Metro Archive - People's Balita

July 28, 2024
Search in People's Balita
Ang Diyaryong Pinagkakatiwalaan

Archive for the ‘Metro’ Category

Mga aktibidad sa Chinese New Year, kanselado sa Maynila

Posted on: January 22nd, 2022 by @peoplesbalita No Comments

WALA na ring magaganap na anumang kasiyahan at aktibidad sa darating na Chinese New Year sa Maynila bilang bahagi pa ng pag-iingat na magkahawaan ng COVID-19.

Kabilang sa mga ipinagbawal ni Manila City Mayor Isko Moreno ang tradisyunal na mga parada, lion at dragon dance, pagsisindi ng mga paputok sa kalsada, street parties, stage shows, palaro, at iba pa.

Inatasan din ni Moreno si Manila Barangay Bureau (MBB) chief Romeo Bagay na mahigpit na ipatupad ang liquor ban sa Binondo upang maiwasan ang inuman sa mga bahay at kalsada.

Sinabi ni Moreno na kung hindi makakansela ang mga aktidibad, tiyak na magiging ‘superspreader’ ng virus ang mga ito lalo na at kalat na ang Omicron variant sa Metro Manila.

“The activities during the New Year celebration, if not cancelled, can be surely an easy medium of Covid-19 spread and transmission thereby endangering the health, well-being and safety not only of residents but also their visitors who will join them in the celebration,” pahayag ni Moreno. (Gene Adsuara)

3 dalaga nalambat sa P1.1 milyon shabu sa Navotas

Posted on: January 20th, 2022 by @peoplesbalita No Comments

UMABOT sa mahigit P1.1 milyon halaga ng shabu ang nasamsam ng mga awtoridad sa tatlong dalaga na umano’y sangkot sa illegal na droga matapos malambat sa buy bust operation sa Navotas City, kahapon ng madaling araw.

Kinilala ni Navotas police chief Col. Dexter Ollaging ang mga naarestong suspek na sina Kyla Marie Legaspi, 22, (Pusher/Not Listed), Kristal Shaine Legaspi, 19, (Pusher/Not Listed) at Marizza Adalla alyas “Mutya”, 29, (User/Not Listed), pawang residente ng lungsod.

Ayon kay Col. Ollaging, dakong alas-3:50 ng umaga nang magsagawa ang mga operatiba ng Station Drug Eforcement Unit (SDEU) sa pangunguna ni PLT Luis Rufo Jr, ng buy bust operation sa Leaño St., Brgy., Bangkulasi kung saan isang undercover police ang nagawang makipagtransaksyon sa mga suspek ng P6,000 halaga ng droga.

Matapos matanggap ang pre-arranged signal mula sa poseur-buyer na hudyat na nakabili na siya ng droga ay agad lumapit ang back-up na operatiba saka inaresto nila ang mga suspek.

Nakumpiska ng mga operatiba sa mga suspek ang tinatayang nasa 162 grams ng hinihinalang shabu na may corresponding standard drug price (SDP) P1,101,600.00, buy bust money na isang tunay na P1,000 bill at limang P1,000 boodle momey, P1,500 cash, body bag, 2 coin purse, weighing scale, cellphone at maliit na note book.

Kaugnay nito, pinuri ni Northern Police District (NPD) Director PBGEN Jose Santiago Hidalgo Jr, ang Navotas police sa matagumpay na drug operation na para maiwasan ang paglaganap ng iligal na droga at ang masamang epekto nito. (Richard Mesa)

12-anyos na dalagita 1 taon sex slave ng step father

Posted on: January 19th, 2022 by @peoplesbalita No Comments

NAGWAKAS na ang isang taon kalbaryo ng 12-anyos na dalagita sa kamay ng step father niya nang maglakas loob na itong isumbong sa kanyang ina ang ginagawang panghahalay sa kanya ng amain makaraang muli siyang gapangin sa Navotas City.

Lumabas sa pagsisiyasat ng Navotas Police Women and Children Protection Desk (WCPD) na nagsimula ang kalbaryo ng biktimang Grade 7 student na itinago sa pangalang “Vicky” sa kamay ng kanyang step-father na itinago sa lang sa alyas “Edgar”, 33-anyos noong Enero 1, 2021 na nangyayari sa loob mismo ng kanilang tirahan sa Brgy. Tangos South.

Mula noon, kapag may pagkakataon ay ginagapang umano ng suspek ang anak ng kanyang kinakasama nang walang pinipiling oras, na labis nagdulot ng takot sa dalagita lalo na’t pinagbabantaan siya ng amain sa tuwing isasagawa ang panghahalay.

Nito lamang araw ng Sabado, Enero 15, 2022, dakong alas-10 ng umaga habang nakaidlip sa loob ng kanyang silid ang biktima, bigla siyang naalimpungatan nang maramdaman ang panghihipo sa maseselang bahagi ng kanyang katawan.

Nagtangkang pumalag ang biktima subalit, muli siyang pinagbantaan ng amain na naging dahilan upang magtagumpay na muli ang suspek sa panghahalay sa kanya.

Matapos nito, naglakas loob na ang biktima na isumbong sa kanyang 30-anyos na ina ang dinaranas na kalbaryo sa kamay ng amain na nagresulta sa pagkakaaresto sa suspek na nahaharap ngayon sa kasong Rape in relation to R.A.7610 o Child Abuse Law. (Richard Mesa)

Manila Zoo gagamiting bakunahan sa mga bata, seniors

Posted on: January 18th, 2022 by @peoplesbalita No Comments

HABANG hindi pa ganap na binubuksan para sa publiko, gagamitin muna bilang ‘vaccination site’ para sa mga senior citizen at batang may edad 5-11 taong gulang sa pag-uumpisa ng bakunahan sa naturang age group sa unang linggo ng Pebrero.

Sinabi ni Manila City Mayor Isko Moreno na pinaka-ideal na lugar ang Manila Zoo na vaccination site dahil sa marami itong ‘open spaces’. Matapos na mabakunahan, maaaring mamasyal ang mga lolo at lola at kanilang apo sa zoo.

“So we thought, dahil sa nagre-request na mga tao sa Manila Zoo, at least magkaroon sila ng sneak peek. At marami naman na ang mapapasyalan dito – open air, maaliwalas. Double purpose pa, maipapasyal nila ang kanilang apo o ‘yung mga lolo at lola,” saad ni Moreno.

Samantala, maaari ring magpabakuna ang mga kabataang nasa edad 12-17 taong gulang sa Manila Zoo at makapamasyal na rin pagkatapos. Bubuksan ito ni Moreno sa mga residente at maging sa hindi residente ng Maynila.

Para matiyak na matutupad ang ‘physical distancing’ at iba pang ‘health protocols’, lilimitahan lamang sa 500 hanggang 1,000 indibidwal ang babakunahan sa Manila Zoo kada araw. (Gene Adsuara)

17-ANYOS NA DALAGITA NIREYP NG KAINUMAN

Posted on: January 18th, 2022 by @peoplesbalita No Comments

MAAGANG nasira ang kinabukasan ng 17-anyos na dalagitang estudyante matapos samantalahin ang pagkalasing nito at halayin ng 29-anyos na may-ari ng isang computer shop sa bahay ng suspek sa Navotas City.

Nadakip naman kaagad nina P/SSgt. Reyjie Gruta at P/Cpl Clifford Lumelay, nakatalaga sa Sub-Station 4 ng Navotas Police ang suspek na si Edmar Santilices sa kanyang tirahan sa 417 Medina St Brgy. NBBN makaraang magreklamo ang 62-anyos na lola ng Grade 12 na biktima na itinago sa pangalang “Alyana”.

Sa ulat na nakarating sa tanggapan ni Navotas police chief P/Col. Dexter Ollaging, nagpaunlak ang biktima sa imbitasyon ng suspek na itinuturing niyang ka-tropa noong Biyernes ng gabi, kasama ang iba pa niyang mga kabarkada.

Gayunman, nang makaubos ng tatlong bote ng alak, nakaramdam ng pagkahilo bunga ng kalasingan ang biktima kaya’t hinayaan muna siyang makapagpahinga sa isang silid ng bahay habang nagpatuloy sa pag-iinuman ang magbabarkada.

Dakong alas-6 ng umaga ng Sabado nang maramdaman na lamang ng biktima ang ginagawang panghahalay sa kanya ng suspek at kahit gusto niyang manlaban, wala siyang sapat na lakas na pigilan ang kapangahasan ng lalaki hanggang sa matagumpay na nailugso ng suspek ang pagkababae ng dalagita.

Matapos nito, isinumbong ng dalagita sa kanyang lola ang pangyayari na naging dahilan ng pagkakadakip sa suspek na ngayon ay nahaharap sa kasong panggagahasa na may kaugnayan sa paglabag sa R.A. 7610 o ang Special Protection against Chile Abuse, Exploitation and Discrimination. (Richard Mesa)

Caloocan City Jail naka-heightened alert dahil sa riot

Posted on: January 13th, 2022 by @peoplesbalita No Comments

SINIBAK na sa pwesto ang Jail Superintendent ng Caloocan City Jail, matapos ang madugong riot na ikinasawi ng anim na preso at 33 ang sugatan.

Ayon kay BJMP Spokesperson JSupt. Xavier Solda nag assume na ngayong araw bilang Officer-in-Charge ng pasilidad si Jail Superintendent Lloyd Gonzaga matapos alisin sa pwesto si Jail Superintendent Neil Subibi dahil sa command responsibility.

Nananatiling naka-heightened alert ang Caloocan City Jail matapos ang nangyaring riot kahapon na nagsimula lamang sa pikunan ng dalawang PDL hanggang lumaki na ito at naging away na sa pagitan ng dalawang malaking grupo.

Kinumpirma ni Solda na anim na PDL ang nasawi sa insidente habang 33 naman ang nasugatan.

Nakipag-ugnayan na ang pamunuan ng Caloocan City Jail sa pamilya ng mga nasawi.

Sinabi ni Solda, matapos naman ang dayalogo sa mga PDL, nagsagawa rin ng Greyhound Operations kagabi sa pasilidad upang linisin ang mga selda mula sa anumang kontrabando.

Aniya, mananatili muna ang karagdagang pwersa na inilatag sa pasilidad upang seguruhin ang kaayusan at katahimikan dito.

Pansamantala rin munang itinigil ang anumang aktibidad sa pasilidad habang isinasagawa ng BJMP ang malalimang imbestigasyon sa pangyayari.

Ipinag-utos na rin ni BJMP chief Jail Director Allan Iral sa pamunuan ng BJMP NCR ang pagpapabilis na maibalik ang normalidad sa loob ng Caloocan City Jail.

Sa kasalukuyan, tahimik at maayos na sa loob ng pasilidad.

Bagama’t ikinalulungkot ng BJMP ang mga pangyayaring gaya nito, tuloy pa rin ang trabaho ng BJMP para isulong ang mga programang makatutulong sa mga kapatid nating nasa piitan. (Richard Mesa)

Metro Manila mayors humirit na rin ng Alert Level 4

Posted on: January 12th, 2022 by @peoplesbalita No Comments

DAPAT paghandaan na ang posibilidad na maitaas sa Alert Level 4 ang Metro Manila sa susunod na mga araw, ayon sa Metropolitan Manila Development Authority (MMDA).

Sinabi kahapon ni Atty. Crisanto Saruca, head ng Metro Manila Council Secretariat, na posibleng maglabas ng resolusyon hinggil sa pagsasailalim sa Alert Level 4.

“….magkakaroon po ng desisyon diyan in the next coming days po,” ani Atty. Saruca sa tanong ng DzBB kung dapat asahan na ito sa susunod na linggo.

Tiniyak ni Atty. Saruca na patuloy pa rin na pinag-uusapan sa pagitan ng Metro mayors at Inter-Agency Task Force (IATF) ang usapin at ipinauubaya na rin ang pagdedesisyon.

Pinagbabatayan din sa tinatalakay na hindi naman malala ang mga kasong naitatala kahit napakataas ng mga kaso dahil mahigit 100 porsyento naman ang bakunado na sa Metro Manila.

Patuloy naman aniya ang pagsasagawa ng enhanced vaccination mandate at agresibo sa primary vacine at booster shots.

Natalakay din na may iba’t ibang vaccines na available, ang patuloy na nagiging epektibo laban sa COVID-19 variants maging sa Omicron na mas nakahahawa, kaya hindi nagiging malala ang infections at naiiwasan ang pagpapa-ospital.

May kanya-kanya na rin aniyang ordinansa ang local government units (LGUs) alinsunod sa inilabas nitong nakalipas na Enero 3 na MMDA Resolution No. 22-01 Series of 2022 “Urging the Metro Manila Local Government Units To Enact Their Respective Ordinances On The Enhanced Restrictions Of The Unvaccinated Individuals to Regulate Their Mobility In The National Capital Region.” (Daris Jose)

PDu30, nanawagan ng pagkakaisa, panalangin ngayong Pista ng Itim na Nazareno

Posted on: January 11th, 2022 by @peoplesbalita No Comments

UMAASA si Pangulong Rodrigo Roa Duterte ng pagkakaisa at patuloy na panalangin para sa paggaling ng sangkatauhan.

Ito ang bahagi ng mensahe ni Pangulong Duterte ngayong Pista ng Itim na Nazareno.

“Although we may not be able to take part in the usual Traslacion activities that have marked the celebration for centuries, let us keep on demonstrating our faith by praying for our country’s recovery and for humanity’s complete healing, especially from the ill effects of the COVID-19 pandemic,”ayon sa Pangulo.

“As a predominantly Catholic nation, may we remain united in spirit and in truth as we continue to build a future that is truly blessed with peace, prosperity, love and goodwill for all,” dagdag na pahayag into.

Ang Pista ng Itim na Nazareno ay ipinagdiriwang ngayong araw ng Linggo, Enero 9.

Subalit, dahil sa pagtaas ng kaso ng COVID-19 cases, ang taunang Traslacion, prusisyon ng imahe ng Black Nazarene mula Quirino Grandstand papuntang Quiapo Church, ay kanselado.

Nauna nang hinikayat ng Pangulo ang suspensyon ng mass gatherings kabilang na ang tradisyonal na Traslacion at misa para sa Black Nazarene, bunsod ng tumaas na COVID-19 infections sa bansa.

“This venerated religious tradition, which commemorates the transfer of the image of Jesus Christ from its original place in Intramuros to its current shrine in Quiapo, is also a precious time for every devotee to understand the value of suffering and its saving grace,” ayon sa Chief Executive. (Daris Jose)

KELOT TIKLO SA DRUG BUY BUST SA VALENZUELA

Posted on: January 10th, 2022 by @peoplesbalita No Comments

KULONG ang isang hinihinalang tulak ng illegal na droga matapos bentahan ng shabu ang isang pulis na nagpanggap na buyer sa buu bust operation sa Valenzuela City, kahapon ng umaga.

Kinilala ni PLT Joel Madregalejo, hepe ng Station Drug Enforcement Unit (SDEU) ng Valenzuela police ang naarestong suspek na si Edmond Carreon alyas “Monmon”, 23 ng 96 F. Bautista St., Brgy., Marulas.

Ayon kay PSSg Ana Liza Antonio, nakatanggap ang mga operatiba ng SDEU ng impormasyon mula sa kanilang regular confidential informant hinggil sa pagbebenta umano ng shabu si Carreon na naging dahilan upang ikasa ng mga ito ang buy bust operation kontra sa suspek sa F. Bautista Street dakong alas-6 ng umaga.

Nang tanggapin ng suspek ang marked money mula sa isang pulis na nagpanggap na poseur-buyer kapalit ng isang plastic sachet ng shabu ay agad siyang dinakma ng mga operatiba.

Nakuha sa suspek ang tinatayang nasa 5 grams ng hinihinalang shabu na may standard drug price P34,000, buy bust money na isang tunay na P500 bill at pitong pirasong P1,000 boodle money at cellphone.

Nahaharap ang suspek sa kasong paglabag sa RA 9165 o Comprehensive Dangerous Drug Act Of 2002. (Richard Mesa)

2 kulong sa baril at P500K shabu sa Malabon

Posted on: January 5th, 2022 by @peoplesbalita No Comments

SHOOT sa kulungan ang dalawang hinihinalang drug personalities, kabilang ang isang bebot matapos makuhanan ng baril at mahigit kalahating milyon halaga ng shabu sa isinagawang buy bust operation ng pulisya sa Malabon City.

Kinilala ni Malabon police chief Col. Albert Barot ang naarestong mga suspek na sina Pierce Joshua Nicholas Pascual alyas “Pasky” at Wendy Roble.

Ayon kay Col. Barot, dakong alas-6:10 ng umaga nang magsagawa ang mga operatiba ng Station Drug Enforcement Unit (SDEU) ng buy bust operation sa Pureza St., Brgy. Tugatog kung saan isang undercover police ang nagawang nakipagtransaksyon sa mga suspek ng droga.

Matapos tanggapin ng mga suspek ang marked money mula sa police poseur-buyer kapalit ng droga ay agad silang inaresto ng mga operatiba.

Nakumpiska ng mga operatiba sa mga suspek ang tinatayang nasa 75 grams ng hinihinalang shabu na may standard drug price P510,000.00, buy bust money at isang caliber .40 pistol na kargado ng magazine at may laman dalawang bala.

Nahaharap ang mga suspek sa kasong paglabag sa RA 9165 o Comprehensive Dangerous Drug Act of 2002 habang dagdag na kasong paglabag sa RA 10591 o Comprehensive Law on Firearms and Ammunation ang kakaharapin pa ni Pascual. (Richard Mesa)