NAGHAIN ng reklamo sa Office of the Ombudsman laban sa mga opisyal ng Department of Transportation (DOTr) ang transport group na Manibela.

May kinalaman ito sa revocation ng kanilang prankisa ng mga hindi nakasali sa consolidation program ng mga public utility vehicles (PUV).

Ang mga sinampahan ay pinangunahan nina DOTr Secretary Jaime Bautista, Office of Transport Cooperatives (OTC) chairperson Ferdinand Ortega, atLand Transportation Franchising and Regulatory Board (LTFRB) chairperson Teofilo Guadiz III.

Sinabi ni Manibela President Mar Valbuena na ang mga opisyal ay lumabag sa konstitusyon at Anti-Graft and Corrupt Practices Act dahil sa pagsusulong ng PUV Modernization program.

Nanawagan din ito ng pagsampa ng kasong kriminal at ang kanilang preventive suspension.

Hinihintay pa ni Bautista ang kopya ng reklamo mula sa Ombudsman at handa aniya nito ng sagutin ang anumang paratang.

Pagtitiyak niya na ang sumasang-ayon sa konstitusyon ang mga isinusulong nilang PUV Modernization Program. (Daris Jose)

INIHAYAG ni Interior and Local Government Secretary Benjamin Abalos na ayaw patulan ni Pangulong Ferdinand R. Marcos Jr. ang panawagan ni dating Pangulong Rodrigo Duterte na ihiwalay na ang Mindanao sa Republika ng Pilipinas.

Ayon kay Sec. Abalos, hindi na napag-usapan sa sectoral meeting kaninang umaga ang isyu ng one Mindanao kung saan, ang naging sentro ng talakayan ay kung paano mapapalakas ang kampanya sa cyber crime.

Muli namang nanindigan si Abalos na isang paglabag sa konstitusyon kung may magtatangkang ihiwalay ang Mindanao sa Pilipinas.

Kung sa posibilidad naman aniya ng paghahabla sa dating Punong Ehekutibo kasunod ng mga naging pahayag nito na may kaugnayan sa pagnanais nitong ihiwalay na ang Mindanao sa Republika ng Pilipinas, bahala na aniya ang DOJ ukol dito. (Daris Jose)

KINOKONSIDERA ng Department of Information and Communications Technology (DICT) na “sophisticated” ang pinakabagong hacking attempts sa iba’t ibang government websites na naka-link sa IP addresses ng China-backed telcofirms.

Inamin ni DICT Undersecretary for Infostructure Management, Cybersecurity and Upskilling Jeffrey Ian Dy na ito’y mas “complicated” kaysa sa nagdaang hacking attempts na napigilan ng cybersecurity experts ng gobyerno.

“These attack is quite sophisticated, siguro kung bibigyan mo ako ng scale of 1-10…10 being the most complicated…I would rate this as 9, even 9.5,” ayon kay Dy.

Aniya, ang mga salarin ay nakita sa isang telecom company na naka-base sa China.

Subalit nilinaw ni Dy na sa ngayon ay wala pa namang konkretong ebidensiya na may kinalaman ang Chinese government sa nasabing insidente.

“We were able to detect a command sa isang computer na nasa loob ng China Unicom network na nag-o-operate sa China. We will have to cooperate with the Chinese government as we do.Pag-aari ito 100 percent ng Chinese government…Mahirap sabihin diretso na ito ay state-sponsored kasi wala naman tayong ebidensiya sa ngayon,”ayon kay Dy.

“Right now our investigations wouldn’t say if the Chinese government would know about this attack. As far as we know, the IP addresses, the command and control center including the techniques used ay mukhang nandoon sa area na yun,” ang pahayag ni Dy.

Aniya pa, nagawa ng departamento na matuklasan ang posibleng “denial of service” o pagtatangka na “to take down the website” ng Overseas Workers Welfare Administration (OWWA).

Mayroong din aniyang ulat mula sa Google ng tangkang pag-atake para makakuha ng government administrator credentials sa loob ng “Google workplace” subalit kaagad namang inalis ng ahensiya ang malware mula sa mga hacker.

Ang ilan aniya sa mga government websites na pinuntirya ng mga hacker ay ang dict.gov.ph; coastguard.gov.ph; cabsec.gov.ph; cpbrd.congress.gov.ph; doj.gov.ph; ncws.gov.ph; at bongbongmarcos.com.

“Hindi siya ganon eh, kukunin nya yung administrator credentials pero hindi mo malalaman. Kumbaga, pupuwedeng dalawa kayo ng gumagamit pa din. Syempre ‘pag nakuha mo na administrator credentials, maaari ka  na ring makakita ng iba pang mga impormasyon…Kaya mong magbigay halimbawa ng access or kaya mong gumawa din ng sariling drive o email access,” ayon kay Dy.

Bagama’t ang request para sa confidential funds ng DICT ay tinapyasan sa isinagawang budget deliberation, winika ni Dy na ang budget ng ahensiya para sa Cyber Security Bureau ay P700 million.

Samantala, hindi pinapayagan ng Chinese government ang anumang uri ng cyberattack, bukod pa sa maging sila ay kaisa sa pagsugpo sa anumang cyberattack gamit ang Chinese infrastructure.

“The Chinese government all along firmly opposes and cracks down on all forms of cyberattack in accordance with law, allows no country or individual to engage in cyberattack and other illegal activities on Chinese soil or using Chinese infrastructure,” ayon sa tagapagsalita ng Chinese Embassy in the Philippines.

Para aniya sa gobyerno ng Tsina, “irresponsible” ang ginagawa ng ilang opisyal ng pamahalaan na pilit na iniuugnay ang cyber attacks sa usapin ng West Philippine Sea as “irresponsible”.

“Some Filipino officials and media maliciously speculated about and groundlessly accused China of engaging incyberattacks against the Philippines, even went as far as connecting these cyberattacks with the South China Sea disputes. Such remarks are highly irresponsible,” ayon sa embahada.

“Cybersecurity is a global challenge that requires collective response from the international community. China calls on all countries to jointly safeguard cybersecurity through dialogue and cooperation,” dagdag nito. (Daris Jose)

“SA isang Bagong Pilipinas, walang puwang ang mga paninira at paghahatakan pababa.

Ito ang sinabi ni Pangulong Ferdinand Marcos Jr. sa kanyang YouTube channel sabay sabing “unahin natin ang ating bayan. Magbago na tayo dahil walang Bagong Pilipinas kung walang bagong Pilipino.”

Noong nakaraang linggo, tinawag na ‘bangag’ at binatikos ni dating Pangulong Rodrigo Roa Duterte si Pangulong Marcos dahil sa umano’y plano nitong mapanatili ang kanilang kapangyarihan kasabay ng isyu ng People’s Initiative para amyendahan ang Konstitusyon.

Si Digong Duterte ay nagsalita sa isang prayer rally sa Davao City, na ginanap sa parehong araw na ginanap ni Marcos ang kanyang Bagong Pilipinas kickoff rally sa Quirino Grandstand sa Maynila.

Inakusahan din niya si Marcos na isang adik sa droga at sinabing ang nangyari sa kanyang ama na si Ferdinand Sr—na napatalsik sa kapangyarihan noong 1986 ng People Power Revolution—maaaring mangyari rin sa kanya.

Habang pinagbibitiw naman sa puwesto ni Davao City Mayor Sebastian “Baste” Duterte si Pangulong Marcos.

Ayon sa alkalde, dapat magbitiw si Pangulong Marcos kung wala itong pagmamahal at mithiin para sa Pilipinas.

Samantala, ang resbak naman ni Pangulong Marcos kay Digong Duterte ay “Sa tingin ko ito ang Fentanyl. Ang Fentanyl ang pinakamalakas na pain killer na mabibili mo. Ito ay lubos na nakakahumaling at ito ay may napakalubhang epekto, at si PRRD ay umiinom ng gamot sa napakatagal na panahon ngayon,” sabi ni Pangulong Marcos.

Ginawa ni Pangulong Marcos ang pahayag nang hingan ng reaksyon sa mga alegasyon na ibinato laban sa kanya ng dating Pangulo.

“Ito ay panawagan para sa kolektibong kilos tungo sa pagbabago ng ating pag-iisip, pananalita at gawa. Ito ay hindi pagtakip sa kung anong kakulangan man ang mayroon,” ayon kay Pangulong Marcos sa kanyang video message.

“Ito ay imbitasyon sa bawat isa na kabahagi ka sa paghahanda at pagpapaganda ng ating bansa,” aniya pa rin. (Daris Jose)

MAAARI umanong mag-isyu ng arrest warrant ang International Criminal Court (ICC) laban sa mga opisyal ng gobyerno ng Pilipinas ayon kay Solicitor General Menardo Guevarra.

Subalit nilinaw naman ng SolGen na ibang usapin ang pagpasok ng mga imbestigador ng ICC sa teritoryo ng Pilipinas kayat mahalaga ang kooperasyon nito sa pamahalaan.

Aniya, ang pag-isyu ng warrant of arrest ay base sa assessment ng ICC pre-trial chamber kaugnay sa existence ng makatwirang basehan na nakagawa nga ng krimen ang isang indibidwal.

Dapat din aniyang imbestigahan ng ICC prosecutor ang ebidensiya na parehong “incriminating” o nagpakita ng ebidensiya o katibayan ng pagkakasangkot ng indibidwal sa krimen o “exonerating” o nag-aabswelto sa isang indibdiwal mula sa criminal charges laban sa kanya.

Sa ibang salita, ang imbestigasyon ay dapat na hindi bias o walang kinikilingan, dahil kung hindi ay insufficient ito para sa pag-iisyu ng arrest warrant.

Ginawa ng SolGen ang naturang pahayag nang tanungin kung maaaring mag-isyu ang ICC ng arrest warrant laban kina VP Sara Duterte na isinasangkot sa Davao death squad at iba pang opisyal ng gobyerno ng PH kaugnay sa Oplan Tokhang sa kasagsagan ng war on drugs noong nakalipas na administrasyon.

Una na kasing inakusahan ni dating Davao Senior Police Officer Aruri Lascañas na umano’y miyembro ng orihinal na Davao Death Squad, si VP Sara na siya umanong nag-orchestrate ng Oplan Tokhang sa Davao city noong alkalde pa siya noong 2012. (Daris Jose)

INIHIRIT ni dating Pangulong Rodrigo Duterte ang paghiwalay ng Mindanao sa Pilipinas.

Sa pulong balitaan sa Davao, sinabi ng dating Pangulo na ito ay maisasagawa sa pamamagitan nang pagkalap ng mga pirma.

Kasabay naman ng panawagan ni Digong dumistansya ang mga senador sa plano na isulong ang paghihiwalay ng Mindanao sa Pilipinas.

Sa ambush interview, tumanggi sina Senate President Juan Miguel Zubiri at Minority Leader Aquilino “Koko” Pimentel na magkomento sa nais na mangyari ni Duterte.

Kapwa taga-Mindanao sina Zubiri at Pimentel.

Pero sinabi rin ni Zubiri na “with due respect” sa dating Pangulo, hindi kailangan ngayong pag-usapan ang isyu na magiging dahilan lamang ng pagkakagulo at pagkakawatak-watak.

Hiniling din ni Zubiri na mag-slow down o maghinay-hinay muna ngayon sa away dahil ang importante ay ang kapakanan ng bayan.

Ipinunto rin ni Zubiri na ang ganitong mga labanan ay hindi makakabuti sa bansa at sa mga susunod na henerasyon.

Ayon naman kay Pimentel, kailangang masusing pag-aralan ang gustong mangyari ni Duterte pero binigyan diin na tutol siya sa anumang mungkahi para sa secession o paghihiwalay ng alinmang bahagi ng teritoryo ng bansa.

Sinabi naman ni Sen. Francis “Chiz” Escudero na hindi uubra sa ilalim ng Konstitusyon ang gusto ng dating pangulo na ihiwalay ang Mindanao sa Pilipinas. (Daris Jose)

NAKABALIK  na ng bansa si Pang. Ferdinand R. Marcos Jr. kaninang madaling araw mula sa kaniyang dalawang araw na state visit sa Vietnam na nag resulta sa pagpapalakas pa ng strategic partnership sa pagitan ng dalawang bansa.

Ipinagmalaki ding ibinalita ng Pangulong Marcos na naging mabunga ang kaniyang biyahe dahil sa kaliwat kanang mga official engagements mula sa ibat ibang grupo mula sa gobyerno at sa business sector ng Vietnam.

Alas-3:30 kaninang madaling araw ng lumapag ang PR 001 sa Villamor Air Base.

Sa pulong nina Pang. Marcos at Viet Nam President Vo Van Thoung muling pinagtibay ng dalawang lider ang kanilang commitment na palakasin ang relasyon at tinunghayan ang exchange agreements sa pagitan ng dalawang bansa.

Kanilang tinalakay ang kooperasyon sa defense, maritime, trade and investment, economic, education, tourism and culture.

Nagkaroon din ng hiwalay na pulong si Pangulong Marcos kay Viet Nam Prime Minster Pham Minh Chinh and National Assembly Chairman Vuong Dinh Hue, kanilang pinag-usapan ang pagpapalakas sa bilateral relations to people-to-people exchanges, parliamentary cooperation,at marami pang ibang collaboration.

Ipinagmalaki din na inulat ng Pangulo na matagumpay nilang napangalagaan ang interes ng mga negosyanteng Pinoy na nag ooperate sa Vietnam sa pamamagitan ng pagbibigay ng plataporma kung saan pwede nilang iparating ang kanilang mga plano at saloobin.

Naging mabunga din ang pulong ng Pangulo sa mga Vietnamese business leaders at ipinahayag ang interes na palawakin ang kanilang negosyo sa Pilipinas. (Daris Jose)

NAGLABAS na kahapon si Vice President Sara Duterte ng reaksiyon hinggil sa panawagan ng kanyang kapatid na si Davao City Mayor Sebastian Duterte, sa kanyang kaalyadong si Pang. Ferdinand Marcos Jr. na magbitiw na sa tungkulin kung wala naman aniya itong pagmamahal sa bansa.

Ayon kay VP Sara, na siya ring kalihim ng Department of Education (DepEd), hindi pa niya nakakausap ang kanyang kapatid hinggil sa naging panawagan nito sa pangulo.

Gayunman, ang maaari lamang aniya niyang maging sapantaha sa ngayon hinggil dito, ay ginawa ng kapatid ang panawagan bilang pagmamahal sa kanya, bunsod na rin ng sentimyento na hindi niya ‘deserve’ ang ginagawang pagtrato sa kanya ng ilang sektor, na nasa sirkulo ng pangulo.

Sa kabila nito, tiniyak ng bise presidente na patuloy niyang gagampanan ang kanyang tungkulin at kakayanin ang anumang pag-atake at paninira sa kanya, na kaakibat aniya ng boto at tiwalang ipinagkaloob sa kanya ng mga mamamayan.

Paniniguro pa niya, hindi siya kailanman panghihinaan ng loob at patuloy na gagam­panan ang kanyang tungkulin, kabilang na ang pagiging kalihim ng DepEd, maliban na lamang kung mismong pangulo na ang aayaw dito. (Daris Jose)

KASABAY  nang pormal na paglulunsad ng “Bagong Pilipinas,” sa Quirino Grandstand sa Maynila, nilinaw ni Pangulong Ferdinand Marcos Jr. na walang “hidden agenda” sa nasabing kampanya at hindi rin ito isang bagong partidong pulitikal.

Sa kanyang mensahe sa kick-off rally ng “Bagong Pilipinas” campaign, sinabi ni Marcos na para maibalik muli ang tiwala ng taumbayan ay dapat ipakita ng gobyerno ang mga dapat gawin hindi sa pamamagitan ng salita kundi ng gawa.

Dapat din aniyang ipakita sa mga mamamayan ang isang plano at “blueprint” kung ano ang mga gagawin ng gobyerno.

Ibinahagi ni Marcos Jr. ang kahalagahan ng tiwala sa gobyerno, at ang pagkamit nito sa pamamagitan ng Philippine Development Plan (PDP) kung saan hinango ang “Bagong Pilipinas.”

Ang Bagong Pilipinas din aniya ay hindi isang slogan o sticker na kung saan-saan na lamang ikinakabit.

“Ang layunin ng Bagong Pilipinas ay maglatag ng mga mithiin na dapat nating makamtan para sa kinabukasan ng ating bayan. Tapos na ang pagsi-patsi na plano na naiiba-iba na ang nangyayari lang ay nagkakawatak-watak tayo,” ani Marcos.

Sinabi ni Marcos na hindi niya sasayangin ang tiwalang ibinigay sa kanya ng taumbayan ngunit magtatagumpay lamang ang Bagong Pilipinas kung magtutulong-tulong ang lahat.

Dapat din aniyang ma­ging mabilis ang pagtugon sa mga humihingi ng tulong at bawal na rin ang mga masusungit sa gobyerno.

Bawal na rin ang mga nangungulimbat at nagwawaldas ng pondo.

“Bawal ang mga hindi tapat at nangungulimbat. Kapag pera ng bayan ang nawala dahil sa katiwalian ang mga taong paglalaanan sana ng pondong naglaho ang nanakawan. Sa Bagong Pilipinas bawal ang waldas,” ani Marcos.

Dumalo rin sa okasyon si dating Pangulong Gloria Macapagal-Arroyo, ilang senador at mga miyembro ng Gabinete.

Libu-libong mamamayan din mula sa iba’t ibang antas ng pamumuhay ang nakiisa sa kick-off rally na dinaluhan din ng maraming celebrities.

Dumating si Marcos sa pagtitipon dakong alas-7 ng gabi kasama si First Lady Liza-Araneta Marcos. (Daris Jose)

NILAGDAAN ng lahat ng senador ng Republika ng Pilipinas ang isang joint statement laban sa signature drive ng ilan para maamyendahan ang 1987 Constitution, bagay na bubura raw sa boses ng mga mambabatas.

Ang pahayag ay binasa ni Senate President Juan Miguel Zubiri sa isang plenary session habang pinag-uusapan ang kontrobersyal na People’s Initiative (PI) ngayong Martes.

“If this PI prospers, further changes to the Constitution can be  done with or without the Senate’s approval, or worse, even absent all the Senators,” sabi ng joint statement.

“Should Congress vote jointly in a constituent assembly the Senate and its 24 members cannot cast any meaningful vote against the 316 members of the House of Representatives.”

“While it seems simple, the goal is apparent — to make it easier to revise the Constitution by eliminating the Senate from the equation.”

Ngayong Enero lang nang ibulgar ni Rep. Edcel Lagman (Albay, 1st District) ang aniya’y suhulan para makakalap ng mga pirma para sa pagbabago ng naturang Saligang Batas.

Marami sa mga nagtutulak ng Charter change ay nais tanggalin ang mga restriksyon at limitasyon sa foreign ownership at investments sa mga industriya, serbisyo at likas-yaman sa ngalan ng “pag-unlad.” Gayunpaman, pinapalagan ito nang maraming patriyotiko dahil sa diumano’y pagsusuko ng soberanya.

“It will destabilize the principle of bicameralism and our system of checks and balances,” dagdag pa ng Senado.

“It is ridiculous that the Senate, a co-equal chamber of the House, which is needed to pass even local bills, will have a dispensable and diluted role in Charter change — the most monumental act of policymaking concerning the highest law in the land.”

Kung saka-sakaling mailusot ito, wala na raw magagawa ang Senado kahit sa mga kontrobersyal na proposals gaya ng:

• pagtanggal ng proteksyon mula sa 100% foreign ownership ng lupa
• pagtanggal ng term limits o “no election” scenario sa 2025 o 2028

Ang naturang pahayag ay tanda aniya ng tindig ng Senado bilang “bastion of democracy” at pagpalag sa talamak na paglabag sa konstitusyon.

Nangyayari ang lahat ng ito kahit una nang inihain ni Zubiri ang Resolution of both Houses 6 sa layuning maamyendahan ang Article 12 (Section 11), 14 (Paragraph 2, Section 4) at 16 (Paragraph 2 Section 11) ng konstitusyon — para rin tanggalin ang mga restriksyon sa foreign investments, foreign ownership sa public utilities, atbp.

Una nang inayawan ni Pangulong Ferdinand Marcos Jr. at Bise Presidente Sara Duterte ang naturang PI para sa Cha-cha, pati na ang posibilidad ng pagbibigay ng 100% foreign ownership sa mga lupain ng bansa. Gayunpaman, aminado si Zubiri na pinapa-review na ni Marcos ang mga economic provisions.

Kamakailan lang nang sabihin ni retired Supreme Court chief justice Artemio Panganiban na kakarampot na amendments lang ang pwedeng mangyari sa ilalim ng PI, bagay na kinakailangang “malinaw at tiyak.” (Daris Jose)