Pinayuhan ni Marinduque Rep. Lord Allan Velasco ang consumers na hintayin ang bagong electricity bill ng Manila Electric Co. (Meralco) na base sa kanilang aktuwal na power consumption bago ito bayaran at isantabi ang nakalipas na billings na ibinase lamang sa estimates.

Ang pahayag ni Velasco ay kasunod na rin sa paniniguro ni Victor Genuino, first vice president at pinunong Customer Retail Services and Corporate Communications ng Meralco, sa isinagawang public hearing ng House Committee on Energy.

“In this meeting, we were able to get the assurance of Meralco that consumers can disregard their estimated billing which were questioned by many of its customers,” ani Velasco, chairman ng energy committee.

Inaasahan na makukumpleto ng Meralco sa Hunyo 8 ang aktuwal na meter readings at maipapadala sa customers ang panibagong billing na may tamang singgil.

Sa nasabing tamang billing, ilalagay ng Meralco ang nabasang metro ng nakonsumo ng consumers na hindi naman kailangang bayaran agad.

Siniguro din ng Meralco na walang magaganap na disconnection sa hindi nabayarang kuryente na nakonsumo sa panahon ng ECQ (enhanced community quarantine).

Inihayag naman ni Energy Regulatory Commission Chair Agnes Devanadera na dumalo sa pagdinig na nagbigay kasiguruhan din ang Meralco na mare-refund ng customers ang sobra nitong bayad o ibabawas sa susunod na billing.

Ikinatuwa naman ni Velasco ang ulat na magkakaroon ng mekanismo para matulungan ang consumers na mabayaran ang kanilang outstanding bills sa panahon ng ECQ sa pamamagitan ng equal monthly installments depende sa nakonsumo nitong kuryente.

Sinabi pa ni Devanadera sa komite na nagpalabas na ang ERC ng advisory na nagdedetalye sa amortization scheme para sa unbilled power consumption.

Sa ilalim ng bagong scheme, ang consumers na may buwanang consumption na 200kWh pababa para sa buwan ng Pebrero ay maaaring magbayad sa 6 na equal monthly installments habang yaong may konsumo na mataas sa 200kWh ay maaaring magbayad ng apat na monthly installments. Ang unang bayad o amortization for ay sa June 15, 2020.

“I think that we made significant headway in today’s meeting by clarifying the cause of the spike in electricity bills during the ECQ and getting the commitment of Meralco, PHILRECA and the ERC that they are on top of problem and will be taking the necessary steps to correct errors in billing and ultimately charging the households only for the actual electricity they consumed,” ani Velasco.

Binigyang-diin ng Department of Education (DepEd) na mangangailangan umano sila ng mas malaking pondo sa darating na taon kasabay sa ginagawang adjustment ng kagawaran bunsod ng mga pagbabagong hatid ng coronavirus crisis.

Paliwanag ni DepEd USec. Jesus Mateo, inaasahan na nilang lalaki ang bilang ng kanilang mga kawani dahil sa pinaghahandaang transition patungo sa “new normal”.

“Sana po matulungan kami at masuportahan sa paglaki ng budget. Kasi po unang-una, hindi lang PS (personnel services) ang lalaki, kailangan magkaroon ng additional manpower hindi lang sa usapin ng guro pati ‘yung susuporta sa guro [IT personnel] kasi mag-iiba talaga ang ating sitwasyon eh,” wika ni Mateo.

“Lalaki rin po ‘yung communication expenses, sa katunayan nga po ngayong enrollment na isinasagawa natin, ‘yung mga teacher po nagtatawag sa mga kanilang dating estudyante—regular phone, cellphone, o kaya nag-e-email. Siyempre may mga internet expenses po iyan,” dagdag nito.

Sinabi pa ng opisyal, dapat ding maging parte ng new normal ang pangangalaga sa mental health ng mga guro at mag-aaral.

“We have to ensure yung mental health condition ng ating mga tao po. Kaya nararapat po na kailangan pa rin mag-increase ng manpower diyan o humanap ng mechanism to ensure that stable po mentally, spiritually, physically tayong lahat,” ani Mateo.

Dapat din aniyang bigyang prayoridad ang internet connectivity at electrification program ng ibang sangay ng gobyerno para matiyak ang pantay-pantay sa access sa blended forms ng edukasyon.

Sa Agosto 24 na itinakdang araw ng pagbubukas ng School Year 2020-2021, sisimulan ng DepEd ang pagpapatupad sa “blended forms” ng pag-aaral sa mga pampubliko at pribadong paaralan sa bansa.