Inumpisahan na ang kons­truksyon ng ikalimang hou­sing condominium project sa San Andres Bukid, Maynila na layong mabigyan ng permanenteng bahay ang mga ‘informal settlers’ at nangu­ngupahan sa lungsod.

Sa kabila na bagong ga­ling pa lamang sa COVID-19, sabak agad sa trabaho si Manila City Mayor Isko Moreno sa pangunguna sa ‘groundbrea­king ceremony’ ng 20-palapag na itatayong gusali na tatawaging Pedro Gil Residences.

“Habang busy tayong tumatakas sa pandemya, kailangan tuloy ang ating mga pangarap. Nakakapagod. Pero hindi baleng pagod basta makita kong nakangiti kayo masaya na ako,” ayon kay Moreno sa kaniyang talumpati.

Tampok sa Pedro Gil Residences ang 309 residential units na may sukat na 40 sqm. at may dalawang kuwarto, 125 parking slots, health center, limang elevators, swimming pool, activity lawn, function room, fitness center, roof garden sa ikaanim na palapag, limang units ng espasyo na maaa­ring rentahan, outdoor activity area sa 7th, 13th, at 18th floors at isang basketball court sa roof deck nito.

Nauna nang inumpisahan ang konstruksyon ng San Lazaro Residences nitong nakaraang buwan habang target na matapos na ang konstruksyon ng mga naunang pabahay na Tondominium 1 at 2 at maging ang Binondominium ngayong taon.

LUNGSOD NG MALOLOS – Upang pataasin ang kamalayan ng mga Bulakenyo sa kahalagahan ng policy research sa pagpapaunlad ng bansa, makikiisa ang Lalawigan ng Bulacan sa obserbasyon ng 19th  Development Policy Research Month (DPRM) sa darating na buwan ng Setyembre na pinangungunahan ng Philippine Institute for Development Studies (PIDS) na may tema ngayong taon na “Muling Magsimula at Magtayo Tungo sa Mas Matatag na Pilipinas Pagkatapos ng Pandemya”.

Layon ng obserbasyon sa taong ito na talakayin ang pangangailangang i-reset ang mga nakasanayang mga gawi upang maitaguyod muli ang Pilipinas pagkatapos ng pandemyang COVID-19 at lumikha ng isang mas mahusay na bansa sa pamamagitan ng pagbabalanse ng interes ng mga tao, kita o pagbibigay ng pantay na kahalagahan sa ekonomiya, lipunan at kapaligiran.

Bilang paraan ng pakikiisa at pagpapakita ng suporta, hinihimok ng PIDS ang bawat lokal na pamahalaan, mga ahensiya, organisasyon at iba pa na i-display ang pisikal o electronic banner ng DPRM sa kanilang mga tanggapan at opisyal na website at sa pag-follow sa kanilang social media pages para sa mga karagdagang mga anunsyo at update.

Isang virtual kick-off forum din ang isasagawa sa Setyembre 2, 2021, ganap na ika-9:00 ng umaga sa pamamagitan ng Cisco Webex na ipalalabas din sa publiko sa Facebook page ng Philippine Institute for Development Studies na dadaluhan ng mga panelista mula sa iba’t ibang sektor upang magbahagi ng kanilang kaalaman sa nasabing tema habang ang 7th Annual Public Policy Conference (APPC) naman ay isasagawa sa pamamagitan ng webinar na may apat na bahagi na gaganapin sa Setyembre 14, 16, 21 at 23, sa ganap na ika-9:00 ng umaga.

Samantala, inihayag naman ni Gob. Daniel R. Fernando ang kanyang pagsuporta sa layunin ng DPRM lalo na at bibigyang pansin nito ang epektibong pagpaplano at paggawa ng mga patakaran na makatutulong hindi lamang sa lalawigan kundi maging sa buong bansa.

“Taun-taon ay napakaganda at napakahusay ng layunin ng DPRM; lalo na ngayong taon kung saan ay tatalakayin ng lubusan ang pagsasaayos ng mga pamamaraan sa pagpapabuti ng ating bansa ngayong tayo ay kasalukuyang dumaranas ng pandemya. Mahalagang mabuksan ang kamalayan ng publiko sapagkat ang pagbabago ay nagsisimula sa bawat isa sa atin,” anang gobernador.

Ang buwan ng Setyembre bawat taon ay idineklarang Development Development Research Month (DPRM) alinsunod sa Proklamasyon Blg. 247 ng Malacañang noong Setyembre 2002 na nagbibigay diin sa kahalagahan ng pagsasaliksik sa kaunlarang sosyo-ekonomiko ng bansa. (Bishop Jesus “Jemba” M. Basco)

Sinimulan na ang pilot COVID-19 vaccination sa mga transport workers sa Paranaque Integrated Terminal Exchange (PITX) dahil na rin sa utos ni Department of Transportation (DOTr) Secretary Arthur Tugade upang magpatupad ng mahigpit na health at safety measures sa mga pasilidad ng mga pampublikong transportasyon.

“Its important that we make sure our heroic transport workers are all vaccinated, as they go to different places, and so are those they mingle with everyday,” wika ni Tugade.

Tinawag ang programa na “Tsuper: Kasangga ng Resbakuna”  at ito ay naglalayon na mabigyan ng bakuna ang mga drivers ng mga pampublikong sasakyan, conductors at iba pang transport workers. Ang programa ay sa pagtutulungan ng DOTr Road Transport Sector, Department of Health (DOH), Mega Manila Consortium Cop. (MMCC), PITX at ang lungsod ng Paranaque. Sinimulan ang pagbibigay ng bakuna noong nakaraang July 2021.

Ginawang inoculation facilities ng MMCC ang mga buses sa PITX na may kapasidad na 1,000 na mangagawa ng transportasyon kada Sabado hanggang makamit ang minimum target na 6,000 na bakuna.

Ang lungsod ng Paranaque ang nagbigay ng unang batch ng bakuna habang ang natitirang bakuna na kailangan pa para sa programa ay mangagaling naman sa national government sa ilalim ng nationwide vaccination sa tulong ng Metro Manila Center for Health Development ng DOH.

Habang ang Health Office ng lungsod ng Paranaque ang siyang nagbigay ng mga kailangan mga health workers at medical personnel para sa screening, vaccination at post-vaccination tasks.

“This initiative would surely hasten the city’s goal of achieving herd immunity as 250,000 residents have already been vaccinated. This help from DOTr and the IATF is a big step for the city to achieve its goal of herd immunity. Any form of help is welcome and hugely appreciated as the struggle felt by Filipinos due to the pandemic need to be stopped immediately,” saad ni Paranaque Mayor Edwin Olivarez.

Samantala, pinahayag naman ni Tugade na pumayag sa kanyag panawagan ang pamunuan ng PITX sa panguguna ni Megawide chairman Edwin Saavedra na huwag na munang pagbayarin ng terminal fees ang mga buses at jeepneys sa PITX na sinimulan noong Aug. 2 hanggang hindi pa nawawala ang travel restrictions upang hindi masyadong madama ang epekto ng pandemya sa sektor ng pampublikong transportatasyon.  LASACMAR