BINATI ni Philippine Sports Commission (PSC) Chairman William “Butch” Ramirez ang bagong pamunuan ng Philippine Olympic Committee (POC) Executive Board kasabay sa payo na iabot ang kanilang kamay sa lahat ng miyembro pati na rin sa mga natalong kandidato para sa inaasam na pagkakaisa sa pribadong organisasyon.

““During my tenure as chairman of PSC, we never intervene with POC election and their programs. Kung sino man manalo, we can always work with them. We congratulate the winners,” wika kamakalawaa ni Ramirez, na ninanais ding magkaroon ng magandang samahan ang mga opisyal.

“Then again if we speak of unity, it is a very delicate work, because you cannot have unity without humility. You have to reach out to those people who lost in the election. But it is easier said,” hirit pa ng opisyal.

Kumpiyansa rin si PSC top honcho na magiging maayos ang samahan sa pagitan ng dalawang ahensiya sa sports pati na rin sa mga national sports association (NSA) para sa magiging kampanya ng bansa sa nakatakdang limang mga malalaking paligsahan sa labas ng bansa sa taong 2021.

Una sa mga ito ang 32^nd Summer Olympic Games 2020 na naurong lang ng Hulyo sa susunod na taon dahil sa Covid-19 pandemic sa Tokyo, Japan, at 31^st Southeast Asian Games 2021 sa Vietnam. (REC)

MAGPAPAHINGA na muna mula sa mga kompetisyon si Alexandra ‘Alex’ Eala.

Maganda na rin ang taon para sa Pinay tennis sensation, kahit sabihin pang may pandemyang Coronavirus Disease 2019 o Covid-19.

Ito’y dahil sa nagkampeon ang 15-anyos na atleta sa 108^th Australian Open 2020 Juniors girls doubles kasama si Indonesian Priska Nugroho bilang fourth seed tandem.

Nakapasok din ang tinedyer na anak ng Southeast Asian Games swimming bronze medalist sa semifinals ng 124^th French Open Juniors girls singles, naabot ang career-high International Tennis Federation (ITF) world juniors girls singles no. 2 spot nitong Oktubre 12;

Sumali na rin sa ilang Women’s Tennis Association (WTA) European circuits ang Rafael Nadal Academy tennis scholar at Globe Ambassador upang marating ang professional career-best world No. 1,180 nitong Nobyembre 30.

Pero bumalik na muna ng bansa si Eala ayon sa kanyang ama na si Michael ‘Mike’ nitong Lunes, Disyembre 7 upang dito na gugulin ang kabuuan ng buwan o taon at magdiwang ng Pasko’t Bagong Taon sa piling ng pamilya.

Hinirit pa ng nakatatandang Eala na magbabalik ang anak sa Academy sa unang linggo ng Enero 2021 upang ituloy roon ang pag-aaral at sumali rin agad sa isang women’s pro $15k tournament sa Mallorca, Spain, bago matapos ang nasabing buwan sa pagpapatuloy ng bangis niya sa paghamablos ng raketa.

Kung magbibigay ng parangal sa mga atletang Pinoy at Pinay ang Philippine Sportswriters Asociation (PSA), sigurado ang boto ko sa isa iyo na kabilang ka sa mga awardee Alex. Dahil sa pagiging astig mo at karangalang binigay mo sa Pilipinas.

Habang karangalan ang ibinibigay ni Eala sa ating mga Pinoy, puro kahihiyan naman ang Philippine Tennis Association (PHILTA) na may dalawang taon na yatang suspendido sa ITF. Sana huwag na kayong pasaway riyan. Umayos na kayo.

At dalangin po ng Opensa Depensa ang patuloy na tagumpay mo Alex sa nawa’y talagang normal nang 2021 sa awa ng Diyos. (REC)

BINAWASAN ng bilang ang dalawang sport – boxing at weightlifting – para sa 33rd Summer Olympic Games 2024 sa Paris, France.

Nangangahulugan ang drastikong hakbang ng International Olympic Committee (IOC) ang pagliit ng bilang sa 329 gold medals na lang ang mga paglalaban sa quadrennial sportsfest.

Mas mababa na ito ng 10 medalyang ginto sa 32nd Summer Olympic Games 2020 na ni-reset lang sa Hulyo 2021 dahil sa Coronavirus Disease 2019 pandemic.

Bale apat na gold ang binaklas sa weightlifting, indikasyon sa pagkabanas ng IOC sa may kasalukuyang gulo na International Weightlifting Federation (IWF) sa bawal na droga at korapsyon. Lalabas na 120 lifters (athlete at officials) na lang ang makakapunta sa Paris.

Wala na sa kalahati ito sa mga bumahagi sa 31st Summer Olympic Games 2016 sa Rio de Janeiro, Brazil kung saan nakamit ng ating kalahi na si Hidilyn Diaz ang silver medal.

Namemeligro ring tuluyang makalos ito sa kalendaryo ng tuwing apat na taong pinakamalaking paligsahan sa mundo dahil na rin sa malalang nabanggit na problema.

Apektado rin ang boxing dahil sa malaking bilang ang malalagas sa athlete quota na 10,500 sa 2024 Games. Lampas sa 600 katao ang mawawala hambing sa mga sasali sa Tokyo Olympics.

Dahil sa korapsyon at dayaan sa mga labanan ang kinaiinis din ng IOC sa International Boxing Association (AIBA) kaya sinuspinde ito noon pang isang taon. Isinaalang-alang na lang ang kapakanan ng mga boksingero kaya may boxing pa rin sa Tokyo at Paris.

Sana umayos na ang IWF at AIBA para hindi naman tuluyang mabura ang weightlifting at boxing sa mga parating pang Olympics.