2020 March 02 Archive - People's Balita

July 3, 2024
Search in People's Balita
Ang Diyaryong Pinagkakatiwalaan

Archive for March 2nd, 2020

Motor banca na may sakay na 13 pasahero, tumaob sa Boracay

Posted on: March 2nd, 2020 by @peoplesbalita No Comments

TUMAOB ang isang motor banca sa bisinidad ng Puka Beach sa Barangay Yapak, Boracay Island noong Biyernes, Pebrero 28.

Rumesponde ang mga tauhan ng Philippine Coast Guard (PCG) Sub-Station at Special Operations Unit-Aklan sa tumaob na “Fantastrip Noel” dakong alas-11:46 ng umaga.

Ayon sa PCG, habang umaangkla, sinalpok ng malalaking alon ang “Fantastrip Noel” kaya kinailangan itong i-tow sa dagat ng kapatid na motor banca na “Fanstrip Nikki”.

Sa kasamaang-palad, naputol ang nag-uugnay sa dalawa na lubid kaya naiwan sa baybayin ang “Fanstrip Noel” kung saan ito tumaob.

Nasagip ang sampung pasahero at tatlong crew member na sakay nito at nasa maayos na kondisyon.

World No. 6 Greek netter, papalo kontra Pinoys

Posted on: March 2nd, 2020 by @peoplesbalita No Comments

MAKATITIKIM ang Pilipinas ng world-class tennis kapag sinagupa si world No. 6 Stefanos Tsitsipas at liyamadong Greece sa World Group II Davis Cup tie sa Marso 6 at 7 sa Philippine Columbian Association clay court sa Paco, Maynila.

Lalabanan ng mga Pilipinong netter si Tsitsipas at ang mga Greek matapos isagawa ng Davis Cup organizers ang bagong format na nagbigay daan para maitakda na non-Asian ang kalaban sa unang pagkakatoan sapul na makahampasan ang Swedes sa 1991 World Cup qualifier.

“We’re looking forward to a really tough duel but we’ll try to use the experience to toughen up the team,” pahayag ni PH non-playing captain Chris Cuarto.

Bubuo sa PH squad sina Francis Casey Alcantara-Jeson Patrombon tandem, Alberto Lim Jr., Eric Olivarez Jr. at Fil-Am Ruben Gonzales.

Ang magkapatid na Tsitsipas kasapa ang nakababatang si Petros, at sina Michail Pervolarakis at Markos Kalovenolis ang ibang miyembro ng dayuhang koponan kung saan si Dimitris Chatzinikolaou ang skipper.

Pero nakatutok ang lahat sa talento ni Tsitsipas na inaasahang magbibigay problema sa mga Pinoy.

“He’s not the No. 6 player in the world if he isn’t great,” sabi ni Cuarto.

Nakaabot na rin ang Greek netter sa No. 5 ng Association of Tennis Professionals rankings, ang pinakabatang nasa top 10 sa edad lang na 21-anyos.

Bitbit din ni Tsitsipas ang tagumpay sa 2020 Open 13 Provence sa Marseille, France sa nakaraang linggo sa ikalima niyang ATP title at kasalukuyang kalahok sa Dubai Duty Free Championships.

Base bagong format, may 12 home-and-away ties para sa World Group II kasabay ang mga laro sa World Qualifiers at World Group I playoffs.

Ang top 12 sa World Group II playoffs ang mga uusad sa World Group II ties sa Setyembre kasama ang mga natalong bansa mula sa World Group I.

Ang matatalo sa laro ng ‘Pinas at Greece ang mahuhulog sa Regional Group III na nakatakda sa Hunyo o Setyembre. (REC)

DavOro nagpasaklolo sa PSC

Posted on: March 2nd, 2020 by @peoplesbalita No Comments

NAGPAPAAYUDA ang Davao de Oro sa Philippine Sports Commission (PSC) partikular kay Chairman William I. Ramirez para sa pagho-host ng Davao Region Athletic Association (DAVRAA) Meet 2020 na na-reset sa Abril 1-7 sa Municipality of Montevista.

Sinadya ni Davao de Oro provincial sports coordinator Miles Atugan, kasama ang sports coordinators ng iba’t ibang siyudad, munisipyo at bayan sa pagbisita sa PSC chief sa Maynila.

“Chairman, Gov. (Jayvee Tyrone) Uy wants PSC’s help to train our coaches and athletes to improve our Davraaa Meet ranking since we are this year’s host,” ani Atugan, sa pagpapaliwanag na pumanbgsiyam lang ang probinsiya sa 2019 regional meet.

Sumagot naman si Ramirez kay Atugan na iprayoridad ang medal-rich sports kumpara sa mga popular ball game.
Nangako rin ang PSC chief na magpapadala ng coaches at trainers sa basketball, volleyball, football, boxing, swimming, athletics, table tennis, archery, taekwondo, at arnis, na ilan lang sa programa nito para maisagawa ang coaches’ education at sports clinics para sa DAVRAA-bound Davao de Oro athletes ngayong Marso.

“Leadership is important to succeed in sports. If there is no leadership, nothing will prosper. Coach leadership, discipline and character are vital in producing competitive and champion athletes,” panapos na pahayag ni Ramirez. (REC)

‘Pastillas’ scheme ng BI, nag-ugat sa kasakiman, kurapsyon – Sen. Lacson

Posted on: March 2nd, 2020 by @peoplesbalita No Comments

NAG-UGAT sa kasakiman at korupsyon at hindi sa kakulangan ng benepisyo ang “pastillas” scheme kung saan dawit ang ilang opisyal mula sa Bureau of Immigration, ayon kay Senador Panfilo.

“Suspension or termination of overtime pay and non-inclusion in the salary hike of other government employees should never be a reason for corrupt BI personnel to justify the illegal acts they commit to augment their income. That is crap, and I am not buying it,” ani Lacson.

“While the Bureau of Immigration’s reshuffle of its airport personnel may be a step in the right direction, it will have little success if it does not eradicate greed and corruption,” dagdag pa niya.

Iniutos na ni Immigration Commissioner Jaime Morente ang balasahan ng lahat ng mga tauhang naka-assign sa Terminal 1 hanggang 3 ng Ninoy Aquino International Airport (NAIA) sa gitna ng imbestigasyon sa suhulang nagaganap.

Mula sa isang sikat na Pinoy dessert na “pastillas” ang modus dahil nakarolyo umano sa bond paper ang perang natatangap ng mga tauhan ng BI.

Sa isang Senate hearing, sinabi ng whistleblower na si Allison Chiong, isang Immigration Officer 1, na nagsimula ang scheme nang tanggalin ang overtime pay para sa mga opisyal ng BI noong 2012.

“To cope with the substantial deduction of their salaries, some immigration officers decided to officer VIP services for immigrants who are casino high-rollers. This VIP service involved immigration officers accepting P2,000 for each high rollers in exchange for the latter’s convenient and seamless immigration,” ani Chiong.

Makailang-ulit nang sinabi ni Lacson na hindi dapat gumawa ng anumang corrupt practices, anumang hirap ang maka-engkuwentro nila sa kanilang trabaho.

“Noong pumasok kami bilang mga kawani ng gobyerno, alam naman namin ang mga limitations, even sacrifices, as well as the benefits that go with being in public service. But even the so-called benefits are governed by rules and regulations, and should not put us above our counterparts in the private sector,” giit pa ng senador.

52 opisyal ng PNP-CSG sinibak dahil sa malpractice

Posted on: March 2nd, 2020 by @peoplesbalita No Comments

NAGSAGAWA ng balasahan ang Philippine National Police-Civil Security Group (PNP-CSG) at inalis sa puwesto ang 52 nilang opisyal dahil umano sa “malpractice.”

Ayon kay CSG Director Police Major General Roberto Fajardo, kabilang sa kanyang sinibak ang 30 police commissioned officer na may pinakamataas na ranggong police colonel, 17 non-commissioned officer at 5 non-uniformed personnel.

Ayon kay Fajardo, dismayado umano siya dahil sa patuloy na nakakatanggap ng report hinggil sa malpractice ng kanyang mga tauhan.

“This is to enhance CSG frontline services due to report of malpractices and over familiarity of stakeholders. This is to expedite transaction of firearms, security guard licenses, license to operate and other permits”, hayag ni Fajardo.
Mariin din nitong binigyang-babala ang kanyang mga tauhan na sisibakin sa puwesto, bukod pa sa mga isasampang kasong kriminal at administratibo, kapag sumuway sa no-take policy na pinatutupad ng PNP.

Samantala, patuloy naman ang ginagawang review at evaluation ng performance ng mga regional chief kasabay ng kautusan sa mga ito na magkaroon ng coordination sa pulisya matapos ang nationwide crackdown sa lahat ng hindi awtorisadong ahente at iba pang tiwaling security agency.

Matatandaang nitong naka-raang Nobyembre 2019 ay 40 pulis din ang sinibak ng PNP-CSG dahil din sa malpractice at korapsyon habang noon ding Oktubre ng parehas na taon ay 27 CSG police official din ang sinibak ni Fajardo dahil din umano sa korapsyon.

Pope Francis, 2-araw nang may sakit

Posted on: March 2nd, 2020 by @peoplesbalita No Comments

KINANSELA ni Pope Francis ang lakad niya noong Pebrero 28 dahil sa masama umano ang kanyang pakiramdam.

Ayon sa The Vatican, may ubo at sipon ang 83-anyos na Santo Papa.

Noong Huwebes, Pebrero 27 ay hindi rin natuloy ang kanyang misa kasama ang mga pari sa Roma.

Ang pagkakasakit ni Pope Francis ay isang araw lang makalipas niyang hindi magsuot ng face mask nang batiin at i-bless kanyang audience noong Ash Wednesday Mass.

Hindi naman kinumpirma ng Vatican kung na-test na may COVID-19 ang Santo Papa.

Nagtatrabaho raw ito sa kanyang bahay.

Hindi umano ugali ng Santo Papa na magkansela ng mga appointment sa kanyang busy schedule, ayon sa Asia Times.

Buntis na mga batang ina, lumobo – PopCom

Posted on: March 2nd, 2020 by @peoplesbalita No Comments

NAALARMA ang Commission on Population and Development (PopCom) sa patuloy na pagdami ng mga kabataan na nabubuntis sa murang edad pa lamang.

Ayon kay USec. Juan Antonio Perez III, Executive Director ng PopCom, sa kasalukuyan ay nasa edad 10 – 14 taong gulang ang nabubuntis na mga kabataan dahil na rin sa kakulangan ng edukasyon at pangangalaga ng magulang.
Lumabas sa datos ng Philippine Statistics Authority (PSA) na noong 2017 ay nasa 1,958 ang kabataan na nabuntis at umabot pa ng 2,250 sa kasunod na taon.

Kaya naman itinutulak nila ang emergency bill sa mga mambabatas na ipasa na ang Teenage Pregnancy Prevention Bill. Kaya naman hihingi na sila ng saklolo kay Pangulong Rodrigo Duterte na mapabilis na ang Teenage Pregnancy Bill dahil sa ngayon ay nasa 108-million na ang populasyon ng bansa.

Inihalintulad pa ng PopCom ang populasyon ng Thailand na nasa 34 million at ang Pilipinas ay nasa 35 million ngunit ngayon ay nasa 68 million lamang ang populasyon ng Thailand at halos nagdoble ang dami ng Pilipinas
Dagdag pa nito na kailangang maprayoridad na ang teenage pregnancy bill na maging batas para makatulong na mapigilan ang paglobo ng populasyon ng bansa at ganon na rin sa ekonomiya.

Aktibidad sa buwan ng pag-iwas sa sunog, handa ang Bulacan PDRRMO

Posted on: March 2nd, 2020 by @peoplesbalita No Comments

LUNGSOD NG MALOLOS – Handa na ang Pamahalaang Panlalawigan ng Bulacan sa pamamagitan ng Provincial Disaster Risk Reduction and Management Office (PDRRMO) sa pag-obserba sa Buwan ng Pag-Iwas sa Sunog ngayong Marso na may temang “MATUTO KA! Sunog Iwasan Na!”.

Magsisimula ang nasabing kampanya kontra sunog sa pamamagitan ng sabayang motorcade sa tatlong siyudad at 21 bayan ng Bulacan sa Marso 1 na lalahukan ng Bureau of Fire Protection-Bulacan kasama ang kani-kanilang DRRMOs at rescue team ng mga lokal na pamahalaan.

Gayundin, magsasagawa sa buong lalawigan ng malawakang ‘information and education campaign’ at ‘fire safety inspection’ sa Marso 1-31 sa Pamahalaang Panlalawigan ng Bulacan.

Sa Marso 2, pangungunahan ng PDRRMO ang paglulunsad ng Fire Prevention Month kaalinsabay ng Lingguhang Pagtataas ng Watawat sa Bulacan Capitol Gymnasium sa lungsod na ito sa ganap na ika-8:00 ng umaga.

Kabilang sa iba pang nakalinyang gawain ang PGB Safety Marshalls Meeting sa Marso 4, ala-1:00 ng hapon; PPHO Staff Lactation Management & Gender and Development (GAD) DRR Orientation sa Marso 5 at 6, alas-8:00 ng umaga hanggang alas-5:00 ng hapon na parehong idaraos sa PDRRMO Training Room; TESDA Employees and Students’ Nationwide Simultaneous Earthquake Drill (NSED) sa Marso 12, alas-2:00 ng hapon sa TESDA Guiguinto; PGB’s Fire Orientation sa Marso 13 at 17 sa mga tanggapan at ospital ng Pamahalaang Panlalawigan ng Bulacan; pagsasagawa ng Earthquake and Fire Orientation sa Marso 14, alas-9:00 ng umaga para sa mga empleyado ng Redeemer’s Glory Christian Church at Child Development Center sa Brgy. San Isidro, Hagonoy; Basic Aquatic/Surface and Swift Water Search and Rescue Training sa Marso 19-22, alas-8:00 ng umaga hanggang alas-5:00 ng hapon para sa mga manggagawa sa barangay ng Pulilan; Operation Center Emergency Training/Drill sa Marso 26, alas-8:00 ng umaga para sa mga tauhan ng C4 (Communication, Control and Command Center) na gaganapin sa PDRRMO Operation Center; at Blood Donation sa Marso 31, alas-8:00 ng umaga sa PDRRMO Training Room para sa mga rumeresponde mula sa mga LGU at NGO.

Para sa iba pang impormasyon, maaaring tumawag sa PDRRMO emergency hotline (044) 791 0566 o sa pamamagitan ng kanilang facebook account sa PDRRMC Bulacan Rescue at Twitter @PDRRMC Bulacan. (Bishop Jesus “Jemba” M. Basco)

571 COVID-19 case kada araw sa SoKor, kinumpirma

Posted on: March 2nd, 2020 by @peoplesbalita No Comments

KADA araw ay nakakapagtala ng aabot sa 571 kaso ng coronavirus disease (COVID-19), ayon sa South Korean Centers for Disease Control and Prevention.

Ang 571 cases ay kinumpirma ng SoKor nitong Biyernes (February 28) ng hapon, kabilang na ang 256 kaso na inanunsiyo ng umaga sa parehong petsa.

Dahil dito ay nakapagtala ng national total na 2,337 cases, na sinasabing pinakamalaki at pinakamalawak na ‘outbreak’ sa labas ng mainland China.

Sa report, ang nasabing numero ng mga kaso na kinumpirma ay mas mataas ng 67 kumpara nitong Huwebes na nakapagtala lamang ng 505 cases.

Batay sa huling tala, ang tinamaan ng outbreak ay kinabibilangan ng isang military personnel, dahilan upang umabot sa total na 26 ang nakumpirmang kaso sa South Korean military.

Wala pa namang napaulat na namatay kaya nanatili sa bilang na 13 ang naitalang national death toll.

Nabatid na sa 571 bagong kaso, 447 ay mula sa Daegu, kung saan naka-concentrate o epicenter ng outbreak.
Karamihan sa naitalang mga kaso ay naka-link sa religious group sa lungsod.

P45M insentibo binigay, inani ng SEAG coaches

Posted on: March 2nd, 2020 by @peoplesbalita No Comments

SINIMULAN na ng Philippine Sports Commission (PSC) ang pamimigay ng tseke mula sa inilaang halos P45 milyon cash incentives para sa 182 national coaches matapos masungkit ng Team Philippines ang overall championship sa 30th Southeast Asian Games.

Batay sa ilalim ng probisyon ng Republic Act No. 10699 o mas kilala bilang National Athletes and Coaches Benefits and Incentives Act, ang national coaches na may gold medal ay tatanggang ng P150K; silver medal P75K; habang sa bronze, P30K sa SEA Games level.

“The incentives for the coaches shall be equivalent to fifty percent (50%) of the cash incentives for gold, silver and bronze medalists. In case of more than one (1) coach, the cash incentives shall be divided among themselves,” ayon pa sa batas.

Ang computation ng cash incentives ay base sa pagsusumite ng certification requirements at profile na ibinigay ng mga national sports associations at mismong mga medallist-athlete sa PSC.

“A coach can only receive his/her incentives upon submission of required certifications and documents,” sabi ni PSC-NSA Affairs Office Head Annie Ruiz.

Ang mga national coach ng arnis, athletics, beach handball, billiards, bowling, boxing, cycling, dancesports, gymnastics, jiu-jitsu, kickboxing, modern pentathlon, muay, pencak silat, rowing, sailing, sambo, sepak takraw, soft tennis, soft tennis, softball, squash, taekwondo, tennis, weightlifting, windsurfing at wrestling ang unang batch na mga makakakuha ng insentibo.

Ang sunod na batch ng coaches na nakatakdang makakuha ng pabuya ay ang archery, baseball, canoe, fencing, judo, lawn bowls, obstacle course, swimming, traditional boat race at volleyball.

Kinuha ang pondo para sa insentibo sa National Sports Development Fund (NSDF) na ibinibigay ng Philippine Amusement and Gaming Corporation (PAGCOR) alinsunod sa RA 10699.