SINABI ni Presidential Spokesperson Harry Roque na datos ang nagsasabi kung bababa ang quarantine classification sa bansa.

Tugon ito ni Sec. Roque sa pagtaya ng OCTA Research Group na posibleng nasa “low risk” na para sa COVID-19 ang Metro Manila sa katapusan ng Oktubre.

“Ang mabuting balita po ay pagdating po sa ICU capacity eh for the first time in many, many months ang Metro Manila  ay nasa moderate risk and that is also a factor to consider in lowering quarantine classification. Pero mayroon pa rin tayong tinitingnan, ito  ang two-week—ang growth in cases na iyong two-week at saka ‘yung daily at makikita po natin na sa NCR negative din ito, okay,” ayon kay Sec. Roque.

“And ‘tong tinitingnan ko pong datos ay hindi ko lang alam kung anong date pero ang nakikita ko pong datos sa NCR—October 10 datos is -13% at -46% ang previous 3 to 4 versus 5 to 6 weeks at saka recent 1 to 2 versus previous 3 to 4 weeks. So mukhang pareho po on the basis of two-week growth rate, average daily attack rate at health care utilization rate and mayroong datos na nagpapakita that we can lower the quarantine classification,” dagdag na pahayag nito.

Subalit, ang eksperimento  kasi nila sa Kalakhang Maynila ay “pilot” kung saan ay kinakailangan pag-aralan muna ang resulta ng pilot.

“Pero kung ang gagamitin ninyo ay ‘yung GCQ, MGCQ ganyan… eh tayo naman  ay on GCQ with alert level system,” aniya pa rin.

“So I would say  that the data supports a reduction of the alert level but that’s ultimately the decision of the IATF. Abangan na lang natin, magpupulong naman  ‘yan on Thursday,” ani Sec. Roque.

Sa ulat, posibleng nasa “low risk” na para sa COVID-19 ang Metro Manila sa katapusan ng Oktubre ayon sa OCTA.

Ang paliwanag ni OCTA Research fellow Guido David na sa ngayon kasi, nasa 2,000 na lang ang 7-day average na kaso sa Metro Manila.

“Maaaring by end of October, maaaring nasa low risk na ang NCR (National Capital Region), based sa criteria namin,” ani David.

Marami na ring local governent unit (LGU) sa NCR na nasa “moderate risk,” partikular umano ang Malabon, Caloocan at Maynila na mababa na ang average daily attack rate.

Kapag nagtuluy-tuloy umano ito, inaasahang nasa hindi tataas sa 1,000 kaso na lang ang maitatala ng Kamaynilaan.

Pagdating ng Nobyembre, puwede pa rin umano itong bumaba sa 500 kaso kada araw.

Positibo si David na magtutuloy-tuloy umano ito hanggang Pasko lalo’t marami na ang bakunado sa Metro Manila at wala ring nakikitang bagong banta ng variant of concern sa bansa.

Pero sa kabila nito, nakita ng OCTA na tumataas ang mga kaso sa buong hilagang Luzon, kasama ang Cordillera Administrative Region, at Ilocos at Cagayan Valley regions.

Sa mga huling ulat ng OCTA, isa ang Baguo sa mga lungsod na may pinakamataas na arawang kaso ng COVID-19.

Patuloy na ipinapatupad ng LGU sa Baguio ang mahigpit na border control para sa non-essential travel.

Umaabot umano sa higit 100 biyahero ang hinaharang sa mga border ng lungsod kada araw.

Pinayuhan ni Tourism Secretary Bernadette Romulo-Puyat ang publiko na i-check ang travel protocols sa pupuntahang lugar para hindi maharang.

Ayon din kay Puyat, nagbukas na ang turimso sa ilang lugar tulad ng Boracay, Siargao at El Nido sa Palawan.

May pagpupulong ang Department of Health at Inter-Agency Task Force ngayong linggo para pag-usapan ang mga bagong panuntunan sa bansa. (Daris Jose)

NAGWAKAS na ang 11-taon pagtatago ng isang lalaking akusado sa panggagahasa sa isang 16-anyos na kanyang kapitbahay sa Ormoc City matapos siyang masakote ng mga awtoridad sa kanyang hideout sa Caloocan City.

Ayon kay NPD Director P/BGen. Jose Santiago Hidalgo, Jr. ang akusadong si Melvin Jumao-as, 30, tubong Leyte at residente ng Purok 6, Calapakuan, Zambales ay sangkot din sa serye motornapping incidents sa Caloocan City at kalapit na probinsya at napag-alaman na sub-leader siya ng notoryus “Limos Motornapping Group”.

Siya ay nadakip sa Langit Road, Brgy. 176, Bagong Silang dakong alas-8 ng umaga ng mga operatiba ng District Special Operation Unit (DSOU) sa pangunguna ni P/Lt Melito Pabon sa ilalim ng pangangasiwa ni P/Lt. Col. Jay Dimaandal, kasama ang NPD- Regional Intelligence Unit of National Capital Region (RIU-NCR), NPD Highway Patrol Group (HPG) at Ormoc City Police Station.

Ani BGen. Hidalgo, si Jumao-as ay tinagurian bilang Top 6 Most Wanted Person sa Ormoc City na may standing warrant of arrest na inisyu noong July 12, 2011 ni Hon. Judge Clinton C. Nuevo ng Ormoc City Regional Trial Court (RTC) Branch 12 para sa kasong Rape in relation to R.A. 7610 o Special Protection of Children Against Abuse, Exploitation and Discrimination na walang inirekomendang piyansa.

Batay sa record, sapilitang hinalay ni Jumao-as ang 16-anyos niyang kapitbahay sa Sitio Tongonan, Brgy. Montereco, Ormoc City noong October 09, 2010 at matapos nito ay nagtago ang suspek makaraang magsampa ng kaso ang pamilya ng biktima kontra sa kanya.

Nang makatanggap ng intelligence information si DSOU head Lt. Col. Dimaandal mula sa NPD-RIU-NCR na si Jumao-as ay naispatan sa Bagong Silang, kasama ang grupo ng hinihinalang motornapping syndicate ay agad bumuo ng team ang DSOU sa pamumuno ni Lt. Pabon, sa coordination sa Ormoc City Police Station saka ikinasa ang police operation na nagresulta sa pagkakaaresto sa suspek. (Richard Mesa)

SASABAK na rin sa larangan ng pulitika upang makapaglingkod sa mga Malabonians ang anak nina Malabon Rep. Jaye Lacson-Noel at An-Waray Party-list Rep. Florencio “Bem” Noel na si District 1 Councilor Regino Federico “Nino” Noel, 28.

Kasama ang buong pamilya, pormal na naghain ng kanyang certificate of candidacy sa local Commission on Elections (Comelec) office ang batang Noel, Lunes ng umaga matapos ang isang banal na misa na ginanap sa San Bartolome Church.

Noong August 2021, itinalaga ni President Rodrigo Duterte ang batang Noel bilang bagong kasapi ng Sangguniang Panlunsod (city council) kapalit ng kanyang amain na may sakit na si Councilor Edwin Dimagiba.

Si Lacson-Noel, ay nakatakda namang maghain ng kanyang COC para sa muling pagiging kinatawan ng lungsod sa Miyerkoles.

Ayon kay Congw. Jaye, ang kanyang anak ay naging aktibo sa bago ang kanyang appointment, katuwang silang mag-asawa sa panahon ng pandemya sa pagbibigay ng lahat ng uri ng tulong sa mamamayan ng lungsod.

Dagdag pa ng mambabatas, malaki ang tiwala nito sa anak na magagampanan ang kanyang tungkulin at magiging magandang ehemplo lalo na sa mga kabataan.

Nakatuon din ang pagbibigay ng tulong ng batang Noel sa mga pangangailang medical ng taga Malabon dahil isa sa prayoridad niya ang kalusugan at pagmamahal sa kalikasan.

Ani Konse Nino, nais lamang niyang ibahagi ang kanyang kaalaman kung paano ang maging modelong opisyal na mas makapag-aangat pa ng kabuhayan, edukasyon, at kalusugan ng mahal niyang Malabonians. (Richard Mesa)