PORMAL na binuksan ng Pamahalaang Lungsod ng Valenzuela sa pangunguna ni Mayor WES Gatchalian at ng Department of Agriculture (DA) sa pangunguna ni Assistant Secretary Christine Evangelista ang Kadiwa Store ng Alyansa ng mga Mamamayan ng Valenzuela (AMVA) Multipurpose Cooperative sa Barangay Ugong.

Ang Kadiwa Store ng AMVA Multipurpose Cooperative ay nabuo sa pamamagitan ng PhP 1,000,000 financial grant na ibinigay ng Department of Agriculture (DA) sa ilalim ng Enhanced Kadiwa ni Ani at Kita program. Ito ay naglalayong magbigay ng puhunan sa iba’t-ibang mga organisasyon gaya ng Non-Government Organizations, Kooperatiba, Asosasyon, Korporasyon, People’s Organization, o mga Homeowners’ Association na kayang magpanatili ng isang Kadiwa Store. Ang nasabing financial grant ay naglalayong magamit sa pagpapatayo ng mga Kadiwa Stores sa mga strategic na lugar, pagbili ng mga marketing equipment, at magsilbing paunang puhunan para sa nasabing tindahan.

Ang Kadiwa ni Ani at Kita program ay isang direct marketing program ng DA kung saan ang mga producers ay direktang mabibilhan ng publiko, na siyang magbibigay daan para maging mas mura ang mga pagkain at iba pang mga bilihin para sa publiko.

Ang AMVA ay isa sa iilang mga organisasyon sa lungsod na maswerteng nabigyan ng PhP 1,000,000 financial grant ng DA. ito ay naibigay noong Marso 13, 2023, higit-kumulang dalawang buwan para maitayo ang Kadiwa Store. Ang Kadiwa Store ay nagbebenta ng iba’t-ibang mga bilihin tulad ng mga gulay at gamit pang-kusina sa mas murang presyo. Ang mga miyembro ng AMVA ay makakakuha rin ng diskwento sa tindahan.

Sa tagumpay ng unang Kadiwa Store sa lungsod, ay patuloy na hinihimok ng Pamahalaang Lungsod at ng DA ang iba’t-ibang mga organisasyon sa lungsod na mag-apply sa Kadiwa program para sa patuloy na pagpapaunlad ng kabuhayan ng mga Pamilyang Valenzuelano.

Kabilang sa mga dumalo sa pagbubukas ng Kadiwa Store ay sina Vice Mayor Lorie Natividad-Borja, Councilor Niña Lopez, Housing and Resettlement Head Ms. Elenita Reyes, Local Economic Development and Investments Promotions Office Head Ms. Annaliza Vitug, Public Employment Services Office and Cooperative Development Office Head Ms. Josephine Osea, at Punong Barangay Ed Nazar at Konseho. (Richard Mesa)

MISYON ng Pamahalaang Lungsod ng Valenzuela na magbigay ng inklusibong serbisyo para sa lahat, kaya naman pinangunahan ni Mayor WES Gatchalian, sa pakikipag-ugnayan ng City Social Service and Development Office (CSWDO) at Housing and Resettlement Office (HRO) ang pagbibigay ng isang fully-furnished na housing unit sa isang PWD family sa Disiplina Village, Brgy. Ugong.

Ang benepisyaryo ay isang PWD family na kinabibilangan nina Mr. Jonady Zapanta, 42, kanyang kapatid na si Ms. Nelly Zapanta, 32, may sakit na Tetra-Amelia Syndrome, at ang kanilang pamangkin na si Ms. Marie Zapanta, 19, na may hydrocephalus. Ang pamilya ay kliyente na ng Pamahalaang Lungsod mula 2011 kung kailan nagsimula ang kanilang paghingi ng tulong pinansyal para sa kanilang pang araw-araw na pangangailangan.

Si Mr. Zapanta, bilang pinuno ng kanilang pamilya ay hindi napigilan ng kanyang sariling kapansanan at patuloy na nagsumikap bilang isang beautician sa Barangay Dalandanan para suportahan ang kanilang pamilya kung saan ang kinikita niyang PhP 4,000 kada buwan ay hindi sapat para sa pangangailangan ng pamilya.

Noong 2016, namagitan na ang CSWDO sa pamamagitan ng pagbibigay ng pang araw-araw na supply ng diapers at gatas. Nagbigay rin ng serbisyo si Ms. Amelia Gatuz , isang homecare volunteer, sa pamamagitan ng pagtulong sa pangangalaga kay Marie.

Dahil sa hirap ng sitwasyon ng pamilya ay inirekomenda sila ng CSWDO na mabigyan ng tuloy-tuloy at maayos na tulong, kaya naman binigyan sila ng Pamahalaang Lungsod ng isang housing unit sa Disiplina Village na naglalaman ng mga kagamitan para sa mga pangangailangan ng pamilya nanaglalayon magbigay ng mas komportableng matutuluyan para sa kanila.

Isa lamang ito sa mga darating pang programa ng lokal na pamahalaan na makakapagpagaan sa pamumuhay ng Pamilyang Valenzuelano.

Dumalo rin sa pagbibigay ng housing unit sina Councilor Niña Lopez, CSWDO head Ms. Dorothy Evangelista, HRO head Ms. Elenita Reyes, Ugong Punong Barangay Ed Nazar at Konseho. (Richard Mesa)