INARARO ng isang SUV ang ilang mga sasakyan sa United Nations Avenue sa Maynila , Lunes ng umaga.

Sa imbestigasyon, isang tricycle driver at ilang motor rider ang nadamay sa insidente na kapwa isinailalim sa paunang lunas matapos magtamo ng mga sugat.

Sa impormasyon, naunang tumama ang puting SUV sa concrete barrier nang bigla na lamang umano itong umangat at nagdire-diretso sa kanto ng UN at Taft Avenue.

Limang motorsiklo ,isang tricycle at dalawang sasakyan ang nadamay sa insidente.

Itinanggi naman ng may-ari ng SUV na nakainom ang kanyang driver.

Ayon sa may-ari, kasasakay lamang niya sa SUV nang bigla na lamang itong “nag-wild” at humarurot.

Iniimbestigahan na ng pulisya ang driver ng SUV .

Samantala, umapela ang mga nadamay na motorista na sagutin o bayaran ang napinsala nilang sasakyan .

Nagpahayag naman ng kahandaan ang may-ari ng SUV na sagutin ang danyos. GENE ADSUARA

MAHIGIT 6K mga bata sa Caloocan, Malabon, Navotas at Valenzuela na may edad 5-12 ang nakatanggap ng Christmas gifts mula sa Office of the President “Balik Sigla, Bigay Saya,” Nationwide Gift-Giving Day na program ni Pangulong Ferdinand “Bongbong” Marcos Jr.

Sa Caloocan, 2,000 Batang Kankaloos ang nakatanggap ng mga trolley bag na naglalaman ng relo, tumbler, medyas, face at hand towels, at kapote na magagamit nila sa paaralan o sa kanilang pang-araw-araw na gawain.

Bukod sa mga regalo, ang mga bata kasama ang kanilang mga magulang, ay nabigyan din ng libreng serbisyo at aktibidad tulad ng oral health at nutrition consultations, gupit, face painting, libreng bitamina at oral health kits ng Caloocan LGU.

Nagpasalamat naman si Mayor Along Malapitan kay Pangulong Marcos sa patuloy nitong suporta sa mga residente ng Caloocan.

Umabot naman sa 1,500 batang Malabueño ang nakatanggap din ng kaparehong mga regalo sa Lungsod ng Malabon kung saan pinangunahan ni Mayor Jeannie Sandoval ang pamamahagi nito.

Pinasalamatan din ni Mayor Jeannie si PBBM sa pagdadala ng aktibidad sa Malabon at pagpapasaya sa mga bata.

“Ngayong nalalapit na Kapaskuhan, nais nating ipadama ang tunay na diwa nito, ang pagmamahalan at pagbibigayan. At ang programang ito, sa pangunguna ng ating kagalang-galang na Pangulong Ferdinand “Bongbong” Marcos Jr. ay isang paraan para maipadama ang mga ito sa mga kabataan,” pahayag niya.

Habang mahigit 1,000 kabataang Navoteños naman ang nakatanggap ng kapareho ding regalo mula kay Pangulong Marcos.

“Nagpapasalamat din po kami sa inyong mabilis at patuloy na pagtulong sa aming mamamayan. Sa Bagong Pilipinas, tunay na ramdam namin ang inyong lubos na pagmamahal”, ani Mayor John Rey Tiangco.

Sa Valenzuela, pinangunahan ni Mayoress Tiffany Gatchalian ang pamamahagi ng gift bag na mula kay PBBM sa 1,500 mga bata mula sa iba’t ibang Early Childhood Care and Development Centers sa lungsod at mga bata mula sa Bahay Kalinga.

Nagpasalamat naman si Mayor WES Gatchalian kay Pangulong Bongbong Marcos sa maagang Pamasko handog nito para sa mga batang Valenzuelanos.

Ang naturang programa ay inilunsad sa ikatlong sunod na taon, ng Office of the President, sa pamamagitan ng Social Secretary Office, sa pakikipagtulungan ng mga lokal na pamahalaan, Metropolitan Development Authority (MMDA), at ng Department of Socal Welfare and Development. (Richard Mesa)

TAHASANG sinabi ni Northern Police District (NPD) Director PCol. Josefino Ligan na sapat ang ikakalat nilang mga pulis sa CAMANAVA (Caloocan, Malabon, Navotas at Valenzuela) area kasabay ng pagdiriwang ng Kapaskuhan.

Ayon kay Ligan, bagama’t inaasahan ang kaliwa’t kanang mga selebrasyon, nakaantabay pa rin ang mga pulis sa lugar upang masiguro ang kaligtasan ng publiko. Naglabas na rin siya ng kautusan sa kanyang apat na chief of police para sa police visibility.

Kasabay ng isinagawang Christmas Lighting Ceremony sa NPD Headquarters nitong Biyernes, sinabi ni Ligan na ang Pasko ay mananatiling simbolo ng pag-asa, pagkakaisa at kasiyahan ng bawat Pilipino.

Ani Ligan, kaisa ng mga residente ng CAMANAVA ang mga pulis na 24/7 na magsasagawa ng pagpapatrol sa mga lansangan partikular sa mga matataong lugar.

Sa katunayan, nakikipag-ugnayan sila sa mga negosyante o may-ari ng mga establisimyento upang maiwasan ang anumang krimen ngayong Holiday Season. (Richard Mesa)

Sa kanyang ulat kay Northern Police District (NPD) Acting Director P/Col. Josefino Ligan, kinilala ni Valenzuela police chief P/Col. Nixon Cayaban ang naarestong suspek na si alyas “Buboy”, 56, taxi driver ng Obando, Bulacan.

Ayon kay Col. Cayaban, ikinasa ng mga tauhan ni P/Capt. Joan Dorado, hepe ng Station Drug Enfortcement Unit (SDEU) sa pangunguna ni P/Lt. Johnny Llave ang buy bust operation matapos magpositibo ang natanggap nilang impormasyon hinggil sa pagbebenta umano ng shabu ni alyas Buboy.

Nang matanggap ang pre-arrange signal mula sa kanyang kasama na nagpanggap na poseur-buyer na hudyat na nakabili na siya ng shabu sa kanilang target, agad lumapit ang back-up na operatiba saka inaresto nila ang suspek dakong alas-7:10 ng Miyerkules ng umaga sa Kabesang Imo St., Brgy. Balangkas.

Ani SDEU investigator PMSg Ana Liza Antonio, nakuha sa suspek ang humgi’t kumulang 60 grams ng hinihinalang shabu na nagkakahalaga ng P408,000.00, buy bust money na isang tunay na P500 bill at walong pirasong P1,000 boodle money, cellphone, P150 cash at coin purse.

Nauna rito, alas-4:20 ng Miyerkules ng madaling araw nang madakip naman ng mga operatiba ng DDEU-NPD sa pangunguna ni PSSg Ronilo Tilano sa buy bust operation sa loob ng kanyang bahay sa Balanti St., Brgy. Ugong si alyas “Bong”, 53.

Sa report niya kay Col. Ligan, sinabi ni DDEU chief P/Lt Col. Robert Sales na nakuha ng kanyang mga tauhan kay alyas Bong ang nasa 65 grams ng hinihinalang shabu na may standard drug price value na P442,000.00, P500 buy bust money, at cellphone.

Pinuri naman ni NPD Director Ligan ang Valenzuela police at DDEU sa kanilang matagumpay na drug operation na nagresulta sa pagkakadakip sa mga suspek na kapwa mahaharap sa kasong paglabag sa Section 5 (Sale of Dangerous Drugs) at Section 11 (Possession of Dangerous Drug) under Article II of RA 9165. (Richard Mesa)