NAGBABALA ang Maynilad at Manila Water sa kanilang customers na magkakaroon ng water interruption sa paparating na mga araw dahil sa pa-tuloy na pagbaba ng tubig sa Angat Dam sa Bulacan at maging sa La Mesa Dam sa Quezon City. Patuloy rin ang pagbaba ng level ng tubig sa Ipo Dam. Kaya ang payo ng dalawang water concessionaires, magtipid sa paggamit ng tubig.

Nagpahayag na noon ang dalawang water concessionaires na maaaring magpatupad sila ng rotational service interruptions. Sabi nila gagawin ito para hindi agad maubos ang tubig at umabot hanggang sa summer ng 2020.
At mukhang tama ang kanilang sinabi sapagkat ngayon pa lang, pababa pa nang pababa ang level ng tubig sa mga dam. Malabo nang magkaroon pa ng pag-ulan at hindi na maabot ng Angat Dam ang target na 212 masl.

Bagama’t may mga dumaang bagyo sa bansa noong Nobyembre at Disyembre ng nakaraang taon, hindi nakasapat para mapuno ang dam. Kahapon, may namataang low pressure sa Mindanao pero ayon sa PAGASA, malabo itong maging bagyo.

Kung magpapatuloy pa sa pagbaba ng level ang tubig sa mga dam, talagang makakaranas ng kawalan ng tubig ang mga lugar na sinusuplayan ng Maynilad at Manila Water. At maaaring maulit ang senaryo noong nakaraang Marso na maraming residente ang nawalan ng suplay ng tubig.

Ang pagtitipid at paghihinay-hinay sa paggamit ng tubig ang nararapat gawin ng mamamayan. Bawasan ang paggamit na kadalasang natatapon lamang. Hindi dapat mag-aksaya sapagkat walang ibang kawawa sa dakong huli kundi ang mamamayan na rin mismo. Pangunahan naman ng pamahalaan ang pagtitipid sa paggamit ng tubig. Inspeksiyunin naman ng Maynilad at Manila Water ang mga tubo na may leak at nasasayang ang tubig.

LUNGSOD NG MALOLOS – Mahigit 200 delegado sa pangununa ni Gob. Daniel R. Fernando ang bumiyahe ng mahigit apat na oras upang marating ang Brgy. Talaibon, Ibaan, Batangas at nagsagawa ng medical mission na tinawag na “Tulong ng Bulacan Para sa Nasalanta ng Bulkang Taal Medical Mission” kahapon.

Sa pakikipagtulungan ng Damayang Filipino Movement, Inc., mahigit 1,000 mga Batangueño na mga evacuee mula sa Brgy. Alas-as at Brgy. Pulang Bato, San Nicolas, Batangas ang nakinabang sa medical mission halos dalawang buwan matapos sumabog ang Bulkang Taal.

Ayon kay Rowena J. Tiongson, pinuno ng Provincial Social Welfare and Development Office, may kabuuang 1,000 supot ng groceries at 110 kahon ng mga gamot at bitamina para sa mga matatanda at bata ang naipamahagi sa mga indibidwal na pumunta sa medical mission.

Sinabi naman ni Fernando na ang medical mission ay paraan ng lalawigan upang maibalik sa mga Batangueño ang kabutihang loob sapagkat hindi sila nag-atubiling tumulong sa Bulacan nang ito ay tamaan ng kalamidad.

“Noong nakaranas po ng matinding kalamidad ang Bulacan, nariyan po ang Batangas para magbigay ng tulong at suporta sa amin. Bilang pagtanaw ng utang na loob, sila naman po ang ating tulungan sa ikalawang pagkakataon at hindi kami magsasawang tulungan kayo,” ani Fernando.

Samantala, sinabi naman ni Batangas Provincial Health Officer II Rosvilinda Ozaeta na lubos ang kanilang kagalakan dahil sa mga ipinamahaging groceries at mga gamot lalo pa’t karamihan sa kanilang komunidad ay wala pa ring trabaho dahil sa pagsabog ng bulkan.

“Ito pong mga handog ninyo ang sinasabi nating mga basic needs ng mga kasamahan ko dito, lalo na po’t karamihan ay mga wala pang trabaho kaya lubos po kaming nagpapasalamat para dito” ani Ozaeta.

Gayundin, inihalintulad ni Batangas Governor Hermilando Mandanas ang pagkakaisa ng mga Pilipino sa mga sinag ng araw sa pambansang watawat.

“Ang simbolo ng mga sinag sa watawat, naroroon ang Batangas at Bulacan; at ngayong araw ipinakikita natin na tayo ay magkasama sa pagbibigay ng liwanag at init ng pagmamahal sa ating mga kababayan. Kaya’t kami po ay lubos na nagpapasalamat sa panahon na inyong inilaan para sa amin,” ani Hermilando.

Dagdag pa rito, ipinahayag ni Rosila Dawit, 64 taong gulang na evacuee mula sa Brgy. Alas-as, San Nicolas ang kanyang pasasalamat sa Pamahalaang Panlalawigan.

“Sobra po kaming natutuwa dahil dinayo niyo po kami dito kahit malayo. Karamihan po dito ay may mga ubo’t sipon. Dahil po sa inyo, matutugunan po ‘yung mga pangangailangan namin lalo sa mga gamot at vitamins,” ani Dawi.
Bukod sa medical mission, nagsagawa din ng libreng gupit ng buhok ang Damayang Filipino Movement Inc. (Bishop Jesus “Jemba” M. Basco)