Sinimulan nang talakayin ng House Committee on Justice ang nakabinbin na 12 panukala na naglalayong ibalik ang pagpapataw ng parusang kamatayan.

Ito ay matapos na umapela si Pangulong Rodrigo Duterte sa dalawang kapulungan ng Kongreso sa ikalimang SONA nito na asikasuhin ang mga panukalang batas para sa reimposition ng death penalty para sa mga krimen na may kaugnayan sa kalakaran ng iligal na droga.

Sa kanyang sponsorship speech, binigyan diin ng pastor-lawmaker na si House Minority Leader Bienvenido Abante na hindi immoral ang pagpapataw ng parusang kamatayan sapagkat ang Diyos aniya ang siyang nagtatag nito para sa ikabubuti ng tao.

Iginiit ni Abante sa mga kritiko ng panukalang batas na dapat “mata sa mata, ngipin sa ngipin” ang pagpapanagot sa mga nagkasala dahil paano naman aniya ang mga naagrabiyadong indibidwal, lalo na iyong mga binawian ng buhay bunsod ng nagawang krimen.

“I am for death penalty. Advocacy ko ito in defense of human life, honor and dignity… and respect for law and authority,” ani Abante.

Kinontra naman ni House Dangerous Drugs Committee chairman Robert Ace Barbers ang mga nagsasabing hindi deterrent sa pagsawata sa mga krimen na may kaugnayan sa iligal na droga ang muling pagpapataw ng parusang kamatayan.

Walang basehan aniya ito lalo pa at iisang kaso lamang sa Pilipinas ang humantong sa death penalty at wala pa aniyang kaugnayan ito sa iligal na droga.

Kadalasan kasi aniya sa mga tinutukoy na datos para masabing hindi deterrent ang death penalty sa mga drug-related crimes ay mga pag-aaral sa ibang bansa at kultura.

Hindi rin aniya dapat maging balakid para sa gobyerno na huwag gawin ang nararapat at makabubuti sa mga mamamayan kahit pa aminado siyang may mga butas sa justice system ng bansa.

Bukod dito, hindi rin aniya dapat magpatali ang Pilipinas sa mga international commitment nito dahil pinapahintulutan naman ng Saligang Batas ang pagpapataw ng parusang kamatayan.

Pero ayon kay Commission on Human Rights commissioner Karen Dumpit, malaki ang epekto sa ekonomiya at pakikitungo ng bansa sakaling ituloy ang reimposistion ng death penalty dahil sa mga paglabag sa maraming international agreements at obligations.

Bukod dito, wala naman kasi talagang compelling reasons para sa reimposition ng death penalty.

Papahinain lamang din aniya nito ang posisyon naman ng Pilipinas sa pag-apela sa buhay ng mga OFWs na nahaharap din sa death row sa ibang bansa. (Daris Jose)

Mula sa mahigit 10 taon, isang taon na lamang ang actuarial life ng Philippine Health Insurance Corporation (Philhealth).

Ito ang inamin ni Philhealth Senior Vice President for Data Protection Office Nerissa Santiago sa pag-arangkada ng pagdinig ng Senate committee of the whole kahapon.

Ayon kay Santiago, posibleng hindi na sila makapagbigay ng benepisyo sa mga miyembro nito sa 2022.

Sa pagtatanong ni Senate Minority Leader Franklin Drilon, sinabi ni Santiago na sa kanilang pagtaya, sa pagtatapos ng taon ay aabot na sa P90 bilyon ang kanilang losses at sa pagtatapos ng 2021 ay aabot na sa P147 bilyon.

Iginiit ni Santiago na kung hindi sila mabibigyan ng karagdagang subsidiya ng gobyerno ay posibleng hindi na kayanin pa ng Philhealth ang pagkakaloob ng mga benepisyo.

Sa naturang pagdinig, dinikdik din ng mga senador ang mga opisyal ng PhilHealth kaugnay sa sinasabing anomalya sa kanilang tanggapan.

Kinuwestyon  ni Senador Panfilo Lacson ang umano’y maanomalyang pagpapalabas ng advance na pondo para sa ilang medical facilities, kabilang ang dialysis centers at mga maternity package sa ilalim ng Internal Reimbursement Mechanism na para sana sa COVID-19 treatment.

Ilan sa tinukoy ni Lacson ang pagpapalabas ng kabuuang P45.176 milyon sa B. Braun Avitum Philippines Free Standing Dialysis Center, gayundin ang P226.38 milyong maternity package.

Nilinaw naman ng mga opisyal ng Philhealth na binigyan ng pondo kahit ang mga non-COVID-19 patients dahil nakasaad sa kanilang programa na lahat ng ospital na may pending claim ay dapat mabigyan.

Ibinunyag din ni Senador Francis Tolentino na nakatanggap sila ng impormasyon na ilang pagamutan, partikular sa lalawigan ng Cebu, ang idinedeklarang may COVID-19 ang kanilang pasyente kahit wala para lang makasingil sa Philhealth.

Kinuwestyon din ni Lacson ang mga opisyal ng PhilHealth sa pagbili ng umano’y overpriced na network switch layer.

Sa datos na iprinisinta ni Lacson, noong 2019 ay bumili ang Philhealth ng switches sa halagang P4.81 milyon gayong ang market price nito ay P939,360 lamang o overpriced ng P3.87 milyon.

Subalit kahit nakaimbak pa sa bodega ang mga equipment na ito ay muli umanong binalak ng ahensya na bumili ng karagdagang switch.

Naging mainit din ang pagtatanong ni Tolentino hinggil naman sa mga opisyal ng Philhealth na una nang pinagbibitiw ni Pangulong Rodrigo Duterte.

Inamin ni Philhealth President and CEO Ricardo Morales na hindi niya ipinatupad ang mga resolution kaugnay sa pagpapa-resign sa mga opisyal ng ahensiya dahil posible aniyang maparalisa ang kanilang operasyon.

Ipinaalala ni Tolentino na pinagbibitiw ang ilang opisyal ng Philhealth dahil sa isyu ng katiwalian subalit sa halip na ipatupad ang kautusan ay nabigyan pa ng promosyon ang mga ito.

Itinanggi naman ito ni Morales at iginiit na wala rin namang naihaing kaso laban sa mga opisyal ng PhilHealth kaya nanatili ang mga ito sa kanilang pwesto.  (Ara Romero)

“Alam ko ang sinasaway niyo lang ay driver, pero simula sa araw na ito, ang sasawayin niyo na ay taumbayan.”

Ito ang binitiwang salita ni Manila Mayor Isko Moreno Domagoso sa 400 traffic enforcers ng Manila Traffic and Parking Bureau (MTPB) na itinalaga nitong COVID-19 safety marshals sa lungsod.

Hinarap ng alkalde ang mga itinalagang COVID-19 safety marshals sa Kartilya ng Katipunan ngayong umaga kung saan sinabi nito na sila ang magsisilbing katuwang ng kapulisan at mga opisyal ng barangay sa pagpapatupad ng “health protocols” sa ilalim ng umiiral na Modified Enhanced Community Quarantine (MECQ) sa Maynila.

“Kayong lahat ay sanay sa kalsada. Araw-araw na ginawa ng Diyos marami na kayong nakitang makukulit, marami na rin kayong experience sa pakikiusap sa mga tao. We will help our uniformed personnel in the PNP and the MPD. We will augment them for their effort to keep peace and order of the city,” ani Domagoso.

Paliwanag ni Domagoso, sa kabuuang bilang ng mga traffic enforcers ng MTPB ay itinalaga nitong COVID-10 safety marshals habang ang kalahati naman ay ipagpapatuloy ang pagsasa-ayos sa daloy ng trapiko sa kalsada ng lungsod.

Dagdag pa ni Domagoso, bilang deputized civilian personnel, ang mga itinalagang safety marshals ay tutulong sa mga kapulisan at barangay na tawagin ang pansin o sitahin ang mga residente na pasaway at hindi sumusunod sa ipinapatupad na health protocols tulad ng pagsusuot ng facemask, pagpapanatili ng physical distancing, mga residente na maaaring lumabas o hindi sa kanilang bahay atbp. umiiral na ordinasa at batas.

“Sasawayin natin ang mga hindi sumusunod sa batas, pero hindi natin kailangan maging mainitin ang ulo, hindi tayo kailangan maggagalit-galitan. Magagalit lang tayo kapag talagang may tiyak na kagaguhan, kawalanghiyaan, katolonggesan,” ayon pa kay Domagoso. (Daris Jose)