- July 4, 2024
-
Search in People's Balita
Ang Diyaryong Pinagkakatiwalaan
Archive for February, 2020
DFA at DOH, nagpaliwanag sa naantalang repatriation; Pinoy crew members na positibo sa virus, 59 na
Halos 60 Pinoy crew members na ng M/V Diamond Princess sa Yokohama, Japan, ang nagpositibo sa China Coronavirus Disease (COVID)-19.
Isa rito ay gumaling na matapos ma-confine sa ospital sa Japan.
Sinabi ni Department of Foreign Affairs (DFA) Assistant Sec. Ed Meñez, naitala ang bagong limang kaso nitong weekend.
Ayon naman kay Department of Health (DOH) Assistant Sec. Maria Rosario Vergeire, hinihintay pa ang resulta ng isinagawang test sa mga Pinoy crew members at posibleng bukas ito ilalabas.
Ito anila ang dahilan kaya naipagpaliban ang repatriation sa mga kababayan imbes na noong, Linggo, sana sila iuuwi.
Inihayag ni Asec. Vergeire na itinuturing nilang kritikal ang sitwasyon sa loob ng barko dahil posibleng na-expose na sila sa virus sa patuloy na pagtatrabaho kaya hindi pa rin nila masabi ang eksaktong bilang ng maiuuwing Pinoy crew members. Depende kasi ito kung madagdagan pa ang bilang ng mga magpopositibo sa nakakamatay na virus.
Batay sa plano, mula sa Yokohama ay dadalhin ang mga kababayan sa Haneda Airport para dun sila isasakay ng chartered flight deretso ng Clark International Aiport.
Ang mga negatibo naman sa virus at walang sintomas ng respiratory illness ay idideretso sa Athlete’s Village sa New Clark City sa Tarlac para sa 14-day quarantine. Habang ang magpa-pakita ng sintomas ay dadalhin sa natuloy ng isolation hospital.
Kaysa umasa sa imported: Mass-production ng face masks, itutulak
DAPAT ikunsidera ng gobyerno na palakasin ang kapasidad ng bansa sa mabilis na paggawa ng o mass-production ng face masks kasunod na rin sa nagaganap na worldwide shortage ng anti-viral personal device.
“Our sense is, it might be practical for the government itself to be ready all the time to steadily produce large quantities of face masks, not just to help us fight off COVID-19, but also other highly infectious respiratory diseases that might emerge in the future,” ayon kay Anakalusugan Party List Rep. Mike Defensor.
Hindi aniya dapat umasa habangbuhay sa imported supplies sa panahon ng potential global health emergencies.
Ang pahayag ni Defensor ay kasabay na rin sa pangangarag ng mundo sa pag-import at pag-imbak ng masks, kung saan ang Tsina ay nagpakuha ng 1.2 bilyong piraso.
Habang ang Thailand at iba pang bansa na gumagawa ng face masks ay nagbabawas na rin sa kanilang exports para masigurong may sapat silang lokal na suplay.
“Large private manufacturers in India are able to mass-produce the masks for as low as P1.00 (or two US cents) apiece, so cost should not be an issue if the (Philippine) government itself resorts to fabricating the device,” ani Defensor.
Dapat aniyang ikunsidera na ng gobyerno ang pag-import ng mask-making machines at maghanap ng paraan para masiguro ang patuloy na suplay ng raw materials para sa produksyon nito.
Una nito, ipinag-utos ng Department of Trade and Industry (DTI) noong Enero 31 ang Philippine International Trading Corp. (PITC) na maghanap ng paraan para makakuha ng 5 milyong face masks mula sa ibang bansa para mapunan ang local supplies, lalo na para sa mga health workers.
Ngunit, nananatiling malabo aniya kung nakakuha nga ang PITC ng nasabing supplies. Samantala, dahil sa overpricing ay ipinag-utos ni Manila Mayor Isko Moreno na ipasara ang apat na tindahan na nagbebenta ng face mask.
Ang mga nasabing tindahan ay Ambitrend Trading, Cloud 7 Store, Cathay Oriental Chinese Store at LVD Chinese Drug Store na nasa isang mall sa Divisoria kung saan ni-raid ng Manila Police District (MPD) Special Mayor’s Reaction Team dahil sa mga sumbong ng overpricing ng mga mask.
Ayon kay Levi Facundo, Hepe ng Bureau of Permit ng Maynila, ang pagpapasara sa mga nasabing tindahan dahil sa mga nakitang paglabag sa kanilang business permit.
Sinabi pa ni Facundo na naisilbi na rin nila ang show cause order sa MEC Medical Supply, New Genesis Medical Supplies, Medical shop at Citimed Polyclinic & Drugstore dahil sa reklamo ng overpricing ng mga face mask.
Sumagot na rin naman aniya ang mga ito sa show cause at naipasa na nila sa Department of Trade and Industry (DTI).
Sa ngayon, hinihintay na lang aniya nila ang sagot ng DTI kung ano ang magiging rekomendasyon nito.
Hindi kasi maaaring basta magpasara ng business establishment ang Manila City Government hangga’t walang rekomendasyon ng DTI. (Bishop Jesus “Jemba” M. Basco)
ABS-CBN, humingi ng tawad kay Duterte sa ‘di pag-ere ng ilang 2016 poll ads nito
Humingi ng tawad sa Senate hearing si ABS-CBN president at chief executive officer Carlo Katigbak kung sumama ang loob ni Pangulong Rodrigo Duterte sa pag-ere ng network ng isang kontrobersiyal na political advertisement noong 2016.
“We are sorry if we offended the president. That was not the intention of the network. We felt that we were just abiding by the laws and regulations that surround the airing of political ads,” ani Katigbak sa pagdinig ng Senado sa renewal ng prangkisa ng ABS-CBN, na nakatakdang mapaso sa Marso.
Binitiwan ni Katigbak ang pahayag matapos kuwestiyunin ni Sen. Christopher “Bong” Go, ang dating special aide ng pangulo, ang pag-ere ng ad, kung saan mapapanood ang pagkuwestiyon ng mga bata sa mga kontrobersiyal na pahayag at pagmumura ni Duterte.
Humiling ng temporary restraining order mula sa isang korte sa Taguig ang kampo ni Duterte para hindi na maere ang ad, na binayaran ng kritiko ng pangulo at dating senador na si Antonio Trillanes IV.
Tiniyak din ni Katigbak sa mga mambabatas sa pagdinig na walang political agenda ang media at entertainment company.
“Today, we want to make a categorical statement, together with our chairman Mark Lopez, that ABS does not and will not have its own political agenda,” ani Katigbak.
Lumabas din sa pagdinig na inere rin ng GMA-7 ang election ad laban kay Duterte, ayon sa legal department head ng network na si Ma. Luz Delfin.
“Hindi lang isang network ang nag-air nito. Ang kaibahan lang, mas mabilis na nag-pull out iyong isa sa airing,” ani Sen. Grace Poe, na nanguna sa pagdinig.
Nang hingan ng reaksiyon sa paghingi ng tawad ng ABS-CBN chief, sinabi ni Presidential Spokesperson Salvador Panelo na dapat ay dati pa nag-sorry ang ABS-CBN.
“Alam niyo na na may atraso kayo. Ano bang… May ginawa ba kayo? Wala, ‘yon ang tinatawag niyang hubris. Masyado kayong mayabang,” ani Panelo.
Na kay Duterte na raw kung tatanggapin ang paumanhin ng ABS-CBN.
“Kung hindi nag-alboroto sa ’yo saka ka lang hihingi ng paumanhin. Na kay Presidente ‘yon. I don’t know how to respond to that. It’s a personal decision,” ani Panelo matapos tanungin kung paano magre-react si Duterte sa sorry.
PALIWANAG SA MGA DI UMERE NA ADS
Nagpaliwanag din si Katigbak kaugnay sa pag-ere ng network sa mga political advertisement na binayaran noon ni Duterte.
Ayon kay Katigbak, naipalabas ng ABS-CBN ang lahat ng national political advertisement na binayaran ni Duterte pero hindi naere ang lahat ng local ads – o iyong mga ipinapalabas sa mga partikular na lalawigan – dahil sa limitadong airtime.
Nabigo raw ang network na maere ang P7 milyon halaga ng patalastas ni Duterte.
“Our policy on all our ads is first come, first serve. Many of these spots were ordered on May 3, and May 7 was the last day of the campaign period. There had been many previous telecast orders that came in ahead of the president’s telecast order,” paliwanag ni Katigbak.
Nagkaroon din daw ng delay o pagkaantala sa pagbalik ng P2.6 milyon na binayaran ng kampo ni Duterte para sa ads pero hindi na raw ito tinanggap ng pangulo.
“We acknowledge our shortcoming in our failure to release that refund in a timely manner,” ani Katigbak.
Nagkaroon na raw ng pagbabago sa mga patakaran ng kompanya ukol sa pagbabalik ng bayad kapag hindi naere ang isang patalastas.
“We corrected that so in 2019, our policy is, 7 days, if your spot is not aired, the cheque should be back with the client or with advertister within 7 days,” ani Katigbak.
Ayon sa mga senador na sina Juan Miguel Zubiri at Francis Pangilinan, maging sila ay may mga patalastas na hindi naere ng ABS-CBN.
“May hinanakit din kami pero hindi natin dadalhin sa usapin na mawawalan ng trabaho ang 11,000 mga kababayan natin,” ani Pangilinan, na tinutukoy ang bilang ng mga manggagawa na pinangangambahang mawawalan ng trabaho kapag isinara ang ABS-CBN.
Magugunitang paulit-ulit binabatikos noon ng pangulo ang ABS-CBN dahil sa hindi umano pag-ere ng network sa kaniyang mga ad noong 2016 campaign. Nagbanta rin si Duterte na haharangin ang pag-renew ng prangkisa ng network.
Hindi bababa sa 11 ang panukalang batas na may layong i-renew ang franchise ng ABS-CBN, ang nakabinbin sa Kamara.
Hiniling din kamakailan ni Solicitor General Jose Calida sa Korte Suprema na ipawalang bisa ang prangkisa ng ABS-CBN dahil sa ilang paglabag pero itinanggi ng ABS-CBN na lumabag ito sa batas. (Daris Jose)
Antonio, 3 pa kakasa sa LGBA
PAMUMUNUAN ng Team Sagupaan ang pagpapatuloy ng 2020 LGBA Cocker of the Year series sa Pasay City Cockpit sa Biyernes, Pebrero 28.
Binabalangkas ng Luzon Gamecock Breeders Association (LGBA), taya ang mahigit P1M sa 4-cock finals na mga hatid ng Sagupaan Superfeeds at Complexor 3000.
Sasali rito si sabong idol Patrick Antonio, na kagagaling lang sa back-to-back championship sa National Cockers Alliance (NCA) derby, kasama sina three pointer Arnold dela Cruz, Hector Magpantay at Ronnel Pasia.
Ang ibang three pointers ay sina Percy Modomo, lawyer Jun Caparroso, Mel Lim, Nelson Uy/Dong Dhung, Boy Gamilla, Mayor Rommel Romano, Boy Tanyag at Jimmy Junsay/Dennis Reyes/Ed Ladores.
May 2.5 puntos naman sina Jeffrey at Aylwyn Sy ng Team Sagupaan kasama sina Raymond Velayo, Toto Gregore, Mamad Villarubio, RM Senor Vicente entry, Vic Bilangel at Jong Daed.
Ayon kay LGBA president Nick Crisostomo, ihahatag ang COTY series 7-bullstag derby second leg sa Marso 9, 16 at 23. (REC)
9 na Japanese Nationals, ipinatapon dahil sa Telco Fraud
IPATATAPON pabalik sa kanilang bansa ng Bureau of Immigration (BI) ang siyam na Japanese nationals na inaresto ng mga operatiba ng immigration dahil sa kahilingan ng mga awtoridad sa kanilang bansa dahil sa wanted sa telecommunications fraud.
Kinilala ni BI Commissioner Jaime Morente Irie Dai, Ishii Kyogo, Hamaoka Kantaro, Maeyama Takuto, Tanaka Kazuya, Yoshida Takeshi, Murata Seiichi, Kouki Shouji, at Imizumi Ryo ai idineresto sa Narita Airport Tokyo sakay ng Japan Airlines mula sa Ninoy Aquino International Airport (NAIA) Terminal 1.
Ang siyam na pinabalik ay kabilang sa unang batch ng deportees mula sa 36 na Japanese nationals na inaresto sa Makati City noong Nov. 13 ng mga ahente.
Matatandaan na isang summary deportation order ang inisyu ng three-man BI board of commissioners laban sa mga dayuhan para sa pagpapatapon sa kanilang bansa.
Isinama rin ng board ang kanilang pangalan ng undesirable aliens upang maiwasang mkabalik pa sila ng Pilipinas.
Nakasaad sa dalawang pahinang kautusan na pinamu-nuan ni Morente na ang mga wanted na Japanese nationals ay nararapat nang paalisin ng Pilipinas dahil ang kanilang pamamalagi ay maitituring na banta. (Gene Adsuara)
Tinanggihan sa pag-ibig: Bebot, kinatay ng sekyu
ARESTADO kahapon (Lunes) ang isang security guard na umano ay pumatay sa isang babae sa Kawit, Cavite matapos tanggihan ng biktima ang kanyang pag-ibig.
Naaresto ang suspek na si Reggie Boy Estabillo sa isang ginagawang subdivision sa bayan ng Tanza, 3 araw matapos umano niyang patayin sa saksak ang 29-anyos na si Sarah Kaye Mindo.
Natagpuan sa loob ng kaniyang bahay sa subdivision sa Kawit ang bangkay ni Mindo, na tadtad ng mga saksak sa iba’t ibang bahagi ng katawan at walang saplot pang-ibaba.
May isang testigong nakakita kay Estabillo na tumalon mula sa ginagawang bahay sa likod ng bahay ng biktima para tumakas kung saan nakuhanan pa ang suspek ng CCTV.
Umamin si Estabillo sa pagpatay sa biktima, na nakatira sa subdivison na binabantayan ng suspek bilang guwardiya.
Kakausapin lang daw sana niya si Mindo para ihayag ang kaniyang pag-ibig pero tinanggihan umano siya at nanlaban ito.
Inamin din ni Estabillo na gumagamit siya ng shabu.
Itinanggi naman ng suspek na ginahasa niya ang biktima. Hinihintay pa ng mga awtoridad ang resulta ng autopsy na isinagawa sa bangkay para malaman kung ginahasa ito.
Kasong robbery at murder ang isinampa laban sa suspek. Nakatakda namang iuwi sa bukas (Martes) sa Romblon ang labi ng biktima.
10th LBC Ronda: Pangarap ni Tugawin sa Team Tarlac
PANGARAP ni Ryan Tugawin ng Tarlac Central Luzon na makilala sa larangan ng cycling kaya nais niyang makatulong sa Team Tarlac, bukod pa sa manalo ng stage upang mapansin at maipakita na may husay ito sa piniling sport.
Naisakatuparan ng 30-anyos na siklista ang misyon 10th LBC Ronda Pilipinas 2020 nang makipagsabayan sa mga astig na siklista sa pinal na 20 metro ng karera para pamayagpagan ang Stage 2 ng nasabing bikathon na pinakawalan sa Sorsogon at magwawakas sa harap ng Legazpi City Hall.
May kumpol na mga pedalpusher paentra sa huling isang kilometro, nagpuwestuhan ang mga ito habang dumidiskarte ang tubong Solano, Nueva Viscaya na si Tugawin.
Nang makahulagpos umungos si Tugawin sa unahan at nakipagbakbakan kina Ismael Grospe Jr. ng Go For Gold at George Oconer ng Standard Insurance-Navy para sa gabuhok niyang panalo sa tiyempong tatlong oras, 50 minuto at 37 segundo sa 154.5 kilometrong harurutan.
“Medyo nakalusot mula sa likod, nakatutok lang po kasi ako, tapos si George (Oconer) umatake, hinabol ko,” kuwento ng magsasakang si Tugawin.
Sumegundo si Grospe habang tumersero si Oconer na kapareho ng oras kay Tugawin sa event, pero hindi sapat ang oras ni Tugawin para maagaw ang Red Jersey kay Stage 1 winner Mark Julius Bordeos ng Bicycology Shop-Army.
Nakakapit pa rin sa General individual classification si Bordeos sa tangang anim na oras, 56 minuto at 34 segundo, tatlong segundong abante kay No. 2 Jerry Aquino Jr. ng Scratch It at tig-anim na segundo kina Oconer at Rustom Lim ng 7Eleven Cliqq-Air21 by Roadbike Philippines, na nasa 3-4, ayon sa pagkakasunod.
Larga ngayong araw ang Legaspi-Naga City Stage 3. (REC)
Sentimyento ni Santiago
NAKAHANDANG harapin ni volleyball star Alyja Daphne ‘Jaja’ Santiago ang lahat ng pagsubok na darating pa sa kanyang buhay at playing career.
Ikinuwento ng balibolistang Pinay sa Fivb.com ang naging karera niya sa Japan bilang import ng Saitama Ageo Medics sa Japan V.Premier League.
“Ending the season with a podium finish in the Japan V.League was very fulfilling as an athlete. All the hard work and sacrifices that my team Ageo Medics made were worth it in the end,” dada ni Jaja.
Sa kanyang ikalawang season kasama ang koponan, paitas nina Santiago ang bronze medal sa torneo.
“As a Filipina volleyball player, it was really an overwhelming experience. It was an honour to represent my country and at the same time to win a medal in Japan,” wika niya.
Ibinahagi rin ng kapatid ng isa pang volleybelle na si Aleona Denise ‘Dindin’ Santiago-Manabat, na sa kanyang unang taon sa Land of the Rising Sun ang kanyang mga adjustment, hirap sa training at ang mahiwalay sa kanyang mga mahal sa buhay.
“Above all, I learned to be a professional athlete by becoming more disciplined, being more focused and prepared for each match. I have learned a lot from this experience, but I will not stop here. Every opportunity is a challenge to conquer and every challenge is a chance to learn something new,” litanya ng dalaga.
Sa katapusan, nakahanda ang 24-anyos na may taas na 6-5 na middle blocker/opposite heitter na kung may pagkakataon payag siyang maglaro para sa PH national team.
Kahit kabilang sa Japan team kumakayod din si Santiago sa Philippine SuperLiga o PSL.
Pagpapasara sa ilang tindahan ng face mask sa Maynila, ipinag-utos ni Yorme
Ipinag-utos ni Manila Mayor Francisco ‘Isko Moreno’ Domagoso ang pagpapasara sa apat na tindahan ng face mask dahil sa overpricing.
Kabilang ang mga tindahan na pinasasara ang Ambitrend Trading, Cloud 7 Store, Cathay Oriental Chinese Store at LVD Chinese Drug Store na nasa isang mall sa Divisoria.
Matatandaang sinalakay noong Enero 31 ng Special Mayor’s Reaction Team (SMaRT) ang nasabing mga tindahan dahil sa mataas na presyo ng mask.
Bukod sa nasabing mga tindahan, sinabi ni Bureau of Permit Chief Levi Facundo na may ilan pang nakatakdang ipasara dahil din sa nasabing paglabag.
Kabilang dito ang MEC Medical Supply, New Genesis Medical Supplies, Medical shop at Citimed Polyclinic & Drugstore na napadalhan na ng show cause order.
Ayon kay Facundo, sumagot na ang nabanggit na mga tindahan sa show cause gayunman hinihintay pa ang magiging rekomendasyon ng Department of Trade and Industry (DTI) hinggil dito. (Gene Adsuara)