MAITUTURING na malaking ambag para sa papasok na administrasyong Marcos ang maiiwang accomplishment ng Duterte administration sa usapin ng pagbabakuna.

Sinabi ni National Task Force Against COVID 19 Chief Implementer Carlito Galvez Jr kay Pangulong Rodrigo Roa Duterte sa Talk to the People ng huli, Lunes ng gabi, maikukunsiderang malaking kontribusyon na ang higit 70 milyong mga indibidwal na nakatanggap na ng bakuna.

Sinabi ni Galvez na “best scenario” na maituturing na bago matapos ang Duterte Administration ay may 75 million nang mayroong 1st dose ng bakuna at nasa 70,087,920 naman ang fully vaccinated.

“So ‘yung honest accomplishment po natin, evaluation is ang 4-week first dose average po natin, Mr. President, ay 321,083 dose per week. Meaning ‘yung ating first dose average ay humihigit lang po na more than 300,000. Iyong ating 4-week second dose average sa ating second dose naman ay 242,606 doses,” ayon kay Galvez.

“So ‘yung atin pong best-case scenario na bago po tayo matapos ang ating administrasyon, ang nakikita po namin ang pinaka-honest-to-goodness na aming assessment sa individuals with at least one dose, 75 million po tayo; and then ‘yung fully vaccinated po ay 70,087,920,” aniya pa rin.

Sinabi ni Galvez sa Pangulo na 70 million talaga ang orihinal na target subalit itinaas sa 90 million dahil na din sa nuoy tumaas na transmission ng variant.

Kaya di man aniya nangyari ang target na 90 milyon, sinabi ni Galvez na nakamit naman ang orihinal na target na 70 million.

“Noong tiningnan po namin, Mr. President, ‘yung ating original na talagang target, so sa ating National Vaccination Plan ay talagang ang ating target lang po ‘yung 70 million. Dahil noong nakita po natin na medyo tumataas po ‘yung ating transmission sa variant, tinaas po natin ng 90 million. Pero nakita po natin na talagang ‘yung 70 million po na nagawa po natin gusto nating pasalamatan ang National Vaccination Operations Center dahil kasi napakalaki na po nitong naiambag po natin sa susunod na administrasyon,” aniya pa rin. (Daris Jose)

PINAPAYAGAN na ng gobyerno ang lahat ng establisimyento sa mga lugar na nasa Alert Level 1 na mag-operate “at full capacity” subalit kailangan na may proof of vaccination na maipapakita.

Ito’y matapos na amyendahan ng Inter-Agency Task Force (IATF), araw ng Sabado, Hunyo 4, 2022, ang guidelines ukol sa Nationwide Implementation of Alert Level Systems for COVID-19.

Kinikilala kasi ng government pandemic task force ang pangangailangan na i-identify ang mga establisimyento at/ o mga aktibidad na pinapayagan na mag-operate, o isinasagawa sa Alert Level 1.

“Having said this, IATF allowed full 100% capacity under Alert Level 1, subject to presentation of proof of full vaccination before participating in mass gatherings or entry into indoor establishments,” ayon kay Presidential Communications Secretary at Acting Presidential Spokesperson Sec. Martin M. Andanar.

Samantala, ang public transportation sa mga lugar na nasa ilalim ng Alert Level 1 ay pinapayagan na rin sa “full seating capacity.” (Daris Jose)

SA KULUNGAN ang bagsak ng dalawang hinihinalang sangkot sa ilegal na droga, kabilang ang isang ginang matapos maaktuhan nag-aabutan ng shabu sa Valenzuela City, kamakalawa ng gabi.

Kinilala ni Valenzuela Police Sub-Station 6 commander PLt. Armando Delima ang mga nadakip bilang sina Angeline Timosan, 53, at Rolando Tesorero, 54, construction worker at kapwa ng I. Marcelo St. Brgy. Malanday.

Sa imbestigasyon ni PCpl Glenn De Chavez, habang nagsasagawa ng anti-criminality operation (Oplan Galugad) ang mga tauhan ng SS6 sa pangunguna ni PLt. Delima dakong alas-11 ng gabi nang maaktuhan ni PSMS Roberto Santillan si Timosan na may iniabot kay Tesorero na isang transparent plastic sachet ng hinihinalang shabu sa Alley corner I. Marcelo St., Brgy. Malanday.

Nilapitan ni PSMS Santillan at Pat. Ronnie Sandoval ang mga suspek saka inaresto kung saan narekober sa kanila ang isang transparent plastic sachet ng hinihinalang shabu na nasa P2, 040 ang halaga, isang folded aluminum foil na naglalaman ng hinihinalang shabu, P200 cash, coin purse at ID.

Nahaharap ang mga suspek sa kasong paglabag sa RA 9165 o ang Comprehensive Dangerous Drug Act of 2002. (Richard Mesa)