MINOMONITOR ng Department of Agriculture (DA), pinuno ng Philippine Inter-Agency Committee on Zoonoses (PhilCZ), ang umuusbong na ‘zoonotic diseases o infections” na maaaring kumalat mula sa hayop hanggang sa tao.

Sa isinagawang turnover ceremony ng chairmanship ng PhilCZ mula sa Department of Health (DOH) tungo sa DA, sinabi ni Agriculture Assistant Secretary Constante Palabrica na kabilang sa mga sakit na pinagtutuunan nila ng pansin ay ang rabies at “highly pathogenic” avian influenza.

Sinabi pa ni Palabrica na naghahanap ang DA ng P20 million hanggang P30 million budget para sa pagbili ng karagdagang anti-rabies vaccine. Aniya, inendorso na ito para sa pirma ni Agriculture Secretary Francisco Tiu Laurel Jr.

Base sa pinakabagong data ng DOH, may kabuuang 89 human rabies cases, nagresulta ng pagkamatay ng lahat, ang naitala mula January 1 hanggang March 16, 2024.

Nakapagtala ang Soccsksargen ng pinakamataas na bilang ng kaso na 12. Sinundan ito ng Calabarzon at Bicol Region na mayroong tig-11 kaso bawat isa.

Tinatayang 82 ng mga kasong ito ay may kinalaman sa kagat ng aso, limang kaso naman ang kagat ng pusa, habang ang natitira naman ay kagat mula sa ibang hayop.

Kabilang sa kabuuang kaso, tanging isa lamang kaso ang napaulat na ang nakakagat na hayop ay fully vaccinated, 40 kaso naman ang nagsabi na ang hayop ay unvaccinated, habang ang natitirang 48 kaso ay kinasasangkutan ng mga hayop na may “unknown vaccination status.”

Ukol naman sa avian influenza, sinabi ni Palabrica na inaprubahan ng Food and Drug Administration (FDA) ang tatlong kompanya para magpatuloy na I-trial ang vaccine.

“It’s still in process, ‘yung AI na bakuna . We’re just waiting for the results of the trial and from that, we can get an approval from the FDA,” ayon pa rin kay Palabrica.

Maliban sa mga ito, sinabi ni Palabrica na sinusubaybayan niya ang paglitaw ng foot-and-mouth disease at anthrax.

“As of now, merong emerging diseases…and that is the foot-and-mouth disease. The foot-and-mouth disease, as of now, the Philippines is free. Wala tayong bakuna. Hindi naman ito naita-transfer sa tao,” ayon kay Palabrica.

Ang mga kaso ng anthrax sa bansa ay kasalukuyan lamang limitado sa hilagang bahagi ng Luzon. Sinabi pa niya na handa ang DA sakali’t lumagap ang nasabing nakahahawang sakit.

“We have the capability to produce the vaccine for anthrax and we can do immediate action against anthrax,” ang sinabi ni Palabrica.

Buwan ng Marso, sinabi ng DOH na minonitor nito ang anthrax situation sa ibang mga bansa, kahit pa tiniyak ng departamento sa publiko na mayroon lamang na maliit na tsansa na kumalat ang nasabing sakit sa pangkalahatang populasyon. (Daris Jose)

NANANATILING kabilang sa prayoridad ng National Intelligence Coordinating Agency (NICA) ay ang pangangalap ng mahahalagang ‘intelligence’ laban sa mga aktibidad ng mga komunista.

Ito’y sa kabila ng paghina ng terrorist group’s armed wing.

Sa isang panayam sa Bagong Pilipinas Ngayon public briefing, araw ng Huwebes, sinabi ni NICA Deputy Director General for Special Concerns Abelardo Villacorta na nagpapatuloy ang communist recruitment activities kung saan target ang mga estudyante at sektor ng kabataan.

Sinabi pa nito na ang ahensiya bilang pinuno ng National Task Force to End the Local Communist Armed Conflict’s (NTF-ELCAC) Situational Awareness and Knowledge Management Cluster, nakatuon sa pagmo-monitor sa mga nasabing pagtatangka na akitin ang mga kabataan na mag-armas laban sa pamahalaan.

“There are so many of our youth, the students that are being recruited into the CPP-NPA-NDF at kawawa sila, iyong mga pangarap nila, ambisyon nila ay nasisira (their dreams and their ambitions in life are being destroyed) because they are being deceived to join the movement and become members of the NPA,” ayon kay Villacorta.

Aniya pa, marami ng mga magulang ang nakikipag-ugnayan ngayon sa NICA para tumulong na mabigo ang mga komunista sa kanilang recruitment activities.

“Tumutulong sila sa amin in our situational awareness and knowledge management, at napakalaking tulong nila,” aniya pa rin.

Nauna rito, sinabi ni Armed Forces of the Philippines (AFP) chief General Romeo Brawner Jr. na ang walang humpay na operasyon ng pwersa ng estado laban sa mga komunista ay naging napaka-epektibo para was akin ang aktibong New People’s Army (NPA) guerrilla fronts.

Base sa pinakabagong impormasyon mula sa military, ang bilang ng guerrilla fronts ng terrorist group ay bumaba na sa 11. (Daris Jose)

NAIS ni Pangulong Ferdinand Marcos Jr. na ang 10% ng government service vehicles ay maging electric powered.

‘Yes, targeting 10 percent of the fleet should be electric vehicles. Mayroon siyang pinasang inter-agency na led by the Department of Energy, and nandoon din iyong DBM (Department of Budget and Management) para maayos iyong procurement niya at para mag-comply,” ayon kay Energy Undersecretary Felix William Fuentebella sa press briefing sa Malakanyang, araw ng Martes.

”So when the President was looking into that, there was a thumbs up from DBM Secretary Amenah na it’s already in place,” aniya pa rin.

At sa tanong naman kung may timeline para sa mga government service, ang sagot ni Usec. Fuentebella, “yon nga, kasi iyong sa procurement timeline ‘no, ayaw kong makialam. I think every year kasi mayroon tayong procurement ‘no, so I just have to check on that. Sorry, hindi ko lang naano iyong timeline. Ayaw ko kasing magkamali ng bitawan ko.”

Sa kabilang dako, inatasan naman ni Pangulong Marcos ang DOE at ang lahat ng concerned agencies na bilisan ang implementasyon ng action plans at estratehiya para i-develop ang electric vehicle industry sa bansa. (Daris Jose)

MAGPAPATUPAD ang Pamahalaang Lungsod ng Navotas ng bagong iskedyul ng oras sa trabaho simula Mayo 2, 2024.

Ito’y matapos lagdaan ni Mayor John Rey Tiangco ang Executive Order (EO) No. JRT-016, na nagsasaad ng pagbabago ng oras ng trabaho sa pamahalaang lungsod mula 8am-5pm hanggang 7am-4pm alinsunod sa Metropolitan Manila Council (MMC) Resolution No. 24-08 , s. 2024.

“Apart from helping ease traffic congestion in Metro Manila, this change in work schedule will also give workers more time to spend with their families or pursue other meaningful endeavors,” ani Tiangco.

Ang mga departamento, opisina, at mga yunit na may shifting schedules tulad ng traffic management, emergency preparedness and response, at peace and order ay hindi sakop ng EO, upang matiyak ang patuloy na paghahatid ng serbisyo publiko.

Pananatilihin din ng mga coach ng NavotaAs Scholarship Program ang kanilang iskedyul, gayundin ang mga klase sa Navotas Polytechnic College at Navotas Vocational Training and Assessment (NAVOTAAS) Institute.

Sa lahat ng pampublikong pasilidad sa kalusugan sa lungsod, tanging ang health center sa Brgy. Ang Tanza 2 at ang Navotas City Hospital ang magpapatakbo sa kanilang karaniwang iskedyul ng trabaho.

Mahigpit ding hinikayat ni Tiangco ang mga barangay sa lungsod na maglabas ng mga katulad na executive order na nagpapatupad o nagbabago ng kani-kanilang oras ng trabaho alinsunod sa Resolusyon ng MMC. (Richard Mesa)

BILANG bahagi ng paggunita ng Solo Parents’ Day, namahagi ang Pamahalaang Lungsod ng Valenzuela ng cash subsidy, grocery gift certificates at nego-cart sa mga kwalipikadong solo parents na ginanap sa People’s Park Amphitheatre at WES Arena.

Nasa 4,583 rehistradong solo parents ang pinarangalan at kinilala sa kanilang katatagan sa pagpapalaki ng kanilang sariling pamilya, alinsunod sa City Ordinance No. 1087, Series of 2023, na nagdedeklara sa ikatlong linggo at ikatlong Sabado ng Abril ng bawat taon bilang Solo Parents’ Week at National Solo Parents’ Day

Sa isang linggong pagdiriwang, namahagi ang pamahalaang lungsod ng tulong pinansyal sa mga kwalipikadong 487 solo parents na nagkakahalaga ng PhP 1 Million sa ilalim ng Expanded Solo Parents Welfare Act o RA 11861.

Ayon sa batas, ang mga karapat-dapat na solo parents na kumikita ng minimum wage at mas mababa ay may karapatan sa PhP 1,000 cash subsidy kada buwan, kaya ang Valenzuela ang unang Lungsod sa National Capital Region ang namahagi ng nabanggit na benepisyo.

Bukod sa tulong pinansyal, pinangunahan din ni Mayor WES Gatchalian ang dalawang araw na pamamahagi ng PhP 500 grocery gift certificates sa mga solo parents sa lungsod at mga negosyo cart na tinatawag na nego-carts na nagkakahalaga ng PhP 30,000 bawat isa.

Ang Valenzuela LGU ay nagpahayag ng kanilang pangako na suportahan ang bawat miyembro ng Pamilyang Valenzuelano lalo na ang Solo Parents, at patuloy na tugunan ang kanilang mga pangangailangan at alalahanin sa pamamagitan ng pagbibigay ng iba’t ibang aktibidad at hakbangin.

Para sa mga solo parent na hindi pa nakapag-parehistro sa Valenzuela, hinihikayat sila ng pamahalaang pungsod na mag-sign up para sa Solo Parent ID kung saan maaari silang bumisita sa City Social Welfare and Development Office sa City Hall, o sa Solo Parents Valenzuela Office. (Richard Mesa)

PUMASOK sa isang kasunduan ang Pamahalaang Lungsod ng Navotas, kasama ang Council for the Welfare of Children (CWC) para sa pagpapatupad ng Makabata Helpline 1383 sa lungsod.

Nilagdaan ni Mayor John Rey Tiangco ang memorandum of understanding kasama si CWC undersecretary Angelo M. Tapales.

Sa ilalim ng MOU, gagawin ng lungsod ang Makabata Helpline bilang karagdagang serbisyo sa hotline na naa-access ng publiko para sa child-related concerns.

“Our city treasures its young population. Through the Makabata 1383, we encourage people, especially the youth, to report instances of child abuse and violence, and help to immediately resolve these cases,” saad ni Mayor Tiangco.

Ang CWC, sa pakikipagtulungan sa Navotas, ay naglalayon na gawing popular ang child helpline service at i-maximize ang mga operasyon nito upang makinabang ang mas maraming mga bata at pamilyang Pilipino.

Ang Makabata Hotline, na inilunsad noong Nobyembre 2023, ay binuo ng CWC upang magbigay ng plataporma para sa mga bata na mag-ulat ng anumang uri ng karahasan, pang-aabuso, at pagsasamantala.

Nilalayon din nitong tugunan ang paglabag sa mga karapatan ng bata sa pamamagitan ng agarang koordinasyon at prevention measures.

Dumalo rin sa seremonya sina Atty. Karen Gina Dupra, CWC Project Management Office Head, at Ms. Jennifer Serrano, City Social Welfare and Development Officer. (Richard Mesa)

IPINALABAS ng Malakanyang ang mga pangalan ng 13 bagong appointees kabilang na si dating Foreign Affairs at Justice undersecretary Brigido Dulay.

Opisyal na itinalaga ni Pangulong Ferdinand R. Marcos Jr. si Dulay bilang Inspector General ng Internal Affairs Service ng Philippine National Police (PNP).

Kasama rin sa listahan ang bagong apat na miyembro ng Bases Conversion and Development Authority Board of Directors na sina Maricris Carlos, Paul Christian Cervantes, Pablo De Borja at Bryan Matthew Nepomuceno. Si Larry Lacson ay itinalaga naman bilang Acting Administrator at miyembro ng National Food Authority councils.

Si Eric Zerrudo naman ay bilang National Commission for Culture and the Arts Executive Director.

Ang Cultural Center of the Philippines (CCP) ay mayroong tatlong Board of Trustees members, at ito ay Sina Felix Duque, Gizela Gonzales at Kaye Tinga.

Samantala, ang iba pang appointees ay sina Luz Jordana Jose bilang Director IV ng Department of Health at sina Arthur Ledesma at Romeo Prestoza bilang mga acting members ng John Hay Management Corporation Board of Directors. (Daris Jose)

UMABOT sa mahigit P.1 milyong halaga ng ilegal na droga ang nasamsam ng pulisya sa pitong hinihinalang drug personalities, kabilang ang dalawang lolo na malambat sa magkahiwalay na buy bust operation sa Navotas City.

Sa ulat ni Navotas police chief P/Col. Mario Cortes kay NPD Director P/BGen. Rizalito Gapas, nagsagawa ang mga operatiba ng Station Drug Enforcement Unit (SDEU) sa pangunguna ni P/Capt. Genere Sanchez ng buy bust operation sa Santillan St., Brgy. San Jose, bandang alas-2:02 ng madaling araw.

Kaagad dinamba ng mga operatiba sina alyas “Bayag” at alyas “JR” matapos umanong magsabwatan na bintahan ng P500 halaga ng shabu ang isang pulis na nagpanggap na buyer.

Ayon kay Capt. Sanchez, nakuha sa mga suspek ang nasa 5.4 gramo ng hinihinalang shabu na may katumbas na halagang P36,720.00 at buy bust money.

Nauna rito, natimbog namaman ng kabilang team ng SDEU ang dalawang tulak na lolo na sina alyas “Gani”, 62 ng Obando, Bulacan at alyas “Jojo’, 62 ng Brgy. Bangkulasi sa buy bust operation, alas-12:22 ng hating gabi sa Goldrock St., Brgy. San Roque.

Ani PSSg Ramir Ramirez, nakumpiska sa mga suspek ang humigi’t kumulang 5.6 grams ng hinihinalang shabu na nagkakahalaga ng P38,080.00 at buy bust money.

Dakong alas-2:33 ng madaling araw nang matiklo naman ng isa pang team ng SDEU sa buy bust operation sa Badeo 4 St., Brgy. San Roque sina alyas “Jessie”, 30, alyas“Jayson”, 43, at alyas “Andoy”, 38, pawang residente ng lungsod.

Nasamsam sa mga suspek ang nasa 4.5grams ng hinihinalang shabu na nagkakalahaga ng P30,600.00 at isang P500 bill na ginamit bilang buy bust money.

Mahaharap ang mga suspek sa kasong paglabag sa RA 9165 o Comprehensive Dangerous Drug Act of 2002. (Richard Mesa)

IPINAG-UTOS ni Pangulong Ferdinand Marcos Jr. sa Department of Energy (DoE) na kagyat na tugunan ang energy situation sa bansa kasunod ng red alert na deklarasyon ng National Grid Corporation of the Philippines (NGCP).

“In light of the recent Red and Yellow Alerts in the Luzon Grid, I have instructed the Department of Energy to closely monitor and coordinate with all stakeholders to address the situation,” ang sinabi ni Pangulong Marcos sa kanyang post sa X (dating Twitter).

Inatasan din ng Pangulo ang lahat ng ahensiya ng pamahalaan na “to set the standard in conserving energy and minimizing power consumption.”

“At this time, it is crucial that we all work together to ensure a stable power supply for the next couple of days. Let’s adopt energy-efficient practices and stand together to overcome this challenge,” dagdag na wika ng Chief Executive.

Sa kabilang dako, sinabi ng NGCP na ang grid ay kasalukuyang nasa ilalim ng red alert matapos na puwersahang itinigil ang 20 power plants na naging dahilan ng power interruptions sa ilang lugar.

Sa kabilang dako, ipinahihiwatig ng red alert status na ang power supply ay ‘insufficient’ o kapos na matugunan ang demand ng mga konsyumer at ang regulating requirement ng transmission grid.

Samantala, inanunsyo ng Meralco na maaari silang magpatupad ng one-hour manual load dropping (MLD) o rotating power interruptions sa pagitan ng alas- 2:00 ng hapon hanggang alas-4:00 ng hapon sa franchise area nito kasunod ng naging deklarasyon ng NGCP na red alert sa Luzon grid. (Daris Jose)

ANUNSIYO  ng Bureau of Immigration (BI) ang pagsasagawa nila ng second leg ng kanilang nationwide caravan sa Iloilo.

Ang Bagong Immigration Service Caravan ay isasagawa sa Seda Hotel sa  Iloilo ngayong Abril 17.

Ayon sa BI, layon nito na mabigyan ng maluwag na pribilehiyo sa mag serbisyo sa mga dayuhan sa piling lugar sa Pilipinas.

“We wish to bring our services closer to the people,” sabi ni  BI Commissioner Norman Tansingco   “Apart from our online services, we are also visiting key cities to facilitate immigration compliance,”  dagdag pa nito.

Ang nasabing service caravan ay iikot sa pangunahing rehiyon sa buong bansa at mag-aalok ng mabilis na pagpo-proseso para sa iba’t ibang transaksyon  kabilang ang tourist visa extensions, exit clearances, dual citizenship applications, at iba pang mga clearances.

Dahil  sa pagbibigay ng direktang serbisyo sa tao ay mababawasan ang mahabang pagpoproseso gayundin ang pagbiyahe.

Dagdag pa dito, ay maaari nang makapagsampa ng reklamo sa isang illegal na dayuhan a  mga pang-aabuso sa pamamagitan ng caravan.

“As part of our #ShieldKids Campaign, we have intelligence personnel joining our caravan to receive information from community members regarding foreign sexual predators and sex tourists that might be plaguing their area,”  dagdag pa ng BI Chief.

“This represents a significant milestone in our ongoing efforts to improve our services by making these more accessible, both online and offline,” ayon pa kay Tansingco.

“By bringing our services directly to the communities we serve, we aim to enhance accessibility, efficiency, and transparency in our operations, ultimately contributing to a safer and more secure Philippines,” dugtong pa ng BI Chief.

Ang caravan ay nagsimula sa Zamboanga City noong March 6 habang at ang Iloilo leg ay bukas mula alas-7 ng umaga hanggang l 5:30 ng hapon.

Hinikayat ng BI na samantalahin ang serbisyo nito na inaalok

Para sa karagdagang kaalaman o updates sa serbisyo ang mga aplikante ay maaring  bumisita sa  official website ng  Bureau of Immigration sa  www.immigration.gov.ph. GENE ADSUARA