Yan ang tanong ng marami sa Lawyers for Commuters Safety and Protection (LCSP). Ayon sa IATF, mukhang ito ang ipatutupad nila para payagan ang angkasan sa panahon ng GCQ. Maski sinasabi pa ng mga eksperto, mga mambabatas at ilang lokal na opisyal, na hindi na kailangan ang barrier sa pagitan ng dalawang magka-angkas sa motor at sapat na, na naka-helmet at may face mask and driver at ang naka angkas.

Ang problema ay huhulihin at pagmumultahin ang sinuman na hindi sumunod. Kaya kanya-kanyang diskarte ang mag-asawa na gustong magbyahe nan aka-motor. Ibat ibang “makeshift design” ng metal barrier o body shield ang nakikita natin sa social media – meron na hawak ng naka angkas ang barrier meron naman nakasuot sa driver o naka-install sa motor.

Tuloy mas nagiging delikado sa magka-angkas ang pagmomotor. At dahil paborito ng mga enforcers ang panghuhuli at paninita ng mga nakamotor ay diskresyon nila ngayon kung pasado sa kanilang panglasa ang makeshift barrier na diskarte ng isa’t isa – dahil pag hindi ay huli sila.

At ang violation – “no divider”. Isa pang nagiging problema sa naka angkas na mag-asawa o mag live-in ay kung anu-ano ang requirements na hinihingi para patunayan na mag-asawa asawa nga sila – gusto pa ng NSO copy ng marriage contract. Meron bibiruin pa raw na halikan mo nga yung ka-angkas mo? Pero ano ba ang polisiya talaga?

Simple lang magdala ng identification card ang magka angkas na nakatira sila sa iisang bahay. Matibay ang marriage contract pero hindi mandatory requirement ito dahil may mga mag-live in partners nga na ang ibig sabihin ay nagsasama ng hindi kasal kaya walang marriage contract.

Ang LGBT relationships naman basta magkasama sa isang bahay ay pwede rin at hindi pwedeng hingan ng marriage contract. Ang nakikita natin na problema dito ay kapag magka-angkas dalawang bagay ang kailangan patunayan – Una, na mag-asawa o nagsasama bilang magasawa ang magka-angkas o may barrier o body shield sa pagitan nila. Kaya’t asahan ng mga nagmomotor na magka-angkas na mas magiging paborito silang sisitahin ng mga enforcers ngayon.

Ang suggestion ng ilang eksperto kung ganun rin lang ay – bakit hindi na lang gawin simple ang polisiya na basta magka-angkas dapat may helmet at face mask pareho at may metal barrier o body shield.

Ano man ang relasyon ng magka angkas dahil ligtas at may compliance na sila sa health protocols. Sa private vehicles kahit sino ang magkasakay basta may distansya okay naman, ganun din sa mga public transport ganoon din.  Pero pagdating sa motor maraming arte, ang kumplikado! Dahil ba magkadikit sila? Sa kotse ba hindi maaring magdikit ang nakasakay? Sa public transport na iba-iba ang nakasakay at hindi magkakilala ay ano nga ba ang pagitan?

Sa ngayon ay sunod muna at kahit delikado sa pagbalanse sa motor, kanya-kanyang diskarte sa barrier o body shield. Mensahe at pakiusap lang sa mga enforcers – huwag naman mapaghanap ng kung anu-ano pa para masita, mahuli at mapagmulta ang ating mga riders. (Atty. Ariel Enrile-Inton)

PATULOY na pananagutin ng lokal na pamahalaan ng Maynila ang mga lokal na opisyal na hayagang lumalabag sa quarantine protocols sa gitna ng COVID-19 pandemic.

Sa katunayan, ayon kay Mayor Isko Moreno ay may barangay chairman na inakusahan na sangkot sa illegal cockfighting sa Tondo at may ilang barangay officials naman ang nahuli na nag-iinuman sa labas ng kanilang bahay.

“Ngayon po mayroon tayong bagong kinasuhan na chairman, nahuli po silang nagsasabong at nakakuha po tayo ng mga testigo na talagang naglaro sila ng sabong during the GCQ sa isang maliit na eskinita sa Tondo,” ayon kay Mayor Isko sa Palace press briefing.

Hindi naman nito pinangalanan ang nasabing barangay chairman.

“‘Yung isa naman ho, kanina may nakita akong video na nag-iinuman sa labas ng kalye, araw na araw, mga barangay officials. So tuloy-tuloy po ‘yung ating pagkastigo sa mga iresponsableng barangay officials while at the same time pinupuri naman natin ‘yung iba,” aniya pa rin.

Nauna rito, sinabi pa ni Mayor Isko na inatasan na niya si Manila Police District chief Police Brigadier General Rolando Miranda at ang local police commanders na palagiang i-monitor ang situwasyon sa 896 barangay sa Lungsod ng Maynila.

Matatandaang, noong nakaraang linggo ay may 34 magulang ng mga menor de edad na di umano’y lumabag sa quarantine measures ang inaresto ng kapulisan.

Napaulat din na may ilang residente ng Lungsod ang nakitang binalewala ang social distancing measures at ang tamang pagsusuot ng face masks sa mga pampublikong lugar sa gitna ng krisis sa kalusugan. (Bishop Jesus “Jemba” M. Basco)

Sinita ng Philippine National Police (PNP) ang mahigit sa 7,000 na motorcycle riders dahil sa hindi pagtupad sa regulasyon tungkol sa backriding na ipinatutupad ng IATF simula ng payagan ng pamahalaan ang ganitong klaseng transportasyon sa ilalim ng GCQ.

Marami sa mga backriding couples ay hindi sumusunod sa paglalagay ng barriers sa pagitan ng driver at sakay nito.

“Police around the country have flagged down more than 14,700 motorcycle riders as of Sunday and found that 7,091 or almost half of the total attempted to pass themselves off as married or live-in couples,” wika ni PNP deputy chief Guillermo Eleazar.

May 6,475 na mga violators ang hindi lamang nahuli dahil sa paglabag bilang mag-asawa kung hindi pati na rin dahil sa hindi paglalagay ng barriers.

“With 14,700 motorcycles flagged down, 14,156 riders or 96 percent did not put up barriers while carrying another passenger. This means that 600 riders have used barriers,” dagdag ni Eleazar.

Samantalang mayroon naman na 7,680 na riders ang napatunayan na sila ay magasawa subalit wala naman silang nakalagay na barriers.

Nalaman din ng PNP na halos lahat ng nahuli nila ay may sakay na hindi mag-asawa kundi mga kamag-anak, kapitbahay, at kaibigan lamang.

“For a long time motorcycle riders had repeatedly requested the government to allow at least their partners to backride with them due to limited public transportation. And now that the government finally granted their request, they openly and brazenly disregarded the rules that the government was asking from them in return to ensure their safety from the coronavirus infection,” saad ni Eleazar.

Ayon sa datos ng PNP, sa Central Visayas ang may pinakamataas na  nahuling violators kung saan may 1,755 na couples. Kasunod ay ang Bicol region na may 741 na accosted violators, Western Visayas ay may 737, at Central Luzon na may 675 na nahuling hindi tumutupad sa regulasyon.

Pinayagan ng pamahalaan ang mag-asawang sumakay na magkasama sa motorcycles simula noong July 10 subalit sila ay kinakailangang mapatunayan na talagang sila ay mag-asawa o di kaya ay live-in partners.  Kasama rin sa pinapayagan ay ang mga hanay ng lesbian, gay, bisexual at transgender community subalit kailangan nilang sila ay nagsasama sa isang bahay lamang.

Pinaalalahanan din ni Eleazar na magdala ang mga back-riders na mag-asawa at live-in couples ng kanilang mga identification cards at iba pang dokumento para mapatunayan na sila ay talagang lehitimong mag-asawa at live-in partners na magkasama sa isang bahay.

“Those who were accosted were either warned or cited for violation. Our personnel on the ground were instructed to make sure that those accosted would comply with the rules set by the NTF against COVID 19,” wika ni Eleazar.

Binigyan pa ng grace period ang pagsunod sa regulasyon dahil na rin sa gagawin pa na consultations sa mga stakeholders at mga figures na kanilang nakalap.

Kung kaya’t magsisimulang magbigay ng kaukulang penalty ang PNP sa mga violators simula sa July 27.  (LASACMAR)

IPAGPAPATULOY  ng Department of Health (DOH) sa tulong ng World Health Organization o WHO at United Nationsd Childrens Fund  (UNICEF) ang programa kontra polio upang labanan ang poliovirus outbreak  sa Pilipinas.

Isasagawa sa Mindanao ang susunod na yugto ng programa ng DOH ang  “Sabayang Patak Kontra Polio” campaign na magsisimula sa  ngayong July 20 hanggang  August 2,2020 para sa mga bata mula  edad 5 taong gulang pababa. Mabibigyan din ng polio drops ang mga batang 10 taong gulang pababa.

Samantala, ang bagong immunization campaign  para sa mga batang 5 taon pababa ay magsisimulka  ang yugto  sa Region 3  (Central Luzon)  ngayong araw habang sa Agosto naman sa probinsya ng Laguna, Cavite at Rizal sa Region 4A .

Sinabi ni Health Secretary Francisco  Duque III na ang patuloy  na pagpapatupad ng pagtugon sa polio sa gitna nang nararanasang krisis sa kalusugan  na kinakaharap sa ngayon ay importante upang maiwasan hindi lamang ang epekto nito kundi para mapigil ang pagkalat nito sa panahon ng pandemiya.

“Polio is a vaccine- preventable  disease and we cannot  let our  gains over the years go to waste  by deprioritizing  our polio response. It is  imperative for parents and caregivers to have their  children vaccinated, while strictly adhering  to infection prevention and control protocols ,as we cannot afford to overwhelme our health system  with another outbreak” ayon pa kay Duque.

Ang outbreak ng polio sa bansa ay inanunsyo noong Setyembre 19,2019  kung saan kauna-unahang nakumpirma ang kaso sa isang 3 taong gulang na batang babae mula sa Lanao del Sur. Kasunod nito, 15 pa nakumpirmang may polio mula sa edad na isang taong gulang pababa hanggang 9 taong gulang.

Ang nasabing mga kaso ay natukoy sa Bangsamoro Autonomous Region  of Muslim  Mindanao  o BARMM, Region 12 (Soccsksargen), Region 3 at Region 4A.

Ang polio vaccine ay pansamantalang natigil  dahil sa COVID-19 pandemic.