal na droga.

Sinabi pa ni Barbers na ang kasalukuyang pamamaraan ng administrasyon laban sa droga ay mas epektibo at makatao. Ayon sa kanya, nakamit nito ang higit pa sa mga inaasahang resulta nang hindi gumagamit ng extra-judicial killings.

Ayon sa mga ulat, sinabi ni Barbers na ang opisyal na bilang ay nagpakita na umabot sa 6,229 na napaslang na drug personalities sa pamamagitan ng extra-judicial killings hanggang noong Marso 2022, habang tinatayang higit sa 20,000 sibilyan ang napatay sa ilalim ng nakaraang administrasyon ayon naman sa tala ng mga human rights group.

Noong 2022, hinimok ng noo’y si outgoing President Rodrigo Duterte ang kaniyang kahaliling si Marcos Jr. na ipagpatuloy ang giyera laban sa droga sa “kanyang sariling paraan,” kung saan idineklara naman ni Marcos Jr. na mas tututukan niya ang pagpigil at rehabilitasyon ng mga nalulong sa droga, at nagsabing “ang pagpatay ay hindi kailanman bahagi ng kanyang plano.”

Sa kanyang ikatlong State of the Nation Address (SONA) noong Lunes, muling ipinahayag ni Pangulong Marcos Jr., ang kanyang polisiya na magpapatuloy siyang susunod at susundin ang umiiral na polisiya laban sa iligal na droga na nakatuon sa ligal at matuwid na paraan na mas makatao at ang pagpaslang ay hindi kailanman bahagi nito.

Pinuri ni Barbers ang kasalukuyang mapayapang kampanya laban sa droga, kung saan naitala 71,500 operations, nakumpiska ang halagang P44 bilyon ng ilegal na droga, at naaresto ang 97,000 na drug personalities, kasama na rito ang higit sa anim na libo na high-value targets. Kasama rin sa mga naaresto ang 440 na empleyado ng gobyerno, 42 ang uniformed personnel, at 77 mga halal na opisyal.

Ibinunyag din ng Pangulo na ang kasalukuyang kampanya laban sa droga ay nagresulta ng freezing of assets ng mga big-time drug traffickers na nagkakahalaga ng higit sa P500 milyon, at conviction rate na 79 porsyento laban sa mga kasong isinampa sa korte para sa iligal na droga.

Habang ang gobyerno ay nakatuon sa pag-iwas at rehabilitasyon ng mga pinaghihinalaang drug suspects, hinimok ni Barbers ang mga awtoridad na may kinalaman sa anti-drug operation na mas bigyang-pansin ang pagbawas ng suplay ng droga kaysa sa pagbawas ng demand.

Sa isang ulat na ginawa ng US International Narcotics Control Strategy noong 2010, tinatayang ang ilegal na kalakalan ng droga sa Pilipinas ay nasa $6.4 hanggang $8.4 bilyon taun-taon.

Dahil sa geographical location ng bansa, ginagamit ng mga international drug syndicate, na karamihan ay mga miyembro ng Chinese drug triad, ang Pilipinas bilang transit hub para sa ilegal na kalakalan ng droga. Gumagamit sila ng mga local drug syndicate at gang bilang mga “mules” para mag-transport ng droga patungo sa ibang mga bansa. (Vina de Guzman)

NAGMISTULANG ‘water world’ ang malaking bahagi ng Metro Manila sa mala-Ondoy na malawakang pagbaha dulot ng matin­ding epekto ng southwest monsoon na pinalala pa ng bagyong Carina, ayon sa report na tinanggap ng National Disaster Risk Reduction and Management Council (NDRRMC) nitong Miyerkules.

Dahil dito, isinailalim na sa state of calamity ang buong Metro Manila matapos aprubahan ng Metro Manila Council ang rekomendasyon ni Interior and Local Government Secretary Benhur Abalos kay Pangulong Ferdinand Marcos Jr.

Sa ginanap na situation briefing sa Camp Aguinaldo na pinanguhan ng Pangulo, sinabi ni Abalos na makabubuting isailalim sa state of calamity ang MM upang mabigyan ang mga LGU ng access sa mga karagdagang pondo para sa pagtugon sa kalamidad, kasama na dito ang paglalatag ng price freeze sa mga basic goods.

Ayon kay Abalos, naglabas na rin ito ng mga direktiba sa mga LGU upang pabantayan ang mga sitwasyon sa ground level, tumulong sa mga evacuation. Malaking bahagi ng Metro Manila at kalapit na probinsya ang binaha.

Ayon sa ulat, maraming mga pangunahing highway at inner roads ang dumanas ng mula gutter hanggang abot baywang na lalim ng tubig baha dahil sa walang humpay na malalakas na pag-ulan simula pa nitong Martes ng gabi na tumindi hanggang umaga nitong Miyerkules.

Iniulat ang mga pagbaha sa mga lungsod ng Manila, Marikina, Quezon, Pasay, Taguig at Valenzuela. Gayundin sa Mandaluyong City at lungsod ng San Juan.

Sinabi ni Abalos na 70% ng Navotas City, 80% ng Malabon City at 60% ng Valenzuela City ay binaha dahil na rin sa nawasak na flood control.

Maraming mga pasahero ang na-stranded habang kaunti lamang ang mga bumibiyaheng sasakyan dahil hindi makakalusot sa baha at may mga tumirik at inanod ng baha. Nagdulot rin ang mga pagbaha ng pagkakabuhol-buhol ng daloy ng trapiko sa malaking bahagi ng Metro Manila.

Magugunita na ang bagyong Ondoy ay naminsala sa malaking bahagi ng bansa dahil sa idinulot na malakas na ulan na kumitil ng buhay ng 710 katao, 439 missing habang nasa P6.2 bilyon ang iniwang pinsala noong Setyembre 2009. (Daris Jose)