MAY dalawa hanggang tatlong kompetisyon pang lalahukan si Carlos Edriel ‘Caloy’ Yulo bago sumalang pangarap ng lahat ng atleta na 32^nd Summer Olympic Games 2020 sa Tokyo, Japan na inurong lang sa darating na Hulyo 2021 dahil sa Covid-19.

Nabatid kamakalawa kay Gymnastics Association of the Philippines (GAP) president Cynthia Carrrion-Norton, na gaganapin sa Marso-Hulyo sa Germany, Azerbaijan at Japan ang tatlong kompetisyon ng 20-anyos, 4-11 ang taas at tubong Maynila na gymnast.

Nadiyeta sa dalawang nilaruan lang si Yulo sa nakalipas na taon parehong sa Japan sa kasagsagan ng pandemya na pumutok sa mundo nitong Marso.

Sumungkit ang reigning world men’s floor exercise champion at current world No. 1 ng isang silver medal sa sa men’s vault ng 53rd All-Japan Seniors Gymnastics sa Gunma Prefecture nitong Setyembte.

Habang nakadalawang bronze naman siya sa 74th All-Japan Gymnastics Championships — floor at vault events – sa Gunma pa rin nito lang Disyembre.

Nasa ikatlong taon na si Yulo sa Land of the Rising Sun sa pagtustos ng Philippine Sports Commission (PSC) sa paghahanda sa quadrennial sportsfest. (REC)

NASA limang key player ng Petro Gazz Angels sa pangunguna nina  Maricar Nepomuceno-Baloaloa, Jeanette Panaga, at Jonah Sabete ang naglaho sa team dahil sa pagiging free agent.

Sa isang social media post ng Petro Gazz nitong isang araw lang, pinasalamatan ng team ang naging serbisyo ng tatlo kasama rin sina Cherry Nunag at Jovy Prado na pinaupo ang Angels sa trono ng 2019 Philippine Volleyball League (PVL) Reinforced Conference.

“We’re thankful for all the years you’ve played for the Petro Gazz family! Forever grateful for all the amazing memories!” lahad ng pangasiwaan ng koponan via Facebook.  “Wishing you all the best in your future endeavors! Thank you, Angels!”

Pero dahil sa kalibre ng tatlong beteranang balibolista, inaasahang mabilis itong mapapapirma ng iba pang team lalo’t sa Abril na ang planong pagbubukas ng unang propesyonal na liga ng baibol sa bansa. (REC)

INAMIN ng tatlong agent-manager ng mga player na bukas lahat ang 12 team sa mga palitan ng mga manlalaro bilang pagpapalakas para sa 46th Philippine Basketball Association (PBA) 2021 Philippine Cup sa darating na Abril 9.

Nagkakaisa sa pahayag sina veteran agent-manager Danny Espiritu, Charlie Dy, at Ed Fonceja ,na anila’y lahat ng mga koponan ay naghahanap ng mga kailangang talent  at kalidad sa puwesto para punan ang mga pangangailangan.

“Yes, may mga nagpapahanap na sa amin sa kulang nilang player sa team. Sa ngayon, kung wala talagang makuha doon sa mga nasa free agent, saka kami maghahanap sa mga hindi nagagamit sa ibang teams kung pupuwede naming na mai-negotiate sa isang trade,” bulalas ni Espiritu, ang pinakamaraming hawak na basketbolista at nasa 33 taon na sa larangan.

Kaya lang idinagdag niyang  inaasahan pa ang pagsusulputan ng swap ng cagers bago o matapos ang 36th PBA Rookie Draft sa Marso 24, na ang deadline ng aplikasyon para rito ay Enero 27.

Inalis na ng PBA ang trade suspension na sinimulan sa nagdaangtaon hanggang January 4 ng taong ito dahil sa Coronavirus Disease 2019.

Ang huling naganap na palitan ay kinatampukan sa pagbagsak ni John Paul Erram sa Talk ‘N Text buhat sa North Luzon Expressway sangkot ang Blackwater. (REC)

Target ngayon ng International Olympic Committee (IOC) na mabakunahan kontra COVID-19 ang mga atletang sasabak sa kompetisyon para matuloy nang ligtas ang Tokyo Games sa darating na Hulyo.

Bagama’t ayaw sumingit ng IOC sa listahan nang kung sino ang dapat na maturukan ng COVID-19 vaccines gaya ng mga napapabilang sa vulnerable sector at health care workers, umaasa silang sa lalong madaling panahon ay mabakunahan din ang mga atletang sasabak sa Olympic Games sa Tokyo.

Ito ay sa gitna na rin nang pagkakatuklas sa mga bagong variants ng COVID-19 sa iba’t ibang panig ng mundo, pati na rin ang pagtaas ng kaso sa Japan.

Ayon kay IOC member Dick Pound, ang pagpapabakuna sa mga atleta ang siyang “most realistic way” para matiyak na matuloy nang ligtas ang Tokyo Olympics sa Hulyo.

Hindi naman daw niya nakikita na magkakaroon ng public outcry o pagpuna sakali mang matuloy ang pagbabakuna sa mga atleta.

Sa huli, desisyon pa rin aniya ito ng bawat bansang lalahok sa kompetisyon.

Nauna nang hinimok ni IOC president Thoms Bach ang mga atleta na magpaturok muna ng COVID-19 vaccine bago sumali sa Tokyo 2020 Games pero iginiit na hindi naman ito magiging requirement.

BALAK sa panahon ng panunungkulan ni Philippine Olympic Committee (POC) president Abraham  Tolentino na mapagtayo ng sariling permanenteng tahanan ang pribadong organisasyon upang hindi maging ‘iskuwater’ sa PhilSports Complex ng Philippine Sports Commission (PSC) sa Pasig City.

Ito ang ipababatid ng opisyal sa mga kasamahan sa organisasyon unang edisyon na unang POC Executive Board Meeting bukas (Martes, Enero 12) sa nasabing lugar.

“Ngayon lang namin napagtanto ang bagay na ito, at pangunahin namin itong pag-uusapan sa board. Ang POC pala walang permanenteng opisina sapul noong 1911 pa. Mabigat man itong sabihin, pero parang informal settler. Nakikitira lang ang POC sa facilities ng PSC. Hindi rin naman sa PSC ang kinatitirikang lugar (kasaosyo ang DepEd),” salaysay kamakalawa ni Tolentino.

Kakahalal lang opisyal ng sports at Cavite Eight District Representative na pangulo ng POC nitong Nobyembre at sa Integrated Cycling Federation of the Philippines (PhilCycling) nitong Disyembre.

“Nakakalungkot, pero baka isa tayo sa mundo, o sa Asia o kahit sa Southeast Asia na ang POC ay walang sariling opisina. Daig pa tayo ng Laos, Myanmar at Thailand na may mga sariling opisina. Kaya isa ito sa aking pagtutuunan ngayong taon,” panapos na namutawi kay Tolentino. (REC)