Balik kalsada ang may 980 units na UV Express sa kanilang operasyon sa Metro Manila at karatig na mga probinsya noong Lunes matapos ang tatlong buwang pagkahinto ng kanilang operasyon.

Mayroon 47 routes ang binuksan ng Land Transportation Franchising and Regulatory Board (LTFRB )mula sa Bulacan, Cavite, Laguna, at Rizal papuntang Metro Manila.

Ayon sa LTFRB, ang operasyon ng UV Express ay mahigpit na ipapatupad ang terminal-to-terminal basis para sa pick up at drop off ng pasahero. Hindi rin sila papayagan ng dumaan ng EDSA at Commonwealth Avenue sa Quezon City.

“UV Express operators and drivers should comply with strict guidelines with the resumption of their operations,” wika ni LTFRB Chairman Martin Delgra.

Dapat din sundin ang iba pang provisions na nasasaad sa guidelines tulad ng regular examination ng mga drivers upang malaman kung sila ay may magandang kalusugan at ang pagsusuot ng masks at gloves sa lahat ng oras.

Habang ang mga pasahero naman ay kinakailangan din magsuot ng face masks at dapat ay may eksaktong pamasahe ang ibabayad bago pa man sumakay upang mabawasan ang personal transactions.

Kinakailangan din na ang isang pasahero ay mag fill-out ng forms na gagamitin sa contact tracing. Kailangan din na may mga barriers nailalagay sa pagitan ng driver at pasahero.

Diniin ng LTFRB na walang mangyayari ng pagtaas ng pamasahe at ito ay mananatiling P2 kada kilometro kahit na limited ang passenger capacity nito dahil sa pagpapatupad ng social distancing.

Ayon naman sa mga operators at drivers ng UV Express na kukunti lamang ang kanilang mga pasahero kahit na may sinusunod silang health protocols sa mga sasakyan. Subalit inaasahan din nila na dadami rin ang mga pasahero sa mga darating na araw kung malalaman ng karamihan na may UV Express na.

Samantala, ang mga “roadworthy” traditional jeepneys naman ay inaasahang magsisimula ng operasyon sa Metro Manila sa darating na lingo dahil ang mga routes ay pinag-aaralan pa rin ng LTFRB ngayon Linggo. Inaasahang magkakaroon ng 30 posibleng routes ang bubuksan ng LTFRB.

“We are still completing the list of routes of traditional  jeepneys. But we’re looking at Thursday or Friday for them to be deployed on the routes that will be identified. I would not put an exact number of routes, but it is necessary for us to release first the Memorandum Circular for the matter,” sabi ni Delgra.Pinaliwanag din niya na depende sa routes na mabubuksan ang bilang ng mga jeepney units na papayagang pumasada.

Habang ang operasyon naman ng traditional jeepneys sa ibang lugar ng bansa ay pinayagan ng magsimula tulad sa Northern Mindanao, Davao region, Cordillera Administrative Region, Ilocos, Eastern Visayas, SOCCSKSARGEN Regions; Bulacan, Pampanga, Cagayan de Oro, South Cotabato, at Siquijor.

Pinayagan silang pumasada dahil sa kakulangan ng transportasyon sa mga nasabing regions sa bansa. (LASACMAR)

Hindi pabor si Labor Secretary Silvestre Bello III sa ilang panawagan na paggamit ng trust fund na pinamamahalaan ng Overseas Workers Welfare Administration upang magbigay ng tulong sa mga nawalan ng trabaho at napauwing Pilipinong migranteng manggagawa.

“Nakapagbibigay sila sa atin ng $30 bilyong dolyar kada taon. Nakakatulong sa ekonomiya natin. Kaya naman, kahit ngayon lamang ay ibalik natin ito sa kanila, ‘wag nating galawin yung pera nila,” wika ni Bello.

Humihingi ang OWWA ng P5 bilyon pisong supplemental budget mula sa kongreso upang mapalawig ang kanilang pondo dahil sa banta ng bankruptcy kung magpapatuloy sa paggastos para sa pagkain, accommodation at transportasyon ng mga napauwing manggagawa hanggang taong 2021.

Sa isinagawang Senate hearing noong nakaraang linggo, sinabi ni OWWA chief Hans Leo Cacdac na ang pondo ng ahensya na P18.79 bilyon ay inaasahang babagsak sa P10 bilyong hanggang matapos ang taon hanggang sa bumaba ito ng P1 bilyon hanggang matapos ang 2021 kung patuloy na magkakaroon ng mga OFW na mawawalan ng trabaho at mapapauwi.

Batay sa tala, gumastos na ang OWWA ng P800 milyon para sa repatriation, accommodation at tulong pinansyal para sa mga umuwing OFW na apektado ng Covid 19,  ayon kay Cacdac.

Sinabi pa ni Bello na ang pondo ng OWWA ay dapat na ginagastos para sa pangangailangan ng mga miyembro tulad ng livelihood o kung balakin nilang magtayo ng sariling negosyo at para sa edukasyon ng kanilang mga anak.

“Dapat gobyerno ang magbigay ng pera para matiyak natin na lahat ng kailangan ng ating mga OFW ay matugunan natin… Bakit naman, for the first time na hihingi naman sila ng tulong, nangangailangan sila ng tulong, bakit naman kailangan nating galawin yung pondo nila?… ‘Wag natin gamitin ang pera na ‘yan sa panahong ito,” ayon sa kalihim.

“Ang gobyerno ay dapat na gumawa ng pamamaraan upang matiyak ang karagdagang pondo upang matulungan ang ating mga OFW,” dagdag pa niya.

Sinabi rin niya na, “Huwag nating hayaan na maramdaman ng OFW na tinitipid sila sa kabila ng napakalaki nilang naitulong sa ekonomiya natin in the good and in the best of times.”

Ayon kay Bello, tinatayang nasa 90,000 OFW ang stranded sa ibang bansa, naghihintay ng repatriation, habang ang nasa 63,000 ay napauwi na sa bansa. (Bishop Jesus “Jemba” M. Basco)

Si Congressman Jesus “Bong” C. Suntay ay ang Congressman ng District 4 ng Quezon City at Chairman ng Committee on Human Rights sa House of Representatives.

‘NO’ ang boto nya sa Anti-Terrorism Bill.

Kung ang Chairman mismo ng Human Rights Committee sa Kongreso ay ni-reject ang Bill na ito, ano ang ibig sabihin? May balita rin sa isang dyaryo na si Congressman Ruffy Biazon ng Muntinlupa, anak ng isang heneral, at original author ng terror bill ay umatras din at binawi ang suporta sa bill.

Ano ang kinatatakot ng tao at ang matinding tinututulan laban sa terror bill na ito–‘warrantless arrest, detention for up to 24 hours without a warrant, to be placed under surveillance for 60 to 90 days’.

Sino ang hindi matatakot. Lalo na dahil sa panahon ng quarantine na limitado ang galaw ng tao, at ang daming naging kaso ng violation ng human rights at violation ng mga batas at ordinansa na ilan sa mga lumabag ay mismong mga tao sa gobyerno at mga awtoridad – at ang terror bill ay magbigay ng sandata at kapangyarihan pa sa mga taong ito laban sa simpleng mamamayan.

Ang sabi ng iba – bakit tayo matatakot sa anti-terrorism bill kung hindi naman tayo terorista?

Ang tanong – sino ang magde-determina kung isa kang ‘terorista”?  Kung halimbawa nagreklamo ka dahil hindi ka nakatanggap ng ayuda galing sa iyong barangay captain at dahil na-offend si Kapitan sa reklamo mo at binansagan kang terorista. Huhulihin ka agad. Walang warrant of arrest at pwede ka ikulong ng 24 araw. Wala pa nga ang batas may mga nangyayari nang ganito!

At ano ang kinalaman nito sa sektor ng Transportasyon! Malaki at marami!

Tandaan na dahil ang transport sector ay kinabibilangan ng mahihirap nating mga kababayan na nagbibigay serbisyo sa mahihirap din nating mga mananakay, sila ang maraming hinaing at kahilingan sa gobyerno. At marami sa kanila ay mga matatapang na ‘aktibista’.

At ang batas na ito ay kinatatakutan dahil ang mga aktibista ay binabansagang terorista!

Kung may nag-violate ng quarantine regulation, kulong. Kung may mga pinaghihinalaang susuway sa utos ng awtoridad, kulong, at pwedeng bansagang terorista.  Mas malala pa ito sa – “nanlaban kasi”.

Hindi ko inasahan ang botong ito ni Cong. Bong pero nagpapasalamat ako at humahanga sa kanyang paninindigan.

Abangan ang mga susunod na mga mangyayari. Maging mapagbantay tayo. Mag-isip.  Hindi terorismo ang kalaban natin ngayon, kundi ang COVID-19!  Huwag na sana madagdagan pa ang paghihirap at takot ng ating mga kababayan.

Protektahan natin ang mga taong walang kakayahang protektahan ang sarili. Yan ang pagiging makabayan. Hindi ang terror bill na ito.

NO to ANTI-TERRORISM BILL. (ARIEL ENRILE-INTON)