MAY pangangailangan na madaliin ang “water security” sa Pilipinas, ayon kay Pangulong Ferdinand Marcos Jr.

Muling inulit ng Chief Executive ang direktiba nito na madaliin ang pagkompleto sa water projects sa bansa.

Kasalukuyan ngayong nasa Davao City ang Pangulo para pangunahan ang inagurasyon ng Davao City Bulk Water Supply Project.

Ito ay isa sa tatlong event na na gagawin sa balwarte ni dating Pangulong Rodrigo Roa Duterte.

”I continually stress the urgency of improving water security and directed agencies concerned to expedite the completion of all water projects across the country,” ang bahagi ng talumpati ni Pangulong Marcos.

Aniya pa, ang pagkakaputol ng water supply ”degrades quality of life and dampens economic activity.”

Layon naman ng water project na tugunan ang pangangailangan ng mahigit sa isang milyong Davaoeños at dagdagan ang tiwala sa groundwater sources sa pamamagitan ng paggamit sa Tamugan River, sinasabing nananatiling pinagkukuhanan ng tubig sa Davao District.

Ang public-private partnership (PPP) project sa pagitan ng Apo Agua Infrastructura, Inc. (Apo Agua), isang water subsidiary ng Aboitiz InfraCapital (AIC), at Davao City Water District (DCWD), ang water treatment facility ng proyekto ay pinapagana ng renewable energy mula sa sariling nitong run-of-river hydroelectric power plant.

Ang lahat ani Pangulong Marcos ng emergency, kakapusan sa tubig ang pinakamahirap na pigilan.

”It is, however, preventable – with foresight, right plans, united action, and strong political will,” ayon sa Chief Executive.

”Anticipating problems instead of letting them catch us by surprise is how we approach these challenges in the Bagong Pilipinas. We prepare for contingencies, solve problems, and defuse potential crises before they occur,” dagdag na wika nito.

Sa kabilang dako, ang unang event ay dinaluhan ng iba’t ibang opisyal ng pamahalaan kabilang na sina Department of Environment and Natural Resources (DENR) Secretary Ma. Antonia “Toni” Yulo-Loyzaga, Special Assistant to the President (SAP) Secretary Antonio Lagdameo at Presidential Communications Secretarry Cheloy Garafil, at Iba pa.

Iyon nga lamang ay kapansin-pansin na wala ang presensiya ni Davao City Mayor Sebastian ”Baste” Duterte sa naturang inagurasyon. (Daris Jose)

INAMIN ni Department of Interior And Local Government (DILG) Secretary Benhur Abalos Jr., na wala pa siyang naisusumiteng ‘short list’ ng posibleng maging susunod na hepe ng Philippine National Police (PNP).

Ito’y sa gitna ng nakatakda ng pagreretiro ni PNP Chief Dir Gen Benjamin Acorda sa March 31.

Sa press briefing sa Malakanyang, todo puri si Abalos kay Acorda na aniyay maraming nagawa sa PNP dahil sa malawak na karanasan nito.

Sa katunayan, sa naging paglalarawan ni Abalos sa naging trabaho ni Acorda sa PNP, “excellent job” na maging sa mga hinaharap na panahon ay mararamdaman ang mga nagawa nito sa kapulisan.

Samantala, sa darating na Disyembre 4, 2023 ang dapat sana’y retirement ni Acorda ngunit pinalawig pa ito ni Pangulong Marcos ng hanggang March 31 ngayong taon. (Daris Jose)

IPINAG-UTOS ni Department of Interior and Local Government (DILG) Secretary Benhur Abalos Jr. sa Philippine National Police (PNP) na gawin ang lahat ng makakaya para protektahan ang mga kabataang kababaihan at paigtingin ang implementasyon ng “Kuwarto ni Nene” program sa mga komunidad kung saan tumaas ang sexual abuse cases laban sa mga kabataang kababaihan.

“Rape is now the number one crime in some parts of the Philippines,” ayon kay Abalos.

“I was surprised na merong lugar na hindi nakawan, hindi cybercrime, kung hindi number one crime is rape,’’ aniya pa rin.

Ipinaliwanag naman ng Kalihim na ang “Kuwarto ni Nene” ay proyekto ng PNP na naglalayong protektahan ang mga kabataang kababaihan at tiyakin ang kanilang kaligtasan mula sa mga sekswal na mandaragit.

“I asked the PNP, we have this program, it’s called Kwarto ni Nene. Where we give out (building) materials para yung mga nagdadalaga, (dapat) may sariling kwarto na. Hinihiwalay na,” aniya pa rin.

Sa ilalim ng nasabing programa, sinabi ni Abalos na dapat na regular na binibisita ng mga babaeng pulis at social workers ang mga tinedyer na biktima upang i- check ang kanilang kapakanan.

Tinuran pa ni Abalos na kinokonsidera rin nila ang posibilidad na magpalabas ng polisiya na maghihikayat sa mga overseas Filipino workers (OFWs) na ipaalam sa kanilang barangay ang kanilang pag-alis.

Layon nito ay magsagawa ng regular na pagbisita ang barangay women officers, pulis at social welfare officials sa bahay ng OFWs at I-check ang situwasyon at kondisyon ng kanilang anak.

Sa kabilang dako, sinabi pa rin ng Kalihim na makikita sa 2022 National Demographic and Health Survey na ginawa ng Philippine Statistics Authority (PSA) na 17.5% ng mga kababaihang Filipina na may edad na 15 hanggang 49 ay may karanasan o nakaranas ng “physical, sexual at emotional violence”mula sa kanilang intimate partners.

“The Philippines continues to be the leading Asian country in closing the gender gap according to the 2023 Global Gender Gap Index Report by the World Economic Forum,’’ ayon kay Abalos. (Daris Jose)

TINATAYANG umabot na sa 200,000 household-beneficiaries ng Pantawid Pamilyang Pilipino Program (4Ps) ang inaabangang magtatapos mula sa programa ng Department of Social Welfare and Development (DSWD), sa darating na Setyembre.

“By September, mayroong mga around 200,000 na wala ng eligible children na automatic na mag-eexit sa program,” ayon kay 4Ps National Program Management Office (NPMO) Director Gemma Gabuya.

Sinabi ni Gabuya na ang pagtatapos ng pamilya sa 4Ps ay alinsunod sa Republic Act No. 11310, o mas kilalang bilang 4Ps Law, na nagsasaad na “a qualified household-beneficiary shall be deemed to exit from the program, when the last monitored child in the household turns 19 years old.”

Ipinaliwanag pa nito na ang exit date sa Setyembre ay nagkataon sa pagtatapos ng school year upang matiyak na ang mga sinusubaybayang mga bata ay nakumpleto na ang kanilang kasalukuyang grade level.

“To ensure that the exiting households will not slide back to poverty, the DSWD is working with other government agencies and local government units to provide livelihood opportunities and other interventions that will help meet the needs of the families,” ayon kay Gabuya.

Sa pagtatapos ng 200,000 household-beneficiaries, makakaya na ngayon ng DSWD na makapag-accommodate ng kahalintulad na bilang ng pamilya sa 4Ps.

“The new program beneficiaries will be extracted from the current list of waitlisted beneficiaries assessed by the Listahanan 3 or the National Household Targeting System for Poverty Reduction (NHTS-PR),” ayon kay Gabuya.

Ang 4Ps ay national poverty-reduction strategy at human capital investment program ng gobyerno ng Pilipinas na nagbibigay ng conditional cash transfers para mapahusay ang kalusugan, nutrisyon, edukasyon ng mga batang ang edad ay 18 paibaba.

Sa kasalukuyan, mayroong 4.4 million household-beneficiaries sa buong bansa. (Daris Jose)

PINASALAMATAN ni Vice President Sara Duterte si Pangulong Ferdinand Marcos Jr. dahil sa patuloy na pagtitiwala nito sa kanya.

Tiniyak ni VP Sara na ‘independent’ ang kanyang mga pananaw sa kanyang ama na si dating Pangulong Rodrigo Roa Duterte at kapatid na si Davao City Mayor Sebastian Duterte.

Sa isang kalatas, sinabi ni VP Sara na pinasasalamatan niya si Pangulong Marcos dahil patuloy na ipinagkakatiwala sa kanya ang Education portfolio sa Gabinete nito (Pangulong Marcos).

Kaya ang pakiusap ni VP Sara sa publiko ay igalang ang opinyon ng mga miyembro ng kanyang pamilya at sinabi na ang kanyang pagiging tapat ay “first and foremost” ay para sa bayan.

“Nagpapasalamat din ako kay Apo BBM (Bongbong Marcos) sa kanyang paggalang sa aking mga paninindigan, katulad na lang ng aking pagtutol sa ‘Pera kapalit ang pirma sa People’s Initiative’ dahil insulto ito sa kahirapan ng ating mga mamamayan at paglabag sa kanilang karapatang magpasya ng malaya,” ayon kay VP Sara.

Binigyang diin na nagpakita ng paggalang ang Pangulo sa iba, sinabi ni VP Sara na tama lamang na igalang din ng mga Filipino ang opinyon at paniniwala ng ibang tao kabilang na ang mga miyembro ng kanyang pamilya.

“May respeto ako sa mga pananaw at opinyon ni dating Pangulong Rodrigo Duterte pati na ng aking kapatid. Katulad ng posisyon ko sa maraming mga isyu, hindi kailangan na sumasang-ayon ako sa lahat ng mga ito. Pinalaki ako

ng aking mga magulang na may pagpapahalaga sa malayang pag-iisip at pagpapasya. Para sa akin, laging nangunguna ang katapatan ko sa paglilingkod sa bayan,” aniya pa rin.

Nito lamang nakaraang linggo ay itinalaga ni Pangulong Marcos si VP Sara bilang caretaker ng bansa habang nasa state visit ito sa Vietnam.

Habang pinagbibitiw naman ni Davao City Mayor Sebastian “Baste” Duterte si Pangulong Marcos sa kanyang puwesto.

Ayon sa alkalde, dapat magbitiw si Pangulong Marcos kung wala itong pagmamahal at mithiin para sa Pilipinas.

Matatandaan na unang dinaluhan ni VP Sara ang Bagong Pilipinas kick-off rally na isinagawa sa Quirino Grandstand sa lungsod ng Maynila araw ng Linggo.

Kung saan inilahad ni VP Sara ang commitment ng kaniyang pinamumunuang ahensiya, ang Department of Education (DepEd), para sa paghubog ng mga kabataang Pilipino.

Dumating din ang pangalawang pangulo sa isinagawang prayer rally sa Rizal Park sa lungsod ng Davao kung saan nagpahayag ng pasasalamat si VP Sara sa suporta hindi lang ng mga Dabawenyo kundi ng lahat ng Pilipino.

Partikular na sa laban ng mga Pilipino laban sa Charter Change kung saan ipinunto ng pangalawang pangulo na dapat manindigan ang Pilipino laban sa pagbabago sa Salitang Batas sa pamamagitan ng pera kapalit ng pirma para sa People’s Initiative (PI). (Daris Jose)

TINIYAK  ng mga lider ng Kamara na wala silang plano upang buwagin ang senado sa kanilang isinusulong na reporma sa Konstitusyon.

Ito ang sinabi nina Rizal Rep. Jack Duavit, ang lider ng Nationalist People’s Coalition (NPC) bloc sa Kamara, Deputy Speaker at Ilocos Sur Rep. Kristine Singson-Meehan, Senior Deputy Speaker at Pampanga Rep. Aurelio “Dong” Gonzales Jr., at Bataan Rep. Albert Garcia, ang secretary general ng National Unity Party (NUP).

Sinabi ng mga ito na ang pangamba na plano ng Kamara na buwagin ang Senado ay nasa isip lamang ng nagpapahayag nito.

Muli ring iginiit ng mga kongresista ang pagsuporta ng Kamara at ng liderato ni Speaker Ferdinand Martin Romualdez sa Resolution of Both Houses (RBH) No. 6 ng Senado na naglalayong amyendahan ang economic provision ng Konstitusyon.

Ang RBH No. 6 ay akda nina Senate President Juan Miguel Zubiri at Senadora Loren Legarda, at senator Juan Edgardo Angara. Ang panukala ay isinumite sa special subcommittee na pinamumunuan ni Angara.

“With regard to the fears and allegations that the House would want to abolish the Senate, we would just like to let everybody know that as far as our party is concerned, there is no way we will be voting in any form to remove our five senators. And if we are not going to remove our five senators, then the other 19 senators can be assured,” ani Duavit.

Sa Senado ang mga miyembro ng NPC ay sina Sen. Loren Legarda, Francis Escudero, Lito Lapid, Sherwin Gatchalian, at Joseph Victor Ejercito.

Si Singson-Meehan, na stalwart din ng NPC ay sumuporta sa pahayag ni Duavit.

Ayon sa mga kongresista, suportado nila ang pag-amyenda sa economic provision ng Konstitusyon upang mas malayang makapagnegosyo sa Pilipinas ang mga dayuhang mamumuhunan na pinagbabawalan na mag may-ari ng negosyo sa bansa.

“At at the same time when the economy gets better, alam mo ‘yung basic social services na binibigay natin, laging sinasabi ng mga people from our district na kulang. Kulang ‘yung TUPAD, kulang ‘yung AICS, pati ‘yung medical assistance sa hospitals. But when our economy gets better, ‘yung collections, ‘yung funds ng government, tumataas na rin,” sabi pa ng lady solon.

Iginiit naman ni Gonzales, stalwart ng Lakas-Christian Muslim Democrats (CMD), na hindi kasama ang political amendments sa isinusulong ng Kamara.

“Wala po kaming sinasabi na i-abolish natin ang Senado, guni-guni lang po nila ‘yan. Hindi po ‘yun totoo,” sabi ni Gonzales.

Umapela naman si Surigao del Norte Rep. Robert Ace Barbers, stalwart ng Nacionalista Party (NP) sa mga senador na maging mahinahon at iginiit nag kahalagahan ng pagkakaroon ng parliamentary courtesy sa pagitan ng Senado at Kamara.

Ganito rin ang sinabi ni Ako Bicol Party-list Rep. Zaldy Co, ang pangulo ng Party-List Coalition Foundation, Inc. (PCFI).

Nagpahayag din ng pagsuporta si House Majority Leader at Zamboanga City Rep. Manuel Dalipe sa RBH 6 ng Senado.

Ayon naman kay Camiguin Rep. Jesus Jurdin Romualdo, nahuhuli ang Pilipinas sa mga karatig-bansa nito sa paghikayat ng dayuhang pamumuhunan.

Iginiit naman nina Deputy Speaker at Quezon Rep. David “Jay-jay” Suarez at Agusan del Norte Rep. Jose “Joboy” Aquino II ang kahalagahan ng pag-amyenda sa economic provisions ng Konstitusyon upang madagdagan ang mga mapapasukang trabaho at kabuhayan ng mga Pilipino.  (Ara Romero)

SINABI ng China Coast Guard na gumawa ito ng “temporary special arrangements” upang makapagpadala ang Pilipinas ng tropa nito sa grounded World War II-era vessel sa pinagtatalunang katubigan.

Napaulat na nag-deploy ang Chinese coastguard ng kanilang vessels para pigilan ang misyon ng Pilipinas na mag-suplay ng tropa sa BRP Sierra Madre, na naging military outpost sa Ayungin Shoal, 190 km (118 miles) off Palawan.

Sa isang kalatas, sa official WeChat account, sinabi ng Chinese Coast Guard na pinapayagan nito ang kailangang suplay, subalit desidido rin itong depensahan ang soberanya at maritime rights ng China at interests sa shoal at katabing-katubigan.

“On Jan. 21, a small aircraft from the Philippines airdropped supplies to the illegally beached warship,” ang nasakasaad pa rin sa kalatas.

“The Chinese coast guard has followed up and monitored the situation in real time, controlled and dealt with it in accordance with laws and regulations, and made temporary special arrangements for the Philippines to replenish necessary daily supplies,” dagdag nito.

Sinasabi pa rin sa WeChat message na “relevant parties” sa Pilipinas ay sadyang inililigaw ang international opinion at binabalewala ang katotohanan, at hindi kaaya-aya para pagaanin ang tensyon sa South China Sea. (Daris Jose)

INABSWELTO ng Sandiganbayan si dating Makati City mayor Elenita Binay sa graft and malversation charges kaugnay ng mahigit P9.9 milyong halaga ng biniling medical equipment.

Nakalusot sa criminal lia­bility si Binay matapos hindi napatunayan ng proseku­syon ang kanyang “guilt beyond reasonable doubt.”

Kasama rin sa mga akusado sina dating Makati City officials Conrado Pamintuan at Jaime de los Reyes na hinatulan ng Sandiganbayan na makulong ng hanggang 8 taon at sinentensyahan din ng “perpetual disqualification” sa anumang posisyon sa gobyerno.

Ang kaso ay isinampa ng Ombudsman noong 2011 kaugnay ng umano’y irregularidad sa pagbili ng cryosurgical units na may volumetric pressure pumps sa halagang P9.9 milyon na hindi dumaan sa public bidding para sa Ospital ng Makati. (Daris Jose)

PERPEKTONG destinasyon umano ng dayuhang pamumuhunan ang Pilipinas dahil sa malakas na ekonomiya nito at mga repormang ipinatutupad para mas maging bukas ang ekonomiya kasabay ng magandang pagsasama ng mga miyembro ng Association of Southeast Asian Nations (ASEAN), ayon kay Speaker Ferdinand Martin Romualdez.

Sinabi ni Romualdez na bagamat magkakaiba ang kultura, wika, at pamamaraan ng mga miyembrong bansa ng ASEAN, nag-uugnayan ang mga ito upang matugunan ang mga hamon na kapwa nila kinakaharap.

“And that’s why it’s not such a big surprise that after the COVID pandemic we the ASEAN emerged as the bright spot in the global economy of course I’d like to put the Philippines up front,” ani Speaker Romualdez, isa sa mga panelist ng “Learning from ASEAN” session sa World Economic Forum Annual Meeting live panel discussion kung saan host ang CNN anchor na si Julia Chatterley noong Miyerkoles ng hapon (oras sa Switzerland).

Inaasahan na mananatili ang ASEAN bilang rehiyon na may pinakamabilis na pag-unlad ang ekonomiya sa mundo at magsisilbing malaking bahagi ng pag-angat ng Asia-Pacific sa susunod na dekada.

Nauna rito, sinabi ni Romualdez sa lider ng iba’t ibang international business groups sa isang breakfast roundtable discussion ang mga hakbang na gagawin ng Pilipinas upang alisin ang limitasyong sa dayuhang pamumuhunan na nakasaad sa Konstitusyon.

Inanunsyo rin ni Speaker  ang paglulungsad ng kauna-unahang sovereign wealth fund ng bansa—ang Maharlika Investment Fund (MIF).

Gagamitin ang MIF upang agad na magawa ang mga proyekto at programang kinakailangan ng bansa na magpapalakas sa ekonomiya, lilikha ng mapapasukang trabaho at magpapahupa ng kahirapan sa bansa.

Ang pondo ay estratehikong ilalagay sa mga sektor na magtutulak ng multi-generational growth, partikular sa sektor ng enerhiya, food security, physical connectivity, teknolohiya, at napapanatiling paggamit ng pambansang yaman.

Sinabi ni Maharlika Investment Corporation CEO Rafael Consing, Jr. na ginawa ang MIF na maging pangmatagalan at epektibo.

Dagdag pa nito, ang pamamahala sa MIF ay nakaayon sa pinakamahusay na kasanayan sa mundo kung saan tinitiyak na ito ay transparent, may pananagitan at sumusunod sa pinakamataas na pamantayan. (Ara Romero)

KINATIGAN ng Department of Budget and Management (DBM) ang ginawang pagtanggi ng Commission on Elections (Comelec) na inilaan para sa plebisito ng Charter change (Chacha) ang P12 billion na additional funding ng Komisyon sa ilalim ng 2024 national budget.

“It is not for the purpose of Charter Change but may be used for various activities of the COMELEC such as the preparation of national and local elections, overseas absentee voting, continuing registration, recall, special elections, referenda, and other initiatives,” ayon kay DBM Secretary Amenah Pangandaman.

Ayon sa Kalihim, may diskresyon ang Comelec na gamitin ang budget na isinama ng bicameral conference committee ng Kongreso para sa plebesito kung magdedesisyon ang gobyerno na isulong anumang pagbabago o maging ito man ay people’s initiative.

Sinabi naman ni Comelec Chairperson George Garcia, na nang ibinigay sa kanila ang pondo ay wala naman ang alingasngas tungkol sa People’s Initiative.

Binigyang diin ni Garcia na sinikap lamang nilang maibalik ang P17.4 billion na tinanggal sa kanila sa national budget, subalit P12 million lang ang naaprubahan.

Kamakailan ay kinumpirma ni Garcia na humirit ang poll body ng ibalik ang tinapyas sa kanilang pondo para sa pagsasagawa at pangangasiwa sa mga eleksyon, referenda, recall votes, at plebesito.

Sinabi pa rin niya na nauna nang naglaan ang DBM ng P2-billion budget para sa Comelec sa 2024 National Expenditure Program (NEP), Sinasabing P17.4 billion na mas mababa sa paunang panukala na P19.4 billion. (Daris Jose)