2020 December 19 Archive - People's Balita

December 23, 2024
Search in People's Balita
Ang Diyaryong Pinagkakatiwalaan

Archive for December 19th, 2020

Del Carmen tigasin sa WNBL Draft Combine

Posted on: December 19th, 2020 by @peoplesbalita No Comments

PINANGUNAHAN ng 82nd University Athletic Association of the Philippines (UAAP) 2019 Finals Most Valuable Player na si Monique Allison del Carmen ang 54 pang ikalawang grupo ng mga aspirante na nagladlad ng kanilang talento sa ikalawa’t pinaleng ng araw ng 1st Women’s National Basketball League (WNBL) Draft Combine 2020 nitong Linggo, Disyembre 13 sa Victoria Sports Tower sa Quezon City.

Kapansin-pansin din bukod kay Del Carmen ng six-peat University Athletic Association of the Philippines (UAAP) women’s basketball champion National University Lady Bulldogs, sina Gilas Women at dating University of the Philippines standout Fille Claudine Cainglet, na kapatid ng volleyball player na si Fille Saint Merced Cainglet-Cayetano, at iba pa.

Pribilehiyo ng mga point guard na ipakita ang kanilang husay maghapon sa pagdaan din sa kanilang liksi, bilis at lakas na kabilang sa basehan sa pagpili sa mga manlalaro na huhugutin naman sa unang draft din ng liga sa buwan ding ito.

Kabilang ang mga dumalo sa unang pangkat nitong Sabado, Dis. 12, nasa kabuuang 115 lady ballers ang bumahagi sa dalawang araw na okasyon para sa mga nangangarapna makapaglaro sa unang ligang propesyonal ng sport sa bansa sa papasok na taon. (REC)

Mass wedding, pinapayagan na ngayong pandemic – DILG

Posted on: December 19th, 2020 by @peoplesbalita No Comments

Kinumpirma ng Department of Interior and Local Government (DILG) na maaaring magsagawa ng mass wedding kahit nasa gitna pa ng pandemic ang bansa.

Kailangan lamang daw siguraduhin ng mga local government units (LGUs) na nasusunod pa rin ang mga health protocols na ipinapatupad ng gobyerno.

Sinabi ni DILG Undersecretary Jonathan Malaya na papayagan ang mass wedding basta 30 porsiyento lamang ng venue capacity ang bilang ng mga dadalo upang siguruhin na masusunod pa rin ang physical distancing.

Pagsusuotin naman ng face mask at face shield ang groom at bride.

Sa lungsod ng Makati ay may ikinasal na si Makati City Mayor Abby Binay na tinaguriang “mask wedding.”

Inilinsad noong Hulyo ang naturang programa upang patunayan na walang pandemya ang makakaharang sa pagpapakasal ng mga nagmamahalan.

Ayon sa alkalde, talagang pinag-isipan nila ang pagsasagawa ng outdoor wedding para ma-accomodate pa rin ang lahat ng mga humihiling na sila ay maikasal.

Halos 200 magsing-irog na ang ikinasal dahil sa naturang programa ng lungsod.

28 PWDs BINIYAYAAN NG HEARING AID SA VALENZUELA

Posted on: December 19th, 2020 by @peoplesbalita No Comments

PINAGKALOOBAN ng Public Employment Service Office (PESO) at Persons with Disability Affairs Office (PDAO) ng Valenzuela City ang 28 Persons with Disabilities (PWDs) ng hearing aid sa Valenzuela City Hall.

Sa pakikipagtulungan ng Humanity & Inclusion (HI), ang mga benepisyaryong hirap makarinig ay sumailalim muna sa serye ng ng pagsusuri sa Hear Sound Health Care Center, at matapos pumasa ay nabiyayaan ng pagkakataong matutong magsalita at makarinig gamit ang isang “assistive device.”

Ang makatanggap ng hearing aid na nagkakahalaga ng halos PhP 50,000 bawat isa ay hindi lamang malaking tulong pinansyal kundi isang biyaya ng pag-asang makarinig at magsalita.

Dahil sa mga nasabing hearing aid, mapag-aaralan ng mga benepisyaryo ang mga tunog sa kanilang kapaligiran at kinalaunan ay inaasahang makabubuo ng mga salita at pangungusap.

Napag-alamang ang pag-aaral magsalita ay madalas na mas madali sa mga taong nabingi nang kahit paano ay natuto nang magsalita ng bahagya.

Mayroon din namang mga nabingi dahil sa pinsala, pagkabantad sa malalakas na tunog o iba pang kondisyon sa kalusugan. Gayunpaman, para sa mga ipinanganak na hindi nakaririnig, mas mahirap na mag-aral pag-aralang magsalita at kinakailangan ng ibayong pagsasanay.

Karamihan sa mga benepisyaryo ay gagamit ng hearing aid sa unang pagkakataon kaya’t imo-monitor ng LEIPO at PDAO ang pag-unlad ng kanilang kakayahang makarinig at makapagsalita.

Maliban sa mga hearing aid, makatatanggap din ang mga benepisyaryo ng mga dehumidifier set at earmold. Sila rin ay isaiilalim sa libreng counseling ukol sa paggamit ng hearing aid. (Richard Mesa)

PDu30 kinampihan si Duque sa Pfizer vaccine deal

Posted on: December 19th, 2020 by @peoplesbalita No Comments

PINAGPAPALIWANAG ni Pangulong Rodrigo Roa Duterte si Health Secretary Francisco Duque III hinggil sa sinasabi ni Foreign Affairs Secretary Teodoro Locsin Jr. na “somebody who drop the ball” kaya hindi natuloy ang kasunduan ng Pilipinas sa Pfizer COVID-19 vaccine manufacturer na dapat sana ay Enero ng susunod na taon ay maidedeliver na ang bakuna.

Ayon kay Presidential Spokesperson Harry Roque, kinausap ni Pangulong Duterte si Duque para ipaliwanag ang akusasyon ni Secretary Locsin na dahil umano sa kapabayaan nasayang ang pagkakataon ng Pilipinas na makakuha ng 10 milyong doses ng anti-COVID-19 vaccine na gawa ng Pfizer ng Amerika sa unang buwan ng susunod na taon.

Aniya, tuloy pa rin naman ang negosasyon ng pamahalaang Pilipinas sa US government at inaasahang sa buwan ng Hunyo ng susunod na taon ay darating sa bansa ang bakuna na gawa ng Pfizer.

Sa naging pahayag ni Locsin naisara na ang kasunduan sa pagitan ng Pilipinas at Amerika sa pamamagitan ni US Secretary of State Mike Pompeo para sa bakuna ng Pfizer subalit nabigo umano si Duque na isumite ang requirement na Confidentiality Disclosure Agreement o CDA for procurement.

Base sa record September 24, 2020 ibinigay kay Secretary Duque ang CDC para pirmahan subalit nireview pa umano ng legal department ng DOH at napirmahan noong October 26 ng taong kasalukuyan.

Samantala, walang nakikitang kapabayaan o malaking pagkakamali ang Pangulo kay Health Secretary Duque III.

Ayon kay Presidential Spokesman Harry Roque na bagaman madamdaming nagpaliwanag si Duque sa Pangulo kamakalawa ng gabi, sa kabuuan ay wala namang nalikhang pinsala at danyos ang insidente dahil tuloy pa rin naman ang pakikipag-usap ng bansa sa Pfizer.

Sinasabing nabigo si Duque na agad isumite ang Confidentiality Closure Agreement kaya naunsyami ang negosasyon sa Pfizer.

Matatandaan na ibinunyag ni Sen. Panfilo Lacson na si Duque ang tinututukoy ni Locsin na dahilan kaya nabigo ang Pilipinas na makuha ang deal sa bakuna ng Pfizer.

Sina Locsin at Philippine Ambassador to the US Jose Romualdez ang umano’y gumawa ng paraan para makakuha ang Pilipinas ng bakuna ng Pfizer.

Subalit nabigo umano si Duque na isumite ang documentary requirements para makuha ang bakuna.

Paliwanag pa ni Lacson na nag-follow up pa ang country representative ng Pfizer sa mga kailangang dokumento subalit hindi ito naibigay ng DOH.

Dahilan dito kaya mas nauna umano ang Singapore na makakuha ng Pfizer vaccines kaysa sa Pilipinas. ( Daris Jose)

ANG SIKRETO NG BUMABALONG NA PERA, IBUBUNYAG!

Posted on: December 19th, 2020 by @peoplesbalita No Comments

Sino nga ba sa atin ang hindi may gusto na magkaroon ng unlimited cash?

Ngunit, ano nga ba ang susi para bumalong ang kuwarta sa iyo?

Magtrabaho ka at i-manage mong mabuti ang pera mo. Huwag waldas. Pero maliban rito, may ilang llife hacks akong ituturo kung paano hindi mawawalan ng laman ang wallet mo at lagi kang may pera.

Una, HUWAG NA HUWAG MONG SASABIHIN NA WALA KANG PERA! Natutuhan ko ito sa Tatay ko. Ang sabi niya, kahit literal na wala ka nang pera, huwag mong sasabihin na wala kang pera. Dapat ay laging positibo lamang ang iyong sagot. Halimbawa, may gusto kang bilhin pero hindi na sapat ang pera mo. Huwag mong sasabihin na “hindi ko na ito mabibili kasi wala na akong pera.”

Sa halip, sabihin mo, “babalikan kita.” Kung may nangungutang naman sa iyo, huwag mo ring sasabihin na, “wala akong pera, eh!” Ganito ang sabihin mo: “May pera ako, kaya lang ay sapat lang sa amin.” Matutong humindi sa maayos na paraan.

Hindi naman sa idini-deny mo ang katotohanan na wala kang pera, pero ito ay isang uri ng positive affirmation na ikaw ay hindi nawawalan ng pera; na laging ang pera ay bumabalong sa iyo. Maaaring na-delay lang, PERO MAY PERA KA! Dapat ay buo ang pananalig mo na ikaw ay matutustusan.

Huwag kang manlalata, manghihina, matutulala, mabubugnot, o iritable kapag wala kang pera. Huwag mong ipahahalata kaninuman na wala kang pera, maski sa iyong sarili! Magtiwala ka na hindi ka mawawalan. Kapag daw kasi sinasabi mo lagi na wala kang pera ay magtatampo nga sa iyo ang pera. Sabi ng tatay ko, maihahaintulad ko ito sa isang pangyayari sa Bible kung saan humingi si Kristo ng tubig na maiinom sa may-ari ng balon, ngunit ikinaila nito na may tubig ang balon. Kaya naman isinumpa siya ni Kristo na hindi na kailanman bubukalan ng tubig ang nasabing balon.

Pangalawa, HUWAG MASYADONG MAHIGPIT SA PERA. Iyong tipo na may pera ka na nga pero ayaw mo pa ring pawalan sa palad mo. Tipong hinayang na hinayang ka kapag may binili ka, kahit gusto mo naman iyong binili mo. Oo, dapat lang naman talaga na i-budget mabuti ang pera. Ngunit, anumang sobra ay masama. Para lang din itong tao. Kapag ang isang tao ay minahal mo ng sobra-sobra at ikaw ay naging obsess at possessive sa kanya, malamang ay masakal siya at iwan ka nito.

Ganoon din ang pera. Habang lalo mong hinahawakan ng mahigpit ang pera, lalo kang nawawalan. Sabi nga, pawalan mo ang isang bagay at tiyak na may papalit. Kapag ayaw mong pawalan ang pera, parang ina-affirm mo sa sarili mo na hindi ka na kasi magkakaroon pa ng pera kaya ayaw mong pawalan ang hawak mong pera. Nangyari na sa akin ito dati. Sobrang sinop ko sa pera. Basta masaya lang ako na nasa wallet ang pera ko. Kahit may gusto na akong bilhin, ayaw ko pa ring bilhin.

Pero ang napapansin ko, napupunta naman sa ibang gastusin ang pera ko tulad ng mga emergency na pagkakasakit. Iyong tipong gagastusin mo ang pinakamamahal mong pera sa bagay na hindi mo naman gusto. Iyong mapapaisip ka na sana, pinang-treat ko na lang sa sarili ko at binili ko na iyong gusto ko. Kaya mula noon ay hindi na ako naging masyadong mahigpit sa pera. Binibili ko na ang lahat ng gusto ko sapagkat ito ay nakapagpapasaya sa aking kalooban. At napapansin ko na bumabalik rin naman sa akin agad ang mga ginagastos kong pera. Magic talaga, pero totoo.

Pangatlo, HUWAG KANG MADAMOT SA PERA, LALO NA SA IYONG PAMILYA. Sabi nga, pagdamutan mo no ang lahat, huwag lang ang pamilya mo, lalong lalo na ang iyong mga magulang. Kung single ka at may kumikita ka, mag-share ka rin naman sa mga gastusin sa bahay kahit pa hindi ka ino-obliga.

Pasayahin mo ang iyong mga magulang. I-treat mo sila gamit ang pera mo. Pero, dapat ay maluwag ito sa loob mo. Hindi iyong nagbibigay ka nga ng pera pero kung ano-ano naman ang naririnig sa bibig mo. Bukod sa pamilya, try mo ring magbahagi ng iyong biyaya sa mga tunay na nangangailangan.

Mag-donate ka ng kahit maliit, basta’t ito ay taos sa iyong puso. Sa ganitong paraan ay mahahatak mo ang positibong enerhiya ng universe. What you sow is what you reap, ika nga. Anuman ang mabuti mong gawin ay tiyak na may boomerang sa iyo. Basta tatandaan lamang na kung tutulong ka, gawin ito ng taos sa puso at walang halong pag-iimbot. Asahan mo na anumang kabutihang ginawa mo ay babalik sa iyo—siksik, liglig at umaapaw pa! (Rey de Leon)

Martin and Pops, ‘nagkabalikan’ sa eXes & whYs

Posted on: December 19th, 2020 by @peoplesbalita No Comments

Proud parents sina Martin Nievera at Pops Fernandez sa anak nilang si Robin Nievera na direktor na nila ngayon sa kanilang bagong show sa Cignal TV para sa Colours.

Swak na swak pa ang title na eXes & whYs with Pops and Martin na magsisimula na sa Sabado, December 19 ng alas-nuwebe ng gabi.

Sa totoo lang, wala pang napanood si Robin na kahit isang episode ng programang Penthouse Live ng kanyang magulang, pero sabi niya mala-ganundin daw ang tipo ng show pero siyempre, ang laki na ng kaibahan ngayon sa panahon ng digital at social media.

Sabi naman ng musical director nilang si Louie Ocampo, parang behind the scenes daw ang mapapanood sa bagong programang ito. Halos wala na ngang script dahil sa sobrang komportable na ng dating mag-asawa sa isa’t isa.

Pero kahit kayang-kaya nang dalhin nina Martin at Pops ang buong show, ipinaubaya pa rin niya kay Robin ang lahat. Kaya nga ang anak daw nila ang boss sa buong show, na hindi naman matanggap ng kanilang anak.

“I think Robin hit the nail on the head because he knows both of us so well, that he allows us to be who we are and then bahala na siya sa editing…bahala na siya dun,” pahayag ni Martin.

Bukod sa eXes & whYs tuwing Sabado ng gabi, every Sunday naman ay kasama rin si Robin sa programa nila ni Louie Ocampo na pinamagatang Louie O Live.

Pareho silang musicians, magkakaiba lang ng tunog at atake bilang nasa huling heneras yon naman si Robin.

Pero sabi nga ni Robin, very organic lang daw ang show nila ni Louie na magbibigay daan din sa iba pang mga bago at nagsisimula ring mga musicians. “We’re both composers. We’re both musicians. It’s a very different levels of that industry but we wanted to take everyone in between us…the experience, the brand new, the up and coming.

“We all wanted to take the platform for them and show what musicians can really do with very little…you know what I mean,” saad pa ni Robin.

Mapapanood ang mga bagong programang ito sa Colours na available sa Cignal TV CH, 202 HD at CH 60 SD. Sa mga hindi pa subscriber ng Cignal, puwede kayong kumontak sa telepono 88885555, 09499977600 to 7603 o sa sales@cignaltv.

Mga atleta busy sa 1st quarter ng 2021

Posted on: December 19th, 2020 by @peoplesbalita No Comments

MAY 83 national athletes pala buhat sa 19 sports ang mga nangangarap pang makahabol sa paglahok sa 32nd Summer Olympic Games 2020 sa Tokyo, Japan na inurong lang ng Hulyo 2021 sanhi ng pandemyang Covid-19.

Ito ang napag-alaman ng OD kay Philippine Sports Commission (PSC) Chairman William “Butch” Ramirez sa programa ng ahensiya kung saan karamihan sa mga manlalaro ay magba-bubble training na sa Inspire Sports Academy sa Calamba City, habang ang ilan ay nasa abroad naman.

Idinagdag ng opisyal na balak ng PSC na ipadala sa iba’t ibang Olympic Qualifying Tournament (OQT) sa abroad simula sa papasok na buwan, sa Pebrero o sa Marso.

May 29 na atleta at coaches mula sa tatlong combat sports na taekwondo, boxing at karate ang nasa radar ng government sports agency ang mga unang isali sa mga paligsahan makaraan ang 90 na araw na Calamba bubble training camp sa Laguna.

Ang boxing na may 16 katao’y popondohan na ng P2M habang ang karate tutustusan ng P1.5M at taekwondo na mayroong lima, gagastusan ng P1M sa bubble training.

Kumakatawan ang mga halaga para sa room at lodging, meals, snacks, gym rentals at paggamit sa pasilidad ng National University ng Pamilyang Sy.

Ang iba pang mga manlalaro na pa-OQT ay sina karetakas Jamie Christine Lim at Joane Orbon, judoka Junna Tsukii, weightlifters Hidilyn Diaz, Kristel Macrohon at Vanessa Sarno, skateboarder Margielyn Didal at marami pang iba.

Sa kasalukuyan, apat pa lang Tokyo Olympics-bound nating mga kababayan. Sila ay sina pole vauler Ernest John Obiena na sa Italy, gymnast Carlos Edriel Yulo ng nasa Japan, nasa Estados Unidos na boxer Eumir Felix Marcial at bopksingerang nasa Iloilo na si Irish Magno.

Buhat po sa pitak na ito, good luck sa ating mga athlete. (REC)

PGH director nagbabala dahil posible ang ‘surge’ ng Covid-19 sa Enero

Posted on: December 19th, 2020 by @peoplesbalita No Comments

Umapela ang direktor ng Philippine General Hospital (UP-PGH) sa mga kapwa pagamutan na ngayon pa lang ay paghandaan na ang inaasahang pagdating ng mga pasyente pagkatapos ng Pasko at Bagong Taon.

“Hindi dapat magpabaya at maging overconfident,” ani Dr. Gerardo Legaspi sa isang media forum.

Pahayag ito ng opisyal kasunod ng anunsyo ng Department of Health (DOH) at mga eksperto na may tsansang “surge” pagbulusok sa mga kaso ng COVID-19 sa Enero kung hindi maipapatupad ng maayos ang health protocols ngayong holiday season.

Ayon kay Health Usec. Maria Rosario Vergeire, nasa 36% pa naman ang antas ng occupancy rate ng COVID-19 beds sa buong bansa. Katumbas daw nito ang kategoryang “low risk.”

Maging si National Capital Region, na itinuturing na epicenter, ay nasa mababang level pa rin daw ng occupancy ang mga pasilidad para sa coronavirus patients.

“But we are trying to prepare the system, because if and when this surge will happen, we need all hospitals be compliant to the mandate.”

Magugunitang naglabas ng kautusan ang DOH sa mga ospital na taasan ang porsyento ng alokasyong kama para sa mga pasyenteng may COVID-19.

Para sa private hospitals, dapat may 20% bed allocation sa infected patients; habang 30% ang mandato sa public hospitals.

Sa ngayon, tinatayang nasa higit 100 pa ang COVID-19 patients na naka-admit sa UP-PGH. Kumonti rin daw ang mga kritikal at severe na pasyente na nasa intensive care unit (ICU).

“Nung July and August, umaabot ng 220 to 230 a day ang naka-admit na COVID (patients): mga bata, buntis, adults,” ani Legaspi.

“Ang malaking kakaiba noon ay ang dami ng bilang ng nasa ICU. Halos 30% ng pasyente noon ay severe at critical. Maybe even 40% at a certain point.”

Mula sa 1,500 total beds ng naturang ospital, 200 ang nakalaan para sa COVID-19 patients. May nasa 100 kama rin daw ang nakahanda para sa inaasahang “surge” ng mga pasyente.

NON-COVID PATIENTS, POST-HOLIDAY WORKFORCE

Aminado si Dr. Legaspi na kumpara noong mga nakalipas na buwan, ay mas marami nang non-COVID patients ang naka-admit sa mga ospital.

Kaya umapela rin siya sa mga opisyal ng ibang pagamutan at One Hospital Command na paigtingin ang koordinasyon para masigurong pantay ang alokasyon ng mga pasilidad para sa mga pasyente ng coronavirus.

“Siguro mararamdaman ng maraming ospital na bumibigat ang load ng pasyente sa non-COVID at maaaring maka-limita sa kapasidad ng ospital na makapagbigay ng serbisyo (sa COVID-19 patients).”

“Sa pamumuno ni Usec. Bong Vega, ay maaari nating hingan ng tulong upang ma-coordinate ng maaga ang paglilipat ng COVID at non-COVID patients.”

Ayon sa DOH, karaniwan na ang hamon sa health system tuwing bagong taon. Inaasahan lang daw na mas mabigat ang sitwasyon ngayon dahil sa pandemya.

“It is in January that training hospitals are in the transition phase where the senior residents are replaced by new ones. Also the staff can be on an end-of-contract break, or the non-renewal of JOs (job orders),” ani Vergeire.

“There are usually more consults and admissions for non-communicable diseases during this time like hypertension and diabetes.”

Ayon kay Dr. Legaspi, nasa kamay ng publiko ang pag-iingat para hindi tuluyang sumirit ang COVID-19 cases ng bansa pagpasok ng Enero.

Kaya dapat maging displinado ang bawat isa habang nagdiriwang ng holiday.

“Ang laban ng COVID ay wala sa ospital. Ang karamihan ng tagumpay ay nasa komunidad.” ( Gene Adsuara)

Kamara umaasa na sasang-ayon si Pangulong Duterte sa panukala para sa Coconut Trust Fund

Posted on: December 19th, 2020 by @peoplesbalita No Comments

Umaasa ang kamara na malalagdaan ni Pangulong Duterte ang panukalang magtatatag sa Coconut Levy Trust Fund upang maging batas.

Ayon kay Quezon Rep. Wilfrido Mark Enverga, ang mga usapin sa unang panukala sa coconut levy na inayawan ni Pangulong Duterte noong nakalipas na taon, ay natugunan na sa ilalim ng bagong panukala, na inaprubahan sa ikatlo at huling pagbasa sa Kamara nitong linggo.

“Maingat naming binalangkas ang bagong bersyon ng panukalang ito, kaya’t naniniwala kami na natugunan na ang mga nakaraang usapin,” ani Enverga, na siyang namuno sa Komite ng Agrikultura at Pagkain sa Kamara, na nauna nang nag-endorso para sa pag-apruba ng House Bill 8136 o ang Coconut Farmers and Industry Trust Fund Act.

Idinagdag ni Enverga na “Tiniyak namin na may limitasyon ng 99 na taon. Pangalawa, hinggil sa malawak na kapangyarihang iginawad sa Philippine Coconut Authority (PCA), tinugunan natin ito sa pamamagitan ng malinaw na paglalarawan sa implementasyon ng kapangyarihan ng bagong tatag na Board ng PCA.”

“Binuo rin natin ang Trust Fund Management Committee, na kinabibilangan ng DBM (Department of Budget and Management) at DOJ (Department of Justice),” aniya.

Ipinahayag din ni Enverga ang kanyang pasasalamat kay Speaker Velasco nang gawin niyang prayoridad ang House Bill 8136 at tiniyak na maipapasa ng Kamara ang panukala bago magbakasyon para sa pagdiriwang ng Pasko.

Pinuri rin niya si Velasco sa paghahanap ng paraan para makipag-ugnayan sa ehekutibo para makarating sa lamesa ng Pangulo ang panukala para sa kanyang lagda.

Nauna nang pinuri ni Velasco ang mga kapwa mambabatas sa pagpasa ng panukala. Umaasa rin siya na maisasabatas ang panukala na tutulong upang mapaunlad ang kabuhayan ng mga magsasaka ng niyog at ng kanilang mga pamilya.

Inaasahang ang HB 8136 ay pakikinabangan ng may 3.5-milyong magsasaka ng niyog mula sa 68 lalawigan na napagkukunan ng produkto ng niyog, na nagmamay-ari ng hindi lalagpas sa limang ektarya ng sakahan. Layon ng panukala na palakihin ang kita ng mga magsasaka ng niyog, iahon sila sa kahirapan at isulong ang pantay na karapatan sa lipunan, at rehabilitasyon at modernisasyon ng industriya para sa kaunlaran ng mga sakahan.

Sa pamamagitan ng panukalang ito, sinabi ni Enverga na mapapasigla ng pamahalaan ang sektor ng sakahan ng niyog, upang lalo pa silang mahikayat na mamuhunan sa industriya.

“Nais nating makita sa hinaharap ang ating mga magsasaka ng niyog, na kumita ng mas malaki kumpara sa pagko-copra lang ang kanilang inaasahan,” giit ni Enverga.

“Maaari na silang mag-level up sa production. Yung value ng kanilang kinikita, mas tataas,” dagdag pa niya. (ARA ROMERO)

Mga panukalang batas, ipinasa ng Kamara

Posted on: December 19th, 2020 by @peoplesbalita No Comments

Inaprubahan ng Kamara ang iba’t ibang panukala sa ikalawang pagbasa bago nagdeklara ng pagsasara ng sesyon para sa pagdiriwang ng Pasko.

Isa na rito ay ang House Bill 8097 na naglalayong gawaran ng karagdagang benepisyo ang mga solo parents.

Ang mga kuwalipikadong solo parents ay maaaring makinabang ng karagdagang 10% diskwento, sa pagbili ng mga pangunahing pangangailangan ng bata o mga kabataan na nasa ilalim ng solong pangangalaga ng kuwalipikadong solo parent.

Aamyendahan ng panukala ang Republic Act 8972 o ang “Solo Parents Welfare Act of 2000” upang pasiglahin ang buhay at estado ng mga solo parents at kanilang mga anak.

Inaprubahan din ang HB 8145 na naglalayong palawigin ang implementasyon ng lifeline rate kung saan aamyendahan nito ang Seksyon 73 ng Republic Act 9136 o mas kilala bilang “Electric Power Industry Reform Act of 2001 o EPIRA Law. Ito ay upang gawing abot-kaya ang halaga ng kuryente para sa mga konsyumer na nabubuhay sa kahirapan.

Ang iba pang panukalang inaprubahan ay ang HB 8149 o ang “Bating Filipino Para sa Kalusugan Act,” na naglalayong baguhin ang sistema ng pagbati sa mas ligtas na pamamaraan para magpahayag at magpaabot ng pangungumusta, respeto, at papuri; HB 8216 o ang “Swimmers’ Protection and Safety Act,” HB 7950 o ang “People Empowerment Act,” na naglalayong bumuo ng sistema ng pakikipagsosyo sa pagitan ng lokal na pamahalaan at civil society organizations, sa pamamagitan ng People’s Council; at ang HB 8207 na naglalayong palitan ang mga kasalukuyang munisipalidad o grupo ng mga barangay tungo sa component cities. (ARA ROMERO)