“Mali ang ginawa, pero totoo ang mga sinabi niya.”

Ito ang karamihang reaksiyon sa halos sampung oras na hostage-taking sa isang mall sa Greenhills, San Juan nitong nakalipas na araw na kinasangkutan ng isang security guard.

Sa social media mas marami ang umayon sa kanyang panig, sumasalamin siya ngayon sa mayorya ng mahihirap na sinugal ang kalayaan makamit lamang ang karapatan sa mga buwayang oligarko.

Sa mistulang presscon, inilahad ng hostage-taker na napag-alamang sinibak na sekyu ang mga aniya’y hindi patas na pagtrato sa kanilang mga sekyu at ang nagaganap umanong korupsiyon at iba pang labor issues sa kanilang ahensiya at maging sa mall.

At bago pa man ang insidente, aminado ang Department of Labor and Employment (DOLE) na may natanggap na silang reklamo kaugnay sa naganap na sibakan.

Hindi ito ang tama at mabuti, sa pamamagitan nito ay nagbukas ang pagkakataon para mapag-usapan ang mga isyu at hinaing, hindi lang ng mga security guard kundi ng iba pang mga manggagawa.

Mulat tayo sa katotohanan na marami talaga ang lumalabag sa batas-paggawa na tila hindi nabibigyan ng pansin ng gobyerno.

May mga manggagawa rin na sunud-sunuran na lang kesa mawalan ng kayod habang meron ding wala talagang sapat na kaalaman sa kanyang mga karapatan kaya hindi makapagreklamo.

Ilan sa mga karapatan ng manggagawa ay ang kasiguruhan na hindi basta-basta matatanggal sa trabaho nang walang sapat na dahilan na ayon sa batas, tamang suweldo, pagkakaroon ng mga benepisyo, ligtas na lugar ng pinagtatrabahuhan at iba pa.

Sana ay magsilbi itong panggising sa gobyerno na palaging bantayan ang kapakanan ng lahat, sa mga manggagawa na alamin ang ating mga karapatan at ipaglaban ito sa tamang paraan at sa mga boss o namamahala sa trabaho na sumunod tayo sa batas at maging makatao.

LUNGSOD NG MALOLOS- “Ang sining ay hindi eksklusibo para sa ibang tao. Ang sining ay inklusibo. Kasama dito ang lahat. Para dapat ito sa lahat: sa tindera sa palengke, sa nagmamaneho ng tricycle, sa mga estudyante, sa mga opisyal ng pamahalaan. Nauukol ito sa lahat ng tao mula sa lahat ng antas ng buhay.”

Ito ang mensahe ng Pangulo ng Cultural Center of the Philippines (CCP) at Tagapangulo ng National Commission for Culture and the Arts (NCCA) Arsenio “Nick” J. Lizaso sa lahat ng pinarangalan at dumalo sa “2020 Parangal sa Kislap ng Sining” na ginanap sa Nicanor Abelardo Auditorium, Hiyas ng Bulacan Sentrong Pangkultura sa lungsod na ito.

Ikinuwento ni Lizaso kung paanong nilalapit ng CCP ang sining sa mga Pilipino sa lahat ng bahagi ng bansa sa pamamagitan ng pagsasagawa ng mga konsiyerto kasama ang Philippine Philharmonic Orchestra, Bayanihan Dance Company, Philippine Madrigal Singers at UST Symphony Orchestra.

Samantala, pinasalamatan at binati ni Gobernador Daniel R. Fernando ang mga pinarangalan ng Kislap ng Sining sa kanyang mensahe na ipinahayag ng kanyang Chief of Staff Atty. Jayric Amil sa kanilang pagsusulong at walang kamatayang pagmamahal sa sining at kalinangan ng lalawigan.

“Mula noon, hanggang ngayon, ang mayamang sining ang saksi sa bunga ng lahat ng pagsubok, tagumpay at kabiguan ng ating bansang matagal nakipagdigma para sa ating demokrasya. Bilang mga tagapagmana nito, nasa ating kamay ang hamon at pananagutan na panatilihin ang kislap, dangal at katanyagan ng Sining ng Bulacan upang maipasa sa marami pang henerasyong susunod sa atin,” anang gobernador.

Kabilang sa mga pinarangalan ng 2020 Kislap ng Sining sa Bulacan sina Niño Angelo A. Campo mula sa Marilao para sa Literatura; Albert S. Aguilar mula sa Hagonoy para sa Musika; Crisanto B. Aquino mula sa Hagonoy para sa Pelikula; Marcelo H. Del Pilar Memorial School ng Bulakan para sa Dulaan at Literatura; at ang FCPC Baliktanaw at Kenyo Street Fam mula sa Lungsod ng San Jose del Monte para sa Sayaw.

Gayundin, kinilala ang mga bayan ng Guiguinto, Baliwag at Hagonoy at ang Lungsod ng San Jose del Monte bilang Natatanging Lokal na Pamahalaan para sa kanilang pagpapayaman ng sining at kalinangan ng kani-kanilang nasasakupan.

Kinikilala ng Kislap ng Sining sa Bulacan, na inisyatibo ng Provincial History, Arts, Culture and Tourism Office, ang natatanging talento ng mga artistang Bulakenyo sa iba’t ibang larangan ng sining at kultura. Nagbibigay parangal ito sa mga Bulakenyong nagwagi ng nasyunal at internasyunal na pagkilala, at sa mga Bulakenyong tumanggap ng parangal sa iba’t ibang larangan ng sining. (Bishop Jesus “Jemba” M. Basco)