SA unang pagkakataon ay nagsama-sama ang iba’t bang grupo sa sektor ng transportasyon upang itatag ang National Public Transport Coalition (NPTC).

Mula sa motorcycle-for-hire, tricycles, pampasaherong jeep, UV express, TNVS, taxi, at bus, trucks, at iba pang uri ng public transport, ay nagkaisang susuporta sa bawat isa pagdating sa mga issues na makakaapekto sa kanilang sektor. Common denominator ay ang issue ng pangkabuhayan at ang kapakanan ng mga mananakay.

Sa isang nilagdaang manifesto ay pinuna ng grupo ang kaagarang privatization ng mga Motor Vehicle Inspection System (MVIS) kung saan mas prayoridad ang pagiging compliant ng mga sasakyan sa euro 4 kaysa sa roadworthiness ng sasakyan.

Niliinaw din ng grupo ang pagsangayon nila sa modernization ng public transport ngunit imbes na isubo sa kanila ang imported na mga sasakyan ay mas mainam na tulungan ng pamahalaan ang mga gawang pinoy na compliant rin naman sa department order ng DOTR.

Susuportahan din ng grupo ang bawat laban ng mga kasamang sektor – halimbawa ay ang pag-regulate sa motorcycles-for-hire, roadworthiness ng mga trucks, ruta ng mga tricycles, ang pagtutol sa pagwalis ng mga indibidwal franchise para ang kooperatiba at korporasyon ang mag-may-ari ng franchise, pagtutol sa mga sobrang mahal na mga imported jeepneys at pagsulong sa mga locally-made jeeps, atbp.

Nilinaw ng coalition na hindi sasawsaw sa pulitika ang grupo at hindi laban sa pamahalaan ang kanilang stand. Maaring punahin ang mga polisiya ngunit idadaan sa mga dialogues o paguusap muna at mga ligal na paraan.
Sa kabilang banda ay pupurihin din at susuporta ang coalition sa mga pro-public transport at commuter-friendly policies ng pamahalaan at mga public officials. Welcome din ang coalition sa pagsapi ng lahat ng transport groups na kaisa sa nga paniwala at adhikain ng grupo.

Umaasa ang coalition na ang pagtatag ng NPTC ay tutugon sa mga problema ng transportasyon patungo sa mas maalwan at ligtas na public transport sa bansa at sa pangangalaga ng hanap-buhay ng mga Pilipino sa public transport. (Atty. Ariel Enrile-Inton)

DUMARAMI ang kaso ng COVID-19 sa bansa sa araw-araw na sa pinakahuling report, umabot na sa 49 ang kaso ng sakit, pero pagtitiyak ng Department of Health (DOH) na mahigpit ang ginagawa nilang pag-monitor sa mga nakahalubilo ng mga napaulat na nagpositibo sa COVID-19.

Marami naman ang nagtataka kung bakit bigla ang pagtaas at ang Metro Manila ang napuruhan. Ayon sa DOH, maraming naitala sa National Capital Region (NCR) dahil narito ang port of entry.

Isang magandang hakbang naman ang gina-wang pagsuspinde sa lahat ng antas ng klase sa Metro Manila. Mula Marso 10 hanggang 15 ay walang pasok na mismong si Duterte mismo ang nag-anunsiyo ng suspension, ito ay para mapigil ang pagkalat ng virus.

Ayon sa Presidente ‘pag natapos ang suspension ng klase at patuloy pa rin ang pagtaas ng kaso ng COVID-19, muli raw silang magpupulong para pag-aralan ang mga susunod na hakbang. Ang mahalaga aniya ngayon ay nasa bahay ang mga bata para mailayo sa kumakalat na virus.

Nararapat namang bantayan ng mga magulang ang kanilang mga anak at baka sa halip na tumigil sa bahay ang mga ito ay magtungo sa mall o sa mga matataong lugar kasama ng mga kaklase o kaibigan. Lubhang mapanganib ngayon kaya nararapat gabayan ang mga anak.

Ginagawa ng pamahalaan ang mga kaukulang pag-iingat kaya nararapat namang gawin ng mga magulang ang papel para maingatan ang mga bata. Hindi na biro ang pagkalat ng COVID-19 na buong mundo na ang apektado.

AMINADO ang Departent of Health (DoH) na hindi pondo ang problema sa pagharap sa coronavirus disease 2019 (COVID-19) kundi ang global shortage ng mga testing kits at protective suits.

Sa briefing sa House Committee on Health, sinabi ni Health Secretary Francisco Duque na target nila na makakuha ng 2,000 test supplies kada Linggo subalit maging ito ay problema dahil sa kakapusan ng supply.

Ayon kay Philippine Hospital Association President Dr. Jaime Almora mayroong kakapusan sa face masks kaya nag-i-improvised o gumagawa na lamang sila ng sariling mga face mask gamit ang mga lumang tela.

Sa panig ng DOH, sinabi ni Undersecretary for Procurement and Supply Chain Carolina Vidal Taino na kasalukuyan ay mayroon 59,000 piraso ng N-95 masks ang nasa stocks ng DoH na para sa mga public health worker sa buong bansa na sasapat lamang sa loob ng 1 buwan.

Kaya gustuhin man ng DoH na magbahagi sa mga pribadong ospital na nangangailangan din ng suplay ng face masks ay prayoridad muna ng DOH ang government health workers.

Umaasa naman ang DoH na ang kakapusan sa face mask ay kanilang mareresolba sa mga susunud na araw matapos na rin tiyakin ng local supplier na Philippine International Trading Corporation na bibigyan ang gobyerno ng suplay na 30,000 piraso ng face mask kada linggo.

Samantala, sinabi ng Department of Labor and Employment (DOLE) na humingi sila ng karagdagang P2.8 bilyon upang magbigay ng “emergency jobs” sa mga mawawalan ng trabaho dahil sa outbreak ng coronavirus disease.

Sa kabuuang halaga ng hiningi ng DOLE sa Office of the President, P1.3 bilyon ang nakalaan sa local employment, habang ang natitirang P1.5 bilyon naman ang para sa overseas employment, ani Labor Secretary Silvestre Bello.
Magbibigay din ng livelihood assistance at skills training program para sa mga ‘displaced’ workers ang labor department.

Dapat magkaroon ng separation pay ang mga regular na empleyado na nawalan ng trabaho dahil sa pagkalat ng coronavirus. Dapat namang masabihan tungkol sa terminasyon ang mga seasonal workers.