Kasabay ng pagpapatupad ng alert level 3 sa National Capital Region (NCR), mahigpit na ipatutupad ng Department of Transportation (DOTr) ang istriktong basic health protocols sa mga transportasyon kabilang na ang mga public utility vehicles (PUVs).

“I am ordering all transport sectors to strictly enforce the health and safety protocols in order to help prevent the spread of COVID-19,” ayon kay DOTr Dec. Arthur Tugade para matiyak ang kaligtasan ng mga komyuter o mananakay.

Inatasan ni Tugade ang mga enforcers mula sa Land Transportation Office (LTO), Land Transportation Franchising and Regulatory Board (LTFRB), at train marshals ng lahat ng railway lines na tiyaking naoobserbahan ang tamang physical distancing sa loob ng mga pampublikong transport vehicles at sa loob ng mga transport terminals.

Pinatitiyak ni Tugade sa mga enforcers at marshals na lahat ng mga commuters na pumapasok sa terminals at sumasakay sa mga public transport ay gumagamit ng face mask at paalalahanan ang mga ito na huwag mag-usap o kumain habang nasa loob ng mga tren.

“Huwag tayong maging kampante. Ang virus ay nandito pa rin, kaya ugaliin pa rin natin na magsuot ng face masks lalo na sa loob ng pampublikong transpor­tasyon. Huwag makipag-usap o kumain habang nasa loob ng sasakyan. Sundin din natin ang tamang physical distan­cing,” ayon kay Tugade.

Inatasan din ni Tugade ang mga public transport operators na tiyakin ang kanilang mga sasakyan ay ligtas at maayos na na-disinfect.

Maging ang mga commu­ters ay hinikayat ni Tugade na maging vigilante o mapagbantay laban sa mga taong lumalabag sa health protocols, dahil hindi naman aniya sa lahat ng pagkakataon ay nakabantay ang mga enforcers at transport marshals. (Daris Jose)

Nakatakdang talakayin ng Metro Manila Council ang mga terms para sa “enhanced vaccination mandate” na magbibigay sa mga fully vaccinated nang indibidwal kontra COVID-19 ng mas maraming mobility at access privileges.

Ayon kay MMDA chairman Benhur Abalos, pinagsasama-sama pa nila ang mga polisiya mula sa iba’t ibang bansa na maari nilang gayahin at maipatupad sa National Capital Region kung saan ang COVID-19 reproduction number ay tumaas sa 4.05 at ang positivity rate naman ay pumalo na sa 28 percent.

Kaya naman target aniya ng mga Metro Manila mayors na i-maximize ang vaccination status ng mga tao gayong hindi naman lahat ay maaring pilitin na magpabakuna kontra COVID-19.

Noong Miyerkules, sinabi ni Abalos na inaprubahan ng Metro Manila Council ang resolusyon na bumunuo sa isang technical working group na siyang mangunguna sa pag-aaral kasama ang IATF. (Daris Jose)

SUGATAN ang isang magkapatid matapos umanong pagtripan barilin ng tatlong lalaki, kabilang ang isang menor-de-edad na pinaniniwalaang mga lasing sa Malabon City, kamakalawa ng gabi.

Ginagamot sa Valenzuela Medical Center sanhi ng tinamong mga sugat sa katawan si Joemarie Tuazon, 18, construction worker at kanyang kapatid na si Miguel Angelo, 16, kapwa ng East Riverside, Araneta Village Subdivision, Bryg. Potrero.

Ayon kay Malabon police chief P/Col. Albert Barot, isa sa mga suspek na edad 16-anyos ang naaresto ng mga tauhan ng Sub-Station 1 sa follow-up operation habang pinaghahanap pa ng mga operatiba ng Follow-Up Unit si Ivo Baste Martin, 18, ng Brgy 142, Bagong Barrio, Caloocan City at isa pang hindi kilalang kasama ng mga ito.

Sa imbestigasyon nina P/SSgt. Diego Ngippol at P/SSgt. Mary June Belza, habang naglalakad ang magkapatid sa kahabaan ng East Riverside, Araneta Village Subdivision pauwi dakong alas-9:40 ng gabi nang sundan sila ng mga suspek.

Nang mapansin ng mga biktima na sinusundan sila ay tinangka ng mga ito na iwasan ang mga suspek subalit, isa sa tatlo ang naglabas ng homemade shotgun o “sumpak” at pinaputukan ang magkapatid.

Kahit sugatan, nagawa pang makatakbo ng mga biktima hanggang sa makahingi sila ng tulong sa nagpapatrolyang mga pulis na naging dahilan upang mabilis na tumakas ang mga suspek. (Richard Mesa)

NALAMBAT ng mga awtoridad sa isinagawang manhunt operation ang isang delivery rider na wanted dahil sa kasong murder sa Malabon City, kamakalawa ng gabi.

Kinilala ni Malabon police chief Col. Albert Barot ang naarestong akusado na si Jomael Pagyunan, 42, delivery rider at residente ng No. 45 Doña Ata, Constantino St. Brgy. Baritan.

Ayon kay Col. Barot, nakatanggap ang mga operatiba ng Warrant and Subpoena Section (WSS) sa ilalim ng pangangasiwa ni PLT Joseph Alcazar ng impormasyon mula sa kanilang informant na nakita ang akusado sa Brgy. Concepcion.

Bumuo ng team ang WSS sa pangunguna ni PSMS Armando Isidro, kasama ang 4^th MFC RMFB NCRPO sa pamumuno ni PMAJ Ronilo Aquino saka ikinasa ang joint manhunt operation na nagresulta sa pagkakaaresto kay Pagyunan sa Gov. Pascual Brgy. Concepcion dakong alas-9:45 ng gabi.

Ani PLT Alcazar, si Pagyunan ay danakip sa bisa ng warrant of arrest na inisyu ni Hon. Josie Rodil, Presiding Judge, RTC Branch 293, Malabon City para sa kasong Murder. (Richard Mesa)

DALAWANG hinihinalang drug personalities, kabilang ang isang grab driver ang nakuhanan ng mahigit P.1 milyon halaga ng shabu matapos masakote sa isinagawang buy bust operation ng pulisya sa Valenzuela City, kamakalawa ng gabi.

Kinilala ni Valenzuela Police Station Drug Enforcement Unit (SDEU) chief PLT Joel Madregalejo ang naarestong mga suspek na sina Vhal Ramos, 38, grab driver at Jogel Co, 36, driver ng 532 Fe St., Don Pedro, Brgy. Marulas.

Sa report ni SDEU investigator PCpl Pamela Joy Catalla kay Valenzuela police chief Col. Ramchrisen Haveria Jr., dakong alas-10 ng gabi nang magsagawa ang mga operatiba ng SDEU sa pangunguna ni PLT Madregalejo ng buy bust operation sa bahay ni Ramos sa No. 15, Palo Alto St.,  Brgy. Marulas.

Kaagad inaresto ng mga operatiba ang mga suspek matapos bentahan ng isang plastic sachet ng shabu na nasa P3,000 ang halaga si PSSg Robbie Vasquez na umakto bilang poseur-buyer.

Nakumpiska sa mga suspek ang tinatayang nasa 20 grams ng hinihinalang shabu na may standard drug price P136,000.00, buy bust money na isang tunay na P500 bill at limang pirasong PP500 boodle mmoney, P300 cash, coin purse at 2 cellphones.

Nahaharap ang mga naarestong suspek sa kasong paglabag sa RA 9165 o Comprehensive Dangerous Drug Act of 2002. (Richard Mesa)

PITO katao ang arestado matapos magdulot ng gulo at muntikan nang makabaril ng isang alagad ng batas sa Tondo , Maynila kagabi.

Ayon sa Manila Police District (MPD), kinilala ang mga suspek na sina Vicente Ubias  Palacpac, Ruben Diño , Bañez,  Flaviano Aron  Jr,  Eduardo Ubias, Richard Melo , Agrifino Esteroza Jr  at  Robert Badong.

Sa imbestigasyon, nakatanggap ng sumbong ang barangay Tanod na si Ronald Cusay ng Brgy.101 kaya humingi ng tulong sa mga awtoridad .

Pagsapit sa kahabaan ng Mel Lopez Blvd sakop ng nasabing barangay, inabutan ng mga operatiba ang mga suspek na nag-iinuman at nanggugulo.

Habang pinapakalma ni PCpl Marvin Aguilar  ang grupo partikular si Palacpac nang bigla nitong suntukin ang naturang pulis dahilan para matumba at saka tinangkang barilin ngunit hindi pumutok.

Nagkaroon naman ng pagkakataon si Aguilar na paputukan sa ibang bahagi ng katawan si Aguilar upang hindi na makapanlaban pa.

Agad namang dinala sa ospital ang suspek upang malapatan ng lunas ang tinamong tama ng bala habang ang kanyang mga kasamahan ay binitbit na sa istasyon ng pulisya.

Mahaharap sa kasong  Direct Assault, Attempted Murder, RA 10591, Breach of Peace at RO 5555 ang mga suspek. GENE ADSUARA

KULONG ang pitong hinihinalang drug personalities matapos maaresto sa magkahiwalay na buy bust operation ng pulisya sa Valenzuela City.

Sa report ni PSMS Fortunato Candido kay Valenzuela police chief Col. Ramchrisenchristena Jr., dakong alas-2:20 ng madaling araw nang magsagawa ang mga operatiba ng Station Drug Enforcement Unit (SDEU) sa pangunguna ni PLT Joel Madregalejo ng buy bust operation sa No. 1169 Sta Monica St., Ugong na nagresulta sa pagkakaaresto kina Aldrin Pablo alyas “Ade”, 29, Julius Alaan alyas “Tata”, 43, Mario Luis Buncio III alyas “Baba”, 31 at Lorens Rey Silvaña, 24.

Nakumpiska sa kanila ang tinatayang nasa 10 grams ng hinihinalang shabu na may standard drug price P68,000, P500 marked money, P900 cash, at dalawang cellphone.

Nauna rito, dakong alas-12:10 ng madaling araw nang masakote din ng kabilang team ng SDEU sa buy bust operation sa Galas St., Brgy. Bignay si Gemar Senillo, 29. Nakuha sa kanya ang nasa 7 grams ng hinihinalang shabu na may standard drug price P47,600.00, P500 buy bust money, P150 cash, cellphone at coin purse.

Sa Brgy. Marulas, natimbog din ng isa pang team ng SDEU sina John Loteriña alyas “Jan-Jan”, 47 at Ruby Loteriña, 36, matapos bentahan ng P300 halaga ng shabu ang isang police poseur-buyer sa buy bust operation sa F. Bautista St., dakong alas12:05 ng hating gabi.

Narekober sa mga suspek ang nasa 5 grams ng hinihinalang shabu na tinatayang nasa P34,000 ang halaga, buy bust money, coin purse at cellphone.

Nahaharap ang naarestong mga suspek sa kasong paglabag sa RA 9165 o Comprehensive Dangerous Drug Act of 2002. (Richard Mesa)

Patay ang isang tattoo artist matapos barilin ng isa sa dalawang hindi kilalang mga suspek sa harap ng kanyang bahay sa Navotas City, kamakalawa ng hapon.

Kinilala ni Navotas police chief Col. Dexter Ollaging ang biktima na si Ryusi Soriano alyas “Adjong”, 25 ng 19 Pat Buntan, Brgy. San Roque.

Patuloy naman ang follow up operation ng pulisya para sa posibleng pagkakilanlan at pagkakaaresto sa mga suspek habang inaalam pa ang motibo sa insidente.

Sa inisyal na imbestigasyon ni PSSg Reysie Peñaranda, dakong alas-4:15 ng hapon, nakatayo ang biktima sa harap ng kanilang bahay nang isa sa mga suspek na nakatayo sa harap niya ang naglabas ng baril at walang sabi-sabing binaril siya sa katawan na nagresulta ng kanyang kamatayan.

Matapos ang pamamaril, tumakas ang mga suspek patungong Judge A Roldan Street habang agad namang nagsagawa ng dragnet operation ang mga tauhan ng San Roque Police Sub Station 2 at SWAT team subalit, hindi nila naaresto ang mga salarin. (Richard Mesa)