2021 August 17 Archive - People's Balita

July 3, 2024
Search in People's Balita
Ang Diyaryong Pinagkakatiwalaan

Archive for August 17th, 2021

Pacman, kargado na ng protina ang pagkain, ilang araw bago ang laban

Posted on: August 17th, 2021 by @peoplesbalita No Comments

Nananatili umanong agresibo sa nalalapit na laban si 8-division world boxing champion Sen. Manny Pacquiao, kahit naudlot ang laban kay American undefeated boxer Errol Spence at ipinalit si Yordines Ugas.

Ayon sa isa sa tagaluto ng team Pacquiao na si Cliff Ramat Manzano hindi nagbago ang gilas ng fighting senator.

Kaya naman kailangan nila itong bigyan ng masusustansyang pagkain para lamang mapanatili ang mataas na level ng lakas at sigla nito.

Kabilang sa paboritong pagkain ng fighting senator ang tinola, calderetang kambing, isda at monggo.

“Okay lang yun, kahit marami syang kainin, mabilis naman ma-burn ang calories sa katawan ni senator, dahil sa grabeng ensayo,” wika ni Manzano.

Samantala, nagpatupad na rin ng paghihigpit sa training camp ng team Pacquiao.

Ang dating public workout, sa compound na lang umano ito ginagawa ng Pinoy ring icon.

Mataas pa rin kasi ang naitatalang COVID cases sa ilang bahagi ng Estados Unidos.

Magaganap ang labanang Pacquiao vs Ugas sa darating na Agosto 22, 2021.

Navotas nanguna sa may pinakamataas na ADAR

Posted on: August 17th, 2021 by @peoplesbalita No Comments

“Ito ang No. 1 na di natin gugustuhin”, Ang naging pahayag ni Mayor Toby Tiangco matapos manguna ang Lungsod ng Navotas sa may pinakamataas na Average Daily Attack Rate (ADAR) sa buong bansa simula Agosto 7 hanggang13, 2021.

Base sa pinakahuling ulat ng OCTA Research, 215% ang itinaas ng kaso ng COVID-19 sa lungsod. 41 ang average daily case noon, ngayon, ay 129 na.

“Dati, tayo ang may pinaka-mababang ADAR sa buong Metro Manila. Kung nakaya nating pababain ang mga kaso noon, sigurado akong kaya din natin ngayon”, ani Mayor Toby.

“Marami na tayong mga kapamilya, kaibigan o kakilala na nagkasakit o namatay dahil sa COVID-19. Wag nating hayaan na may madagdag pa rito”, dagdag niya.

Paalala ng alkalde sa mga Navoteño na palaging sumunod sa safety health protocols sa pamamagitan ng tamang pagsuot ng face mask para malabanan ang salot na COVID-19.

“Magpabakuna para magkaroon ng proteksyon. Kapag walang nahahawaan, namamatay ang virus. Wag itong hayaang makapaminsala pa ng buhay at kabuhayan”, pahayag niya. (Richard Mesa)

Party-list group Gabriela, nilabag ang Saligang Batas-Esperon

Posted on: August 17th, 2021 by @peoplesbalita No Comments

SINABI ni National Security Adviser (NSA), Secretary Hermogenes Esperon, Jr., na malinaw na nilabag ng party-list group Gabriela ang Saligang Batas dahil sa di umano’y pagtanggap ng financial assistance at suporta mula sa foreign sources.

Bahagi ito ng naging testimonya ni Esperon sa video teleconferencing sa idinaos na 2nd Division of the Commission on Election (Comelec) noong Agosto 12, bilang pagsuporta sa petisyon ng National Task Force to End Local Communist Armed Conflict (NTF ELCAC) para sa kanselasyon ng rehistrasyon ng Gabriela Women’s Party (GWP) at General Assembly of Women and Reforms (GAWR) sa party-list system

Ang Gabriela ay pinaiksing General Assembly Binding Women for Reforms, Integrity, Equality, Leadership and Action, Inc.

Nakasaad sa petisyon ng NTF-ELCAC na nilabag ng Gabiela ang Section 2, Paragraph 5, Article 9 (C) ng Saligang Batas ng Pilipinas sa ginawa nitong pagtanggap ng financial assistance mula sa foreign government at non-government organizations (NGOs).

Nakita ng political parties na guilty ang Gabriela sa ginawa nitong pagtanggap ng financial assistance at suporta mula sa foreign sources dahilan para makansela ang rehistrasyon nito sa Commission on Elections (Comelec).

Maging ang, Rule 32, Section 8 (D) ng Comelec Rules of Procedure na nagsasad na “that receiving support from any foreign government is one of the grounds for the cancellation of the registration of any political party.”

Idinagdag pa ni Esperon na tumanggap ang Gabriela ng Belgian financial support, sa pamamagitan ng Belgian accredited NGOs na “subjected” sa external financial audit ng international accounting firm Mazars na kinontrata ng Belgian government para mg- audit o mag- review ng 2014-2016 at 2017-2021 programs nito.

Makikita sa report ng Mazar na ang Gabriela, kasama ang Ibon Foundation at Karapatan ay local partners ngViva Salud VZW.,isang Belgian accredited NGO.

Samantala, nakasaad naman sa report ng Anti-Money Laundering Council (AMLC), na ang Viva Salud ay nagpadala ng remittance sa Gabriela na nagkakahalaga ng P1,811,867.35 noong Marso 28, 2019, at anim na remittances mula sa Intl. Fstone Ltd. of London, United Kingdom na nagkakahalaga ng mulaP1,058,392.42 hanggang P2,190,628.52 mula Setyembre 2015 hanggang Marso 2019. (Daris Jose)

Mayor Isko nagpositibo sa COVID-19

Posted on: August 17th, 2021 by @peoplesbalita No Comments

Nagpositibo sa COVID-19 si Manila Mayor Isko Moreno.

Ayon kay Julius Leonen, hepe ng Public Information Office, nasa Sta. Ana Hospital na si Moreno, na dinala doon ng ambulansiya ng Manila City Government kahapon.

“Nakararamdam ako ng kaunting ubo, kaunting sipon. Masakit ang aking katawan ngayon,” ani Moreno.

Tiniyak naman ng alkalde na patuloy ang pagpapatakbo ng pamahalaang lungsod lalo na sa mga operasyon laban sa COVID-19 pandemic.

Kamakailan lang ay tinamaan din ng COVID si Vice Mayor Honey Lacuna na kasalukuyan pang nagpapagaling ngayon. (Gene Adsuara)

Unang COVID-19 Lambda variant case sa ‘Pinas buntis, Western Visayas ‘local infection’ — DOH

Posted on: August 17th, 2021 by @peoplesbalita No Comments

Nagdadalang-tao ang unang kaso ng “Lambda variant” ng coronavirus disease (COVID-19) sa Pilipinas, bagay na maaaaring sa loob na raw ng bansa naipasa sabi ng Department of Health (DOH).

Linggo lang nang kumpirmahin ng DOH na isang 35-anyos na babae ang nadali ng Lambda variant, na unang namataan sa Peru. Sinasabing wala siyang sintomas at gumaling na matapos ang 10-day isolation period.

“Siya po ay currently nandun po sa lugar nila and we are trying to coordinate, apparently, based on record, she is also pregnant,” ani Health Undersecretary Maria Rosario Vergeire, Lunes.

“Sa ngayon, ang aming pinaka-probable na classification sa kanya mukhang local case talaga ito. Ngayon itong local case na ito nasa Region VI (Western Visayas) siya at amin Pong vina-validate pa further ang lahat ng impormasyon sa ngayon.”

Ika-22 ng Hulyo pa raw ito na-diagnose sa pamamagitan ng RT-PCR, habang nakapagsagawa naman na ng contact tracing at iba pang aksyon.

Sa kabila nito, idadaan pa naman daw nila sa verification ang babae sa pamamagitan ng RT-PCR test. Nakikipag-ugnayan na rin daw nang mahigpit ang DOH sa city health office ng naturang kaso.

“Ang aming most probable is the local case. Kasi nakita po natin siya within the persons in the community at kasama po siya sa na-sequence dahil apparently may cluster, kaya kasama siya sa na-sequence,” dagdag ni Vergeire.

“Kinukuha rin namin ang status ng kanyang pagbabakuna.”

Kamakailan lang nang isama ng gobyerno ang mga buntis sa listahan ng “expanded” A3 comorbidities priority group para maisama sa mga inuunang bakunahan laban sa COVID-19. Ligtas naman daw ito sa mga nagdadalang-tao maliban na lang sa Sputnik V vaccine ng amaleya Research Institute.

Ayon sa mga nasusulat, posibleng “highly transmissible” o madaling maipasa sa isang tao patungo sa isa pa ang Lambda variant ng COVID-19. Hindi pa ito “variant of concern” sa ngayon ngunit “variant of interest” pa lang para sa World Health Organization.

Bagama’t inihahalintulad ng ilan sa lubhang nakahahawang Delta variant, sinasabi ni Vergeire na maaaring wala sa parehong antas ang dalawan.

“‘Yung kanyang spread across the 26 countries where it is already identified, nakita natin… mostly in Latin America, na hindi ganoon kabilis ang spread niya as compared with the Delta,” wika niya. Aniya, mas laganap pa rin ang Delta sa mga bansa kung saan nagsimula na itong ma-detect.

“Ito pong Lambda variant can affect vaccine’s [efficacy] apparently, sinasabi. Pero ang lagi nating ipinapaalala, most of the variants of concern that we have right now affects the efficacy of vaccines.”

Sa kabila nito, meron pa rin naman daw cell-mediated immunity (T cells) na hindi naaapektuhan ng variants, na natitirang panlaban ng mga tao laban sa COVID-19 galing sa bakuna.

Umabot na sa 1.74 milyon ang tinatamaan ng COVID-19 sa Pilipinas kahapon. Sa bilang na ‘yan, patay na ang 30,340.

Sec. Roque, hindi pa masabi kung extended o hindi ang ECQ sa NCR

Posted on: August 17th, 2021 by @peoplesbalita No Comments

HINDI pa masabi ni Presidential Spokesperson Harry Roque kung dapat ba o hindi na palawigin pa ang Enhanced Community Quarantine (ECQ) sa National Capital Region (NCR) na magtataposa Agosto 20, 2021.

Ang katwiran ni Sec. Roque, may ilang araw pa naman bago makita ang datos na pagbabasehan kung quarantine status sa NCR.

“Ang ating objective ay iyong sinasabi nating total health. Bawasan iyong kaso pero hindi naman po pupuwedeng dadami iyong hanay ng mga magugutom,” ayon kay Sec.Roque.

“So, tingnan natin ang datos mayroon pa tayong mga araw noh? At sa tingin ko naman, alam na nating lahat ito po iyong parang third na pagtaas na ng mga kaso noh? Alam po natin na it takes about two weeks bago po magkaroon ng epekto iyong ating ECQ. at maski dumating po ang a-bente eh hindi pa po natin makikita iyong pagbaba noh? yan po ang ating naging karanasan sa dalawang pagkakataon na tumaas ang kaso natin at nag-ecq rin po tayo,” aniya pa rin.

Samantala, hanggang ngayon ay wala pa ring rekomendasyon ang Metro Manila Council sa Inter-Agency Task Force (IATF) kung palalawigin o hindi ang ECQ sa NCR.

“Wala pa pong rekomendasyon at nilinaw po ni Mayor Olivarez na bagama’t nagkaroon ng ulat sa isang pahayagan na ‘di umano ay nag-meeting na ang mga mayor, wala pa pong ganiyang pagpupulong na nangyayari.” anito. (Daris Jose)

‘Kusina Manileño’, iikot sa Maynila

Posted on: August 17th, 2021 by @peoplesbalita No Comments

Inilunsad ni Manila 3rd District Cong. John Marvin “Yul Servo” Nieto ang ‘Kusina Manileño na naglalayong maserbisyuhan ang mga residente ng Maynila sa simpleng pamamaraan.

Ayon kay Nieto, ang mobile kusina na ‘Kusina Manileño’ ay nagsimula nang maglibot sa ilang barangay sa distrito 3 noong Huwebes upang mamahagi ng libreng pagkain.

Kabilang sa mga ito ay ang Barangay 329 Zone 33 ni Chairman Antonio Navarro na nabigyan ang 150 pamilya at Barangay 390 Zone 40 ni Chairman Danilo Cailes na 168 pamilya ang ayudahan.

Bagama’t maliit na bagay lamang ang pagseserbisyo ng ‘Kusina Manileño’, umaasa si Nieto na makatutulong ito ng malaki ngayong nasa Enhanced Community Quarantine ang Metro Manila.

Ang ‘Kusina Manileño’ ay iikot sa buong Maynila upang maghatid ng pagkain sa mga residente na sumusunod sa ipinatutupad na health standards at safety protocols.

Pacquiao nagpakitang gilas sa huling sparring session bago ang laban vs Ugas

Posted on: August 17th, 2021 by @peoplesbalita No Comments

Tapos na ang anim na linggong training camp ni boxing champ Manny Pacquiao para sa kaabang-abang na laban nito sa susunod na linggo.

Kahapon, apat na rounds ang ginugol ng tinaguriang fighting senator sa sparring session nito kay Abrahan Lopez.

Kinailangan ni Pacquiao ang presensya ni Lopez matapos na hindi natuloy ang laban ng Pinoy boxer kontra Errol Spence Jr., na isang southpaw.

Sa halip na si Spence, ang makakalaban ng Filipino icon ang orthodox fighter na si Yurdenis Ugas sa T-Mobile Arena sa Las Vegas sa darating na Linggo, Agosto 22 (araw sa Pilipinas).

Ayon kay Lopez, maganda ang kondisyon ni Pacquiao sa ngayon sapagkat napanatili pa rin nito ang kanyang bilis, timing, at persistence.

Walang kupas din aniya ang magandang footwork ni Pacquiao — bagay na makakatulong sa kanya laban sa mas mabagal na si Ugas.

Samantala, tiwala naman si coach Freddie Roach na sasapitin ni Ugas ang kapalaran ni Kieth Thurman, na tinalo ni Pacquiao noong 2019.

Hindi aniya kakayanin ni Ugas ang bilis ni Pacquiao kahit pa 42-anyos na ito sa ngayon.

Netizens lumuwa ang mga mata sa suot na luxury jewelry brand ni MARIAN na ini-endorse ni SONG HYE KYO

Posted on: August 17th, 2021 by @peoplesbalita No Comments

PURING-PURI ng netizens ang ginawang effort ni GMA Primetime King Dingdong Dantes na mabigyan ng memorable, intimate and very elegant birthday party ang asawa na si Marian Rivera na nag-celebrate ng 37^th birthday noong August 12 kahit ECQ na naman.

Ang bongga naman talaga nang pina-set-up ni Dingdong ang bahay nila na fit na fit sa nananatiling GMA Kapuso Primetime Queen, na makikita sa kanilang IG posts.

Sa IG post ni Marian labis-labis nga ang kanyang pasasalamat, “Thankful for 37 years of life. I am filled with gratitude for all of you and for all the blessings.”

Kaya naman, ang daming napapa-sana all at naiinggit kay Marian sa pagkakaroon ng isang Dingdong Dantes, na mapagmahal, sweet at sobrang maalaga, hindi lang sa kanya pati sa mga anak na sina Zia at Sixto.

Say nga ng netizens, “Swerte ni Yan talaga..truly blessed sa buhay…di lang sa endorsement kundi sa pagtulong rin sa nangangailangan..may gwapong asawa at magagandang mga anak.”

“Sana all talaga! Well sa tagal naman nilang nagtatrabaho they earned that money. Kaya afford nila to have that set-up, photog services, and to get glammed up like that para sa birthday shoot nya. And to think for the gram ito. Part of the bigger picture pa rin syempre to maintain the image and A-list status kahit sa social media.

“Happiness vividly shows in Marian’s face and aura. You can’t fake it.”

“Buti pa itong mag-asawa, happy lang. Walang problema sa buhay.”

Kitang-kita nga sa aura ni Marian ang labis na kaligayahan at hindi yun maitatago sa photos na kinunan sa kanyang intimate birthday party.

Pero ang ikinaloka ng netizens at ikinaluwa ng kanilang mga mata, ay ang suot-suot niyang luxury jewelry brand from Paris na Chaumet Josephine Aigrette set (watch, rings & earrings) na ini-endorse ng sikat na Korean actress na si Song Hye Kyo para Asia-Pacific na kilala sa pinagbidahang Kdramas na Autumn in My Heart (2000), All In (2003), Full House (2004), That Winter, the Wind Blows (2013), Descendants of the Sun (2016) at Encounter (2018) na ni-remake nina Cristine Reyes at Diego Loyzaga na kasalukuyan pang napapanood sa TV5, Cignal TV at Vivamax.

Nag-search kami sa chaumet.com para tingnan ang mga nakalululang pieces of jewelry ni Marian.

At dahil born in August ang host ng Tadhana, nag-assume kami na ang first ring niya, ayon sa description ay Joséphine Aigrette pavé diamond ring in 18-carat white gold, set with a heart-shaped peridot of 0.80 carat.

Yung pangalawa na diamond ring na may 18-carat white gold, set with Akoya cultured pearls and brilliant-cut diamonds at katerno nito napakagandang diamond earrings na higit sa kalahating milyon ang halaga na bagay na bagay sa beauty ni Marian.

Gandang-ganda rin kami sa suot naman niyang Josephine Aigrette timepiece. Ang luxury diamond watch in pear-shape with white strap na part pa rin ng collection ng Chaumet, na ayon sa pricelist ay naglalaro rin higit sa kalahating milyon ang halaga.

Kaya pag pinagsama-sama ang naturang set of jewelry, ilang milyon kaya ang aabutin nito?

Anyway, sa rami nga ng endorsements ni Marian na patuloy siyang nire-renew kahit panahon ng pandemya at sa kanyang business, kayang-kaya talaga niyang bumili ng ganitong kamahal na alahas, na sinasabing napakagandang investment at magiging pamana sa kanyang anak na si Zia pag nagdalaga na ito.

Samantala, patuloy na napapanood sina Dingdong at Marian sa rerun ng Endless Love sa GMA Telebabad, na kahit ilang taon na ang lumipas ay marami pa rin ang tumututok sa kahihinatnan ng lovestory nina Johnny at Jenny.

Every Saturday afternoon naman ang Tadhana ni Marian at Sunday night naman ang top-rating na Amazing Earth na three years nang hino-host ni Dingdong.

(ROHN ROMULO)

PSC umaasang mabibigyan ng sapat na pondo

Posted on: August 17th, 2021 by @peoplesbalita No Comments

Kung mabibigyan ng sapat na pondo ay maaaring maulit o mahigitan pa ng Team Philippines ang kanilang performance sa nakaraang Tokyo Olympics sa paglahok sa 2024 Paris Games.

Gumastos ang Philippine Sports Commission (PSC) ng humigit-kumulang sa P2.7 bilyon simula noong 2016 na nagresulta sa isang gold, dalawang silvers at isang bronze medal sa Tokyo Olympics.

Ayon kay PSC chairman William ‘Butch’ Ramirez, tutulungan sila ni Philippine Olympic Committee (POC) president at Tagaytay City Rep. Abraham ‘Bambol’ Tolentino na makakuha ng mas malaking pondo.

“Nakapag-exchange kami ng idea ni Congressman Bambol, if we can sustain the same P1.3 billion na ibinigay ng Kongreso last year, he mentioned na being a Congressman balak niyang dagdagan. So nasa kanya na iyan.”

Sa Tokyo Olympics ay naglabas ang PSC ng P200 milyon para sa preparasyon at pagsabak ng Team Philippines.

Nagresulta ito sa pagbuhat ni weightlifter Hidilyn Diaz sa kauna-unahang Olympic gold ng Pinas bukod pa ang dalawang silvers nina boxers Nesthy Petecio at Carlo Paalam at isang bronze ni Eumir Felix Marcial.