2020 August 21 Archive - People's Balita

July 3, 2024
Search in People's Balita
Ang Diyaryong Pinagkakatiwalaan

Archive for August 21st, 2020

Willie Revillame, naipamigay na ang P5M ayuda para sa higit 3,000 jeepney drivers

Posted on: August 21st, 2020 by @peoplesbalita No Comments

Maayos na naipamahagi ni Willie Revillame ang limang milyong pisong ayuda para sa jeepney drivers ngayong Miyerkules ng tanghali, August 19.

Personal itong inasikaso ni Willie.

Sa central office ng Land Transportation Franchising and Regulatory Board (LTFRB) tinipon ang transport leaders at jeepney drivers na hindi miyembro ng kahit anong transport group.

Nakatanggap ng PHP1,449,500 ang Pasang Masda, na tinanggap ng kanilang leader na si Ka Obet Martin.

Ang grupong ALTODAP naman na pinamunuan ni Boy Vargas ay nakatanggap ng PHP1,132,500.

Nabigyan din ang isang grupo ng mga jeepney drivers ng PHP342,000, at ang mga driver na may biyaheng Tandang Sora-Visayas Avenue ay tumanggap ng PHP298,500.

Bukod sa perang ipinamahagi, namigay rin si Willie ng dalawang libong sakong bigas na pinaghati-hatian ng jeepney drivers. Binigyan din niya ng jacket ang lahat ng nandoon sa LTFRB central office.

Ayon sa LTFRB, umabot sa 3,211 jeepney drivers ang nakinabang sa ayudang ipinamahagi ng Wowowin host.

Sabi naman ni Willie, ang pagtulong na ito para sa PUJ drivers ay mula sa kanyang sariling ipon. Ibinahagi ito ng TV host dahil alam daw niya ang nararamdaman ng mga mahihirap.

“Sa bawat success ko, sa bawat baytang ng buhay ko, hindi ko makakalimutan yung masa, yung mahihirap. Inangat ninyo ako.

“Kung anong meron ako, galing din po sa inyo iyan,” bahagi ng pahayag ni Willie sa harap ng mga jeepney drivers at iba’t ibang transport leaders.

Nangako si Willie na sa susunod na buwan ay mamimigay siya uli ng limang milyong piso para sa bagong batch ng jeepney drivers.

“Sana, all.”

Emote iyan ng ibang jeepney drivers na hindi kasama sa unang batch ng nabiyayaan ng ayuda ni Willie.

Salamat at may second batch pa ng jeepney drivers na makatatanggap ng ayuda.

Balik-tanaw sa 18th Asian Games 2018

Posted on: August 21st, 2020 by @peoplesbalita No Comments

NAKOBERAN po ng inyong lingkod ang 18th Asian Games sa mga lungsod ng Jakarta at Palembang sa Indonesia noong Agosto 18-Setyembre 2, 2018.

Dalawa lang kami ni kasamang Manolo ‘Bong’ Pedralvez ng Malaya Business Insight na na-aasigned sa Palembang. Ang mga kasama namin sa Philippine media pool na sina Lorenzo Lomibao, Jr. ng Business Mirror, Rierra Mallari ng Manila Standard, Randy Caluag ng Ripples Daily, Angelito Oredo ng Bandera, Peter Paul Patrick Lucas ng Sports Radio at freelance photographer Noilon Reyes, mga nadestino lahat sa main hub sa Jakarta.

Sa may 16 na araw ko sa nasabing lungsod ng South Sumatra Province, nakoberan ko ang gold medal performance ni Margielyn Arda Diday sa women’s street skateboarding.

Gayundin ang mga pagpasok sa finals ng ating mga paddler sa traditonal boat race at canoe, at muntikanang pagsampa sa bronze matches ng ating sepak takraw team, soft tennis squad, at mga pagkabigo ng tenpin bowling, lawn tennis, at shooting.

Madalas akong nakakakita ng mga atletang mga malulungkot at ang iba mga umiiyak sa sandaling sila’y matalo sa mga bawat laban nila sa iba’t ibang playing venue.

Masisilayan mo ang lalim at lawak ng kanilang pagka-patriotic o pagmamahal sa kanilang bansa sa paraang iyon. Matagal silang humahagulgol at nalulungkot talaga sa aking obserbasyon ang maraming mga nanatalong manlalaro sa kanilang laban.

Sa ating mga Pinoy, iyon ang kulang.

Kasi pagkatapos na pagkatapos ng bawat laban kapag talo, parang normal lang ang lahat sa ating mga atleta. Wala akong nakitang umiyak sa ating mga manlalaro o atleta sa 2018 Asiad. At madali rin silang makabalik sa normal na sitwasyon tapos matalo.

Isa pang nasilip ko ay ang sobrang palakaibigan ng ating mga athlete sa kapwa nila mga oposisyong player.

Sana lang magawan ng paraan ito nina Philippine Sports Commission (PSC) Chairman William Ramirez at Philippine Olympic Committee (POC) president Abraham Tolentino.

Masasabi ba nating kababawan , hindi naman siguro lahat, ang pagmamahal nila sa ating inang bayan kung ihahambing sa ilang kapwa nila players.

Ilang palaro maari sa bansa – Jaworski

Posted on: August 21st, 2020 by @peoplesbalita No Comments

KUMPIYANSA si newly-elected International Olympic Committee (IOC) Executive Board Member at Repesentative to the Philippines Mikaela Maria Antonia ‘Mikee’ Cojuangco-Jaworksi na may kakayanan ang bansa na makapagtaguyod ng mas malalaking torneo, malaki pa sa nakaraang Disyembre na matagumpay na 30th Southeast Asian Games PH 2019.

“Hosting a sportsfest far bigger than the SEA Games last year can be a feasible undertaking for the Philippines,” pahayag ng opisyal sa panayam kamakailan ng pahayagang ito.

Tiwala siya sa mataas na kakayanan ng local organizers na mamahala ng mga paligsahan hindi lang ng Olympic Council of Asia (OCA), Southeast Asian Games Federation Council (SEAGFC)kundi maging ng IOC.

Aniya, mas magiging mahusay kung masasanay sa mga susunod na mga pagtataguyod pa ang mga Pinoy ng ilang mga okasyon o pagtitipon.

Aminado man na hindi naging perpekto ang bansa sa 11-nation biennial sportsfest, mas madaling matutunan ng mga nakabahagi sa hosting ang susunod na gagampanan pa sa mga posibleng malalaking torneo na aakuin aniya ng mga Pinoy.

“It’s very doable,” panapos na namutawi sa 2002 Busan Asian Games equestrian gold medallst na si Cojuangco-Jaworski sa asam na maidaos sa susunod na ilang taon dito ang Asian Indoor and Martial Arts Games (AIMAG), Asian Beach Games (ABG) at iba pa. (REC)

NO FACE SHIELD NO MASK NO REGISTRATION POLICY

Posted on: August 21st, 2020 by @peoplesbalita No Comments

MAHIGPIT na ipatutupad ang “No face mask No face shield, No registration policy” sa pagpapatuloy ng voters registration sa Setyembre 1.

Ilan sa mga lugar na magreresume ng voters registration ang Metro Manila na nasa ilalim nan g General Community quarantine o GCQ.

Habang ang mga lugar na nasa Enhanced Community Quarantine at Moderate Enhanced Community Quarantine ay pansamantala pa ring suspindido.

Ang pagpaparehistro ay mula Martes hanggang Sabado mula alas 8:00 ng umaga hanggang alas 3:00 ng hapon

Upang organisado, maglalagay naman ng erxpress lane para sa mga buntis, senior at persons with disability o PWD. (GENE ADSUARA)

Pacquiao tipo ni Garcia

Posted on: August 21st, 2020 by @peoplesbalita No Comments

MALABO nang makakaakyat ng ruwedang parisukat sa taong ito dahil sa pandemiya si reigning World Boxing Association (WBA) super featherweight champion Emmanuel ‘Manny’ Pacquiao.

Pero may isang boksingero ang atat na makaupakan siya sa katauhan ni former four-division world champion Miguel Angel Garcia Cortez, na mas kilalang Mikey Garcia ng USA (40-1-0).

“Actually, we have not reached any agreement. I have not communicated with anyone from his team. But I would love it,” ani Garcia sa boxingscene.com.

“It would be an honor to go up in the ring with Manny Pacquiao. He is a legend. It would be something great and it is the fight that interests me the most,” aniya pa.

Sa ngayon kinakain ang oras ni Pacquiao sa sesyon ng Senado, sa pamilya at pagtulong sa mga mahihirap na pamilya sa panahon ng COVID-19.(REC)

DOH: Na-maximize namin ang 2-week MECQ para sa ‘recalibration’ ng strategies vs COVID-19

Posted on: August 21st, 2020 by @peoplesbalita No Comments

Kumpiyansa ang Department of Health (DOH) na nasulit nila ang dalawang linggong modified enhanced community quarantine (MECQ) dito sa Metro Manila at ilang kalapit na lalawigan, para mapunan ang ilang kakulangan sa responde ng bansa sa pandemic na COVID-19.

Pahayag ito ng DOH kasabay nang pagbabalik sa mas maluwag na general community quarantine (GCQ) ng NCR, Bulacan, Cavite, Laguna at Rizal ngayong araw.

Ayon kay Health Usec. Maria Rosario Vergeire, binigyan ng dalawang linggong MECQ ng pagkakataon ang ahensya at Inter-Agency Task Force para ma-recalibrate o palakasin pa ang mga stratehiya laban sa pandemic.

Naging daan din daw ang “timeout” para mas maging malinaw ang targets tulad ng mas tutok na contact tracing at papel ng bawat opisyal, lalo na sa level ng local government units, sa pagtugon sa COVID-19 cases.

Binanggit din ni Usec. Vergeire ang pagbisita ng mga opisyal sa LGUs, One COVID referral system ng mga lokal na pamahalaan, pinalakas na testing at isolation, na ilan din sa nagawa ng mga opisyal sa nakalipas na 2-week MECQ.

“Primarily noong ginawa natin itong MECQ na ‘to, hindi naman natin sinabing in two weeks time ay mapapababa natin ang mga kaso (ng COVID-19). That is really impossible. Ang hiningi natin na dalawang linggo, hiningi ng ating mga health care workers is for them to breathe and at the same time the DOH was able, together with the IATF, to recalibrate our strategies, to analyze more, to assess the situation on the ground.”

Sa ngayon maaga pa raw para hanapin ang naging epekto ng MECQ sa sitwasyon ng COVID-19 sa bansa. Aabutin pa umano ng dalawa hanggang tatlong linggo bago makita ng malinaw ang idinulot ng lockdown sa estado ng pandemya.

Nilinaw din ni Usec. Vergeire na hindi lang factors na may kinalaman sa kalusugan ang kanilang ikinonsidera sa pagre-rekomenda ng balik GCQ, dahil tiningnan din daw nila ang estado ng ekonomiya at seguridad sa bansa.

Nitong Linggo nang magtanong si Vice President Leni Robredo ukol sa kung na-maximize ba ng DOH ang dalawang linggong MECQ para tugunan ang mga natukoy na kulang sa COVID-19 response ng gobyerno.

P23.96M pinsala ng M6.6 lindol sa Masbate – DPWH

Posted on: August 21st, 2020 by @peoplesbalita No Comments

Tinatayang aabot sa P23.96 milyon ang pinsala sa imprastraktura na dulot ng magnitude 6.6 lindol sa Masbate, batay sa Department of Public Works and Highways (DPWH).

Kasama sa napinsala ang ilang mga daan na P5.64 milyon; P8.96 milyon sa tulay; at P9.35 naman sa pampublikong gusali.

Nakita ang mga pinsala sa kalsada sa Uson, Palanas, Cataingan, at Placer maging ang Cataingan-Poblacion Road sa Barangay Poblacion, Cataingan, Masbate.

LeBron James, ikakampanya sina Biden sa pagkapangulo ng US

Posted on: August 21st, 2020 by @peoplesbalita No Comments

Inanunsiyo ni NBA star LeBron James na ikakampanya niya sa pagkapangulo ng US si Joe Biden at Kamala Harris.

Sinabi nito na napapanahon na para magkaroon ng pagbabago at para simulan ito ay dapat baguhin ang namumuno sa bansa.

Dagdag pa nito na hindi naman niya itinatago na hindi ito sang-ayon sa ipinapatupad na programa ni US President Donald Trump.

Magugunitang noong 2016 ay ikinampanya ng Los Angeles Lakers Star si Hillary Clinton.

P10-K special risk allowance para sa private healthcare workers, pasok na sa Bayanihan 2

Posted on: August 21st, 2020 by @peoplesbalita No Comments

Pasok na sa ilalim ng Bayanihan to Recover as One Act (Bayanihan 2) ang tax-free P10,000 special risk allowance sa mga private health workers.

Ito ay matapos na magkasundo ang mga miyembro ng bicameral conference committee na pagtibayin ang naturang probisyon na nakapaloob sa bersyon ng Kamara ng Bayanihan 2.

Kabuuang P10.5 billion ang inilalaang pondo para sa iba’t ibang compensations sa mga medical frontliners, kabilang na ang special risk allowance hindi lamang sa mga public healthcare workers (HCWs) kundi maging sa mga private HCWs na gumagamot sa mga COVID-19 patients.

Mababatid na sa Bayanihan to Heal as One Act, na napaso noon pang Hunyo, tanging ang mga public HCWs lamang ang nabibigyan ng benepisyo at hindi iyong mga nagtatrabaho sa mga pribadong ospital.

Sinabi ni House Speaker Alan Peter Cayetano na walang katumbas na halaga ng pera ang sakripisyo at serbisyo ng mga health workers lalo na ngayong may COVID-19 pandemic.

Umaasa ang lider ng Kamara na makakatulong ang subsidiya na nakatakdang ibigay ng pamahalaan para mabawasan man lang ang inisiip ng mga HCWs sa linya ng kanilang trabaho.

Bukod sa risk allowance, pinagtibay din ng bicameral conference committee ang probisyon na magbibigay ng P100,000 na compensation para sa mga public at private HCWs na may severe COVID-19 infection.

HEALTH PROTOCOLS na MULA sa MEDICAL SOCIETIES, KAILANGAN IPATUPAD sa PUBLIC TRANSPORTATION

Posted on: August 21st, 2020 by @peoplesbalita No Comments

Inanunsyo ng Department of Health (DOH) na magtatalaga ng isang working committee ang pamahalaan at ang medical societies para mapag-usapan ang mga strategies para labanan ang pagdami ng kaso ng COVID-19. Magandang hakbang ito upang hindi puro military solutions na mula sa mga heneral ang napapakinggan kundi ‘yung galing din sa medical experts.

Importante rin ang opinyon ng mga ekonomista para nang sa ganoon ay makasulong ang ekonomiya habang pinangangalagaan ang kalusugan ng bawa isa. Isang sektor na kailangan ang gabay ng medical experts ay ang public transportation.

Mahalaga ang mobility ng tao sa ekonomiya pero dito rin mataas ang risk ng hawaan. Marami kasing polisiya sa transportasyon ang kwestyonable kung kailangan ba o hindi.

Nais natin ng mga kasagutan ng mga medical experts sa mga sumusunod na tanong:

Kailangan ba ang “barrier” sa pagitan ng rider at angkas nito. Ininsulto ng DILG Secretary na motorcycle experts lang ang nagsasabing delikado ito samantalang heneral sya. So tanungin natin ang mga doktor tungkol dito?
Ligtas ba ang mga tradisyonal na jeepneys. Ano ang mas ligtas na sakyan, yung naka-aircon o open air tulad ng jeep?
Ang 50 percent reduced capacity ba sa mga pampublikong sasakyan ay pwede naman na basta naka mask ang mga pasahero at walang overloading sa bawat byahe?
Gaano kailangan o gaano ka kritikal ang cashless transaction sa pamasahe sa pampublikong sasakyan?
Ang face shield ba ay kailangan pa maliban sa face mask para sa mga pasahero?
May koneksyon ba sa pagpigil ng hawaan ng COVID-19 ang pagbago o pagputol ng mga ruta ng mga pampublikong sasakyan?
Kung pinayagan na mag backriding sa private motorcycles ang mga nagtatrabaho at mga persons authorized outside their residence, pwede na rin ba ang backriding sa tricycles at motorcycle taxis.
Ang paglalagay ba ng mga harang sa kalye ay kailangan?

Marahil ay marami pang nais itanong ang mga taga transport sector sa mga medical experts upang maliwanagan ang mga motorista at mga tao sa kalye at para naman maging angkop ang mga polisiya na ipinatutupad sa public transportation.

Sa ganitong paraan ay mas gagaan ang pagkilos at mas ligtas ang mga pasahero at mga drivers sa araw araw at mapagsisilbihan nila ng mas epektibo ang mga pasahero at ang publiko.

Mahirap ang mga ‘tsamba-tsamba’ at may ibang pakay maliban sa kaligtasan dahil napagsususpetsahan na ginagamit lamang ang pandemya upang magpatupad ng polisiyang wala namang koneksyon sa problema sa kalusugan. At kapag may sagot na ang mga medical experts sa mga tanong na ito, sana ay pakinggan naman sila ng gobyerno. (Atty. Ariel Enrile-Inton)