Malapit na ang deadline ng DOTr at TRB sa cash transaction sa mga tollways pero marami pa ring problema sa RFID ang nararanasan ng mga motorista. Hindi pa rin masiguro kung mapag-iisa ang sistema ng Autosweep at Easytrip at ‘baka’ sa June 2021 pa raw ito pero ‘kung’ makikipag-cooperate ang dalawang malalaking negosyo na Autosweep at Easytrip. Kaya ang panawagan ng mga mambabatas ay panatilihin muna na magkaroon ng cash lanes sa mga tollgate.

Sangayon dito ang Lawyers and Commuters Safety and Protection (LCSP) – hindi kami tutol sa RFID system pero dapat may option ang mga motorista sa mga emergency cases o para sa mga bihira naman dumaan sa tollways. Halimbawa ang mga taxi.

Pagpalagay mo na may RFID sticker sila. Pero naubos ang load. May pasaherong sakay na ang destinasyon ay sa tollgate ang daan –magpapaload ba agad ang taxi driver o pasahero.

At saan sila papaload? Maghahanap pa ng loading station? Sa mga emergency cases naman. Kung bihira ka naman dumaan sa tollgate lalo na yun mga taga probinsya na luluwas isa o dalawang beses isang taon di ba pwedeng cash transaction na lang sila?

Pero baka raw magkahawaan ng Covid19 pag cash transaction? Nilinaw ng World Health Organization na walang specific research na nagpapatunay nito.  Sabi ng WHO Spokesperson Fadela Chaib – “We did not say that cash was transmitting coronavirus”. Pero ipagpalagay mo na, di ba pwede maglagay ng payment tray o lagayan ng bayad at sukli – tulad sa mga drive-thru ng mga fastfood restaurants – ang mga operator ng tollways. Hindi naman siguro sila gagastos ng milyon-milyon para dito.

Sana ay pagbigyan ng Dotr at TRB ang pananatili ng emergency cash lanes sa mga tollways para may option ang mga motorista hanggat hindi pa nila naaayos ang inter-operability ng dalawang concessionaires at hindi pa nahaharap at nabibigyang sagot ang mga reklamo ng mga motorista sa loading, barrier at installation.

Wala naman sigurong mawawalang kita ang mga malaking negosyante kung may emergency cash lanes? O may mawawalan nga ba? (Atty. Ariel Enrile-Inton)

Iniulat ng Department of Education (DepEd) na umabot sa nasa P16.8-milyon ang halaga ng mga learning materials na nasira sa kasagsagan ng pananalasa ng Bagyong Ulysses.

Sa isang situation report, sinabi ng DepEd na halos 400,000 learning materials, na karamihan ay nanggaling sa Bicol region, ang nasira bunsod ng bagyo.

Maliban sa Bicol, nakatanggap din aniya ng report ang DepEd tungkol sa mga nasirang learning materials sa Cordillera Administrative Region, National Capital Region, Ilocos Region, Cagayan Valley, Central Luzon, Calabarzon, at Mimaropa.

Sinira rin daw ng bagyo ang mahigit 23,000 computer sets sa ilang mga elementary at secondary schools sa buong bansa.

Habang nasa halos 1,800 namang mga paaralan ang napinsala kaya kailangan ng DepEd ng nasa P3.6-bilyon para sa pagsasaayos ng naturang mga istraktura.

Sa pagtataya ng kagawaran, nasa P38.9-bilyon ang kinakailangan para sa pagsasaayos ng mga pinsala.

Ngunit as of November 20, nakapaglaan pa lamang ang ahensya ng P5.7-milyon para sa “other non-infrastructure needs.”

Nag-donate na rin daw ng P1.4-milyon ang mga local DepEd offices para sa iba pang mga regional at division units na naapektuhan ng bagyo.