NAG-ABISO ang National Commission on Muslim Filipinos sa mga Pilipinong may balak na sumabak sa Hajj pilgrimage sa Hulyo na ituloy ang paghahanda ng kanilang visa papers para rito.

Ito ay matapos na ianunsiyo ng pamahalaan ng Saudi Arabia na bawal sumabak ang mga dayuhan sa Umrah pilgrimage sa naturang bansa, bilang pag-iingat sa banta ng COVID-19.

“Ang suspended po na visa ay ‘yung Umrah pilgrimage. Yung Hajj pilgrimage hindi po. Tuloy-tuloy po yung Hajj pilgrimage, mayroon tayong lead time diyan mga 4 months from now kasi July 1 ‘yong first flight ng Hajj pilgrimage,” ayon kay Saidamen Pangarungan, pinuno ng NCMF.

Tiniyak din ni Pangarungan na nagbibigay pa rin sila ng work visa at resident visa sa mga nais pumasok ng Saudi Arabia.

Maaalalang sinuspinde ng Saudi Arabia ang entry visa para sa mga pilgrim sa Mecca ngayong taon, kasunod ng outbreak ng coronavirus disease 2019 sa Middle East.

Umaasa ang NCMF na maaayos ang sitwasyon pagsapit ng panahon ng Hajj sa Hulyo 30.

Milyon-milyong Muslim sa buong mundo ang sumasabak sa Hajj Pilgrimage, na parte ng kanilang “5 pillars.”
Noong 2019, mahigit 7,000 pilgrims ang nagpunta sa Saudi para sa Hajj, at inaasahang aabot pa ng 8,000 sa darating na Hulyo.

Ayon kay Pangarungan, hindi naman natigil ang Hajj nang magkaroon ng SARS at MERS-COV.

Sa halip ay nagkaroon ng mas mahigpit na protocol ang pamahalaan ng Saudi.

“Hindi ka puwedeng pumunta dun without accomplishing ‘yung 2 vaccine. It’s a mandatory requirement, kailangan kumuha ka ng meninggococemia vaccine at saka flu vaccine bago ka payagan na makapunta sa Saudi for the Hajj,” ani Pangarungan.

ARESTADO ang isang 18-anyos na murder suspect na tinaguriang Top 1 Most Wanted Person sa Navotas City nang bumalik sa kanyang tirahan makalipas ang dalawang buwan pagtatago sa Navotas Fish Port Complex (NFPC).

Ayon kay Navotas police chief P/Col Rolando Balasabas, alas-2:10 ng hapon nang isilbe ng mga elemento ng Warrant and Subpoena Section sa pangunguna ni P/EMSgt Alvin Bautista ang arrest warrant na inisyu ni Navotas Regional Trial Court (RTC) Judge Ronald Torrijos ng Branch 288 kontra kay Arnold Goma, 18, sa kanyang bahay sa BGA Compound, Navotas Fish Port Complex, Brgy. North Bay Boulevard North (NBBN).

Sinabi ni Col. Balasabas, ang naarestong suspek ay responsable sa pagpatay kay Rogel Illustrisimo noong December, 2019 sa pamamagitan ng pananaksak sa iba’t ibang parte ng katawan ng biktima.

Matapos ang insidente, mabilis na tumakas ang suspek na naging dahilan upang sampahan siya ng pulisya ng kasong murder matapos mabigong maaresto ng mga tauhan ng Follow-Up Unit.

Ayon pa kay Col. Balasabas, ang pinaigting na “Manhunt Charile” ay isinagawa matapos mag-isyu ang korte ng warrant of arrest kontra kay Goma na nagresulta sa pagkakaaresto sa kanya. (Richard Mesa)

PATAY ang mag-asawa matapos na malunod ang mga ito nang mahulog ang sinasakyan nilang kotse sa dagat, kahapon (Biyernes) ng madaling-araw sa Ozamiz City, Misamis Occidental.

Nakuha pang dalhin sa MHARS Hospital ang mag-asawang biktima na nakilalang sina Ferdinand, 48, at Teresita Jalasan, 47, residente ng Cotta Area, Barangay Triunfo ng nasabing lungsod subalit idineklara na rin silang dead on arrival ng sumuring doktor.

Ayon kay Police Brig. General Rolando Anduyan, Police Regional Office 10 Director, naganap ang insidente dakong alas-12:30 ng tanghali sa kahabaan ng Diversion Road sakop ng Barangay Triunfo ng lungsod na ito.

Napag-alaman na lulan ang mag-asawa ng kanilang kulay itim na Toyota Vios na may plakang YGP-805 na minamaneho ng lalaking biktima.

Galing umano sa paghahatid ng kanilang mga kaibigan sa simbahan ang mag-asawa mula sa isang kasiyahan at pauwi na sana ang mga ito sa kanilang bahay ng pagdating sa pakurbang bahagi ng kalsada ay hindi nakalkula ng drayber ang palikong kalsada dahilan upang magtuluy-tuloy na nahulog ang kotse sa dagat.

Dagdag ng pulisya na nakainom si Ferdinand na siyang nagmaneho ng sasakyan.

Umuulan at wala ring ilaw sa bahagi ng kalsada kaya posibleng hindi nito nakita ang daan.

Natagpuan na lang ng ilang concerned citizen ang mag-asawa sa loob ng kotse na walang malay kaya agad nila itong dinala sa nabanggit na ospital subalit patay na rin ang mga ito ng idating doon.

Base sa inisyal na pagsusuri ng doktor na tumingin ay pagkalunod ang sanhi ng pagkamatay ng mag-asawa.