NAGSIMULA na ang clinical trial ng lagundi na maaaring maging gamot kontra coronavirus disease (COVID-19) ayon sa Department of Science and Technology (DOST).

‘Yung sa lagundi po, ito po ay nagsisimula na,” ani DOST Philippine Council for Health Research Development executive director Dr. Jaime Montoya.

“Nakapag-screen na sila ng mahigit 150 na pasyente. Out of which, mga 37 ang nag-qualify at nagsimula na po ang kanilang paglahok, dito po sa lagundi,” dagdag nito.

Aniya susundan ang pag-aaral ng virgin coconut oil (VCO) na ibibigay sa mga pasyente ng Philippine General Hospital (PGH).

Dagdag pa nito na ang pag- aaral sa tawa-tawa bilang posibleng gamot sa COVID-19 ay nasa Ethics Review Board pa rin na maaaring magsimula ang pag-aaral sa susunod na linggo.

SINABI ni Pangulong Rodrigo Roa Duterte na sa administrasyon babagsak ang nangyayaring gulo sa kasalukuyan ng mga kongresista na patuloy na nagbabayangan bunsod ng usapin tungkol sa kapangyarihan.

Ani Pangulong Duterte, hindi naman mga pangalang “ Alan o Lord” ang babanggitin ng mga tao kapag napag- usapan ang away sa Kongreso.

Ang maaalala aniya ng tao sa gulong nangyayari sa Kongreso ay naganap ito sa kanyang Administrasyon sa halip na ibato ang baho sa mga mambabatas na nag-aagawan ngayon sa kapangyarihan.

Sinabi ni Pangulong Duterte na ang gusto niya sana’y maging maganda ‘ang kanyang administrasyon at huwag makaladkad o madamay sa bangayan ng mga nagbabanggaang kongresista.

Kapag nangyari aniya ito sabi ng Pangulo ay doon na magkakaroon ng problema. (Daris Jose)

ITO ang sinabi ni Navotas City Mayor Toby Tiangco kasabay ng kanyang kahilingan sa City Council sa pamumuno ni Vice Mayor Clint Geronimo na gawing “urgent for consideration” ang ordinansang magbabawal sa videoke at malakas na pagpapatugtog hanggang sa kalagitnaan ng 2021 o habang may online classes.

Nakasaad sa liham ni Tiangco sa Konseho na may petsang Oktubre 5 na ipagbawal ang videoke o pag-iingay maliban kung araw ng Linggo dahil nabubulahaw umano ang mga mag-aaral.

Gayunman, maaari namang mag-videoke o magkasayahan kung araw ng Linggo subalit limitado pa rin ito mula lamang ala-1 ng hapon hanggang alas-10 ng gabi.

Dagdag pa ni Tiangco, kailangan na magkaroon ng malasakit at pang-unawa sa lahat partikular sa mga estud-yante at guro dahil sa pagbabago ng sistema ng pagtuturo.

Aniya malaking hamon ang adjustment sa learning at teaching system kaya kailangan ang suporta ng barangay at local government unit.

Samantala, tumalima na rin ang Pamahalaang Lungsod ng Maynila sa panawagan ng Philippine National Police (PNP) nang magpasa ng ordinansa na nagbabawal sa pagbi-videoke tuwing araw upang hindi makaistorbo ang ingay sa mga batang nasa ‘online class’ at mga nagwo-work-from-home na empleyado.

Nilagdaan ni Mayor Isko Moreno ang Ordinance No. 8688 na nagbabawal sa paggamit ng karaoke at videoke machines mula alas-7 ng umaga hanggang alas-5 ng hapon mula Lunes hanggang Sabado.

Sinabi ng alkalde na minabuti niyang agad na umaksyon makaraan na makatanggap na ng reklamo mula sa mga magulang ng mga batang naiistorbo ng ingay ng mga kapitbahay nang mag-umpisa na ang pasukan sa mga pampublikong paaralan nitong Lunes.

Ang mga lalabag dito ay papatawan ng multang P1,000 sa unang pag-labag, P2,000 sa ikalawa at P3,000 sa ikatlo at higit pang pagkakataon ng pagsalu-ngat sa ordinansa. (Richard Mesa)