• June 14, 2024
  • Ang Diyaryong Pinagkakatiwalaan

Archive for December 3rd, 2020

Mga lider ng Kamara, nanawagan ng nagkakaisang tugon sa krisis sa klima

Posted on: December 3rd, 2020 by @peoplesbalita No Comments

Matapos ang pananalanta ng mga malalakas na bagyo sa bansa ay nanawagan ang mga lider ng kamara sa pulong ng Pandaigdigang Parlyametaryan ng Climate Vulnerable Forum (CVF) upang magkaisa sa pagtugon sa pamamagitan ng pagsisikap ng lehislatura para mapagaan ang lumalalang epekto ng pabago-bagong klima ng panahon.

 

Ang CVF Global Parliamentarians Meeting na ginanap noong Nobyembre 25, 2020 ay isang pandaigdigang webinar na inorganisa ng CVF, sa pakikipag-ugnayan sa Inter-Parliamentary Union and Global Center on Adaptation.

 

Tinalakay sa webinar kung papaano magagamit ang mga praktikal na hakbang para malabanan ang pabago-bagong klima ng panahon sa pamamagitan ng mas mahalaga at ambisyosong hakbang at pandaigdigang pakikipag-ugnayan.

 

Binigyang-diin ni Speaker Lord Allan Velasco na dapat na madaliin ng mga parlyamentaryan ang mga pagsisikap tungo sa pagpapatatag ng pagtugon sa klima sa gitna ng pandemya at ng lumalalang epekto ng pabago-bagong klima ng panahon.

 

“Ang tumataas na bilang ng mararahas na bagyo, hurricanes, at pagbaha sanhi ng pabago-bagong klima ng panahon ay nagiging normal na sa buong mundo at ang Pilipinas ay isa mga minalas na masalanta ng pinakamalalakas na kalamidad. Bilang mga parlyamentaryan sa bansang labis na apektado ng mga ito sa buong mundo, kailangan nating gumawa ng mga polisiya na magpapabilis ng paglipat sa matatag na ekonomiya nang hindi natin inaalintana ang pandemyang dulot ng COVID-19… Ang pangangailangang hakbang sa klima ay napakahalaga at madalian tulad ng pangangailangan natin sa bakuna para sa COVID-19,” ani Speaker Velasco.

 

Idinagdag ni Velasco na umaasa siya na sama-sama silang magtatrabaho ng mga parlyamentaryan ng CVF upang makabuo ng nagkakaisang adyenda sa lehislatura, na titiyak ng isang nagkakaisang daigdig sa paghahanap ng mapanatiling hakbangin.

 

“Sama-sama tayong maghatid ng mga kinakailangang polisiya na gagabay sa atin tungo sa bagong panahon ng kaunlaran sa ekonomiya batay sa pagpapanatili, pangangalaga sa kalikasan, mas maayos na pagtugon sa panganib at katarungan para sa klima,” aniya.

 

Samantala, binanggit ni House Committee on Climate Change Chair at Bohol Rep. Edgar Chatto na pinagtibay kamakailan ng kamara ang House Resolution 1377, na nagdedeklara ng isang climate and environmental emergency, na titiyak ng isang pinalakas at nagkakaisang hakbang sa klima sa adyenda ng ehekutibo at lehislatura ng pamahalaan.

 

“Ang Komite ng Climate Change sa Kamara, sa ilalim ng aking liderato ay ganap na sumusuporta sa pagsusulong ng pagpapanatili at muling nagagamnit na enerhiya. Katunayan, ang resolusyon sa environmental at climate emergency ay nananawagan sa lahat ng mga nangungunang nagbubuga ng usok, mga pandaigdigang industriya at mga lokal na pamahalaan na isulong ang renewable at sustainable energy sources na pinagtibay ngayong araw ng Mababang Kapulungan ng Kongreso sa oras na 7:02 ng gabi. Ito ang pinakaunang deklarasyon ng climate emergency na sumasakop sa buong bansa,” ani Chatto.

 

Ang CVF ang pinaka nangungunang pandaigdigang samahan ng mga bansang may banta mula sa climate emergency. Mayroon itong 48 bansang miyembro mula sa Africa, Asya, Caribbean, Latin America at Pacific. Ang pagpupulong na idinaos noong ika- 25 ng Nobyembre ay tumalakay sa pinalakas na ambisyon ng mga pamahalaan sa ilalim ng Paris Agreement ngayong taong 2020, na naglunsad ng programa ng mga parlyametaryan mula sa mga bansang may banta ng klima, at tiyakin ang matatag na pagtugon sa klima sa pagitan ng mga hamon na nararanasan tulad ng pandemya at mga kalamidad na may kaugnayan sa klima. (ARA ROMERO)

Wizards player nagpositibo rin sa COVID

Posted on: December 3rd, 2020 by @peoplesbalita No Comments

Isa pang player ng Washington Wizards ang nagpositibo rin sa COVID-19.

 

Ito ang kinumpirma ng koponan sa harap na rin ng pagsisimula sana ng pre-season workouts ngayong araw.

 

Aminado si Wizards coach Scott Brooks na na-delay tuloy ang pagsisimula nila ng individual player workouts.

 

Sa sunod na Biyernes kasi ang simula naman ng group sessions.

 

Tumanggi naman si Brooks na kilalanin ang player na tinamaan ng deadly virus.

 

Bago ang anunsiyo ng Wizards, kinumpirma rin naman ng Warriors na dalawa ring players nila ang nagpositibo sa COVID.

 

Una nang naglabas ang NBA ng health-and-safety protocol guide na kung sakaling merong player na magpositibo sa COVID kahit na ito ay asymtomatic ay kailangang mag-quaratine ng 10  araw.

 

Kung sakaling magsimula na sa workout kailangang i-monitor ulit ng dalawang araw ang player.

 

Batay pa sa patakaran, kailangan din na dalawang beses na magnegatibo sa PCR test ang isang player.

 

Kung maalala bago ang NBA bubble kamakailan maraming players at mga staff ang nagpositibo sa coronavirus na umabot sa mahigit 30.

Panukalang Bayanihan III, pag-iisahin sa TWG

Posted on: December 3rd, 2020 by @peoplesbalita No Comments

Binuo ng House Committee on Economic Affairs ang isang technical working group (TWG) para pag-isahin ang dalawang panukala na naglalayong madaliin ang pag-ahon ng ekonomiya ng Pilipinas sa gitna ng nararanasang pandemya.

 

Ang House Bill 8031 o ang “Bayanihan to Arise as One Act” at ang HB 8059 o ang “Bayanihan to Rebuild as One Act”, ay parehong naglalayong isailalim ng isang mekanismo ang pamamaraan upang mapabilis ang pag-angat ng ekonomiya ng bansa at socio-economic relief.

 

Ang HB 8031 ay iniakda ni Marikina City Rep. Stella Luz Quimbo, na nagsabing kailangang palakasin ng pamahalaan ang paggasta upang maiangat ang ekonomiya ng bansa.

 

“Kailangan pa natin ng mas maraming economic stimulus, subalit dahil hindi pinapayagan ng ating Saligang Batas ang pagdaragdag ng pondo sa panukalang badyet, kailangan nating humanap ng karagdagang pondo para sa muling pagmumungkahi ng panibagong economic stimulus,” ani Quimbo.

 

Sa ilalim ng kanyang panukala ay hinihiling niya na maglaan ng karagdagang P400-bilyon. Sa kabuuang halaga, ang P330-bilyon nito ay ilalaan sa pagtugon sa COVID-19 at P70-bilyon naman ay para sa pagtugon sa mga kalamidad

 

Samantala, ang isa sa mga may akda ng HB 8059 na si Albay Rep. Joey Sarte Salceda, ay iginiit ang pangangailangan na matiyak na may sapat na pondo para sa pagbili ng bakuna.

 

“Ang pangkalahatang direktang pamamaraan ay pabilisin ang pagbili ng bakuna. Siguraduhin na ngayon at gastusan na ‘yan,” aniya.

 

Idinagdag ni Salceda na dapat na maglaan ng pondo ang pamahalaan sa typhoon relief at pasiglahin ang pautang para sa paglago ng ekonomiya.

 

“Hindi na maiiwasan ang pangangailangan na magbigay tayo ng ayuda sa mga kabahayan at kabuhayan, at magtatag ng pundasyon para sa isang matagalang programa sa pag-ahon at paglago ng ekonomiya,” dagdag pa niya.

 

Kasama sa mga naghain ng HB 8059 ay sina Majority Leader Ferdinand Martin Romualdez at AAMBIS-OWA Party-list Rep. Sharon Garin.   (ARA ROMERO)

Reyes, Torre aawra sa 2nd Pro Sports Summit

Posted on: December 3rd, 2020 by @peoplesbalita No Comments

MAKIKIISA sina world 9-ball at four-time 8-ball billiard champion Efren Reyes at Chess Olympiad silver at four-time bronze winner Grandmaster Eugenio Torre sa Games and Amusement Board (GAB) 2nd Professional Sports Summit Zoom Teleconferencing & Facebook live 2020 sa Sabado, Disyembre 5.

 

“Hindi naman kasi porke pandemic ay hihinto na ang GAB so we thought of coming up with a virtual Sports Summit,” pagsisiwalat ni GAB chairman Abraham Kahlil Mitra sa Philippine Sportswriters Association (PSA) webcast Forum nitong Martes.

 

Paksa sa maghapong okasyon  ang boxing rules, mental health at batas sa pro sports. Gayundin ang pagkilala sa mga pambihirang talento ng mga atletang tulad nina Reyes, Torre, 2010 world 10-ball king Francisco Bustamante, dating world boxing champ Geronimo Penalosa at former Philippine Basketball Associatiopn (PBA) Best Import Sean Chambers.

 

Imbitado rin ang ilang opisyal gayani Samahang Basketbol ng Pilipinas Inc. (SBPI) chairman Sen. Juan Edgardo, kapwa mambabatas na sina Lawrence Christopher Go, Joel Villanueva at eight-division world boxing champion Emmanuel Pacquiao.

 

Sasamahan si Mitra sa isang araw na pagtitipon na sisimulan sa alas-9:00 nang umaga nina GAB Commissioners Mario Masanguid at Eduard Trinidad.

 

Sa temang ‘Leadership in Crisis,’ babahagi rin dito ang Philippine Basketball Association (PBA), Chooks-to-Go 3×3 Pilipinas, National Basketball League (NBL), Premier Volleyball League (PVL), Professional Chess Association of the Philippines (PCAP), Philippine Football League (PFL), at iba pa.  (REC)

2 drug pushers arestado sa Caloocan buy-bust

Posted on: December 3rd, 2020 by @peoplesbalita No Comments

Rehas na bakal ang kinasadlakan ng dalawang tulak ng ilegal na droga matapos makumpiskahan ng baril at P68-K halaga ng shabu sa isinagawang buy-bust operation ng pulisya sa Caloocan City.

 

Kinilala ni Caloocan police chief Col. Samuel Mina Jr. ang naarestong mga suspek na si Michael Ponayo, 37 at Orwin Callejo, 37, kapwa (watch-listed pusher).

 

Ayon kay Col. Mina, dakong 7 ng gabi nang maaresto ang mga suspek ng mga operatiba ng Station Drug Enforcement Unit (SDEU) warrior sa pangunguna ni P/Capt. Deo Cabildo sa buy-bust operation sa bahay ni Ponayo sa No. 25 Marulas B, Brgy. 36 matapos bentahan ng P7,500 halaga ng shabu ang isang undercover police na nagpanggap na buyer.

 

Nakumpiska sa mga suspek ang tinatayang nasa 10 gramo ng shabu na nasa P68,000 ang halaga, buy-bust money, isang cal. AR type 9mm pistol na kargado ng limang bala.

 

Sinabi ni Col. Mina, ang operation ay nagmula sa impormasyon na isiniwalat ng isang drug suspect na naaresto ng mga operatiba ng SDEU sa kanilang dating operation.

 

Mahaharap ang mga suspek sa kasong paglabag sa RA 9165 at paglabag sa RA 10591. (Richard Mesa)

Pre-Christmas tradition ng Santo Papa, kinansela dahil sa banta ng COVID-19

Posted on: December 3rd, 2020 by @peoplesbalita No Comments

Kinansela ni Pope Francis ang kaniyang taunang tradisyon na pre-Christmas rite sa darating na Disyembre 8 dahil sa COVID-19 restriction.

 

Ayon sa Vatican, na hindi muna isasagawa ng Santo Papa ang wreath laying ng bulaklak sa base ng 12-meter column katabi ang statue ni Madonna.

 

Nagdesisyon ang Vatican na hindi na isagawa ni Pope Francis ang nasabing tradisyon kasabay ng piyesta ng Immaculate Conception mula pa noong 1953. para hindi na dagsain pa ng mga tao.

 

Nauna ng isinagawa na lamang sa indoor ang lingguhang public participation ng Santo Papa para hindi ito mahawaan ng COVID-19.

Psalm 27:8

Posted on: December 3rd, 2020 by @peoplesbalita No Comments

Your face, Lord, I seek.

Kasunduan para masilip ng mga health expert ng bansa ang resulta ng mga clinical trials ng AstraZeneca, tinintahan na

Posted on: December 3rd, 2020 by @peoplesbalita No Comments

TULUY-tuloy ang pakikipag-usap ng Department  of Science and Technology (DoST) sa AstraZeneca, makaraang sabihin na muli silang magsasagawa ng panibagong clinical Trial dahil sa paiba-ibang resulta ng kanilang bakuna laban sa Covid-19.

 

Sa katunayan, ayon kay Dr. Jaime Montoya, Executive Director ng Philippine Council for Health Research and Development ng DOST sa Laging Handa briefing na nagkaroon na sila ng confidentiality data agreement signing sa AstraZeneca para payagan  ang Vaccine Expert Panel ng bansa na matingnang mabuti ang datos na kanilang  isusumite sa Pilipinas batay sa isinagawa nilang Phase 1 at Phase 2 clinical trial.

 

Bukod dito, sinabi ni Dr. Montoya  na mayroon na ring ikinakasang phase 3 clinical trial ang Astrazeneca Biopharmaceutical company sa Pilipinas.

 

Kumbinsido si Montoya na isa itong pagkakataon para maberipika kung ano pa ang mga maaaring katanungan na ibibigay sa kanila ng mga Press  at ng iba’t ibang tao  ukol sa  resulta ng kanilang Phase 3 Clinical Trial.

 

Magugunitang,  noong Biyernes, pumirma na ng 600-million deal ang pamahalaan ng Pilipinas para sa isang tripartite agreement aa pagitan ng mga pribadong sektor at AstraZeneca upang madala na sa Pilipinas  sa second quarter ng susunod na taon ang kanilang COVID-19 vaccine. (Bishop Jesus “Jemba” M. Basco)

Gulo sa PWAI nasa AWF na

Posted on: December 3rd, 2020 by @peoplesbalita No Comments

UMABOT na rin pala ang alingasngas sa Philippine Weightlifting Association, Inc. (PWAI) sa nakabase sa Doha, Qatar na Asian Weightlifting Federation (AWF).

 

Ito ay ang kawalang eleksiyon sa National Sport Association ng ‘Pinas sapul noong taong 2016 at basta na lang pinalitan ito ng bagong pangalan.

 

Si PWAI board member Felix Tiukinhoy Jr. ang nagparating ng bagay kina AWF officials, Qatari president Mohammded  Yousuf Almana at secretary general Boossaba Yodbangtoey ng Thailand.

 

Nanunungkulan ding pangulo ng Cebu Weightlifting Association, Inc. (CWAI), ipinahayag ng Cebu City-based na si Tiukinhoy na nagkaloko-loko  ang PWAI nang biglang umalis ng Pilipinas at manirahan na sa Estados Unidos ang dating pangulo na si Roger Dullano.

 

At basta-basta na lang din aniya ipinagpatuloy ng dating pangulong si Monico Puentevella ang pag-aktong presidente nang walang pagpupulong o halalan base sa batas ng PWAI.

 

“I am sincerely looking forward to your positive remark on this regard and may all the good forces be with as to uplift our beloved sport weightlifting,” anang opisyal ng PWAI, na commissioner din ng Cebu Sports Foundation (Cesafi) sa dalawang pahinang liham sa mga opisyal ng Asian continental lifting body.

 

Bubmuo sa CWAI, na karamiha’y bahagi rin ng PWAI sina Cong. Rufus Rodriguez (chairman), Jude Harry del Rio (vice president), Judith Sadje Sulla (secretary general), Edwin Nacua (treasurer), Danilo Catingub (auditor), Juan Maraat (PRO), Eliseo Dildig (project director), Dean Baldomero Estenzo (legal adviser), at Hidilyn Diaz (program ambassador).

 

Dalangin ng OD, para kabutihan ng PH sports at ng ating mga atleta, maayos na sana ang problema ng PWAI. Panghimasukan na rin sana rin ni Philippine Olympic Committee (POC) president Abraham Tolentino o ng kagaya niyang bagong halal na POC executive board. (REC)

Panukala sa binagong Wildlife Resources Conservation and Protection Act, aprubado na

Posted on: December 3rd, 2020 by @peoplesbalita No Comments

Inaprubahan ng House Committee on Natural Resources na pinamumunuan ni Cavite Rep. Elpidio Barzaga, ang draft substitute bill na naglalayong baguhin ang Wildlife Resources Conservation and Protection Act, na tinalakay sa isang online na pagdinig.

 

Ang substitute bill ay para sa House Bill 265 na inihain ni Occidental Mindoro Rep. Josephine Ramirez Sato, HB 3351 ni Pampanga Rep. Juan Miguel Macapagal Arroyo at HB 4860 ni Deputy Speaker at Cagayan de Oro City Rep. Rufus Rodriguez.

 

Inaprubahan din ng komite ang mosyon para isama ang HB 1684 ni Camarines Sur Rep. Luis Raymund Villafuerte at HB 3614 ni Quezon City Rep. Alfred Vargas, sa inaprubahang draft substitute bill.

 

Ang dalawang huling panukala ay parehong naglalayon na isailalim sa regulasyon ang paghuli, pagbebenta, pagbili, pagtataglay, pagdadala, pag-aangkat at pagluluwas ng lahat ng pating, page at mga chimaeras.

 

Nagpahayag ng suporta si Rodriguez sa draft substitute bill na mabusising tinalakay ng TWG.

 

Bukod sa parusang pagkabilanggo ay pagmumultahin din ng P2-milyon ang sinumang mapapatunayang lumabag.

 

Sa kanyang paliwanag sa HB 4860, sinabi ni Rodriguez ang lubos na pangangailangan na matiyak na ang flora at fauna sa bansa, kabilang na ecosystem na kanilang tirahan ay protektado mula sa mga banta at panganib, pagkawasak ng habitat, sobrang pag-abuso, pangangaso, polusyon, pabago-bagong klima ng panahon, at culling.

 

Ayon sa Department of Environment and Natural Resources Biodiversity Management Bureau, ang bansa ay may 133 terrestail mammals, 230 birds, 244 reptiles, at 97 amphibian species na hindi makikita sa ibang bansa.

 

“Mayroon din tayong 120 uri ng isda na makikita lamang sa mga karagatan at look ng Pilipinas,” ani Rodriguez.

 

Sinabi ni Barzaga na ang inaprubahang draft substitute bill ay sakop din ang mga paksa na nakasaad sa HB 1684 at 3614.

 

Pinatunayan ni ASEAN Centre for Biodiversity Executive Director Dr. Theresa Mundita Lim, na ang mga species na binanggit sa mga panukala ay itinuturing na nanganganib na, at dapat lamang patawan ng sapat na parusa ang lalabag kapag ito ay naisama sa substitute bill.

 

Sumang-ayon naman si Atty. Theresa Tenazas, OIC ng DENR-BMB Wildlife Resources Division na ang mga ito ay kasama na sa inaprubahang substitute bill at kanya ring ipinahayag ang pasasalamat ng ahensya sa chairman at mga miyembro ng komite sa pag-apruba ng substitute bill at gawing prayoridad ng ika-18 Kongreso ang panukala. (ARA ROMERO)