- July 27, 2024
-
Search in People's Balita
Ang Diyaryong Pinagkakatiwalaan
Archive for November 11th, 2020
Malakanyang, ipinaubaya sa Comelec ang desisyon
IPINAUBAYA na ng Malakanyang sa Commission on Elections (Comelec) ang pagdesisyon hinggil sa panukalang palawigin ang mail voting sa 2022 presidential elections.
Ayon kay Presidential spokesperson Harry Roque, kinikilala nila ang Comelec bilang constitutional body na may atas na ipatupad ang batas at regulasyon sa pagdaraos ng eleksyon sa bansa.
Sa ulat, isinusulong kasi ni Comelec Commissioner Rowena Guanzon ang mail voting para sa halalan 2022.Ang katwiran ni Guanzon ay mas maraming makaboboto kung gagawin ang mail voting.
Ginawang halimbawa pa ni Guanzon ang ginawa sa Estados Unidos.
“We respect that recommendation coming as it does from a legal luminary within the Comelec and under the Constitution it is tasked of course with the supervision and conduct of elections,” ayon kay Sec. Roque
“Pero ang hindi ko lang po sigurado kung kinakailangan pang maamyendahan iyong Omnibus Election Code para ma-include iyong mail voting. Pero we leave that to the wisdom of the Comelec,” dagdag na pahayag nito.
Kaugnay nito, hindi naman sang-ayon ang liderato ng Senado na ipatupad sa bansa ang ‘mail-in votes’ na ginawa sa US elections.
Ayon kay Senate President Vicente Sotto III, ito raw ang pinakamabilis na sistema para makapandaya sa botohan.
Giit ni Sotto, maraming mga katanungan kung papaanong ipatutupad ang mail in votes, gaya ng tanong kung saan ipadadala ang boto, sa post office ba? kailan ito bibilangin, at higit sa lahat sino ang magbibilang nito.
Pagdidiin pa ni Sotto, papaano kung may mag-leak na resulta ng botohan, dahil lahat ani Sotto ng paraan para makapandaya ay pwedeng gawin.
Magugunitang ayon kay Senadora Imee Marcos, chair ng Committee on Electoral Reform ng Senado na masalimuot ang pagbabago ng proseso ng eleksyon, dahil posible itong mauwi sa kawalan ng tiwala ng publiko.
Samantala, hinikayat naman ni Sec. Roque ang mga eligible na mga Filipino na magpartisipa sa voters’ registration para sa May 2022 national at local elections.
Ang registration period, na inorganisa ng poll body, ay hanggang Setyembre 30, 2021.
“Well, hinihikayat po natin ang lahat na pupuwede nang magrehistro, magrehistro po kayo at pagdating po ng halalan sa Mayo 2022 dapat po lumabas at bumoto dahil ito po’y obligasyon natin sa ating inang bayan,” ayon kay Sec. Roque. (Bishop Jesus “Jemba” M. Basco)
3 TNT staff pinagmulta
TATLONG staff ng Talk ’N Text ang pinagmulta matapos lumabag sa dress code ng Philippine Basketball Association (PBA).
Pinadalhan ni PBA commissioner Willie Marcial ng sulat sina Ricardo Santos, Bong Lozano at Bong Tulabot kung saan pinagmulta ang bawat isa ng P1,000.
Napag-alaman na naka-shorts lamang sina Santos, Lozano at Tulabot sa laban ng TNT Tropang Giga at NorthPort Batang Pier sa Angeles University Foundation gymn sa Pampanga.
Ayon kay Marcial, malinaw na paglabag ito sa dress code ng liga.
“You were observed wearing shorts while on duty as TNT personnel. This is in violation of the PBA dress code,” ani Marcial.
Binalaan ni Marcial ang opisyales ng lahat ng teams na mahigpit na ipinagbabawal ang pagsusuot ng shorts sa mga aktuwal na laro.
“We would like to remind that PBA coaches and all other team personnel must not be seen wearing shorts during games,” ayon pa kay Marcial.
Mas magiging mabigat ang parusa ng liga sa oras na muling lumabag sina Santos, Lozano at Tulabot. “Let this serve as a warning that a repetition of the same shall merit a heftier fine,” pagtatapos ni Marcial.
Ginebra nasa unang puwesto na matapos tambakan ang Dyip, 102-80
PASOK na sa unang puwesto ang Barangay Ginebra matapos tambakan ang Terrafirma 102- 80 sa laro na ginanap sa Angeles University Foundation Sports Arena and Cultural Center.
Pinangunahan ni Japeth Aguilar ang panalo na nagtala ng 21 points habang mayroong 13 points, 11 rebounds at siyam na assists si Scottie Thompson.
Dahil sa panalo ay tinapos nagtapos na ang kampanya ng Ginebra sa elimination na mayroong walong panalo at tatlong talo habang ang Dyip ay mayroong isang panalo at siyam na talo.
Kuntento naman si Ginebra coach Tim Cone dahil nakabangon na sila sa pagkatalo nila noong nakaraang araw sa San Miguel Beermen.
3rd Quarter Monthly allowance ng MPD police, naibigay na
IBINIGAY na ng pamahalaang lungsod ng Maynila ang 3rd quarter allowance sa lahat ng kapulisan na nakatalaga sa Manila Police District (MPD) ngayong araw.
Matapos ang isinagawang flag raising ceremony, mismong si Manila Mayor Isko Moreno Domagoso ang nag-abot ng tseke sa ilang kapulisan na naglalaman ng kanilang “monthly allowance” simula buwan ng Hulyo, Agosto, at Setyembre ngayong taon.
Nasa kabuuang P36,578,500 halaga ng allowance ang itinurn-over ng pamahalaang lungsod sa pamunuan ng MPD sa pamumuno ni Director P/Brig.Gen. Rolando Miranda upang ipamahagi sa kada pulis na nakatalaga sa Maynila.
Ayon naman kay Miranda, nasa mahigit 4,800 ang kabuuang bilang ng kapulisan na nakatalaga sa Maynila kung saan ang bawat isa sa kanila ay makatatanggap ng halagang P7,500 allowance dahil ang kada pu- lis ay nakatatanggap ng P2,500 monthly allowance sa pamahalaang lungsod. (Gene Adsuara)
DOH pinaiiwas muna ang publiko sa Christmas caroling dahil sa COVID-19
PINAIIWAS muna ng Department of Health (DOH) ang publiko sa mga nakagawiang aktibidad tuwing holiday season tulad ng Christmas caroling dahil sa banta ng COVID-19.
Pahayag ito ng ahensya sa gitna ng mga paghahanda sa ilang tradisyon tuwing sasapit ang Pasko at Bagong Taon.
“Let us limit the number of people in social gatherings and activities, preferably to people within the same household. Avoid activities that require travel to areas with higher quarantine classification and keep activities as short as possible,” ani Health Sec. Francisco Duque III.
Ayon sa tagapagsalita ng ahensya, may mga lumabas nang pag-aaral tungkol sa risk o banta ng COVID-19 transmission ng ilang aktibidad na ginagawa ng mga tao.
“May lumabas na pag-aaral na ipinakita na kapag ikaw ay may certain activity how much load of the virus can you transmit. Mayroon diyan yung pagsasalita, paghinga, pag-ubo, pagbahing, pagkanta at pagsasalita ng malakas,” ani Health Usec. Maria Rosario Vergeire.
“Nakita diyan na yung pagkanta ng malakas, ‘yan yung pinakamataas na porsyento or highest yield of the virus if you’re infected na lalabas.”
Sa ilalim ng Department Circular No. 2020-0355, pinapayuhan ng ahensya ang publiko na iwasan pa rin ang malalaki at matagal na pagtitipon.
Hindi rin muna inirerekomenda ng DOH ang holiday activities sa enclosed spaces o masisikip na lugar, kung saan malabong masunod ang physical distancing protocol.
Pinag-iingat din ng Health department ang magpapamilya sa pagtanggap sa mga kamag-anak na galing sa malalayong lugar.
SINAS, MOST TRUSTED NI PDU30 – Sec. ROQUE
SI National Capital Region Police Office (NCRPO) director Police Major Gen. Debold Sinas ang itinuturing na ‘most trusted’ ni Pangulong Rodrigo Roa Duterte kaya’t itinalaga bilang bagong hepe ng Philippine National Police (PNP).
Ito ayon kay Presidential Spokesperson Harry Roque ang kalamangan ni Sinas sa ibang kandidato sa puwesto.
“Let’s just say that the appointment to the post is a matter of trust and confidence. And he is, for the moment, the most trusted by the President. So let’s leave it at that,”ayon kay Sec. Roque.
Nauna rito itinalaga na ni Pangulong Duterte si Sinas bilang bagong PNP Chief.
Si Sinas ay naging kontrobersiyal matapos taguriang mañanita cop.
Nauna rito, inanunsyo ni Sec. Roque, na nagsimula sa kanyang bagong posisyon si Sinas kahapon, November 10, kasabay ng pagbaba sa puwesto ni outgoing PNP Chief, Gen. Camilo Cascolan na nagretiro na.
Aniya, kung ang seniority ang susundin o ang rule of succession, si PNP deputy chief for administration Lt. Gen. Guillermo Eleazar ang number two man ng PNP.
Samantala, napaulat na posibleng ang magkaklase sa Philippine Military Academy (PMA) Hinirang Class of 1987 na sina Police Lt. General Guillermo Eleazar, na kasalukuyang commander ng Joint Task Force Covid Shield, at National Capital Region Police Offcie (NCRPO) Police Major General Debold Sinas ang maaring mapagpilian bilang susunod na PNP chief.
Si Eleazar ay mahigit isang taon pa sa serbisyo at nakatakdang magretiro sa Nobyembre 2021 habang si Sinas naman ay magreretiro sa Mayo 2021.
Samantala, hindi titigil ang pamahalaan sa laban nito sa iligal na droga at isulong pa ang mga tagumpay na una nang nakamit ng Philippine National Police (PNP) sa larangan ng kaayusan at kapayapan.
Nais din aniya ng Chief Executive na manatili at isulong pa ang pagkakaroon ng peace and order sa bansa, na napatunayan na aniya sa pinakahuling survey ng Gallup, kung saan lumalabas na ang Pilipinas ay pang-12 sa mga pinakaligtas na bansa mula sa 144 countries.
Sa kabilang dako, nakiusap naman si Sec. Roque sa publiko na bigyan ng pagkakataon si Sinas na gampanan ang kanyang bagong tungkulin sa kabila ng kontrobersiya nitong kinasangkutan dahil sa Mañanita, ayon sa kalihim, maiging bigyan ng pagkakataon si Sinas. (DARIS JOSE)
Bicol, CALABARZON, at MIMAROPA, malamang na isailalim sa State of Calamity
MALAMANG na isailalim ni Pangulong Rodrigo Roa Duterte sa state of calamity ang Bicol, CALABARZON, at MIMAROPA dahil sa pinsalang iniwan matapos bayuhin ng mga bagyong Quinta at Rolly.
“Most likely po pero antayin natin ‘yung papel mismo na manggagaling sa tanggapan ng Presidente,” ayon kay presidential spokesperson Harry Roque.
Sa ulat, umabot sa P5.6 bilyong pinsala sa agrikultura ang iniwan ng Bagyong Quinta at Rolly sa ilang rehiyon sa bansa, ayon sa pagtataya ng Department of Agriculture.
Sinabi ni Agriculture Secretary William Dar na lubhang napinsala sa paghagupit ng dalawang bagyo ang mga palayan ngunit sa kabuuan ay tumaas naman ng 16 porsyento ang produksyon ng bigas nitong third quarter ng taon.
Aniya pa, may apat na araw na produksyon ng bigas lamang ang nawala dahil sa pagsalanta ng magkasunod na bagyo.
“Apat na araw lang ang bumaba, ang present inventory 94 days. Meron pa tayong tatlong buwan na sapat na bigas para sa ating bansa,” aniya.
Nauna nang nabanggit ni Dar sa ibang panayam na inaasahang tataas ang produksyon ng palay ngayong 2020 ng pitong porsiyento, o kabuuang 20.175 milyong metriko tonelada (MT), kumpara sa 18.81 milyong MT noong 2019. Aniya pa, sa third quarter ng taon ay umabot ng 3.542 milyon MT ang ani ng palay.
Sinabi pa ni Dar na handa ang ahensya sa epekto ng La Niña phenomenon o ang madalas na pag-uulan at malamig na panahon na maaaring magtagal hanggang sa susunod na taon.
“Handang-handa po tayo doon sa sinasabi nilang La Niña, ang sabi po nila moderate La Niña ito, ibig sabihin hindi po masyadong malakas and that would be very beneficial sa ating bansa kung merong ulan during that period, until the first quarter of next year,” ani Dar.
Sa kabilang dako, dahil sa pananalasa ng dalawang bagyo ay nagresulta ito ng pagkamatay ng ilang katao at nag-iwan ng pagkawasak hindi lamang sa agrikultura kundi maging sa imprastraktura
Ito ang dahilan ani Sec. Roque kaya inirekumenda ng National Disaster Risk Reduction and Management Council (NDRRMC) kay Pangulong Duterte na ilagay ang ‘most affected regions’ sa ilalim ng state of calamity.
Inirekomenda rin ng NDRRMC sa Department of Social Welfare and Development (DSWD) at National Housing Authority (NHA) na i- standardize ang Emergency Shelter Assistance kung saan ang mga benepisaryo ay nakatatanggap ng financial assistance para kumpunihin ang bahay.
Pinayuhan naman ng NDRRMC ang NHA na tulungan ang local government units sa relokasyon ng mga na-displaced na pamilya mula sa danger zones at pagtatayo ng temporary shelters.
Inatasan naman ang Department of the Interior and Local Government na magsumite ng update report ukol sa status o kalagayan ng local disaster risk reduction and management fund at irekumenda ang posibleng pagdaragdag ss kanilang quick response fund.
Inatasan din ng NDRRMC ang kasalukuyang Philippine Humanitarian Assistance Registry (PHAR) na i- record at i- monitor ang mga donasyon para sa iba pang kalamidad. (Daris Jose)
Rematch hamon ni Holyfield, kay Tyson
HINAMON na ni dating heavyweight boxing champion Evander Holyfield si Mike Tyson.
Sa inilabas nitong video, direktahang hinamon nito si Tyson.
Nakatakda kasing makalaban ni Tyson si Roy Jones Jr sa November 28 kaya sinabi nito na nais niya na siya ang sumunod na makalaban nito.
Lumabas din sa kampo ni Holyfield na iniiwasan siya ni Tyson na makaharap mula.
Nagharap ang dalawa noong 1996 sa MGM Grand sa Las Vegas kung saan nagwagi si Holyfield sa 11th round TKO.
Nagrematch ang dalawa noong 1997 kung saan naging kontrobersiyal ang laban dahil sa pagkagat ni Tyson sa tenga ni Holyfield sa ikatlong round.