2024 March 23 Archive - People's Balita

March 13, 2025
Search in People's Balita
Ang Diyaryong Pinagkakatiwalaan

Archive for March 23rd, 2024

2 sa 5 sugarol na natimbog sa Caloocan, buking sa boga at patalim

Posted on: March 23rd, 2024 by @peoplesbalita No Comments

NABISTO ang dalang baril at patalim ng dalawa sa limang kalalakihan matapos maaktuhan ng pulisya na naglalaro ng ilegal na sugal sa Caloocan City.

Tinangka pang tumakas nina alyas “Calatay” at “Tablante” nang matiyempuhan sila at tatlo pang kasama ng mga tauhan ni Caloocan police chief P/Col. Ruben Lacuesta habang nagsusugal ng ‘cara y cruz’ sa Manggahan St Miramonte Park, Soldiers Hills, Brgy. 180 dakong alas-12:30 ng hatinggabi.

Subalit, nang habulin at masukol ng pulisya ang dalawa, nakuha kay ‘Tablante’ ang isang improvised shotgun na may kargang isang 12 gauge na bala habang balisong naman ang nasamsam kay ‘Calatay’.

Ang tatlo nilang kasama ay hindi na nagtangkang tumakas matapos makuha sa kanila ang tatlong barya na ginagamit bilang toss coin o pangara at P560,00 na taya sa kanilang pagsusugal.

Ayon kay Col. Lacuesta, bukod sa kasong paglabag sa PD 1602 na isasampa sa limang nadakip, karagadagng paglabag sa R.A. 10591 o ang Comprehensive Law on Firearms and Ammunition at B.P 6 o illegal possession of deadly weapon ang ihahain nila laban kina ‘Tablante’ at ‘Calatay’ sa Caloocan City Prosecutor’s Office. (Richard Mesa)

Truck driver at helper, kinasuhan sa pagmamaniobra ng palitan ng manok

Posted on: March 23rd, 2024 by @peoplesbalita No Comments

SINAMPAHAN ng National Bureau of Investigation-Organized and Transnational Crime Division (NBI-OTCD) ang dalawang indibidwal na responsible sa pagpapalit ng mga buhay na mga manok na nagresulta sa pagkakalugi ng mahigit P200K ng isang poultry company.

Kasong Qualified Theft sa ilalim ng Article 308 in Relation to Article 310 of the Revised Penal Code ang isinampang kaso laban kina Ruel Torres Barredo at Wilfredo Cruz habang kina Ryan Santos at Reynante Dechosa, truck driver at helper sa truck na ginamit na decoy na pinaghahanap pa sa kasalukuyan ay nahaharap din sa kahalintulad na kaso.

Ang pagsasampa ng reklamo laban sa mga suspek ay bunsod sa reklamo ng Foster Foods Inc (FFI) , isang kumpanya ng poultry products at may iba’t-ibang farm at planta sa Luzon kung saan napansin nila ang pagkakaiba ng timbang ng mga buhay na manok mula sa kanilang farms at timbang ng buhay na manok na natatanggap nila sa kanilang mga planta

Modus operandi ng mga suspek ay pagpapalitin ang mga premium sized na manok na galing sa kumpanya sa mas mabababang timbang ng manok na kinukuha sa Hermosa, Bataan.

Inireport ng kumpanya sa NBI dahilan upang magsagawa ng entrapment operation.

Una ay, nagpadala ng escort ang Riverview Farm upang mag-monitor sa biyahe ng kanilang dalawang trucks na may laman na buhay na manok gayunman, hindi umano nila nasundan ang isa nilang truck.

Pero iniulat na nagsabay din ang dalawang truck sa tulay malapit sa Pulilan exit bago bumalik sa FFI.kaya humingi sila ng magsusupevise para sa unloading ng mga manok

Lumalabas na mayroong pakikialam sa truck GPS safety seal at padlock nito gayundin ang pakikialam sa GPS report.

Mayroon din pagbabago sa timbang ng mga buhay na manok. Lumalabas na sa mga ikinakarga sa truck ay tumitimbang ng 4,191.23 kilograms pero sa truck scale ticket ang timabang ng manok ay 3,460 kilograms kaya lumalabas na mayroon pagkakaiba na 731.23 kilograms o kabuuan na damage loss na P167,451.67

Nang kinompronta ang driver at helper na si Barredo at Vicente, inamin nila na ipinalit nila ang 520 na mga premium -sized na manok sa maliliit sa isang lugar sa Hermosa. Bataan kung saan tumanggap sila ng halagang P26,000 sa nasabing transaksiyon habang sina Marvin at Ian ang nag-tamper ng padlock. GENE ADSUARA

NURSING STUDENT UTAS SA SUNOG SA MALABON

Posted on: March 23rd, 2024 by @peoplesbalita No Comments

ISANG 20-anyos na babaing nursing student ang nasawi matapos umanong ma-trap sa nasusunog nilang tirahan sa Malabon City, Miyerkules ng umaga.

Natutulog umano ang biktimang si alyas “Nyanza”, working student ng Our Lady of Fatima University sa ikalawang palapag ng kanilang tirahan sa A. Bonifacio St., Brgy. Tugatog nang sumiklab ang sunog dakong alas-7:06 ng umaga.

Sa pahayag ng tiyuhin ng biktima na si Candido Manalang, may-ari ng bahay na pinagmulan ng apoy, nalaman na lang niya sa isa pa niyang batang pamangkin na nagliliyab ang nakabukas nilang bentilador matapos magtatakbong lumabas ng bahay ang bata.

May hinala naman ang Malabon Bureau of Fire Protection (BFP) na pagkakalanghap ng makapal na usok ang ikinasawi ng dalaga na mahimbing ang pagkakatulog nang sumiklab ang sunog.

Ayon kay Malabon BFP F/Insp. Michael Jacinto, nagawa nilang makontrol ang sunog na umabot ng ikalawang alarma dakong alas-7:57 hanggang tuluyang maapula ng alas-8:12 ng umaga.

Pitong bahay ang tinupok ng apoy at siyam na pamilya ang naapektuhan na pansamantalang nanunuluyan sa covered court ng Barangay Tugatog habang hindi pa batid ng Malabon BFP ang halaga ng ari-ariang natupok sa sunog. (Richard Mesa)

‘It’s Showtime’, mapapanood na sa GMA sa Apr. 6: Grupo nina VICE at ANNE, labis-labis ang pasasalamat sa Kapuso Network

Posted on: March 23rd, 2024 by @peoplesbalita No Comments

MALUGOD na inaanunsyo ng GMA Network at ABS-CBN Corp. ang kanilang makasaysayang kolaborasyon sa pagpapalabas ng noontime variety show na “It’s Showtime” sa GMA mula Lunes hanggang Sabado, 12 ng tanghali hanggang 2:30 ng hapon, simula 6 Abril 2024 (Sabado).

Dumalo ang mga opisyal ng GMA at ABS-CBN kasama ang mga sikat na host ng “It’s Showtime” sa contract signing ceremony na ginanap sa GMA Studios.

Pinangunahan ang event ng mga executive ng GMA Network na sina Chairman Atty. Felipe L. Gozon, President at CEO Gilberto R. Duavit, Jr., Executive Vice President at Chief

Financial Officer Felipe S. Yalong, at Senior Vice President for Programming, Talent Management, Worldwide, and Support Group at GMA Films President at CEO Atty. Annette Gozon-Valdes.

Ang mga kumatawan sa ABS-CBN ay sina Chairman Mark L. Lopez, President at CEO Carlo L. Katigbak, Chief Operating Officer Cory V. Vidanes, at Group Chief Financial Officer Rick B. Tan.

Kasama rin sa event ang mga host ng “It’s Showtime” na sina Vice Ganda, Anne Curtis, Vhong Navarro, Jhong Hilario, Kim Chiu, Ogie Alcasid, Karylle, Amy Perez, Teddy Corpuz, Jugs Jugueta, Darren, Ryan Bang, Ion Perez, Jackie Gonzaga, MC, Lassy, at Cianne Dominguez.

Ang unprecedented move na ito ay patunay sa layunin ng GMA at ABS-CBN na patuloy magbigay ng mga magagandang programa at maglingkod sa bawat Pilipino.

Malugod na pagtanggap ang ipinaabot ng GMA Network sa “It’s Showtime” at itinuturing ito bilang welcome addition sa patuloy na dumaraming programa nito para sa Kapuso viewers sa loob at labas ng bansa.

Taos-pusong nagpapasalamat ang ABS-CBN at “It’s Showtime” sa GMA Network sa pagbubukas nito ng pinto at pagbibigay ng bagong plataporma para makapaghatid ng entertainment at saya sa mas maraming manonood sa buong bansa.

“Nagpapasalamat kami sa aming loyal viewers sa patuloy na suporta sa halos 15 taon at umaasa kaming makasama ang mga bagong manonood sa paggawa ng FUNanghalian moments sa GMA, GTV, GMA Pinoy TV, at sa iba pang platform kung saan kasalukuyang napapanood ang “It’s Showtime.”

Maraming salamat, mga Kapamilya, mga Kapuso, at Madlang People.

(ROHN ROMULO)

2 kelot kulong sa sugal, mga bala at shabu sa Valenzuela

Posted on: March 23rd, 2024 by @peoplesbalita No Comments

SWAK sa selda ang dalawang lalaki matapos makuhanan ng shabu makaraang maaresto sa sugal at paglalaro ng bala sa Valenzuela City.

Sa report ni PSSg Carlito Nerit Jr. kay Valenzuela police chief P/Col. Salvador Destura Jr., nakatanggap ng impormasyon mula sa concerned citizen ang mga tauhan ni Malinta Police Sub-Station 4 Commander P/Capt. Doddie Aguirre hinggil sa nagaganap na illegal gambling activity sa L. Angeles St., Brgy. Malinta.

Kaagad pinuntahan ng mga pulis ang nasabing lugar at naaktuhan nila ang dalawang lalaki na nagsusugal ng ‘cara y cruz’ na nagresulta sa pagkakaaresto kay alyas ‘Richard’, 36, dakong ala-1:10 ng madaling araw habang nakatakbo naman ang kalaro nito na si alyas ‘Japper’.

Nakuha kay ‘Richard’ ang dalawang transparent plastic sachets ng hinihinalang shabu na nagkakahalaga ng P2,720, P320 bet money at tatlong peso coins na gamit bilang ‘Pangara’.

Nauna rito, nadakip din ng mga tauhan ni Capt. Aguirre sa pangunguna ni PSMS Roberto Santillan, kasama ang mga tanod ng Brgy. Malinta sa pamumuno ni EX-O Mark Guerrero sa isinagawang ‘Oplan Galugad’ sa Dulong Tangke Street, dakong alas-8:00 ng gabi si alyas ‘Michael’, 44 ng Tondo, Manila matapos maaktuhan pinaglalaruan ang mga bala ng baril.

Nakumpiska sa kanya ang naturang mga bala at isang plastic sachet ng hinihinalang shabu na may katumbas na halagang P240.00.

Mahaharap ang mga suspek sa mga kasong paglabag sa PD 1602 (Anti-Illegal Gambling Law/Cara y Cruz), RA 10591 (Comprehensive Firearms and Ammunition Regulation Act) at R.A. 9165 (Comprehensive Dangerous Drug Act of 2002. (Richard Mesa)

PBBM, sinertipikahan bilang urgent ang Senate bill na mag-aamiyenda sa gov’t procurement law

Posted on: March 23rd, 2024 by @peoplesbalita No Comments

SINERTIPIKAHAN ni Pangulong Ferdinand Marcos Jr. bilang urgent ang Senate bill na mag-aamiyenda sa Republic Act 9184 o Government Procurement Reform Act (GPRA) .

Sa isang liham na may lagda ni Secretary Lucas Bersamin na may petsang Marso 19 para kay Senate President Juan Miguel Zubiri, binigyang-diin ni Pangulong Marcos ang agarang pangangailangan na aprubahan ang Senate Bill 2593 na naglalayong “to address the tedious and prolonged procedure in the public procurement efficacy.”

Winika pa ng Pangulo na ang SB 2593 ay “remedy the public emergency caused by the gaps in public spending, which hamper the ability of the government to deliver substantial services to the people.”

Sa kanilang dako, binigyan naman ng kopya ng nasabing liham si Speaker Martin Romualdez at Presidential Legislative Liaison Office chief Secretary Mark Llandro Mendoza.

Sa ngayon, naghihintay ang SB 2593 ng Senate approval sa ikalawang pagbasa.

Sa ulat, tIWALA naman si Senator Sonny Angara na ang kanyang isinusulong na pag-amiyenda sa umiiral na Government Procurement Reform Act o GPRA ay magbubunga ng positibong pagbabago sa pagpapatupad ng mga proyekto at purchase of goods and services and supplies at iba pang aktibidad ng gobyerno na nalulusutan ng matinding korapsyon.

“While it was able to institute key reforms in the government procurement process, over time individuals with evil intent have managed to find loopholes to exploit, costing the public billions that could have been spent on more productive endeavors,” ayon kay Angara.

“We have seen agencies whose procurement of basic supplies takes an inordinate amount of time to complete. There is a lack of true competition among bidders, and oftentimes agencies are unable to undertake the procurement of goods due to poor planning or [because they] are tied up by the procedures under the law,” dagdag na wika ng senador.

Ang GPRA na priority measure din ng Legislative-Executive Development Advisory Council o LEDAC ay inaasahang hindi lamang makatutulong na mas mapabillis ang government procurement process, kundi gawing mas mapahusay din ito.

At dahil batid ng kasalukuyang administrasyon ang naglalakihang problema sa public procurement, maging si Pangulong Marcos ay nagpahayag na importanteng amiyendahan na ang GPRA.

Sa kanya ngang State of the Nation Address (SONA) nang nakaraang taon, binigyang-diin ng Pangulo na kinakailangan nang baguhiin ang public procurement upang maibagay na ang implementasyon nito sa kasalukyang panahon para gawing mas epektibo ang serbisyo ng gobyerno.

Kabilang sa mga isinusulong na reporma sa GPRA ay ang pag-aatas sa mga ahensya ng pamahalaan na magkaroon ng maayos na planning at maagang pagpapatupad ng procurement activities.

Isang probisyon na nilalaman ng Most Economically Advantageous Responsive Bid (MEARB) ang tutugon sa mga usapin hinggil sa award criterion na nakalahad sa RA 9184. Lumalabas kasi na dahil napupunta ang award sa lowest bidder, nabibili ng gobyerno ang mga kagamitang mahihina ang kalidad o subpar. Sa pamamagitan ng MEARB, titiyaking hindi lamang makatitipid ang pamahalaan, kundi sisiguruhin ding dekalidad ang mga mabibili nito.

Aatasan sa ilalim ng batas na ito ang Department of Budget and Management na lumikha ng procurement positions sa iba’t ibang ahensya ng gobyerno, para masiguro na mahuhusay at propesyonal ang mga itatalagang procurement practitioners ng pamahalaan.

“Isinama natin ito para mismong gobyerno ang manguna sa pagsuporta sa mga industriyang Tatak Pinoy upang mas mabilis na maging globally competitive ang mga ito,” ayon kay Angara na principal author at sponsor ng R.A. 11981 o ang Tatak Pinoy Act.

“Tiwala tayo na sa pagsasabatas ng reporma sa GPRA, hindi lamang bibilis ang procurement ng gobyerno, kundi magiging mas epektibo din ito. At sa ganitong paraan, iigting ang kapasidad ng gobyerno para tugunan ang pangangailangan ng sambayanang Pilipino. At kapag lalong gumanda at bumilis ang pag-responde, mas lalalim ang tiwala at magiging panatag ang kalooban ng sambayanan sa ating gobyerno,” saad pa ni Angara. (Daris Jose)

Gaganap na kontrabida sa ‘Pulang Araw’: DENNIS, excited na sa matitinding eksena nila ni ALDEN

Posted on: March 23rd, 2024 by @peoplesbalita No Comments

MARAMI na ang excited at nag-aabang sa pagsasama sa unang pagkakataon sa isang project nina Dennis Trillo at Alden Richards.

In-announce na kabilang si Dennis sa cast ng ‘Pulang Araw’ na upcoming historical drama series ng GMA.

Dito ay gaganap si Dennis bilang kontrabida, isang malupit na sundalong hapon na magpapahirap sa karakter ng mga bida kabilang si Alden.

Lahad ni Dennis, “Excited akong magkaroon kami ng eksena ni Alden, siyempre, siya yung hindi ko pa talaga nakaka-eksena sa mga ganitong drama, ganun.

“Nakatrabaho ko siya sa mga variety shows, pero, ayun excited ako doon, paghahandaan ko ang eksena na ‘yon.”

Happy at excited din si Dennis na makatrabahong muli sa ‘Pulang Araw’ ang kanyang co-stars noon sa ‘Maria Clara at Ibarra’ na sina Barbie Forteza at David Licauco, at si Sanya Lopez na leading lady naman niya sa ‘Cain At Abel.’

“Siyempre excited akong ma-reunite kay David at Barbie, kay Sanya, nakatrabaho ko na rin dati,” wika pa ni Dennis.

Sinabi pa ni Dennis na matagal na niyang hinihintay ang mabigyan ng ganitong klaseng karakter sa isang malaking proyekto.

“Matagal ko na rin hinihintay itong ganitong klaseng project, ganitong kabigat na character ngayon naman as a kontrabida.

“May konting pressure pero mas doon ako sa importansya sa pagkakaroon ko ng challenge bilang artista. Sa rami [na] ng nagawa ko, kailangan ko ng isang mabigat na role na mag-iisip ako at pag-iisipan ko bawat kilos, bawat galaw, bawat dialogue, excited ako sa ganun.”

(ROMMEL L. GONZALES)

Truck driver tinarakan ng nakaalitang e-trike driver sa Malabon

Posted on: March 23rd, 2024 by @peoplesbalita No Comments

MALUBHANG nasugatan ang 33-anyos na truck driver matapos saksakin ng nakaalitang e-trike driver sa kalsada sa Malabon City, kamakalawa ng gabi.

Inoobserbahan sa Caloocan City Medical Center sanhi ng tinamong saksak sa kanang braso at ibabang bahagi ng kanang dibdib ang biktimang si alyas “Jojo’, 33 ng Parola Compound, Area B Gate 13, Tondo Manila.

Pinaghahanap naman ng mga tauhan ng Malabon Police Sub-Station 2 ang suspek na si alyas “Maui”, 31 ng Concepcion St., Brgy. Tugatog.

Sa imbestigasyon nina PSSg Bengie Nalogoc at PSSg Michael Oben, dakong alas-9:50 ng gabi, minamaneho ng biktima ang isang Fuso Truck sa kahabaan ng M.H. Del Pilar St., Brgy. Tugatog nang businahan niya ang suspek na nagmamaneho ng E-trike at binabagtas din ang nasabing lugar para maiwasan ang posibleng banggaan.

Nagalit ang suspek at nauwi ang mga ito sa komprontasyon kung kaya bumaba ang biktima sa kanyang saksakyan subalit, nang pabalik na siya sa truck ay bumunot ng patalim si ‘Maui’saka sinaksak si ‘Jojo’ sa braso at dibdib.

Matapos ang insidente, mabilis na tumakas ang suspek patungo sa hindi matukoy na direksyon habang isinugod naman ang biktima sa nasabing pagamutan ng nagmalasakit na E-trike driver. (Richard Mesa)

Kaso ng pertussis, tigdas lumobo – DOH

Posted on: March 23rd, 2024 by @peoplesbalita No Comments

HINIKAYAT ng Department of Health (DOH) ang publiko na magpabakuna matapos ang biglang pagtaas ng bilang ng mga naitatalang kaso ng pertussis o ubong dalahit at measles o tigdas sa bansa.

Sa datos ng DOH, sa unang 10-linggo ng nakalipas na mga taon ay mababa lamang ang naitatalang mga kaso ng pertussis.

Nasa 52 noong 2019 at 27 noong 2020.

Sa kasagsagan ng COVID-19 pandemic noong 2021, pitong kaso lang habang dalawa noong 2022.

Sa unang taon matapos alisin ang pandemic restrictions nitong 2023, nakapagtala ng 23 pertussis cases, sa kaparehong panahon.

Gayunman, sa unang 10-linggo ng 2024 ay biglang tumaas ang kaso sa 453.

Samantala, hanggang noong Pebrero 24, 2024 naman, nakapagtala ang DOH ng kabuuang 569 measles at rubella cases sa bansa.

Ayon sa DOH, ang disruptions sa routine immunization at primary care noong panahon ng pandemya ang nakikita nilang pangunahing dahilan nito.

Ang Pertussis, na kilala rin sa tawag na whooping cough ay isang highly contagious bacterial respiratory infection na nagdudulot ng influenza-like symptoms ng mild fever, sipon at ubo na tumatagal ng pito hanggang 10-araw matapos ang exposure.

Ang Pertussis ay maaaring gamutin ng antibiotics ngunit pinakamahusay pa rin ang bakuna upang ito’y maiwasan.

Samantala, ang Measles naman o tigdas, ay highly contagious din at madaling maihawa ng mga infected individuals sa pamamagitan ng hangin, partikular na sa pag-ubo at pagbahing.

Kabilang sa mga sintomas nito ay mataas na lagnat, ubo, runny nose, at body rash.

Wala umanong ispesipikong lunas sa virus na nagdudulot ng measles ngunit ang bakuna ang pinakamabisang proteksiyon dito. (Daris Jose)