Inabot din ng isang dekada bago nakabalik sa Western Conference finals ang Los Angeles Lakers  matapos ilampaso sa Game 5 ang Houston Rockets, 119-96 sa ginanap na laro sa Walt Disney World Complex sa Florida.

Mala-halimaw ang pagdomina ng Lakers superstar LeBron James sa laro kung saan ipinoste ang 29 puntos, 11 rebounds at seven assists sa kanyang all-around game para tapusin ang serye nila sa Rockets, 4-1.

Kung maalala ang Game 1 ay na-upset ng Rockets ang LA.

Nanguna si James sa walang humpay na pag-atake sa depensa ng Rockets na hilig ang matinik nilang small-ball offense.

Pero hindi ito umubra at sinabayan pa nang taktika ng Lakers kung saan ipinasok si Markieff Morris bilang sentro sa starting five sa halip na ang big man na si JaVale McGee.

Rumesponde naman si Morris sa hamon na may kabuuang 16 points at walang paltos sa three point shots gamit ang 4-for-4.

Hindi nakayanan ng Rockets ang pag-ulan ng three point shots nang tumabo ang Lakers sa 19-for-37 kumpara sa 13-for-49.

Mula umpisa agad na umarangkada ang Lakers pero humabol ang Rockets upang dikitan ang score at nahabol pa ang 22 points lead ng Lakers sa first quarter.

Pero pagkatapos ng third quarter ay hindi na lumingon pa ang Lakers at tuluyan nang ibinulsa ng mas maaga ang best-of-seven series.

Inabot lang ng 30 minutos sa paglalaro si LeBron at ang natitirang mahigit limang minuto ay ipinaubaya na niya sa mga teammates.

Aminado si LeBron na malaki ang inaasahan sa kanya ng mga fans upang dalhin muli sa kampeonato ang koponan.

“Getting this franchise back to competing for a championship, which we’ve done all year,” ani 35-anyos na si James. “It’s the reason I wanted to be a part of this franchise.”

Ang iba pang umeksena sa opensa ng Lakers ay sina Anthony Davis na may 13 points at 11 rebounds at si Kyle Kuzma na nagpakita ng 17 points mula sa bench.

Samantala, labis naman ang panghihinayang ni James Harden na nagtapos sa 30 points kaugnay sa kanilang kampanya ngayong season na minalas ulit.

“it’s very frustrating especially the amount of work individually I put in,” wika pa ng dating NBA MVP.

Batay naman sa kasaysayan noong huling umakyat sa conference finals ang Lakers taong 2010, kasama pa noon si Kobe Bryant kung saan umabot pa sila sa kampeonato nang talunin ang Celtics sa finals.

Sa ngayon mag-aantay muna ang Lakers kung sino ang kanilang haharapin kung matapos na ang Clippers-Nuggets series.

Abanse ngayon ang Clippers sa serye, 3-2 kung saan ang Game 6 ay gagawin bukas.

DINISPATSA ni Princess Honey Arbilon ng Pilipinas si Maryia Gnedtchik ng Belarus, 4-1, para maikuwintas ang bronze medal sa katatapos na 1st Union Internationale de Pentathlon Moderne (UIPM) World Laser All-Stars.

Nilansihan ang 18-anyos na Pinay buhat sa Ormoc City ni Darcy Dryden ng Britain, 2-4, sa semifinals ng Under-22 online tournament na nilahukan ng 35 bansa, upang maihulma ang pakikipagtudlaan sa Balerusian nitong Setyembre 9.

Kaga-graduate lang sa Ormoc National High School at isang gold medalist sa 30th Southeast Asian Games PH 2019 sa mixed beach laser relay katambal si Samuel German, isang bagito pa lang sa sport ang dalaga.

Sinikwat ang gold ni Silvia Ventura ng Mexico na mga dinaig sina Gnedtchik sa semifinals, at Dryden sa race-to-four finale na binubuo ng limang target kada putukan.

“We’re slowly honing her to develop the way she makes quick and precise decisions,’’ reaksiyon ni Philippine Modern Pentathlon Association (PMPA) president Richard ‘Goma’ Gomez na siyang alkalde ng Ormoc.

“She has to understand the small details that makes a champion, that winning is not all about strength. It also needs mental sharpness and quick decision-making,’’ hirit pa aktor noon at pulitiko na ngayong opisyal.

Papasok sa final four, ginulantang din ng bagito ni Arbilon si world-rank Nouran Beheiry ng Egypt 4-0, at ang isa pang world-rank athlete sa katauhan ni Marcela Mello ng Brazil, 4-3.

Mula sa OD, isang saludo sa iyo Princess Honey. Gayun na rin sa bata no Mayor Goma. (REC)

HINDI nagging maganda ang pagtatapos na laro ni Yuka Saso, may maalat na four-over 76 para makuntento lang sa five-way tie sa 13th place, lubog ng pitong palo sa nag-reynang si Nippon Saki Nagamine sa wakas nitong Linggo ng 53rd Japan Ladies Professional Golf Association (JLPGA) Minolta cup 2020 sa  JFE Seto Inland Sea Golf Club sa Okayama.

Kabilang ang 68-70-69 patungo sa 283 lang score ng top Philippine pro golfer hambing sa Haponesa na pumoste ng stroke win (69-276) sa mga kalahing sina Na-Ri-Nee Inari (67-277), Ayako Kimura (69-277) at Hikari Tanabe (71-277), mga nagtabla para sa sa ikalawa hanggang ikaapat na puwesto.

Nakapagsubi si Nagamine ng top purse na ¥36M o katumbas ng P16.5M sa apat na araw na paluan sa loob ng 72 butas at nagsilbing panlimang torneo ng mayamang sport circuit na ito sa Asya.

May grasya pa rin ang Fil-Japanese rookie pro na isinilang sa San Ildefonso, Bulacan na ¥2,640,000 (P1.3M) sa pagmintis sa una niyang pagtatanga sa unang major title sa paliga.

Isa lang ang nai-birdie sa back nine ni Saso, nakatatlong bogey sa holes No.   10, 16 at 18^th, at dalawa pa sa front nine sa ikaanim at ikapitong butas na pumigil sa hangad sana niyang pangatlong korona sa limang kompetisyon dito. (REC)