Mga Transport groups at mga motorista naghahanda na ng pag-boykot sa PMVIC!!!

Magaling din tumayming ang LTO sa pagpapalabas ng isang kontrobersyal na memorandum ng List of Geographical Areas of Responsibility (GAOR)for authorized private motor vehicle inspection centers (PMVICs).

Inilabas ang memo nitong August 6, 2021, ang simula ng lockdown sa Metro Manila. Habang naghahanda ng pang ayuda sa mga tao ang karamihan ng ahensya ng pamahalaan, ang LTO naman ay pinaghandaan ang pag “buhay” ng PMVIC na dagdag gastos sa motorista. Pero dahil sa paglabas ng COA findings tungkol sa mga non-delivery of car plates ay natuon ulit ang atensyon sa LTO kaya sumabog muli ang usapin ng kontrobersyal na PMVIC.

Ika nga ni Sen. Ralph Recto ay “risen from the dead” ito dahil sinabi na nga ng Malacañang na hindi na mandatory ang inspection sa mga PMVIC at maraming mambabatas ang pinatitigil na ito.  Pero dahil mala zombie na binuhay ang PMVIC dapat na sigurong ibaon na sa hukay ito para hindi na muling buhayin pa.

Ayon sa LTO memo ay may kanya-kanyang geographical areas ang operasyon ng authorized PMVICs.

“The conduct of inspection of motor vehicles prior to registration by PMVICs shall be MANDATORY in their respective GAOR”. Ibig sabihin ay ipinagkaloob ng LTO sa chosen ones na PMVIC ang exclusive mandatory inspection ng mga sasakyan.

Ano ang resulta? Halimbawa sa Bulacan na iisa lang ang PMVIC na sa liblib pa ng isang bayan matatagpuan ay doon pupunta ang lahat ng sasakyan na magpaparehistro dahil MANDATORY na sa GAOR ng PMVIC dadaan. Di tulad ng dati na may mga emission testing centers na malalapit sa LTO offices. Aba ay dapat tingnan din ng ARTA ito dahil labag ito sa ease of doing business na ilalayo mo ng ilang kilometro ang magpaparehistro para sa inspeksyon.

Anong ligal na batayan kaya meron ang LTO para gawing mandatory ang GAOR ng mga PMVICs samantalang sinabi na nga na hindi mandatory ang inspection sa kanila. Sino kaya ang mga mayari ng mga PMVICs? Mga pulitiko, retired generals, mga mainpluensyang tao? Nasira ba ang ipinangakong return of investment sa kanila? Sino kaya nakaisip na ipasa sa pribadong sector ang pag-i-inspect ng mga sasakyan? Bakit noon ay humingi ang ilang opisyal ng P800 million pesos at may inilaan na nga para i upgrade ang MVIS ng LTO pero nagbago ng plano at prinivitize na lang ito? Anyare?

Sa ngayon ay marami na ang napipikon at umaalma sa pinalabas na GAOR ng LTO. Ang grupong 1-UTAP o Unified Transport Alliance of the Philippines ni Ariel Lim at mga kaalyado nito ay nais nang iboykot ang implementasyon ng GAOR.

Idagdag pa sa usapin ng PMVIC ang problema sa non-delivery ng mga car plates ay may sapat na dahilan ang mga motorista na suportahan ang balak na boykot! (Atty. Ariel Enrile-Inton)

LUNGSOD NG MALOLOS – Sa tagubilin ng National Inter-Agency Task Force (IATF), inanunsiyo ni Gob. Daniel R. Fernando kamakailan na mula ngayon, Agosto 16-31, muling isinailalim ang Lalawigan ng Bulacan sa modified enhanced community quarantine (MECQ) ayon sa Executive Order No. 30 series of 2021 na may localized lockdowns at curfew mula 8:00 ng gabi hanggang 5:00 ng umaga bunsod ng biglang pagtaas ng kaso ng COVID-19 sa probinsiya.

Sa kanyang mensahe kamakailan sa Cyberspace League 87.9 NYC-FM, may mga paghihigpit pa rin na kailangang sundin habang nasa ilalim ng MECQ at pinayuhan ang mga Bulakenyo na iwasan ang mga pagtitipon lalo na at mas mabilis makahawa ang Delta variant.

“Nandoroon pa rin ang mga restrictions na kailangan natin sundin lalo na at may banta pa ng Delta variant na mas madali at mabilis makahawa. Mas paigtingin natin ang pag-iingat; hangga’t maaari iwasan natin ang mga mass gathering,” ani Fernando.

Bukod dito, ang pinapayagan lamang sa interzonal travel sa loob ng NCR Plus areas kasama na ang Bulacan ay ang mga authorized persons outside of residence (APOR) kung saan limitado lamang ang paggalaw sa pag-access sa essential goods, sa mga trabaho sa mga pinahihintulutang establisimiyento at iba pang mga aktibidad na pinapayagan sa lugar.

Ang iba pang mga aktibidad gaya ng indoor dine-in ay pinahihintulutan na may 10% na kapasidad lamang; ang indibidwal na pag-eehersisyo ay pinapayagan sa loob lamang ng lugar ng kanilang tinitirhan; ang mga religious activities, burol, kasalan at binyagan ay pinahihintulutan lamang na may 10% na kapasidad ngunit maaaring itaas ng LGU hanggang 30% sa mga necrological service, wakes inumment, at burol para sa mga malalapit na pamilya.

Dagdag pa dito, ang pag-access at paggamit ng iba pang pampublikong pasilidad ay hindi pinahihintulutan habang nasa MECQ kabilang na ang mga indoor/outdoor tourist attractions; venues para sa mga meeting, conference, exhibition; specialized market ng DOT gaya ng staycation/DOT-accredited accommodation; horse racing na may off-track betting (OTB) station; indoor sports courts at venues; entertainment venues gaya ng bars, concert halls at sinehan; recreational venues gaya ng internet cafés, billiards at arcades; amusement parks, fairs, playgrounds at kiddie rides habang ang mga personal care services gaya ng mga salon, parlor, beauty clinic at iba pa ay pahihintulutan na may 30% na kapasidad lamang.

Inatasan din ni Fernando ang mga lokal na pamahalaan sa kung anong mga lugar sa kanilang nasasakupan ang kailangang isailalim sa lockdown upang makontrol ang pagkalat ng virus.

Sa datos kahapon ng alas 4:00 ng hapon, nakapagtala ang Bulacan ng 469 na fresh cases at 11 late cases na walang bagong naitalang pagkamatay at may 223 bilang ng mga gumaling.