2020 February 18 Archive - People's Balita

July 18, 2024
Search in People's Balita
Ang Diyaryong Pinagkakatiwalaan

Archive for February 18th, 2020

DOH sa publiko: Banta ng COVID- 19, ‘di pa humuhupa

Posted on: February 18th, 2020 by @peoplesbalita No Comments

PINALAGAN ni Department of Health (DOH) Secretray Francisco Duque ang ulat na unti-unti nang humuhupa ang banta ng COVID-19 at nagiging stable na ang sitwasyon sa mundo.

Sa Laging Handa press briefing ay sinabi ni Sec Duque, hindi pa sapat ang mga datos at pabago-bago pa ang sitwasyon para sabihing nagiging mabuti na ang lahat.

Kasama sa mga tinukoy ni Duque na dapat pang tingnan ang mga kaso at sitwasyon sa lalawigan ng Hubei at iba pang bahagi ng China gayundin sa mahigit 20 pang bansa na nagkaroon ng kaso nito.

Maging ang pagpasok ng panahon ng tag-init sa Marso ay hindi rin tiyak kung ano ang magiging epekto sa transmission o pagkalat ng nasabing virus.

Dahil naman sa nagkaroon na ng local transmission ng COVID-19 sa ibang bansa, ito ang pinaghahandaan ng pamahalaan upang matugunan sakaling magkaroon ng katulad na pangyayari sa bansa.

Kasabay nito, hinikayat naman ni Pangulong Rodrigo Roa Duterte ang mga Filipino na samahan siya sa pagbiyahe sa iba’t ibang panig ng Pilipinas, Ito ay sa kabila ng banta ng coronavirus o COVID-19.

Sa kanyang pahayag, tiniyak ni Pangulong Duterte na ligtas ang bansa mula sa mga banta ng sakit, law and order at kahit sa isyu ng accessibility.

Binigyan diin ng Pangulo na maraming magagandang mapupuntahan dito sa Pilipinas at walang dapat alalahanin ang mga biyahero.

Nangako na rin umano ang hotel owners at airline companies na magbibigay ng discount sa mga local tourist.
Kaugnay nito, iginiit ng Office of the President (OP) na nananatiling coronavirus-free ang Pilipinas.

Ginawa ng Malakanyang ang pahayag sa gitna ng nabibigyang highlight na mga ulat hinggil sa umano’y mga kumpirmadong kaso ng COVID-19 sa bansa.

Ayon kay Presidential spokesperson Salvador Panelo, bagama’t may tatlong una nang naiulat na tinamaan ng nasabing sakit, ito aniya’y hindi na maaaring maibilang pa sa existing list ng mga kinapitan ng COVID 19.
Isa aniya kasi sa tatlong naitalang kaso ay namatay na habang ang dalawa ay nagawa namang makarekober at sa katunayan ay nakalabas na ng pagamutan.

Sa harap nito’y tiniyak ni Panelo na ginagawa ng pamahalaan ang lahat ng paraan upang hindi na kumalat pa ang kinatatakutang karamdaman.

Sa huling ulat mula sa Department of Health (DOH), sa 455 na PUIs, 386 na ang nag-negatibo sa sakit. Kasama umano sa naturang bilang ang 259 na nakalabas na ng ospital.

Gayunman, ayon kay DOH Assistant Secretary Maria Rosario Vergeire, kahit 82 percent na ng mga PUI ang negatibo sa virus ay kailangan pa rin ng ibayong pag-iingat laban sa naturang sakit. (Bishop Jesus “Jemba” M. Basco)

Chinese President Xi Jinping tinago ang coronavirus outbreak

Posted on: February 18th, 2020 by @peoplesbalita No Comments

Tila nabulgar sa speech ni Chinese President Xi Jinping na hindi agad pinaalam ng China government na nagkakaroon na pala ng virus outbreak sa kanilang mga citizen, gayundin sa ibang bansa.

Sa February 3 speech ni Xi, sinabi nito na maagang umaksyon ang China para mapigilan ang pagkalat ng virus, na kalauna’y binansagang novel coronavirus.

Ito’y matapos punahin si Jinping na naging mabagal umano ang kanilang responde sa nasabing virus outbreak.
Ayon kay Xi, noong January 7 pa lang ay kanila nang pinag-utos ang pag-shutdown sa Hubei Province, lugar kung saan nanggaling ang coronavirus.

Ngunit January 23 pa na-lockdown ang nasabing lugar, at kasabay na ito ng pagkabalita sa mga taga-China at ibang bansa na mayroon ng coronavirus outbreak sa Hubei.

“On Jan. 22, in light of the epidemic’s rapid spread and the challenges of prevention and control, I made a clear request that Hubei province implement comprehensive and stringent controls over the outflow of people,” ayon kay Xi sa meeting ng standing committee ng kanyang party.

Sa ngayon ay umabot na sa 69,267 ang kumpirmadong kaso ng nasabing virus, 1,670 na ang nasawi dahil dito at patuloy pa ang pag-angat.

Kumalat na rin sa lampas 30 bansa ang virus, kasama na ang tatlong kumpirmadong kaso sa Pilipinas.

Isa pa sa isyu sa China ngayon ay pinangako ng kanilang gobyerno na magiging bukas sa impormasyon tungkol sa nCoV, ngunit may ilang mga video report na nawawala ang mga journalist na nagbabalita tungkol sa outbreak, na pinaghihinalaang dinetine. (Daris Jose)

Technician nakaligtas sa pamamaril ng kapitbahay

Posted on: February 18th, 2020 by @peoplesbalita No Comments

NAGAWANG makaligtas ng isang 27-anyos na technician sa kamatayan nang mailagan nito ang pamamaril ng kapitbahay na pumasok sa kanyang bahay sa Malabon City, kamakalawa ng gabi.

Sa imbestigasyon ni PEMSgt. Julius Mabasa, alas-9:10 ng gabi, kasama ng biktimang si Kenneth Ordoña, technician ng Globe Telecom Company ang room mates na si George Payton at Louie Dela Cruz, kapwa 29-anyos na nanonood ng television sa kanyang bahay sa Blk 4 Damata St. Letre, Brgy. Tonsuya nang biglang pumasok ang suspek na si Pedro Repol 43, plumber, na armado ng baril saka pinutukan si Ordoña subalit, hindi tinamaan.

Muling pinaputukan nang malapitan ng suspek ang biktima na nagawa namang makailag kaya hindi ito tinamaan.
Bago muling makapaputok ang suspek ay nagawa itong masunggaban nina Payton at Dela Cruz na naging dahilan upang humingi ng tulong sa mga pulis ang biktima.

Agad namang rumesponde ang mga tauhan ng Malabon Police Community Precinct (PCP) 8 na nagresulta sa pagkakaaresto sa suspek at narekober sa kanya ang isang 9mm revolver na kargado ng dalawang basyo ng bala at dalawang deformed bullets.

Ayon kay Malabon police chief P/Col. Jessie Tamayao, inaalam pa nila ang tunay na motibo sa tangkang pagpatay. (Richard Mesa)

Kauna-unahang gamot laban sa COVID-19, inaprubahan na sa China

Posted on: February 18th, 2020 by @peoplesbalita No Comments

Inanunsyo ng Zhejiang province sa China na inaprubahan na ang kauna-unahang gamot na makatutulong daw sa mga pasyente laban sa deadly virus na novel coronavirus.

Ayon sa Taizhou government sa Zhejiang ang gamot na Favilavir, na dati ang pangalan ay Fapilavir, ay maituturing daw na epektibo bilang antiviral ay aprubado na para ibenta sa merkado.

Ang naturang gamot ay na-develop ng Zhejiang Hisun Pharmaceutical Company bilang unang anti-novel coronavirus drug na puwede nang ibenta ng National Medical Products Administration mula nang magkaroon ng outbreak noong buwan ng Disyembre.

Ang Zhejiang province ay merong kaso ng mga pasyente na umaabot na sa 1,167.

Iniulat naman ng Ministry of Science and Technology ang Favilavir ay isa sa tatlong gamot na nagpapakita ng pagiging epektibo sa paggamot sa novel coronavirus matapos ang isinagawang mga clinical trials.

Samantala, umakyat na ang bilang sa mga nasawi dahil sa Coronavirus Disease 1,770 habang mahigit naman sa 71,000 ang nagkasakit mga iba’t ibang panig ng mundo. (Daris Jose)

Price cap sa presyo ng gamot, tinintahan ni Duterte

Posted on: February 18th, 2020 by @peoplesbalita No Comments

PINIRMAHAN ni Pangulong Duterte ang Executive Order number 104 na naglalagay ng price cap sa kabuuang 86 drug molecules o 133 drug formulas sa bansa.

Sinabi ni Presidential Spokesperson at Chief Presidential Legal Counsel Salvador Panelo na sa ilalim ng EO 104 o “Improving Access to Healthcare Through the Regulation of Prices in the Retail of Drugs and Medicines,” maglalagay na ng regulasyon sa mga gamot na sakop ng price cap sa pamamagitan ng pagtatakda ng maximum retail price (MRP) at maximum wholesale price (MWP).

“Access to affordable and quality drugs and medicines is now a reality under the Duterte Administration. This measure is part of the real and lasting reform which President Rodrigo Roa Duterte has instituted in order that all Filipinos can live decent and comfortable lives that they deserve,” sabi ni Panelo.

Nauna nang isinulong ng Department of Health (DOH) ang pagkakaroon ng regulasyon sa presyo ng mga gamot na ginagamit sa maraming sakit kagaya ng hypertension, diabetes, cardiovascular disease, chronic lung diseases, neonatal diseases o mga kondisyon na may kaugnayan sa mga bagong silang na sanggol at sa mga pangunahing sakit na cancer.

“After considering the factors provided in section 19(a)(2) of RA no. 9502, as amended, among others, an MRP and/or MWP were determined and are now imposed on select drugs and medicines totalling to 86 drug moelecules or 133 drug forumals annexed to this order,” nakasaad sa EO 104.

Sa ilalim ng EO inaasahang bababa sa 56 porsiyento ang presyo sa kasalukuyan ng mga tinukoy na gamot na sakop ng price cap.

“Within 30 days from the issuance of this order, a technical working group composed of representative from the DOH and Department of Trade and Industry (DTI) shall convene and review, in consultation with stakeholders, the prices of the remaining 36 drug molecules or 72 drug formulas previously proposed to be subject of the MRP o MWP,” sabi pa ng EO 104. (Daris Jose)

Slaughter, Badua asaran sa Twitter

Posted on: February 18th, 2020 by @peoplesbalita No Comments

MALABO pa yatang matapos ang parang away-bata nina Philippine Basketball Association (PBA) star Greg Slaughter at netizen Edmond ‘Snow Badua sa social media na nagkaasaran sa ratratan nila gamit ang Twitter.

Inis ang Barangay Ginebra San Miguel slotman sa pagkakabitin ng kanyang playing career, walang bagong kontrata tatlong linggo na lang bago magbukas ang 45th PBA Philippine Cup 2020.

Nakatakdang pumailanlang ang naurong pang all-Pinoy conference ng pro league sa darating na Marso 8 sa Smart Araneta Coliseum sa Quezon City.

Inihayag sa nakalipas na linggo ni Gregzilla na magbabakasyon muna siya sa paglalaro nang mabatid niya na nasa trading block siya para kay NorthPort center Christian Standhardinger.

Pakiram ng 31-anyos, may-taa na 7-foot na Fil-Am cager, sa halip na damayan siya nang maraming kaaway sa socmed na si Badua, pambubuska pa aniya ang inabot niya.

“Comeback stronger, Greg. I heard they are throwing the PBA book on you, which means you can be banned forever. I hope I don’t one day see you in the same club where Calvin (Abueva) and I are currently in. Defer your leave of absence and let’s see what happens.You’re one of my idols,” tweet ni Badua sa Gin Kings center.

Agad namang tumugon nang mala-Game of Thrones reference tweet ang sentro matapos maglabas ng litratong may caption na ‘You know nothing, Jon Snow’ isang quote mula sa series na Game of Thrones.

Pero hindi pa roon natapos ang lahat.

Muling rumesbak si Snow kay Greg nang maglabas naman ng litrato ni Barneys na malungkot na nagmumukmok sa isang sulok at may caption na “They say I’m a clown” bilang bira balak na maagang pagku-quit ni Greg sa unang ligang propesyonal sa sport sa Asya at ‘Pinas.

Nakaaway din sa socmed sa nagdaan lang na linggo ni Badua si Talk N’ Text player Bobby Ray Parks Jr.
Hay naku Mons (Badua) tigilan mo na ‘yan. Dumarami na ‘bespren’ mo. Sige ka.

KINASUHAN NA

Posted on: February 18th, 2020 by @peoplesbalita No Comments

INIHARAP ni Manila Mayor Francisco “Isko Moreno” Domagoso ang limang suspek, kabilang ang 4 na menor de edad na nag “trip” sa isang balloon vendor na kumalat sa social media.

Ang menor de edad ay sinamahan ng kanilang mga magulang na nagtungo sa Manila City Hall gayundin si Dranreb Colon, 18, ng 1464 Ilang-ilang St., Pandacan, Maynila makaraang manawagan ni Domagoso sa mga suspek na sumuko na lamang ang mga ito.

Ang suspek naman na si Ivan Matimatico, 19, ng 1366 Interior Burgos St., Paco, Maynila ay nakatakdang isuko ng kanyang ama habang pinaghahanap pa ang isang suspek na kinilala lamang sa alyas Axel.

Ang mga nasabing suspek ay mga miyembro ng “True Life Gangsta” na pawang may mga marka ng paso sa kanilang kanang kamay.

Ang dalawang suspek na nasa wastong gulang ay nahaharap sa kasong RA 7610 (Special Protection of Children Against Abuse, Exploitation, and Discrimination Act at Article 155 Revised Penal Code Alarms and Scandal.

Habang ang mga menor de edad naman na mapapatunayang may sala ay isasailalim sa kustodiya ng Manila Youth Recreational Center (MYRC) ng Manila Social Welfare and Development.

Nanawagan naman ang alkalde sa mga netizens partikular na ang mga nagbabanta sa mga inarestong mga kabataan na huwag nilang ilagay sa kanilang mga kamay ang hustisya na dapat makamit ng balloon vendor na si Oliver.
“Ang mali ay hindi maita-tama ng isa pang pag-kakamali.” ani Domagoso.

Ayon kay Mayor Isko, magsilbi sanang aral ang insidente sa mga kabataan na maging mas responsible sa mga kilos. “‘Yang joke, joke, joke niyo, maaari pala tayong makapaminsala.”

Pinaalalahanan din ni Domagoso ang mga kabataan na wala umanong idudulot na maganda sa kanilang buhay ang pagsali sa ‘gang’ sa halip ay maaari pa silang mapahamak dito.

Nabatid na nagkaroon ng kasunduan na magbibigay ang mga suspek ng kontribusyon para sa pagpapagamot ng biktima na halagang P5,000 bawat isa sa kanila ngunit nasa P2,500 pa lamang kada isa sa kanila ang nakakapagbayad.

Matatandaan na nito lamang nakaraang Pebrero 12 dakong alas-4:00 ng hapon sa Brgy. 842 sa Pandacan ay napagtripan ng mga suspek na sindihan at silaban ang mga itinitindang lobo ng vendor na kinilalang si Oliver Rosales na nagresulta ng pag-kakasunog ng mga lobo na kanyang itinitinda at pagkakalapnos ng ilang bahagi ng kanyang katawan. Ang tindero ay nananatiling nasa ospital. Ang naturang pangyayari ay naging viral sa social media. (Gene Adsuara)