Papalo sa halos 9-milyong mga magulang ang may gusto sa modular instruction bilang alternatibong learning modality para sa kanilang mga anak para sa darating na pasukan sa Agosto 24.

Batay sa resulta ng mga nakalap ng Department of Education (DepEd) na datos mula sa Learner Enrollment and Survey Form (LESF) survey, lumabas na nasa 8.8-milyon na magulang ang pabor sa paggamit ng mga module.

Sa ilalim nito, maglilimbag ang DepEd ng mga modules na ipapamahagi ng mga guro sa kanilang mga estudyante para malimitahan ang kanilang interaksyon sa isa’t isa sa harap ng krisis sa coronavirus.

Nasa 3.9-milyon naman ang may gusto sa blended learning, o kombinasyon ng iba’t ibang mga learning modalities.

Habang nasa 3.8-milyon na mga magulang naman ang pabor sa online learning; 1.4-milyon para sa Educational TV; 900,000 para sa radyo; at kalahating milyon ang may gusto sa iba pang modalities.

“Ang mga datos at impormasyon ay ginamit ng bawat regional at schools division office, at mga paaralan sa pagdisenyo ng kanilang sariling learning continuity plan partikular sa pagpili ng ipatutupad na learning modalities,” saad ng DepEd sa isang pahayag.

“Ang mga datos ay ginamit rin upang tukuyin ang budget requirements para sa LCP lalo na sa paggawa ng learning resources.”

Samantala, ipinakita rin ng survey na may kabuuang 395,743 na mag-aaral ang lumipat mula pribadong paaralan at state and local colleges and universities patungong pampublikong paaralan.

Sa kabilang dako, sa pinakahuling datos ng kagawaran, umabot na sa 22.3-milyong mga estudyante ang nag-enroll na sa mga pampubliko at pribadong paaralan sa buong bansa.

Ang naturang bilang ay 80.4% ng enrollment turnout noong nakalipas na taon.

Nasa 20.95-million na ang mga nagpatala sa mga public schools, habang nasa 1.37 million naman sa mga private schools.

NANANALIG ang Department of Labor and Employment (DOLE) na sakaling maisabatas na ng Kongreso ang Bayanihan II o Bayanihan to Recover as One Bill, ay magkakaroon din ng malaking tsansang maaprubahan ang kanilang mga proyekto,partikular na ang TUPAD Program na magsisilbing emergency employment at subsidy program para sa mga nawalan ng trabaho dahil sa covid19.

Sinabi ni Department of Labor and Employment Undersecretary, Usec. Joji Aragon, malaki ang maitutulong ng programang ito sa DOLE upang mabigyan ng mapagkakakitaan ang mga mamamayan na wala ng binalikang trabaho dahil sa pagsasara ng kanilang mga kompanya o mga pinapasukang business establishments.

Sinabi pa ni Aragon, kapag naipatupad na ang emergency employment sa ilalim ng tupad program, agad na nilang masisimulan ang tinatawag na community-based emergency employment na magbibigay ng trabaho sa mga kababayan na nawalan ng mapagkakakitaan.

Aniya pa, sisimulan ang implementasyon ng programa sa mga rural areas hanggang sa mga urban places.

Sinasabing, ilan lamang sa mga maaring maitulong ng TUPAD program ay ang pagLikha ng mga trabahong may kaugnayan sa paglaban sa covid19, tulad aniya ng pagiging contact tracer, data encoDer Sakaling mayroon backlog sa mga pag-input ng mga COVID cases at ang occupational safety and health. (Daris Jose)