KAIBIGAN pala ni Carlo San Juan si Sandro Muhlach na nasasangkot ngayon sa isang malaking kontrobersiya.

Naging magkaibigan sila dahil sa Sparkle.

Noong nalaman niya ang nangyari, ano naging reaksyon niya?

“Siyempre nalungkot po ako kasi kaibigan ko yun e, parang ayun po yung nangyari sa kanya. Ayun po, sana malagpasan niya po ito na may ngiti pa rin kahit papaano, and sana po hindi siya pabayaan ni Lord all throughout sa mga nangyari po sa kanya.

“And alam ko naman po sobrang nandun lang yung family niya para naka-support sa kanya. So ayun po.”

Hindi pa raw nakakausap ni Carlo si Sandro mula nang pumutok ang balita.

Dagdag pa ni Carlo tungkol sa initial reaction niya sa pangyayari…

“Nagulat actually kasi parang ano yun e, sobrang grabe siya as kaibigan, kuwela, ganun. Tapos biglang malalaman ko na ganun yung nangyari sa kanya. So ayun po.

“Ipagpasa-Diyos na lang po natin, kasi ayun naman po talaga…”

Hindi pa raw niya napapadalahan ng mensahe si Sandro.

Samantala, makalipas ang dalawang taon bilang Sparkle artist, wala na siya sa nabanggit na artist management arm ng GMA Network, dahil matapos na ang kontrata last April.

Umalis siya sa Sparkle o hindi na siya ni-renew?

“Hindi na po na-renew.”

Ayos lang raw kay Carlo kung hindi man na-renew ang kanyang kontrata.

“Okay lang naman po kasi kahit naman po anong mangyari sa buhay natin, kung ano pong dumating o mawala, it’s still a blessing.

“Kasi alam ko po na hindi po ako pababayaan ni Lord at may darating na bago na makikita. Siguro kung ano yung meron pa sa akin. Ayun, kaya thankful din ako sa KreativDen, kasi kinuha nila ako.”

Si Carlo ngayon ay nasa pangangalaga na ng KreativDen Entertainment ni Kate Valenzuela.

Hindi raw sumama ang loob ni Carlo sa Sparkle, bagkus ay labis ang pasasalamat niya.

“Hindi po, hindi po sumama loob ko. In fact, sobrang thankful po ako sa kanila kasi sobrang ganda po ng experience ko sa kanila,” bulalas ng guwapong binata.

“Madami po akong natutunan. Hindi po ako magiging ganito kung wala yung mga natutunan ko po sa buhay, hindi ko po malalaman kung wala din pong gabay sa kanila.

“So thankful po ako sa kanila, sobra,” patungkol pa ni Carlo sa Sparkle at GMA.

Nanalong Mr. Pogi sa Eat Bulaga! noong 2019 si Carlo at isinadula sa ‘Magpakailanman’ ang buhay niya na pinamagatang ‘Ang Driver Na Mr. Pogi: The Carlo San Juan Story’, pagbibidahan ito mismo ni Carlo at ipinalabas noong Setyembre 17, 2022.

Taga-San Pedro sa Laguna si Carlo at ilan sa mga naging proyekto niya bilang Kapuso ay ang ‘Daddy’s Gurl’ nina Vic Sotto at Maine Mendoza, at ang teleserye na ‘Mano Po Legacy: The Flower Sisters.’

Pinag-usapan rin noon si Carlo dahil matapos manalo sa Mr. Pogi ay bumalik sa pamasada ng tricycle sa panahon ng pandemic dahil nahinto ang mga taping sa GMA.

Talents rin ng KreativDen sina Richard Yap, Angeline Quinto at ang beauty queen/actress na si Xena Ramos.

Kasalukuyang inaayos na ang proseso ng pagpirma ni Carlo sa management ni Kate noong nakausap namin sa Philippine premiere ng ‘Lola Magdalena’ na pinagbibidahan nina Gloria Diaz, Sunshine Cruz, Perla Bautista, Pia Moran at Liza Lorena.

Tinanong naman namin si Carlo kung ano ang naging reaksyon niya nang napanood na niya finally ang una niyang pelikula.

“Sobrang saya ko po kasi, first time ko pong makita yung sarili ko on the big screen,” lahad niya.

“First movie and first po na screening na ako naman po yung nandun sa harap kasi ipe-present po namin yung movie namin.

“So, sobrang saya po. Wala po akong masabi kundi sobrang happy ko po ngayon.”

Ano ang feeling na mga legends at mga icons ang kasama niya sa pelikula?

Kuwento ni Carlo, “Siyempre nakakakaba kasi yun nga, mga beterana, kailangan maayos yung pakikitungo sa kanila, ayun, and ayun naman po yung nangyari.

“Naging okay naman po lahat, sa tapings, dito po sobrang natutuwa po at nakikita ko po ulit sila kasi sobrang mabait po sila, para po silang mga lola ko na po talaga.

“Pag binabati po nila ako, sobrang very nurturing. Ayun po.”

Young lover ng karakter ni Pia ang papel ni Carlo sa ‘Lola Magdalena’ na ang direktor ay si Joel Lamangan at ang sumulat naman ng screenplay at siya ring line producer ng pelikula ay si Dennis Evangelista.

(ROMMEL L. GONZALES)

SINAGOT na ng SB19 member na si Stell Ajero ang hindi mamatay-matay na gender issue sa kanya.

Sa naging interview ni Boy Abunda sa P-pop Kings na SB19 as programang Fast Talk with Boy Abunda, tinanong niya ang mga ito tungkol sa mga kumukuwestiyon sa kanilang sexuality.

“Kaakibat ng pagsikat ay kontrobersiya. Isa na dito ‘yung sexuality. What do you wanna say?” tanong ni Boy sa SB19.

Si Stell ang unang sumagot, “’Di ko nga rin po talaga maintindihan. Kasi unang-una po, tingin po ba nila insulto ‘yung ganung klaseng bagay? Ako, for example, lagi po akong natatanong or lagi pong nagiging issue po sa ‘kin ‘yun and I don’t mind na kung if ever man isipin nilang ganun.

“Kasi if ever man ganun ako, what’s the problem?”

Matapang pang sabi ni Stell, “So, if ever man na ganun ako, ano’ng problema? So, may issue ba tayo kung example na maging bakla ako or anything naman na matawag n’yo sa akin? Kasi pare-parehas naman tayong tao, pare-parehas tayong kumakain, pare-parehas tayong dumudumi.”

Tanggap din ni Stell na mahilig mag-ship ang kanilang fans kahit sa kaniyang kapwa SB19 members.

“Katulad nga po nung mga ganu’ng issue, na mahilig ‘yung mga fans sa shipping. Hindi namin maiiwasan ‘yun. Kasi kami nga minsan nagkaka-ano rin kami, bakit parang ganun ‘yung tingin ng tao, e, sa ‘min parang normal naman ‘yun bilang magkakaibigan. Sa ibang tao, iba pala ‘yung iniisip nila,” paliwanag pa ni Stell.

Kaya nakikiusap ni Stell sana raw ay tigilan na ang mga kanegahan. Gusto lang daw nila ay maging masaya ang lahat at ma-enjoy ang mga ginagawa para sa kanilang fans.

“Wala naman kaming problema sa mga ganoong klaseng issue kasi willing naman po kaming sagutin lahat,” sagot pa niya.

Mapapanood si Stell sa pinakabagong The Voice Kids sa GMA. Makakasama rito ni Stell sina Billy Crawford, Julie Anne San Jose, at kanilang pinuno sa SB19 na si Pablo.

(ROHN ROMULO)