Ang Diyaryong Pinagkakatiwalaan
INILAMPASO ng 19-anyos na Spanish tennis player na si Carlos Alcaraz ang Norwegian player na si Casper Ruud sa katatapos lamang na US Grand Slam Championship game sa New York.
Sa katunayan ito ang kauna-unahang Grand Slam Singles title ni Alcaraz matapos nitong matalo si Ruud sa score 6-4, 2-6, 7-6(1), 6-3.
Sa ngayon, ang Spanish tennis player na si Alcaraz ay aakyat na sa No.1 ATP rankings bilang pinakabata at bilang nagkampeon sa US Open Mens Singles.
NAGSAGAWA ng inspeksyon ng Bureau of Customs (BOC) kasama ang ilang ahensya ng gobyerno ang ilang warehouse sa Meycauayan Bulacan nitong Huwebes
Naglabas ang BOC ng siyam na Letter of Authority at Mission Orders laban sa mga may-ari, kinatawan, o sinumang may hawak ng mga imported na kalakal na nakaimbak sa mga bodega.
Natuklasan sa isinagawang inspeksyon ang 11,717 sako ng local sugar na may assorted brnads at 50,182 sako ng Mithr Phol Pure Refined Sugar mula Thailand sa B3L5 Kendex Drive, Polyland Industrial Subdivision; at 60,876 sako ng imported na assorted brands mula Thailand sa Edison Lee Mktg Dazo Compound.
Gayundin ang 1,860 sako ng Mithr Phol Pure Refined Sugar mula sa Thailand ang natagpuan sa Olympia Street, Sterling Industrial Park; habang 62,734 locally produced na asukal na may iba’t ibang tatak, gayundin ang mga kitchenware at GM na produkto, ay natagpuan sa Copper Street, Muralla Industrial Park.
Tinatayang nasa P936 milyon ang halaga ng kalakal na natagpuan sa mga bodega ng asukal
Ang mga kinatawan ng Sugar Regulatory Administration (SRA) ay hindi nakiisa sa pagpapatupad ng mga LOA ngunit naroroon sila sa panahon ng imbentaryo upang matukoy kung ang mga lokal na nakaimpake na asukal ay talagang lokal na ginawa dahil sa mga ulat ay nagsasaad na ang nasabing smuggled na asukal ay nire-repack upang maging lokal na produkto.
Binigyan naman ng BOC ang mga may-ari o kinatawan ng mga bodega ng 15 araw upang magprosinta Ng dokumento bilang patunay na ang kanilang kalakal ay legal na inimport sa bansa.
Patuloy namang binabantayan ang mga bodega habang nakabinbin ang pagsusumite ng mga dokumento.
“We have to be on our toes 24 hours 7 days a week. You will see that our teams have been operating round the clock, even on weekends. This shows the determination of this administration in making accountable the groups that could be helping this sugar crisis blow out of proportion,” sabi ni Commissioner Yogi Filemon Ruiz.
Ang operasyon ay bahagi ng marching order sa Bureau of Customs ng Pangulong Ferdinand Marcos Jr. upang siyasatin ang mga bodega na sinasabing nag-iimbak ng asukal sa gitna ng krisis sa suplay ng asukal sa bansa. (Gene Adsuara)
PINURI ng Malakanyang ang Pinay na si Alex Eala na nagwagi sa US Open girls’ singles competition laban kay Lucie Havlickova ng Czech Republic.
Lumikha kasi si Eala ng makasaysayang pagkapanalo at tinanghal bilang kauna-unahang Pilipino na nanalo ng Grand Slam singles title sa tennis sa nasabing kumpetisyon.
Sinabi ni Press Secretary Trixie Cruz-Angeles na binabati ng Malakanyang ang 17-year old na si Eala nang talunin nito si Havlickova sa score na 6-2, 6-4 sa kumpetisyon sa Flushing Meadows, New York nitong Sabado (Sunday, Sept. 11, Manila time).
“Mainit na pagbati kay Alex Eala, ang kauna-unahang Pilipino na nagkamit ng titulo sa Junior Grand Slam Singles ng 2022 U.S. Open Championship!” ayon kay Cruz- Angeles.
“Maraming salamat sa karangalan na iyong ibinigay para sa ating bansa. Mabuhay ang atletang Pinoy,” dagdag na pahayag nito.
Ipinamalas ni Eala ang kanyang husay sa buong mundo sa simula pa lang nang laro matapos magtala ng 1-2 score sa opening set kung saan napanalunan niya ang limang laro.
Nakuha pansamantala ni Havlickova ang momentum ng laro sa pamamagitan ng 4-3 lead.
Pero nakabawi si Eala at nakontrol niya ang mga sunod na laro kung saan nakuha niya ang scores na 40-15, ang panghuli at ikasampung laro.
Naging emosyonal naman si Eala sa kanyang pagkapanalo.
“Buong puso ko itong ipinaglaban, hindi lang para sa sarili ko kundi para makatulong din ako sa kinabukasan ng Philippine tennis. So hindi lang ‘to panalo ko, panalo natin ‘to,” ayon kay Eala nang tanggapin niya ang kanyang trophy.
Unang tinalo ni Eala noong Sabado si Victoria Mboko ng Canada sa semi finals para maging unang Pilipino na nakakuha ng Grand Slam.
Nahigitan niya ang dating tagumpay ni Felix Barrientos sa semifinals ng 1985 version ng Wimbledon.
Si Eala ay anak ng dating national swimmer na si Riza Maniego.
Samantala, sinabi pa ni Cruz-Angeles na ang pagkapanalo ni Eala ay nangangahulugan ng kahalagahan ng “good program” para sa pagtrato sa mga atletang Filipino.
Sinabi pa ni Cruz-Angeles na sa ilalim ng administrasyon ni Pangulong Ferdinand Marcos Jr., isusulong ang plano at hakbang ng Philippine Sports Commission (PSC) para sa pagpapabuti ng mga polisiya nito.
“Kaya naman sa ilalim ng administrasyon ng ating Pangulong Ferdinand Bongbong Marcos Jr., may mga plano at hakbang na ang PSC (Philippine Sports Commission) sa pagpapabuti ng mga polisiya bilang tugon dito,” ayon kay Cruz-Angeles. (Daris Jose)
APAT na Transport-Commuters Advocates, kabilang na ang Lawyers for Commuters Safety and Protection (LCSP) ang nanawagan sa Technical Working Group (TWG) ng pilot test ng motorcycle taxi operation na imbestigahan ang diumano ay pagbenta ng MOVE IT sa Grab upang ang huli ay makapasok sa PILOT TEST ng motorcycle taxis. Matatandaan na tatlo ang binigyan ng accreditation ng TWG na binuo ng DoTR para mamasada bilang motorcycle taxis – Angkas, Joyride at Move It – habang wala pang batas. Marami ang nag apply for accreditation pero tatlo lang ang binigyan ng accreditation. Pero ang balita ay “ibinenta” na ng Move It ang kumpanya nila sa Grab.
Mariing itinanggi naman ito ng Move It. Sa isang statement sinabi nila na nananatili silang isang accredited company ng TWG at walang takeover ng Grab na naganap. Pero ano mang tanggi ng Move It ay kailangan nang magpulong ang TWG upang imbestigahan ito.
Imposibleng hindi interesado ang Grab na pumasok sa Pilot Test. Dahil ayon kay Ariel Lim ng National Public Transport Coalition at member ng TWG ay nag- apply noon ang Grab pero hindi na accredit dahil “late” ang application. Dati pa nilang intensyong pumasok. Hindi tutol ang LCSP sa pagpasok ng mga bagong player sa motorcycle taxi industry pero dapat ay pagdaanan nila ang mahigpit na prosesong ipinatutupad ng TWG. Hindi pwede ang BACKDOOR ENTRANCE na gagamitin ang isa sa tatlong accredited companies nang hindi dumadaan sa proseso ng TWG. BAWAL BAKAS. BAWAL ANG KABIT SYSTEM. AT HUWAG PAYAGAN NA HABANG NASA PILOT TEST PA ANG MOTORCYCLE TAXIS. Ang layunin ng Pilot Run ay hindi para sa negosyo kung hindi para bumalangkas ng polisiya IN AID OF LEGISLATION para masumite sa Kongreso at isabatas na ang motorcycle taxis. Tanong? IN AID OF LEGISLATION BA ANG PAGPASOK NG GRAB? Yan ang dapat tingnan ng TWG habang maaga. Isa ang LCSP na unang nagsulong na gawing ligal na ang motorcycle taxis maraming taon na nakalipas.
Kaya hindi maaaring tumahimik lamang kami sa isyu na yan kung ito ay makapagpapaantala sa pag sasabatas ng motorcycle taxi.
Ok ang kumpetisyon pero sana pagtapos na ng pilot run at may malinaw na polisiya na tulad ng pagbibigay prangkisa , ruta, pamasahe, safety precautions at iba pa.
Kayat panawagan ng LCSP, National public Transport Coalition, Arangkada Riders Alliance at Digital Pinoys – Imbestigahan ang Grab- Move It deal. (Atty. Ariel Inton Jr)
NAGSIMULA ring bilang child stars sina Carmina Villarroel at Chuckie Dreyfuss kaya alam nila ang mga pinagdaraanan ni Jillian Ward na bida na ngayon sa GMA Afternoon Prime teleserye na ‘Abot Kamay Na Pangarap’.
Ilan sa mga naging pelikula ni Chuckie ay Idol, I Have Three Hands, The Crazy Professor, Mga Kuwento Ni Lola Basyang, When I Fall In Love, Once Upon A Time, Batang Quiapo, Kambal Tuko, Penoy Balut, Family Tree at Tiyanak.
Si Carmina naman ay lumabas sa mga pelikulang Pinulot Ka Lang Sa Lupa, Underage, Student Body, Bobo Cop, Babaeng Hampaslupa, Good Morning Titser, Regal Shockers: The Movie, Isang Araw Walang Diyos, Limang Daliri Ng Diyos at Tiyanak,
Pero malaki raw ang pagkakaiba ng pagiging child star ngayon sa pagiging child star noong ’80s. Bukod daw sa may TV station na nag-aalaga sa mga batang artista ngayon, provided na ng lahat ng comforts kapag nagte-taping or shooting on location.
Kuwento ni Chuckie: “I started in showbiz when I was 7-years old. From That’s Entertainment, gumawa na ako ng mga movies. Hindi pa kasi uso mga teleserye noon. Ibang-iba ang situation ng mga child stars noon, lalo na in terms of how many hours kang nagtatrabaho. Ngayon kasi may specific hours kung kelan dapat patigilin na ang mga bata mag-work. Ako kasi naranasan ko na two days straight na nagsu-shooting. Mas okey ang kalagayan ng mga child stars ngayon kumpara noon.”
Sey naman ni Mina: “Nag-start ako talaga sa commercials around 9 or 10 years old. Sa movies, 12-years old ako nagsimula. Masasabi ko ay iba noon. Ngayon kasi may mga standby area, may airconditioned tents, may portable toilets ang mga artista.
“Noon wala kaming mga ganyan. Yung tambayan namin sa loob ng sasakyan namin at may dala kaming dariling travel size na portalet. Mas kumportable ang mga bata ngayon compared sa amin. Tsaka mas protektado sila ngayon in case magkaroon ng aberya sa set.”
Ang edge nga lang nina Carmina art Chuckie sa mga child stars ngayon ay ang pagkakataong nakatrabaho nila ang mga mahuhusay na artista tilad nina Fernando Poe, Jr, Dolphy, Susan Roces, Eddie Garcia, Nora Aunor, Vilma Santos, Maricel Soriano, Richard Gomez, Gabby Concepcion, Tirso Cruz III at maraming pang iba.
Sa mga direktor naman, masuwerte sila’t nakatrabaho nila ang mga yumao nang sina Ishmael Bernal, Peque Gallaga, Mel Chionglo, Maryo J. delos Reyes, Joey Gosiengfiao, Channing Carlos at Emmanuel Borlaza.
***
MUNTIK na palang hindi makasama sa FOX series na Monarch si Iñigo Pascual kung hindi siya pinilit na mag-audition ng kanyang US agent.
Kuwento ni Iñigo na hesitant siyang mag-audition sa US at tatlong projects sa US ang tinanggihan niyang puntahan ang auditions dahil sa paniniwalang hindi siya mapapansin at kuntento na raw siya sa career niya sa Pilipinas.
Noong mag-announce ng casting call for Monarch, pinagtulakan pa siya ng kanyang agent na mag-audition kahit na ayaw ni Iñigo.
“I was two weeks late for the submission, because I wasn’t really considering doing it. In my mind, marami namang young actors sa States, mas madali silang makukuha doon, may mas magagaling doon. Sabi ko, ‘Okay na ako sa career ko dito sa Pilipinas. Hindi naman ako makukuha doon. Ano pang point?’
“Until kinausap ako ng mga managers ko. Sabi nila sa akin, ‘May career ka nga dito, pero paano ‘pag nakuha mo ‘yun? Big opportunity ‘yun. ‘Pag hindi mo makuha, there’s no harm in trying. May career ka pa rin dito sa Philippines na puwede mong balikan,’” sey ni Iñigo.
July 2021 nag-audition si Iñigo at after one week ay nakatanggap siya ng tawag na siya ang napiling gaganap na Ace Grayson sa Monarch. Nagsimula siyang mag-shoot para sa naturang series in September 2021 kunsaan isa sa co-stars niya ay ang Oscar winning actress na si Susan Sarandon na gaganap na kanyang adoptive grandmother.
Last Sunday, September 11 nag-premiere ang Monarch sa US at today, September 13 naman dito sa Pilipinas via iWantTFC.
Dahil sa Monarch, naging bukas na si Iñigo sa mga darating pang opportunities sa kanyang career sa labas ng Pilipinas. isang dahilan kung bakit nagpa-tattoo siya ng Baybayin word na “Malaya”.
“When I was here in the Philippines, I felt stuck. I didn’t know what I was going to do with my career. I felt like I didn’t know what I wanted to do after ‘Dahil Sa ‘Yo.’ I felt like I was kind of lost in a way. When I got to do ‘Monarch,’ there was a lot of things na masasabi kong, I felt malaya. I’m free to dream whatever I want to dream of. Kaya kong mangarap at gawin ‘yung mga gustong gawin.
“Nandoon ‘yung kaba, nandoon ‘yung takot, halo-halo, excitement. Siyempre, first ko ‘to na project sa States, at sana magtuloy-tuloy na after this project. Sana marami pang opportunity na dumating. Sana marami akong young aspiring artists na ma-inspire na mangarap at huwag mag-give up sa pangarap nila. I’m also claiming that this project will open more doors for other Filipino artists to be able to cross over and to be able to create a movement, a Filipino wave in the States.”
***
ANG nga pelikulang Kun Maupay Man It Panahon, Big Night, Historya ni Ha, On The Job: The Missing 8, at Walang Kasarian ang Digmang Bayan ay maglalaban pata sa Best Film categpry ng 45th Gawad Urian ng Manunuri ng Pelikulang Pilipino na naka-schedule sa October 27.
Sa Best Actress category, magsasalpukan sina Charo Santos-Concio (Kun Maupay Man It Panahon), Donna Cariaga (Rabid), Elora Españo (Love and Pain in Between Refrains), Kim Molina (Ikaw at Ako at ang Ending), and Yen Santos (A Faraway Land).
Sina John Arcilla (On The Job: The Missing 8), John Lloyd Cruz (Historya ni Ha), Christian Bables (Big Night!), Paolo Contis (A Faraway Land), Francis Magundayao (Tenement 66), Shogen (Gensan Punch) at Dingdong Dantes (A Hard Day) ang magsasabong para sa Best Actor category.
Nakakuha pa ng dalawang nominasyon si John Arcilla sa Best Supporting Actor category. Nominated siya para sa Big Night at A Hard Day.
Ang Filipino animator and filmmaker na si Roque “Roxlee” Lee ang tatanggap ng Natatanging Gawad Urian trophy.
Heto ang iba pang nominees ng 45th Gawad Urian:
Pinakamahusay na Direktor: Joselito Altarejos (Walang Kasarian ang Digmang Bayan); Lav Diaz (Historya ni Ha); Lawrence Fajardo (A Hard Day); Carlo Francisco Manatad (Kun Maupay Man It Panahon); Erik Matti, On The Job: The Missing 8; Jun Robles Lana (Big Night!)
Pinakamahusay na Pumapangalawang Aktres: Dolly de Leon (Historya ni Ha); Lotlot de Leon (On The Job: The Missing 8); Eugene Domingo (Big Night!); Jay Valencia Glorioso (Rabid); Mae Paner (Historya ni Ha); Shella Mae Romualdo (Arisaka)
Pinakamahusay na Pumapangalawang Aktor: John Arcilla (Big Night!); John Arcilla (A Hard Day); Ronnie Lazaro (Gensan Punch); Sandino Martin (Walang Kasarian ang Digmang Bayan); Dante Rivero (On The Job: The Missing 8); Dennis Trillo (On The Job: The Missing 8)
(RUEL J. MENDOZA)
BUMABA ang bilang ng pamilyang Pinoy na nakakaranas ng gutom sa bansa sa ikalawang bahagi ng taong 2022.
Batay sa ulat ng Social Weather Stations (SWS), mula sa dating 3.1 milyon noong 1st quarter ng 2022 ay naging 2.9 milyong Pinoy na lang ang nakakaranas ng involuntary hunger o hindi nakakakain ng kahit isang beses sa isang araw, sa nakalipas na buwan.
Ang hunger rate noong Hunyo 2022 ay nasa 0.6 puntos na mababa sa 12.2% o nasa 3.1 milyong pamilya noong Abril 2022, at 0.2 puntos na mas mababa sa 11.8% o 3.0 milyon, noong Disyembre 2021.
Gayunman, ito ay mas mataas ng 1.6 puntos sa 10% o nasa 2.5 milyong pamilya noong Setyembre 2021.
Mas mataas pa rin ito ng 2.3 puntos sa pre-pandemic annual average na 9.3% noong 2019.
Pinakamaraming nakaranas ng gutom sa mga pamilya mula sa National Capital Region (NCR) na nasa 14.7%.
Sinundan naman ito ng Mindanao (14.0%), Balance Luzon (11.9%), at Visayas (5.7%).
Kaugnay nito, natuklasan din sa survey na 48% ng mga pamilyang Pinoy ang nagsabi na sila ay “mahirap” o “poor”, 31% ang nasa “borderline poor,” at 21% ang “hindi mahirap” o “not poor.”
Pagdating naman sa mga uri ng pagkain na kanilang kinakain, sinabi rin sa survey na 34% ang nagsabing sila ay “food-poor,” 40% ang “borderline food-poor,” at 26% ang “not food-poor.”
Nabatid na ang naturang survey ay nilahukan ng 1,500 adults at isinagawa sa pamamagitan ng face-to-face interviews.
EPEKTIBO na sa ngayon ang “optional” na paggamit ng face masks laban sa COVID-19 outdoors sa mga hindi siksikan na lugar, matapos aprubahan ni Pangulong Ferdinand “Bongbong” Marcos Jr. ang rekomendasyon ng Inter-Agency Task Force for the Management of Emerging Infectious Diseases (IATF).
Ito ang kinumpirma ni Press Secretary Trixie Cruz-Angeles, Lunes, sa pag-isyu ni Marcos ng Executive Order 3.
Matatandaang ika-7 ng Setyembre nang ibalitang inirekomenda ng IATF na tanggalin na ang mandatory face mask requirement sa mga pampublikong lugar basta’t “non-crowded” at merong “good ventilation” ang mga naturang lugar.
Sa kabila nito, labis pa rin naman daw ineengganyo ng gobyerno ang mga senior citizens (60-anyos pataas), mga immunocompromised individuals at mga hindi pa kumpleto ang bakuna na patuloy magsuot ng face masks, ayon kay Angeles.
Ang lahat ng ito ay nangyayari ngayong extended pa ng tatlong buwan ang state of calamity sa Pilipinas dahil sa COVID-19. (Daris Jose)
MAAARING galing sa labas ng Pilipinas ang nasa likod o surce ng personalized text scams o unsolicited text messages.
Sinabi ni Department of Information and Communications Technology (DICT) Undersecretary Alexander Ramos, nakikipag-ugnayan na sila sa kanilang international counterparts para idetermina kung mayroon silang naitala na magtuturo sa IP address ng destination servers na sangkot sa text scams.
“Meron na kaming leads kung saan talaga ito nangyayari. Ang theory namin dito ay hindi ho ito local. Nagkataon lang na ang sistema is parang automated,” ayon kay Ramos.
“Ito ay hindi nangyayari sa Pilipinas lang, nangyayari rin ito sa ibang bansa kaya it’s a bigger effort, a bigger investigation para matukoy itong destination sites,” dagdag na pahayag nito.
Sinabi pa rin ni Ramos, isa ring Executive Director ng Cybercrime Investigation and Coordinating Center (CICC) na iniimbestigahan na ng National Privacy Commission kung mayroong servers ang na-hacked, subalit walang natuklasan.
Tinitingnan din ng mga ito ang pagbili ng bultong SIM cards upang matunton kung saan nagmumula ang text spams.
“Isa ‘yan sa paraan sa pag-trace sa pinag-orderan ng telco companies, na produce [nila] ang listahan kung sino ang mga individual o mga dealer… Isa ‘yan sa mga leads natin sa direksyon kung saan nagagamit itong SIM cards na ‘to,” ani Ramos.
Aniya pa, nagsasagawa na rin sila ng parallel investigation sa inarestong Chinese at South Koreans na di umano’y sangkot sa pagpapalaganap ng text scams sa bansa.
“Ang kanilang binibiktima, mga kababayan din nila sa ibang bansa. So, may parallel, pero ibang scheme naman ‘yan, ibang technique ‘yan,” anito.
Samantala, dalawang South Korean national na wanted sa P1 bilyon telephone scam ang bumagsak sa kamay ng Criminal Investigation and Detection Group (CIDG) sa isinagawang operasyon sa BF Homes sa Paranaque City.
Kinilala ni CIDG chief Brig. Gen. Ronald Lee ang mga suspek na sina Juyeon Lee at Seung Yeol Lim na inaresto ng magkasanib puwersa ng joint operations ng CIDG, Anti-Transnational Crimes Unit and Intelligence Division ng South Korea at Bureau of Immigration (BI) agents.
Ayon kay Lee, ang 2 suspek ay kabilang sa red notice na inilabas ng International Criminal Police Organization (Interpol) dahil sa pagkakasangkot sa transnational crime.
Natuklasan sa imbestigasyon ng Interpol na sina Lee at Lim ay kabilang sa big-time telephone scam syndicate na kumikilos sa Pilipinas mula 2015 hanggang 2016 at nagpapakilalang mga bank officials at call center agent para maka pambiktima.
Si Lee ang tumatayong boss na nag-o-operate ng voice phishing call centers sa ilang malalaking opisina sa Metro Manila. Nabatid na nakakulimbat na ang grupo ng halos US$3.7 million (halos P210 million) sa 215 mga biktima sa loob lamang ng 6 na buwan.
Sa halos isang taon ng operasyon ng grupo umaabot na sa P1 bilyon ang kabuuang natangay ng sindikato. (Daris Jose)
SA isang post sa kanyang IG Account (therealrossanaroces) ibinahagi ng dating sexy star na si Rosanna Roces ang karanasan niya sa taping ng FPJ’s Ang Probinsyano.
Doon lang niya binanggit na habang nagti-taping siya sa Ilocos ay namatay ang kanyang nanay. Sabi ni Osang, nagawa raw niyang itago ang lungkot pero sinabi niya sa mga co-stars niya na namatay ang nanay niya.
Hindi naman daw siya pwedeng umuwi dahil kailangan na naman mag-quarantine kapag siya ay nagbalik.
Dahil sa lungkot, kwento pa ni Osang, ‘di raw niya namalayan na tinatanggal niya ang kanyang pilikmata na ipinakabit niya bago mag-taping.
Sabi pa ng aktres, nasubok ang kanyang katatagan habang nasa taping ng FPJAP dahil matagal siyang nawalay sa kanyang pamilya na bihirang mangyari.
Kahit daw nakaisang taon since namatay ang kanyang ina, fresh na fresh pa ito sa alaala ni Osang.
Sa isang post pa niya ay masaya naman niyang ikinuwento na binigyan siya ng mga damit ni Megastar Sharon Cuneta.
Dahil pumayat na si Sharon kaya hindi na kasya rito ang iba niyang damit at isa si Osang sa mga nakatanggap na ang iba ay hindi pa naisusuot at may tag pa.
Gagamitin daw ni Osang ang damit na bigay ni Sharon sa taping ng bago niyang show na di pa niya pwedeng sabihin ang title.
***
PROUD nanay si Judy Ann Santos sa kanyang anak na si Yohan.
Tatlong medalya kasi ang naiuwi ng bagets sa sinalihan nitong swimming competition.
Wagi si Yohan ng gold medal sa butterfly, silver medal sa freestyle at bronze medal sa backstroke.
“So proud of you, all the while juggling school work, training and college application. You did so well baby girl,” posted ni Juday sa kanyang IG account (officialjuday).
As of this writing ay 55,009 likes na ang post at 267 comments. Kabilang sa mga nag-comment ay sina Beth Tamayo, Dominic Roque, Ryan Agoncillo, at Biboy Arboleda.
(RICKY L. CALDERON)
PERSONAL naming nasaksihan kung paano dinumog ng mga fans at ‘yung ibang tao na nagpunta sa Ayala Mall Cloverleaf ang mini-concert na handog ng mga celebrity endorsers ng BeauteDerm at guest artists, para sa grand opening ng store.
Punung-puno ng mga tao, lalo na sa palibot ng activity center na kung saan ginanap ang ‘Meet & Greet’ event last Sunday, September 11. Nag-uumapaw rin sa bawat floors ng mall na kung saan natatanaw nila ang mga kaganapan sa ibaba.
Inabangan namin ang paglabas ng dalawang social media influencers na first time magsasama sa isang big event, kung saan kitang-kita talaga ang pagsuporta ng kanilang mga fans.
Isa sa unang nag-perform si JC Santos, na patok na patok sa masa ang kanyang mapang-akit na pagkanta. Ang swabe-swabe ng banat niya lalo sa mga kanta ng ‘Apo Hiking Society’, nakaka-inlab, sa totoo lang.
Nagpasiklab din si Buboy Villar sa kanyang pagkanta, na tulad ni JC ay kinagiliwan ng masa.
Pero ang bongga ang dance number nila ni Jelai Andres, isa nga sa pinaka-tinilian lalo ng na kanyang mga fans, na ‘yun iba ay dumayo pa mula sa malalayong lugar, para lang makita siya ng personal.
Pero mas umapaw ang tilian at sigawan sa Ayala Mall Cloverleaf nang lumabas si Zeinab Harake, ang newest brand ambassador ng Beautederm, para sa kanyang pasabog na dance number.
Na ayon kay DJ Chacha, parang Daniel Padilla ang peg, ganun din ang karami ang mga tao at sigawan pag nagmo-mall show.
Magkasunod namang lumabas ang Kapuso couple na sina Ruru Madrid at Bianca Umali, para sa kani-kanilang song numbers.
Ramdam na ramdam namin ang pagmamahal nila kay Ruru, na lalong sumikat dahil sa ‘Lolong’ at nagsimula na ring mapanood ang ‘Running Man PH’ sa GMA, perfect siya mag-close ng event.
Aliw-aliw din kami kay Boobay na bukod sa magaling komedyante at magaling ding kumanta. Samantala, ang nag-open ng successful event ng Beautederm ay ang X-Factor UK finalist na si Maria Laroco, na halimaw nga sa pagbirit ng mga rock songs.
Infairness, sulit na sulit ang pumila at bumili nang magaganda at pinagkakatiwalaang produkto ng Beautederm, dahil may special seats sila at nagkaroon ng chance sa meet and greet, and course makapag-picture sa kanilang idolo at plus pa ng ibang stars.
Umulan din ng mga freebies na binibigay at binabato ng mga stars na nag-perform. Iba talaga ang saya ng mga nakakakuha ng products, na pwede nilang i-try pagdating sa kani-kanilang bahay.
Nakaka-touch din ‘yung ibang mommies na dala-dala ang mga kids, nakipagsiksikan at matiyagang naghintay dahil gustong makita ang hinahangaang social media stars. Na for sure, pinag-ipinunan nila, para makapunta sa event at makalapit sa mga celebrity endorsers.
Iba talaga magmahal ang mga nanay, lahat ay gagawin, para kaligayahan ng mga anak. Priceless ‘yun para sa kanila, at kaya nilang magsakripisyo sa ibang bagay. Kitang-kita namin ang saya nila, lalo na sa kanilang kakaibang experience, na mananatili sa mga kuha nilang mga larawan.
Congratulations Ms. Rhea Anicoche-Tan, sa isa namang matagumpay na grand opening at tulad ng nasa kanta… “sa Beautederm, gaganda ang buhay mo…” and at the same marami talagang napapasaya.
***
LAST September 7, nagbukas na ang SOCMED House (Ang Bahay ni Direk Miah), ang reality show ng KSMBPI (Kapisanan ng mga Social Media Broadcasters ng Pilipinas, Inc.) na puwedeng balik-balikan sa kanilang Facebook page at sa KRTV YouTube channel.
Aminado sina Direk Jeremiah Palma, na peg nila ang PBB (Pinoy Big Brother), na kung saan 10 housemates ang mapipili every week at titira sa isang condo unit sa Kyusi, na kung saan dadaan sila sa mga challenges, workshops at training.
Sa unang batch, siyam lang nakapasok sa bahay na sina Cristina Campuspos Abaigar (Noveleta, Cavite, 19), Princess Stephanie Mongit (Pasay City, 18), Johnson Baronia (Trece Martires, Cavite, 26), Clint Kenneth Benamer (Tanza, Cavite, 31), Ruel Carreon (Caloocan City, 43), Kriszle dela Cruz Teope (Quezon City, 35), Matthew Gabriel Canilang (San Pedro, Laguna, 19), Marvin Escueta (Quezon City, 34), at Rechelle Ann Vargas Lorsano (Quezon City, 17).
Ayon kay Dr. Michael Aragon, mga ordinaryong tao ang pinili nila na gustong mag-artista at hindi rin sila namimili basta lang nasa legal na edad ay puwedeng sumali o mag-apply sa reality show.
Magkakaroon ito ng four batches, na kung saan pipiliin ang grand winner after na makapasok na ang lahat ng housemates, at ang mananalo sa online voting ay magiging bida sa movie na ipo-produce ng KSMBPI, na ang advocacy ay makatulong talaga sa movie industry, lalo sa mga indie filmmakers.
Say pa ng founding chairman, “lahat silang 40 housemates ay kasama sa pelikula, kaya lahat sila ay winner na rin. Sa ranking na lang sila magkakaiba at roles na mapupunta sa kanila.”
After ng reality show, wala silang papirmahin o ima-manage dahil conflict of interest ‘yun. Ang aim lang nila ay mag-train for free at wala talagang kapalit.
“This is what advocacy is all about. We will not sign up anybody. So, kung may magka-interes na i-manage sila, they can do so. Pakakawalan namin sila.”
Ang hiling lang ng organisasyon, na kung sino man ang maging matagumpay sa mga pumasok sa Socmed House, ay mag-‘pay it forward’ at tumulong din sa mga nangangarap, pero walang kakayanan para suportahan ang kanilang ambisyon.
Samantala, noong Linggo, September 11, nag-exit na ang Batch 1 ng mga housemates na kung saan pinamalas nila ang kanyang pag-arte and soon ipakikilala na ang Batch 2 na papasok sa Socmed House.
(ROHN ROMULO)