2020 February 22 Archive - People's Balita

November 7, 2024
Search in People's Balita
Ang Diyaryong Pinagkakatiwalaan

Archive for February 22nd, 2020

Katotohanan sa ABS-CBN franchise issue, hirit ni Duterte – Palasyo

Posted on: February 22nd, 2020 by @peoplesbalita No Comments

MAGMAMASID ang Malacañang sa magiging takbo ng gagawing imbestigasyon ng Senado sa ABS-CBN franchise renewal sa Lunes.

Sinabi ni Presidential Spokesman Salvador Panelo na papanoorin ng Palasyo ang gagawing pagbusisi ng mga senador sa prangkisa ng nabanggit na TV network pati na kung ano ang gustong gawin ng mga senador.

Ayon kay Panelo, nais din nilang malaman ang katotohanan kung nasusunod ba ng ABS-CBN ang mga nakapaloob na probisyon ng kanilang prangkisa o may nilalabag sa mga ito.

Katotohanan ang hinahanap ng publiko, pati na rin aniya si Pangulong Rodrigo Duterte.

“Manunood tayo. Alam mo, sabi nga ni Presidente doon sa KBB, kahit anong gawin ninyo basta ang gusto ko lang, katotohanan – murahin ninyo ako, siraan ninyo ako, okay lang. Kung totoo, sige gawin ninyo. Ang ayaw ko kung ang ginagawa ninyo ay puro kasinungalingan eh doon tayo hindi nagkakasundo,” ani Panelo.

Hindi rin naitago ni Panelo ang pagkayamot sa naging panayam sa kanya ni Karen Davila dahil sa pilit na pag-uugnay sa isyu ng freedom of the press sa franchise issue.

Iginiit ng kalihim na walang koneksiyon ang freedom of the press sa prangkisa ng ABS-CBN na nakatakdang mag-expire sa Marso 30.

Hindi rin aniya si Pangulong Duterte ang dapat kalampagin at pagbuntunan ng sisi dahil ang Kongreso ang may hurisdiksiyon sa pag-iisyu ng prangkisa.

“Ang nakakayamot is pinapasok nila iyong freedom of the press na connected – walang koneksiyon eh. Ipagpalagay natin nawala ang ABS-CBN, are you telling me na namatay na ang freedom of the press? Of course not! Ang daming networks, ang daming radyo, ah ewan ko ba,” dagdag pa ni Panelo.

Kaugnay nito, ipinagdiinan din ng kalihim na hindi umano literal ang mga sinasabing ipapasara ni Duterte ang ABS-CBN.

Ayon dito, hindi dapat seryosohin ang naging pahayag ni Duterte kontra Kapamilya network, na matatandaang babakuran umano nito ang franchise renewal ng ABS-CBN dahil hindi pinalabas ang kanyang campaign ads noong 2016. (Daris Jose)

220 couples sa Bacolod, ikinasal na nakasuot ng face masks dahil sa COVID-19 scare

Posted on: February 22nd, 2020 by @peoplesbalita No Comments

Aminado ang alkalde ng lungsod ng Bacolod na kakaiba ang isinagawang mass wedding kamakalawa kung saan 220 couple ang ikinasal.

Ayon kay Mayor Evelio Leonardia, sinadya na 220 pares ang ikakasal dahil ibinatay ito sa petsa na Pebrero 20, 2020 o 02-20-2020, na hindi na mauulit.

Ito rin aniya ang unang pagkakataon na nagsuot ng face mask ang mga bride at groom na libre ang naging pag-iisang dibdib.

Dahil dito kaya maituturing din daw itong Maskara Festival kung saan kilala ang Bacolod City.

Ang face masks ay ipinamimigay ng lokal na pamahalaan sa pamamagitan ng City Health Office bilang bahagi ng precautionary measures laban sa coronavirus disease (COVID-19).

Samantala, kinilalang oldest couple sina Jennifer, 62-anyos, at Rolly Dela Cruz, 60, na 38 taon nang nagsasama bago nagpakasal.

Isinagawa ang seremonya sa lobby ng Bacolod Government Center.

Sandra Cam dawit sa kasong murder – NBI

Posted on: February 22nd, 2020 by @peoplesbalita No Comments

Nirekomenda ng National Bureau of Investigation (NBI) ang pagkaso ng murder kay Philippine Charity Sweepstakes board member Sandra Cam, kasama pa ang anak nito, sa pagpaslang kay Batuan, Masbate Vice Mayor Charlie Yuson III.

Dawit din sa kasong murder sina Nelson Cambaya, Junel Gomez, Bradford Solis, Juanito de Luna at Rigor dela Cruz, na sinasabing gunmen sa pagpatay kay Yuson, ayon sa NBI Death Investigation Unit.

Ang limang suspek ay nilarawan ng NBI bilang mga tao ni Cam na tinuro siyang mastermind.

Ang kaso ay naisampa na sa Department of Justice, Biyernes ng hapon, February 21.

Si Yuson ay pinaslang sa Sampaloc, Manila noong nakaraang October 9, 2019 habang kumakain ng almusal sa isang kainan.

Ang getaway vehicle ng mga mamamatay-tao ay nasilayan sa CCTV camera.

Matatandaan na itinuro ng asawa ni Yuson na si Lalaine, si Cam bilang mastermind sa pagpatay sa Batuan vice mayor matapos matalo ang anak nito na si Martin, sa anak ng mga Yuson na si Charmax sa 2019 mayoralty election sa Batuan.

Grade 12 student tumalon sa Malabon City Hall, dedbol

Posted on: February 22nd, 2020 by @peoplesbalita No Comments

KAAWA-AWA ang sinapit ng isang binatilyong senior high school student matapos tumalon sa pinakatuktok ng gusali ng Malabon City Hall kahapon (Biyernes) ng hapon sa Malabon City.

Basag ang bungo at halos magkadurog-durog ang buto sa katawan ng biktimang si Jefferson Dela Torre, nasa pagitan ng 16 hanggang 17-taong gulang, at Grade 12 ng Ninoy Aquino National High School sa Brgy. Longos makaraang lumagapak sa kalsada ng F. Sevilla Street, harapan ng gusali ng city hall sa Brgy. San Agustin dakong alas-2:16 ng hapon.

Ayon kay Malabon police chief P.Col. Jessie Tamayao, unang namataan ang biktima ng mga taong nasa labas ng city hall na nakatayo sa pinakatuktok ng 12-palapag na gusali, suot pa ang uniporme ng kanilang paaralan pasado alas-2:00 na nakuhanan pa ng larawan ng mga nakasaksi.

Bukod dito, kumalat na rin sa social media ang video ng malagim na insidente kung saan karamihan sa mga nakapanood ay nagimbal at nagpahayag ng panghihinayang sa bata. May ilan pang komento sa mismong video na dahil sa kabiguan umano sa pag-ibig kaya nagawa nito na tapusin na ang buhay.

Sa hindi pa malamang kadahilanan, biglang tumalon ang binatilyo na labis na nagdulot ng sindak sa mga nakasaksi at lumagapak sa lansangan na naging sanhi ng agaran niyang kamatayan.

Kaagad na nagresponde ang mga tauhan ng Malabon Police Community Precinct (PCP) 6 upang magkaloob ng seguridad sa lugar at mapigilan ang mga taong lumapit sa bangkay matapos na takpan ng damit ang basag niyang bungo.

Ani Col. Tamayao, nagsisiyasat pa ang pulisya sa naturang insidente upang malaman ang dahilan ng ginawang pagpapatiwakal ng binatilyo.

Samantala, sa pahayag ni Malabon Mayor Antolin “Len Len” A. Oreta llI, kanyang pinahayag ang pakikiramay sa mga magulang at naiwan ng biktima.

“As of the moment, we are still determining the details of the incident, and we are allowing our agents on the ground to perform their job of securing the site and protecting the body. Rest assured that we will report to the public any information as they become available,” ayon kay Oreta.

Kanila na rin umanong papaigtingin ang seguridad sa kanilang city hall para maiwasan ang mga katulad na insidente.
“I am ordering the immediate closure of all unnecessary doors and portals in City Hall,” utos pa ng Malabon Mayor. (Richard Mesa)

QC ban sa single-use plastics sa mga resto, hotel sa Kyusi atras Hulyo

Posted on: February 22nd, 2020 by @peoplesbalita No Comments

SINABI ng pamahalaan ng Quezon City na inilipat sa Hulyo 1 ang pagpapatupad ng ban nito sa single-use plastics sa mga restaurant at hotel upang magbigay ng mas maraming panahon sa mga establisyimento na i-adjust ang kanilang dine-in logistics.

Ipinagpatuloy matapos ang limang buwan ang enforcement sa ban sa ilalim ng City Ordinance No. 2876 nang bigyan ng konsiderasyon ng pamahalaan ang ilang concern na pumapalibot sa hygiene at logistics, ayon kay Quezon City Mayor Joy Belmonte.

Inisyal na naging epektibo ang ban noong Pebrero 15 sa pagnanais ng pamahalaang lungsod na iwasan ang paggamit ng single-use plastic food containers at utensils.

Itinaas ng ilang establisyimento ang kanilang logistical concerns na maaaring makaapekto sa kanilang day-to-day operations, pahayag ng lokal na pamahalaan.

Inirekomenda ng Environmental Protection and Waste Management Department (EPWMD) ng siyudad ang pagpapaliban sa ban dahil kailangan pa umanong maipasa ng mga establisyimento ang transition plan sa city government sa loob ng 30 araw.

Kailangan din umanong magkaroon ng procurement timeline para sa mga amenities ang naturang plano maging ang “establishments’ standards and hotel/restaurant international regulations as justification.

Kailangan magkaroon ng impormasyon tungkol sa mga disposable material na ginagamit ng mga establisyimento para sa take-out orders “for hygienic and food safety purposes and its appropriate recovery/recycling mechanisms.”
Nakikipag-ugnayan na ang waste management department ng siyudad sa Philippine Alliance for Recycling and Materials Sustainability (PARMS) upang mas lalo pang ma-develop ang proseso sa pag-recover at recyle ng mga plastic at disposable materials.

May magmulta ng P1,000-P5,000 ang sinumang lalabag dito depende sa bilang ng mga paglabag. Sa ikatlong pagkakataong malabag ito, maaaring ma-revoke ang business permit ng establisyimento at isyuhan ng closure order. (Ara Romero)

‘Di man pasok sa GFH: 3 sangay ng ahensya sa Maynila, popondohan

Posted on: February 22nd, 2020 by @peoplesbalita No Comments

POPONDOHAN ng pamahalaang Lungsod ng Maynila ang Bureau of Jail Management, Department of Social Welfare and Development at Manila Police District (MPD) para sa kanilang Peace and Order Council.

Ayon kay Manila Mayor Francisco ‘Isko Moreno’ Domagoso, umaabot sa halos P40 milyon ang ilalaang pondo sa isinagawang pagpupulong ng ilang opisyal ng Manila City Hall.

Kabilang sa makikinabang sa pondo ang Bureau of Jail Management and Penology, Alternative Learning System Program na lalaanan ng P20 milyon. Ito ay gagamitin para pakainin ang mga batang napapaloob sa kanilang programa.

Ayon kay Moreno nais ng pamahalaang lungsod na tatlong beses sa isang araw mapakain bukod pa sa programang Nutribun.

Para naman sa Bureau of Jail Management and Penology, Manila Department of Social Welfare, at Manila Police District ay naglaan ng P12 milyon na gagamitin naman sa pambili ng dalawang “customized vehicles”.

Nais ng alkalde na maging disenyo ng kanilang mga sasakyan ay angkop sa kanilang bureau at departamento.
Mayroon naman P6 milyon ang Peace and Order Council bilang karagdagang halaga para mamaintain ang kaayusan at katahimikan sa lungsod kung saan gagamitin ang nasabing halaga sa pambili ng mga computer.

Habang may P450,000 naman ang Philippine Drug Enforcement and Agency na para naman sa allowamce ng 15 opisyal ng ahensya at ito ay nagkakahalaga ng 2,500 kada buwan.

Inutusan naman ng alkalde ang Manila District Traffic Enforcement Unit (MTEU) na bumili ng 20 piraso ng Japanese brand motorbikes na para kay Isko na motor pa lang ay pulis na pulis na ang porma.

Samantala, isiniri rin ni Mayor Isko Moreno sa nakalipas na administrasyon kung kaya nabigo ang Lungsod ng Maynila na makasama sa 2019 Good Financial Housekeeping (GFH)inilabas ng Department of Interior and Local Government (DILG) na inilabas noong Pebrero 14.

Ayon kay Moreno, inaasahan na niya ito dahil ayon umano sa DILG, bigo ang nakalipas na administrasyon na matugunan ang full disclosure ng financial documents sa 2018 at first quarter ng 2019.

Sinabi pa nito na isang oportunidad sa kanila na pagbutihin pa ang kanilang trabaho dahil hindi siya papayag na manatili ang nakakadismayang performance.

“It’s not happening under my watch,” ayon pa sa alkalde.

Nabatid na pinulong na niya ang local finance committee para magtrabaho at ayusin ang mga kalat na iniwan ng nakalipas na administrasyon.

Nangako si Moreno sa mga residente ng Maynila na pagbubutihin ng kanyang administrasyon ang pagtatrabaho. (Bishop Jesus “Jemba” M. Basco)

Non-Japanese athletes, ‘di muna sasali sa Olympic test event – organizers

Posted on: February 22nd, 2020 by @peoplesbalita No Comments

NAGDESISYON ang mga organizers ng 2020 Tokyo Olympics na huwag munang palahukin sa isa sa mga nalalapit nang test event ang mga atletang hindi Hapon dahil pa rin sa isyu ng coronavirus disease (COVID-19).

Magbubukas na kasi sa Pebrero 28 ang dalawang araw na test event sa Ariake Arena kung saan tampok ang Paralympic sport na boccia na isang uri ng precision ball sport.

Ito ang una sa 19 pang mga test events bago ang pagsisimula ng Olympics sa Hulyo 24.

Ayon kay Tokyo spokesman Masa Takaya, tuloy na tuloy pa rin ang iba pang mga test events kahit na magpapatupad sila ng iba pang mga pagbabago.

“We still don’t which athletes are competing,” wika ni Takaya. “When it”s the most appropriate time, we will release the participants information.”

Una nang nanidigan ang International Olympic Committee at mga local organizers na walang balak na ipagpaliban o ikansela ang Olympiyada, na huling nangyari noong panahon pa ng digmaan.

Boxers bumida: ABAP, NSA of the Year sa PSA

Posted on: February 22nd, 2020 by @peoplesbalita No Comments

PARARANGALAN ng Philippine Sportswriters Association (PSA) ang Amateur Boxing Association sa gaganaping SMC-PSA Annual Awards Night ngayong Marso 6 sa Centennial Hall ng Manila Hotel.

Ang Association of Boxing Alliances in the Philippines (ABAP) ang tatanggap ng National Sports Association of the Year.

Apat sa mga kilalang boksingero ng bansa ang naging dahilan ng karangalan na nakuha ng ABAP upang hirangin sa nasabing kategorya sa naturang awards night.

Si Nesthy Petecio, ang unang pangalan na nagbigay ng ingay nang kanyang kunin ang kampeonato sa world championships sa pamamgitan ng gintong medalya.

Ang 27-anyos ang naging pambato ng ABAP para sa matagumpay na kampanya nito sa AIBA Women’s World Boxing Championships na ginanap sa Ulan-Ude, Russia kung saan pinataob niya ang pambato nito na si Liudmila Vorontsova sa pamamgitan ng split decision para sa featherweight division.

Kasunod nito, bagama’t hindi nakakuha ng gintong medalya, nakuha naman ni Felix Eumir Marcial ang silver sa nasabi ring torneo para sa naman sa men’s event na ginanap naman sa Yekaterinburg sa Russia.

Gayunman kinilalala pa rin ang 24-anyos na tubong Lunzuran, Zamboanga City na si Marcial ilang ikatlong Pinoy na tumapos ng ikalawang puwesto sa prestihiyosong torneo na huling nakuha nina light-flyweight Roel Velasco noong 1997 at Harry Tanamor noong 2007.

Hindi rin matatawaran ang galing na ipinamalas ng dating world champion na si Josie Gabuco kung saan nag-uwi siya ng gintong medalya buhat sa Asian Boxing Confederation ASBC Elite Boxing Championships na ginanap naman sa Bangkok, Thailand kung saan pinatob naman niya si Kim Hyang Mi ng North Korea sa finals ng women’s light-flyweight category.

Si Gabuco ay naging kampeon din ng AIBA world women’s champion noong 2012 bago pa man nakuha ni Petecio ang nasabing parangalan noong nakaraang taon.

Sa pinagsanib na puwersa ng tatlong nabanggit na boksingero, nakuha din nila ang gintong medalya sa nakaraang 30th Southeast Asian Games upang maiambag sa overall title na nakuha ng buong Team Philippines.

Samantala, ang Team Philippines naman ang tatanghaling Athlete of the Year para sa nasabing gabi ng parangal na suportado ng Philippine Sports Commission, MILO, Cignal TV, the Philippine Basketball Association, AirAsia, at Rain or Shine. (REC)