2020 February 25 Archive - People's Balita

May 16, 2024
Search in People's Balita
Ang Diyaryong Pinagkakatiwalaan

Archive for February 25th, 2020

‘Di kami perpekto, pero wala kaming nilabag sa batas’ – ABS-CBN exec

Posted on: February 25th, 2020 by @peoplesbalita No Comments

Pinabulaanan ni ABS-CBN President at CEO Carlo Katigbak na wala silang nilabag na batas kabilang ang anumang probisyon sa kanilang prangkisa na pinatotohanan naman ng dalawang regulator ng pamahalaan.

Kahit nangako silang magsilbi ng tunay, kinikilala naman ang kumpanya na hindi sila perpek-tong organisasyon na nagka-kamali na puwedeng itama.

“While our commitment to serve is genuine, we also acknowledge that we are not a perfect organization. Where we have shortcomings, we acknow-ledge them, and we work to correct them. May pagkukulang man kami, mas matimbang ang aming adhikain na makapag-lingkod,” ayon kay Katigbak.

Ganunpaman, sinabi pa ni Katigbak na wala silang nilalabag na batas kaya’t nagpasalamat ang opisyal sa Senate committee on public services na pinamumunuan ni Senador Grace Poe sa pagtawag sa pagdinig upang maibahagi ang kanilang saloobin.

“We would also like to state that we have not broken the law or violated any of the provisions of our franchise. We thank the Senate for inviting us today, and we welcome the opportunity to shed light on the issues that have been raised against us,” ani Katigbak.

Nagpasalamat naman ni Katigbak sa mamamayan at mga mambabatas sa pagsuporta sa pagbibigay ng panibagong prangkisa sa ABS-CBN Corporation.

“We are grateful for the many members of Congress and the Senate, spanning many parties and sectors, who have supported bills that would permit us to keep serving the Filipino community. We appreciate the statements from many individuals and organizations here and abroad who have voiced support for our renewal. Thank you to our colleagues from all over the industry for unselfishly and graciously showing support—we are forever grateful,” ayon kay Katigbak.

Samantala, pinatotohanan naman ng Bureau of Internal Revenue (BIR) at Securities and Exchange Commission (SEC), na walang nilabag na batas ang ABS-CBN at regular na nagba-bayad ng buwis kada taon.

Sinabi ng kinatawan ng SEC at BIR na tinutupad ng kumpanya ang regulasyon taliwas sa alegasyon ng ilang sector na ibinato sa network.

“They are regularly filing and paying their taxes for the past number of years,” ayon kay Simplicio Cabantac, Jr., head ng BIR Large Taxpayers Service.

Hindi sana ilalantad ng BIR ang tax payment dulot ng privacy laws, pero kalaunan, inilantad din ito na nagsasabing nagbayad ang ABS-CBN ng P14.398 bilyon mula 2016 hanggang 2019.

“Hindi kabilang dito ang income tax na babayaran sa Abril 15,” ayon kay Cabantac.

Hindi rin kasali dito ang ibinayad ng income tax mula sa artista, empleyado at talents ng kumpanya.

Sinabi ni Katigbak na nagbayad ang kanilang kumpanya ng P8.859 bilyon sa withholding tax mula sa empleyado mula 2009 hanggang 2018.

Ayon naman kay SEC Commissioner Ephyro Luis Amatong na wala siyang nalalaman na insidenteng may paglabag ang network o may reklamo laban sa ABS-CBN sa naturang komisyon. (Daris Jose)

Lalaki timbog sa shabu at panghoholdap sa nene

Posted on: February 25th, 2020 by @peoplesbalita No Comments

ARESTADO ang isang lalaki matapos makuhanan ng shabu at panghoholdap sa isang batang babae sa Valenzuela city, kamakalawa.

Nahaharap sa patung-patong na kaso ang naarestong suspek na nakilalang si Enrique Beranio Jr, 29, ng Bagbaguin, Caloocan city.

Sa nakarating na ulat sa bagong hepe ng Valenzuela City Police na si P/Col. Fernando Ortega, alas-11:50 ng tanghali, nagsasagawa ng Oplan Galugad ang mga tauhan ng Valenzuela Police Community Precinct (PCP)-8 sa pangunguna PEMS Ronaldo Ruiz, kasama si PCpl Rafaelito Santos at Pat. Mark Anthony Gatchalian sa Brgy. Mapulang Lupa, nang ipaalam sa kanila ng concerned citizen ang hinggil sa kahina-hinalang motorsiklo na ibinibenta ng suspek sa Orosco Purok 4.

Nang puntahan ng mga pulis, hinanapan nila ng ID ang suspek subalit, wala itong naipakita at napag-alaman sa papeles ng motorsiklo na nakapangalan ang motor sa ibang tao.

Dito, naghinala ang mga pulis kaya’t inatasan nila ang suspek na ilabas ang laman ng compartment ng motorsiklo at nadiskubre nila ang isang patalim, dalawang driver’s license na nakapangalan sa magkaibang tao at limang plastic sachets na naglalaman ng hinihinalang shabu na naging dahilan upang arestuhin ni PCpl Santos at Pat. Gatchalian ang suspek.

Nauna rito, alas-8 ng Linggo ng gabi nang harangin din umano ng suspek na sakay sa nasabing motorsiklo ang dalawang batang babae malapit sa naturang lugar saka tinutukan ng patalim ang isa at tinangay ang cellphone ng bata kung saan positibo siyang kinilala ng biktima.

Inaalam pa ng mga pulis kung nakaw ang dalawang motorsiklo ng suspek at kung may kaugnayan siya sa isang suspek na unang naaresto sa robbery snatching sa Brgy, Lawang Bato matapos ang isa sa driver’s license na narekober sa kanya ay nakapangalan sa may-ari ng motorsiklo na narekober sa na nadakip na suspek ng robbery snatching at carnapping. (Richard Mesa)

DEPRESYON AY KAMATAYAN

Posted on: February 25th, 2020 by @peoplesbalita No Comments

NITONG nakalipas na linggo, halos sunud-sunod ang naiulat na kaso ng pagpapakamatay na kabilang sa pinakahuling naitala ay ang estudyanteng lalaki na tumalon mula sa pinakatuktok ng gusali ng isang city hall.

Tulad ng inaasahan, mabilis na kumalat ang balita sa pamamagitan ng social media kung saan bukod sa mga larawan ay may video pa ng insidente na nagpasalin-salin sa iba’t ibang account ng mga tao.

Sa huling pag-aaral ng World Health Organization (WHO), isang tao umano ang nagpapatiwakal kada 40 segundo at isa ang Pilipinas sa may pinakamataas na kaso ng depresyon sa Southeast Asia, isa sa mga nakaaapekto sa halos tatlong milyong Pinoy na nauuwi sa suicide.

Nakapanlulumo at sobrang bigat sa pakiramdam na habang may ibang nakikipaglaban para mabuhay ay meron namang tila ganu’n lang kadaling isuko ang buhay.

Kaya patuloy ang panawagan mula sa mga awtoridad hanggang sa ating simpleng mamamayan, lalo na tayong mga magulang, bigyan natin ng pansin ang ating mga anak. Alamin natin ang mga senyales na posibleng dumaranas na sila ng depresyon. Kumustahin natin sila.

Ganundin, bilang kaibigan, maglaan tayo ng oras para sa kakilalang nangangailangan ng makakausap, mapaghuhugutan ng lakas ng loob, magpapaunawa na kahit gaano kahirap o kagulong mabuhay, biyaya pa rin ito na minsang ipinagkatiwala sa atin ng Diyos.

At sa‘yo na gusto nang sumuko sa buhay at nakakaisip nang magpakamatay, maraming salamat dahil nariyan ka pa rin at lumalaban. Kung pakiramdam mo, iniwan ka na ng lahat, may ‘Hopeline’, ‘ika nga, one call away lang, pakikinggan, papayuhan at tutulungan ka nila, anuman ang iyong pinagdaraanan.

Pahalagahan natin ang buhay, napakaraming bagay ang kaya nitong ibigay, huwag tayong mawalan ng pag-asa.

Workers ng Honda nag-rally, alalay ng gobyerno aasahan

Posted on: February 25th, 2020 by @peoplesbalita No Comments

KINALAMPAG ng mga manggagawa ng Honda Cars Philippines Inc. ang Japanese Embassy sa Pasay City kahapon (Lunes, Pebrero 24) matapos ianunsiyo noong weekend ang plano ng Honda na isara ang planta nito sa Sta. Rosa, Laguna.

Nag-vigil sa loob ng planta ang ilang mga manggagawa ng Honda noong Sabado nang ianunsiyo sa kanila ang desisyon na isara ang planta sa Marso 25, 2020.

Kinondena ng Lakas Manggagawang Nagkakaisa sa Honda-OLALIA-KMU ang pagsasara at sinabing trinaydor sila ng management. May bakas sa HCPI ang mga Ayala at ang mga Yuchengco na kapwa may 15% na interes sa kompanya.
Samantala, agad pinakikilos ni House Committee on Ways and Means Chairman at Albay Rep Joey Salceda ang mga ahensya ng pamahalaan na na alalayan ang mga manggagawang mawawalan ng trabaho sa pag-pullout ng operasyon sa bansa ng Honda, Nokia, Wells Fargo at Nissan.

Iminungkahi ni Salceda na mabigyan ng unemployment insurance ang mga apektadong empleyado o opsyon na gamitin ang kanilang naideposito sa SSS habang naghahanap ito ng bagong mapapasukang trabaho, ikalawa ay isama ang mga manggagawa sa Tulong Panghanapbuhay sa Ating Disadvantaged/Displaced Workers (TUPAD) ng gobyerno at ikatlo ay isailalim sa skills retraining ng TESDA ang mga manggagawa upang magkaroon ng bagong “set of skills”.
Nilinaw naman nito na walang kinalaman ang gobyerno sa pull-out ng mga kumpanya.

Sinabi ni Salceda na ang problema ng Honda Philippines ay “competitiveness-related” dahil hindi ito makasabay sa kakumpetensya nito sa car industry dahil masyadong mahal na presyuhan ng ibinibentang sasakyan kumpara sa iba, habang ang Wells Fargo ay pinagmulta ng $3 billion ng US federal authorities, US Department of Justice at US Securities and Exchange Commission kaya nagkaroon ng downsizing sa kanilang global operations.

Habang ang Nokia ay matagal nang nalulugi dahil sa market competition habang ang Nissan naman ay nasa peligro na rin na magsara bunsod nang pagbaba na rin ng kanilang sales at problema mismo sa pamamalakad sa loob ng kompanya.

Giit ni Salceda na pag-aaralan ng Kamara ang national factors sa pagsara ng mga kumpanya subalit sa inisyal na evaluation ay lumilitaw na problema sa operasyon abroad ang nag-contribute para isara ang operasyon sa bansa kaya sa panig ng gobyerno ay ang national concern ngayon ay ang mga apektadong manggagawa.

“It appears that the problems these firms had were imported from abroad. In any case, we are studying the issues” pagtatapos pa ni Salceda.

Kaugnay nito, kahapon din ay sinubukan nang kausapin ng Department of Labor and Employment (DOLE) at ng Department of Trade and Industry (DTI) ang Honda Cars Philippines para himukin na ituloy ang operasyon ng kanilang planta sa Laguna. (Ara Romero)

Cayetano sa Senado: Pa-epal lang kayo sa ABS-CBN franchise

Posted on: February 25th, 2020 by @peoplesbalita No Comments

Sa isinagawang pagdinig ng Senado kahapon (Lunes) sa usapin ng renewal ng prangkisa ng ABS-CBN, sinabi ni House Speaker Alan Peter Cayetano na marami lang umano ang gustong pumapel o umepal.

Bagama’t wala namang direktang pinatamaan si Cayetano ngunit una na itong sinita si Senadora Grace Poe, chair ng public service committee ng Senado, nang ipahayag nito ang planong pagdinig ng komite sa naturang usapin.
Muling pinaninindigan ni Cayetano na malinaw na nakasaad sa Konstitusyon na ang usapin sa prangkisa ay eklusibong manggagaling sa Kamara.

“Ang stand ko na paulit-ulit kong sinasabi na malinaw na malinaw sa Konstitusyon, (franchise) shall exclusively originate from the House,” ayon kay Cayetano.

Dahil dito, hindi niya makita ang rason ng Senado sa ginawa nitong pagdinig gayong malinaw sa Konstitusyon na dapat sa Kamara ito magmumula.

Bukod dito, sinambit ni Cayetano na hindi rin kailangang apurahin ang pagtalakay nito dahil hindi naman magsasara ang naturang TV network kahit na mag-expire na ang prangkisa nito sa Marso 30 at ito’y binibigyan niya umano ng kasiguraduhan.

Kaya naman mariing sinabi nito na malinaw lamang na marami lang ang gusto umapel o gumawa ng eksena o sumipsip sa TV network.

“We’ve said from the start the reason why we think it’s important but not urgent dahil hindi naman tayo papayag na there will be a single minute na hindi magbo-broadcast ang ABS-CBN, ang problema maraming gustong umepal, maraming gustong maging part ng discussion, maraming nagpo-propose, panay what if, what if?,” giit pa ni Cayetano.
Ayon pa sa House Speaker, kaya nilang panindigan ang kanilang sinasabing hindi magsasara ang TV network.
“So nung sinabi naming hindi magsasara, ‘yan ang paninidigan namin,” dagdag ni Cayetano.

No. 24 sa jersey nina Ravena, Manuel aprub sa PBA

Posted on: February 25th, 2020 by @peoplesbalita No Comments

PINAYAGAN na sina Vic Manuel at Kiefer Ravena ng PBA na baguhin ang kanilang jersey number sa pagsisimula ng season-opening ng Philippine Cup bilang tribute sa kanilang idolong si Kobe Bryant.

Sinabi ni Commissioner Willie Marcial na dapat magsabi ang mga manlalaro at ibang mother ballclubs sa liga tungkol sa plano nilang pagpapalit upang makagawa ng adjustment bago ang season opener.

“I-notify lang nila ng mas maaga yung liga para mailagay sa official roster yung bagong jersey number nila,” pahayag ni Marcial.

Dagdag nito, dapat makipag-ugnayan ang PBA properties at mother ballclubs nina Ravena at Manuel tungkol sa naturang pagpapalit upang makagawa ng adjustments lalo na sa team merchandise.

Dala ni Manuel ang No. 87 na numero sa Aces bilang tribute sa kanyang anak na ipinanganak noong Agosto 7 habang No. 15 naman ang ginagamit ni Ravena mula pa noong high school ito.

Buong pagmamalaki namang ipinakita ni Manuel ang No. 24 na jersey na isinuot niya sa katatapos lang na Phoenix Super Basketball Tournament.

“Ito na suot ko na ‘yung (no.) 24. Binigyan na ako ng no.24. Sinabi ko na kay coach Franco (Atienza) at management na magpapalit ako ng numero,” pahayag nito.

“Sobrang idol ko kasi yun si Kobe,” dagdag pa ni Manuel na ikatlong beses nang nagpalit ng jersey number.
Dati na nitong sinuot ang No. 4 para sa Aces ngunit pinalitan niya ito ng 87 dahil palagi umano siyang nai-injure kapag ginagamit niya ito sa Aces. (REC)

PSC: PAGPILI NG ATLETANG PINOY, SASALANG SA KOMITE

Posted on: February 25th, 2020 by @peoplesbalita No Comments

BINUO ang Review Committee para mangasiwa sa pagpili ng Philippine Sports Hall of Fame member ngayong taon.

Ayon kay Philippine Sports Commission (PSC) chairman William “Butch” Ramirez, malaki ang tulong na naibibigay ng mga sports media practitioners sa gagawing selection process.

“It is for this reason that the PSC, for the longest time, has been seeking the help of our partners from the sports media in the evaluation process of the Hall of Fame. We recognize their knowledge of the history of our country’s sports legends,” aniya.

Nakasaad sa R.A. No. 8757 na kilala din bilang PSHOF Act, na tanging ang Screening Committee na binubuo ng PSC Chairman, Philippine Olympic Committee (POC) President, Games and Amusement Board (GAB) Chairman, at dalawang iyembro ng NSA na may pagkilala ng POC at dalawang miyembro buhat sa mga pribadong sektor ang tanging may karapatan na mamili ng mga pararangalan.

Samantala, nabuo naman ang review committee noong panahon pa ni dating PSC chairman Harry Angping taong 2010 kung saan pag-aaralan ng nasabing komite kung karapat dapat nga ba na mapabilang sa Hall of Fame ang nasabing atleta na mapipili.

Pitong miyembro ang bubuo sa naturang kumite na magmumula buhat sa iba’t ibang media outfit na nagkokober ng sports.

Gayunman, hindi pa pinapangalanan ang mga miyembro ng nasabing kumite gayung pinag-aaralan ng mga namumuno ang pagbuo dito.

Nakatakda naman simulan ang nominasyon para sa posibleng parangalan ngayong unang araw ng Marso.

Villanueva sa DOLE: 700 empleyado ng Honda, tulungan

Posted on: February 25th, 2020 by @peoplesbalita No Comments

Nanawagan si Senador Joel Villanueva sa Department of Labor and Employment na tulungan ang 700 trabahador ng Honda dahil sa napipintong pagsasara ng kanilang planta sa Sta. Rosa Laguna.

Ayon kay Villanueva, chairman ng Senate Committee on Labor, Employment and Human Resource Development, naka-kabahala aniya ang pagsasara ng Honda plant dahil bukod sa trabahong mawawala, ang mga pamilya rin ng mga ito ang maaapektuhan.

“Nakakabahala po ang nakaambang pagkawala ng mga trabahong nandito na katulad ng 700 na trabahong apektado sa pagsara ng Honda car manufacturing facility sa Sta Rosa, Laguna matapos ang halos tatlong dekada na operasyon,” sabi ni Villanueva.

“Maliban sa 700 na trabahong mawawala, 700 na pamilya rin ang maapektuhan nito,” dagdag pa nito.
Sabi ni Villanueva, dapat tiyakin ng DOLE na matutulungan nila ang mga manggagawa ng Honda na makahanap ng malilipatang trabaho sa oras na huminto na nga ang operasyon nito.

“Tinatawagan po natin ang Department of Labor and Employment (DOLE) at ang Department of Trade and Industry (DTI) na siguraduhing mapanatili ang mga trabahong andito na at kaagad na tugunan ang mga pangangailangan ng mga apektadong manggagawa at pamilya nila,” sabi nito.

Bagama’t hindi pa malaman ang ugat ng planong pagsasara ng planta, sinabi ni Villanueva na nakahanda sila sa Senado na imbestigahan ito.

“Hindi pa po natin matukoy ang puno’t dulo ng isyu na ito dahil maaaring may iba pang malalim na dahilan dito. Nakahanda ang ating Committee on Labor para maglungsad ng pagdinig tungkol dito kung kinakailangan,” ayon pa sa senador.

Sa website na visor.ph, Marso 26 nakatakdang huminto ang produksyon sa planta.

Olympic meeting kanselado, preparasyon naantala vs COVID-19

Posted on: February 25th, 2020 by @peoplesbalita No Comments

KINANSELA ang gagawing sports conference ng mga Olympic stakeholder sa Beijing dahil sa coronavirus outbreak.

Dahil dito ang nasabing pagpupulong na gaganapin mula April 19 hanggang 24 ay gagawin na lamang sa Lausanne, Switzerland.

Magpapalitan kasi ng mga idea ang iba’t ibang sports governing bodies, tatlong buwan bago ang gaganaping Tokyo Olympics.

Samantala, naantala rin ng dalawang buwan ang training ng mga volunteers para sa Tokyo Olympics dahil sa banta ng COVID-19.

Nangangailangan ng 80,000 na volunteer ang nasabing palaro upang masiguro nitong maganda ang magiging takbo nito.

Ang pagpapaliban ng mga trainings aniya ang isa sa mga aksyon ng Tokyo organizers upang maiwasan ang pagkalat ng virus.

Ayon sa mga organizers, tinatayang 200,000 indibidwal ang nag-apply bilang volunteer, nasa 30% nito ay nagmula sa labas ng bansa.

Sa kabila ng banta ng naturang virus, giniit pa rin ng International Olympic Committee, local organizers at ng World Health Organization na hindi kinakailangang i-suspinde ang mga palaro sa kasalukuyan.

Hindi naman inisasantabi ng mga organizers ang posibleng mga pagbabago sa palaro sa kabila nito.

“In accordance with the government’s policy for preventing the spread of infectious diseases, we will also evaluate the immediate need for each games-related event on a case by case basis,” pahayag ng organizers nito.

Magugunitang tiniyak ng Tokyo Olympics organizers, International Olympic Committee at World Health Organization (WHO) na hindi na kailangan pa ang pagpaliban ng Olympics na gaganapin sa Hulyo 24 hanggang Agosto 9.

Kasalukuyan pa ring nakadaong sa Tokyo Bay ang quarantined cruise ship na mayroong 700 kaso at 3 namatay ayon sa tala nito dahil sa virus.

Ads February 25, 2020

Posted on: February 25th, 2020 by @peoplesbalita No Comments