Inaprubahan ng Department of Labor and Employment ang aplikasyon ng aabot sa 400,000 manggagawa sa sektor ng turismo upang mabigyan ng tig-lilimang libong piso (P5,000) na tulong pinansyal mula sa COVID-19 Adjustment Measures Program (CAMP).

Hanggang Abril 11, umabot na sa 370,434 manggagawa mula sa 14,301 na establisimentong panturismo, organisasyon at asosasyon sa buong bansa, at 13,123 na nag aplay nang personal, ang benepisyaryo ng naturang programa ng DOLE.

Sa nasabing tulong, P1.2 bilyong piso rito ang naipadala sa pamamagitan ng mga payment center habang ang natitirang P719.2 milyon ay nakatakda nang ipamahagi.

Sa isang virtual ceremony nitong Lunes, pinangunahan nina Labor Secretary Silvestre Bello III at Tourism Secretary Bernadette Romulo-Puyat ang awarding ng tulong para sa mga napiling benepisyaryo mula sa National Capital Region, Bulacan, Cavite, Laguna, at Rizal.

Hinikayat ni Bello ang mga manggagawa sa sektor ng turismo na nawalan ng trabaho dahil sa pandemya lalo’t higit ang mga naapektuhan ng enhanced community quarantine (ECQ) sa Metro Manila, kabilang ang mga lalawigan  ng Bulacan, Cavite, Laguna, at Rizal na mag-aplay para sa tulong pinansyal na magkatuwang na ipinatutupad ng DOLE at DOT.

Samantala, sinabi ni DOLE Assistant Secretary Dominique Rubia-Tutay na sa unang linggo ng pagpapatupad ng ECQ ay nakapamahagi na ng tulong ang kagawaran sa 8,000 manggagawa sa sektor ng turismo, sa ilalim ng programang CAMP.

“Hindi tayo magsasawang tumulong sa kabila ng mga hadlang na dala ng pandemya. Sa mga susunod na buwan, kasabay ng pagbuhay sa ekonomiya, umaasa tayong manunumbalik sa dati nitong sigla ang sektor ng turismo sa bansa,” wika ni Bello, kasabay ng pagtitiyak nitong patuloy na tutulong ang DOLE at DOT sa mga manggagawa sa sektor ng turismo.

Kabilang sa mga benepisyaryo ay ang Philippine Association for Licensed Massage Therapists Inc., World Photo Journeys Travel and Tours, 1 Aviation Ground Handling Services Corporation, Hotel Kimberly Manila, Okada Manila Hotel, Great Sights Travel and Tours Corporation, Hop Inn Ermita, Link-World Travel and Tours, Canadian Travel and Tour Corporation, at PLDOZE Travel and Tours sa National Capital Region.

Sa Central Luzon, ang mga benepisyaryo ay nagmula sa Baliuag Buntal Handicrafts Manufacturing, Hilot Kamay One Guiguinteño, San Francisco TODA, Sta. Ana Bulakan TODA, Sto. Rosario Tibig TODA, Zesto Tricycle Operations and Drivers Association Inc., Triple Junction Subdivision TODA, Marilao Poblacion 2 Tricycle Operators and Drivers Association, at sa Gitda-08 Daungan TODA.

Habang ang mga benepisyaryo ng CAMP sa CALABARZON ay mula sa Bag of Beans Café and Restaurant, Inc.; Lantic Carmona Estates, Cedar, Manila Jockey TODA; Public Utility Jeepney Association of Carmona, Inc.; Maduya-PNCC-Golden Mile Tricycle Operators and Drivers Association Inc.; Carmona Public Market Calabuso TODA, Tour Guide and Recreation Association, Inc.; Samahang Nagkakaisa para sa Kaunlaran ng Myseoul Tiangge; Samahan ng Manininda, Mananahi at mga Tauhan sa Bagpi Taytay; Taytay’s Fashion Group; Antipolo Group Inc.; United Boatmen Association; Maria Makiling Frontliners Association Inc.; Costales Nature Farms, Inc.; Bukal Local Guide Association at Lumban Embroidery Association Multipurpose Cooperative.

Upang makapag-aplay para sa tulong, ang mga establisimyento, asosasyon, organisasyon, at indibidwal ay dapat na magsumite ng mga documentary requirement sa DOT Regional Office para sa inisyal na pagsusuri. Pagkatapos ng beripikasyon, bibigyang direktiba ng mga DOT Regional Office ang mga aplikante upang isumite ang kanilang aplikasyon at kaukulang dokumento online https://reports.dole.gov.ph/.

Inilabas ng Toll Regulatory Board (TRB), ang ahensiya sa ilalim ng Department of Transportation (DOTr), ang provisional toll rates para sa 18-kilometer na Skyway Stage 3 project sa ilalim ng San Miguel Corp. (SMC).

Kung deretso mula sa Buendia sa Makati hanggang South Luzon Expressway (SLEX), ang pinayagan provisional toll rate ay P264.

Habang mula naman sa Phase 1 – Buendia hanggang Sta. Mesa ay P105; Phase 2 – Ramon Magsaysay hanggang Balintawak ang toll rate ay P129.

Ayon kay TRB spokesman Julius Corpus ang nasabing pinayagang provisional toll rates ay maaari pa na magbago depende sa mga bagong pangyayari sa darating na mga susunod na araw.

Sinabi rin ni Corpus na hindi kaagad-agad na maipapatupad at masisimulan ang pagkokolekta ng mga nasabing toll rates hanggang hindi pa sila nabibigyan ng abiso mula sa TRB.

“It does not necessarily mean that they have been given the approval on the rates that they can automatically collect. These may be the initial provisional rates that they may be authorized to collect once they are given notice to start collection. Until then, they still cannot collect,” wika ni Corpus.

Ang nasabing pinayagan provisional rates ay mas mababa ng konti sa hiniling ng SMC na rates.

Saad din ni Corpus na marami pa na proseso ang pagdadaanan para sa approval ng rates. Gagawa pa ng resolution ang TRB kung saan ito ay kinakailangan na ilathala sa payagan ng general circulation ng isang beses kada linggo sa loob ng tatlong (3) magkakasunod na linggo. Kinakailangan din na magbigay sila ng surety bond.

Hiwalay pa rin ang mga requirements na kailangan gawin upang ang SMC ay mabigyan ng awtoridad upang makapag kolekta ng toll rates.

Samantala, wika ni SMC president Ramon Ang na lumalaki na ang kanilang pagkalugi dahil sa naaantalang toll collection na dapat sana ay sinimulan noong February pagkatapos na ang SMC ay magbigay ng libreng access sa loob ng isang buwan.

“Basically, TRB is insisting that Skyway 3 cannot start full operations and collect toll until all ramps are 100 percent complete. Our supplemental toll operation agreement states that we can start collecting at 95 percent completion – we are now 97 complete,” saad ni Ang.

Dagdag pa niya na kailangan nila ng sapat na pondo para sa daily maintenance ng kalsada at tamang long-term upkeep upang matiyak na ito ay ligtas at mahusay para sa mga motorista.

Dahil tumataas na ang pagkalugi gawa ng pagaantala ng TRB na simulan na ang toll collection, ang pinakamadaling paraan ay tuluyang ng gawin ang lahat ng ramps upang magkaron ng 100 percent completion subalit ito ay mangangahulugan na ang Skyway 3 ay kailangan munang saraduhan.

Tinatantiya na gagastos ng P10 billion kada taon ang SMC para lamang sa operasyon ng Skyway 3 subalit ang inaasahang makukuhang revenue ay P4 billion lamang kada taon na mas mababa base sa kanilang inihain na toll rates at existing na 60,000 na dami ng sasakyan kada araw.

Ang inihain na mungkahi ng SMC para sa Skyway toll rates noon pa man ay mula P110 hanggang P274. (LASACMAR)